مارو_العاب الرحمه"للكاتبه/لينا بسيوني
الفصل الاول بعنوان" سحر فرعوني"
كنت قاعد علي مكتب ابويا اللي في الكهف وبقرأ في كتب السحر اللي ورثها عن اجداده، خالتي سندس قربت عليا وفي ايديها طبق رز بلبن،حطته قدامي علي المكتب، طبطبت علي كتفي وهي بتقول بحنيه:
_كل يا مارو يا بغل.
رديت:
_تسلميلي يا خاله سندس.. بس دة طبق واحد!!
قالت:
_ عمك حنوش مراحش السوق بقاله جمعتين، فعملت علي اد النشا اللي موجود في الكهف، المرة الجايه هعملك حله كبيبرة لوحدك.
نورا اختي خطفت الطبق من ايدى وهي بتقول:
_ من اول ماجيت يا مارو وانا مش عارفه اكل لقمه، التلاجه علي طوال فاضيه يا مارو يا بغل.
لسه هخطف الطبق من نوار، باب الكهف انفتح من بره ودخل ابويا مع نصير وحنوش، وسلم علينا وقال:
_ازيك يا نورا.... ازيك يا سندس؟!!
وبصلي وقالي:
_ ازيك يا مارو يا بغل؟!!
رديت وانا مبتسم:
_الحمدلله ازيك يا والدى؟!
قالي وهو بيحذرني بصوباعه:
اوعي تكون بتعلم البت نورا السحر!!
قولتله:
ابدا والله....انا قفلت الموضوع دة من بعد ما كانت هتولع في الكهف اخر مرة.
نورا قالت:
والله ما كان قصدى، كل حاجه كانت ماشيه فل بس اخر كلمتين في التعزيمه نطقتهم غلط فولعوا الدنيا.
ابويا قالها وهو قالب وشه:
والله يا نورا لو مابطلتي تلعبي في السحر لانفخك يابنت الدرويشه!!
مردتش عليه، فشخط فيها وقال:
فاهمه يابت!!؟
حاطت راسها في الارض وقالت:
فاهمه يابابا!!
وخدت نفسها وراحت علي اوضتها وفي ايدها طبق الرز بالبن بتاعي
ناديت عليها لكن ماردتش عليا وكملت مشي ناحيه اوضتها،
اه صح نسيت اقوالكم ان اهلي بيدلعوني يا مارو البغل عشان جسمي اكبر من سني وعشان هجين زى حيوان البغل..
"مارو_العاب الرحمه"
الكاتبه/لينا بسيوني
تكمله الفصل الاول"سحر فرعوني"
حنوش قرب عليا وانا قاعد علي المكتب حط ايده علي كتفي وقال:
عامل ايه يا بغل؟!!
رديت:
تمام الحمدلله.
حنوس سالني بفضول:
بتقرأ في ايه!!؟
قلتله:
سحر الفراعنه.
قالى:
سحر الفراعنه مرة واحدة!! بس دة صعب جدا!!
قولتله:
ولا صعب ولا حاجه، طلاسم وتعاويذ وتعزيمات برضه، نفس الفكرة!
قال بأستهزاء:
ياسلام! يعني تقدر تمارس السحر الفرعوني؟!
رديت بثقه:
اها طبعا!
سألني بتحدى:
تقدر توهم عفريت الجن مثلا؟!
قولتله:
دى اسهل حاجه!
فقال:
ورين.........
قطع كلامه لما لقي حد بيخبط علي كتفه من ورا، بص وراه لقاني واقف وراه وفي نفس الوقت قاعد قدامه علي كرسي المكتب.
اللي وراه واللي قدامه سألوه بصوت واحد:
ايه رايك؟!!!
مردش علينا احنا الاتنين وراح قعد جمب ابويا علي طبليه الاكل.
سيبتهم وروحت ناحيه اوضه نورا علشان اطمن عليها وعلي طبق الرز بالبن بتاعي،
فلقيتها قاعدة علي المكتب اللي في اوضتها بتقرا في كتاب شرح اللغات القديمه، اول لم حسيت بيا خبت الكتاب وطلعت كتاب حساب، قولتلها وانا بدور بعيني علي طبق الرز بالبن:
ايه يا نوشه...... مقعدتيش ليه مع عمك حنوش حبيبك!!
انت بتدور علي حاجه!!؟
قولتلها وعيني بتلف في الاوضه:
لا ابدا... خالص... انا بس بطمن عليكي.
قالتلي بدون مقدمات:
كنت سامعاك بتتكلم مع عمو حنوش عن سحر الفراعنه.
قولتلها:
واكيد برضه سمعتي ابويا وهو بيحذرني ما اتكلمش معاكي في السحر، انتي متهورة يا نوشه، مش كفايه انك طلعتي عدوة ابوكي قائدة جيش الشياطين من بيبر برهوت ولولا ستر ربنا كان زمان ابوكي ميت، دة غير التعزيمه اللي رميتيها علي الصرصار اياه فاكراه؟!
استعبطت وقالت وهي بتهرش في راسها:
صرصار؟! لاء مش فاكرة!
قولتلها:
الصرصار اللي رميتي عليه تعزيمه غلط وبقي حجم الجمل ومعرفناش نرجعه لحجمه الطبيعي ولا نقتله وعمك حنوش نقل خزان مبيدات حشرية للكهف علشان نعرف نموته!.. طب مش فاكرة خالتي سندس اللي اتفزعت لما شافته وكانت هتروح فيها لولا لحقناها بطاسه الخضه!!
ردت وهي بتدافع عن نفسها:
والله كان قصظى اصغره مش اكبره والتعز........
قطعت كلامها وقلت:
فكك يا نوشة.. لما تكبرى وتعقلي هنبقي نشوف حوار السحر ده.. خلينا في المهم.. فين طبق الرز بالبن بتاعي؟! مش شايفه!
فتحت درج المكتب وطلعت الطبق بالمعلقه، حطته قدامها علي المكتب ومسكت المعلقه وبدأت تاكل.
قولتلها:
نوشة!!
مردتش عليا.
فقولتلها وانا ببلع ريقي:
سيبلي حبه في الاخر.
بصتلي بقرف ومردتش عليا، فقولتلها:
نوشه!!
قالتلي:
هديك الطبق كله بس بشرط.
قولتلها:
انسي يا نوشة..... مش هعلمك سحر تاني ولو علي جثتي.
قالتلي:
براحتك.
ورفعت المعلقه ونزلت علي طبق الرز باللبن وخلصته في اقل من دقيقه، المعلقه كانت بتحك في الطبق كانها بتستغيث.
خلصت الطبق، اديتهولي فاضي وقالتلي:
ابقي حطه علي حوض المطبخ وانت خارج!
خدت الطبق الممسوح وخرجت برة اوضتها، حطتيه علي الحوض وروحت قعدت مع ابويا ونصير وحنوش.
خالتي سندس كانت بتجهز الطبليه علشان نتلم كلنا انس وجن وناكل مع بعض زى ما اتعودنا، اتلمينا كلنا وقعدنا حوالين الطبليه، خالتي سندس نادت علي نوشة علشان تيجي تاكل فماردتش عليها،راحت ناحيه اوضتها وجات جرى وهي بتقولنا:
البت نورا مش في الاوضه!!!!!!
اويا نط من مكانه وجرى علي اوضتها، دور عليها مالقهاش، حنوش قالهم:
ماتقلقوش ياجماعه، ما انتو عارفين نو.......
مكملش كلامه لما حسينا كلنا بهزة قويه في الكهف وبعدها الدنيا ضلمت كحل.
سمعت صوت حنوش بيوشوش نفسه وبيقول:
يارب ما يطلع اللي في بالي!!
ورفع صوته وقالنا:
متقلقوش يا جماعه... دة اكيد زلزال!
ابويا مشي في الضلمه وراح ناحيه باب الكهف وفتحه، فنور النهار دخل
خالتي سندي سألت بأستغراب:
هو النهار طلع امتي!! هو احنا مش المفروض في نص الليل؟!
جرينا كلنا برة الكهف، لقينا نورا واقفه قدام الكهف متنحه وفي ايدها بقايا ورقه محروقه، بتبص عليها باستغراب وهي بتكلم نفسها.
بصينا حوالينا لقينا التضاريس اللي حوالين الكهف اختلفت تماما، التبه اللي قدام الكهف اختفت والاشجار مش موجودة، مفيش اي حاجه حوالين الكهف غير رمله، صحراء وبس.
خالتي سندس راحت جابت نورا من شعرها وسالتها:
هببتي ايه يابت:؟! انطقي؟!
نورا ردت وهي بتحاول تسلك ايد خالتي سندس من شعرها:
أبويا قرب عليها وقالها:
انتي عملتي ايه يابنت الهبله؟!.. لا مؤاخذه يا سندس!!
نورا قالت بتهته:
انااااا.. انااااااايه... انااااااا مين.. اناا معملتش.. احنافين؟!!
ابويا قالها وهو متعصب:
بت.. بطلي استعباط.. ايه اللي طلع النهار في عز الليل.. وفين التبه وفين الشجر، فين البلد؟!! عملتي ايه في البلد يا شقايا علي الارض؟!
قالت:
انا معملتش حاجه انااا، انا اهو.. انا اهو.. انا اهو.
نصير دخل في الكلام وقالها:
قمر 14 اهو.. عملتي فينا ايه يا نوشه؟! قلبي مش مرتاح!
نوشة مردتش عليهم وبصتلي باستعطاف عشان ادافع عنها، قلتلهم وانا ببص علي الرمل اللي مغطي المنطقه:
تقريبا يا جماعه نوشه نقلتنا معاها بالزمن، بس ازاي معرفش!!
ابويا زق سندس اللي ماسكه شعر نوشه وقالها:
عنك انتي يا سندس.
ومسك نوشة من شعرها فصرحت بقوة، قالها وعينه بتطق شرار:
قسما بالله لو ماحكتيش االي حصل بالتفصيل لارجع بيكي بالزمن لعصور الجاهليه واوادك زى ما كانوا بيوادوا البنات.
وشخط فيها وقال:
انطقي يابت!!
قالت وايديها بتترعش:
انا.. انا كنت بقرأ في.. في.. برديه فرعوني.. لقيتها في الكهف برديه عاديه والله مش بتاعت سحر ولا حاجه.. تقريبا كان فيها.. فيها.. معايدة او تهنئه وكلام كدا تاني مفهمتوش.
ابويا قالها وعينه بتطق شرار:
يعني مش عارفه انتي قريتي ايه؟! وبتقرى في برديات سحر فرعوني اصليه؟! اللي ابوكي نفسه مبيعرفش يقراها.. قريتيها ازاي يابت؟!
قالت:
فكيت رموز البرديه من كتاب لقيته في الكهف.
قالها باستهزاء وهو بيسقف:
مشالله عليكي.. شامبليون
نصير سال:
ايوة يعني احنا فين دلوقتي؟!!
ابويا قاله:
ايه يا نصير انت نسيت انك جني!! روح اطقس واعرفلنا احنا امتي وفين!
نصير اختفي، غاب شويه وبعدين رجع وهو متوتر.
كلنا قولناله بلهفه:
هاااااا.
قالنا مش عارف اجيبهالكم ازاي.. انا رحت لاقرب حته فيها عمار ولقيت الناس بيتكلموا لغه غريبه....
ابويا قطع كلام نصير وقاله:
يا باي عليك يا نصير، انجز في الكلام!!
نصير بص لنوشه وقالنا وهو بيهرش في راسه:
مش عارف اجيبالكم ازاي... نوشه نقلتنا عصر الفراعنه!!
يتبـــــع.
