روايات حديثة

رواية مجدي صفيحة والعشرين حرامي كاملة بقلم لينا بسيوني


 


رواي
ة مجدى صفيحه والعشرين حرامى

للكاتبه/لينا بسيوني
الفصل الأول بعنوان"احذر النشالين"
انا مجدى صفيحه وبشتغل فى كل أنواع السرقه والنصب ..
أنا ولا فخر أحسن حرامى فى الوطن العربى كله .. بفتح أى نوع خزنه فى أقل من دقيقه
نشال درجه أولى وأتحداك لو حسيت بأيدى فى جيبك ... مش عايز أقولك أنى أقدر أسرق هدومك الداخليه .
أى بيت أقدر أعرف مداخله ومخارجه وعدد الغرف اللى فيه بمجرد بس ما

أبص عليه من بره ومن غير ماأدخله
بمجرد ما أعد عواميده من بره.
دماغى صاحيه وشغاله , وبحب التعليم بالرغم من أن أبويا طلعنى من المدرسه من وأنا فى أبتدائى .
كان شايف أنى بضيع وقتى وان المستقبل فى السرقه
أها أبويا هو اللى علمنى السرقه واللى أتعلمها من جدى .. واللى أتعلمها من جدود جدوده .. السرقه وسر صنعتها فى عيلتنا بالوراثه
وأنا صغير أبويا كان بياخدنى معاه المسجد كل جمعه ومش أى مسجد.. بيودينى المساجد اللى فى الأماكن الراقيه ..
كنت أقعد جمبه أسمع الخطبه ولما يقيموا الصلاه والناس تترص جمب بعضها
أطلع ألم كل الجزم الماركات اللى بره الجامع ,واروح بيتنا على ما أبويا يخلص صلاة الجمعه ويحصلنى !!
علمنى سر النشل أزاى القط المحفظه لو فى الحفره ( جيب الجاكته اللى فى الجنب )
أو لو فى البلهاء ( الجيوب الجانبيه للبنطلون ) .
أيدى لازم تبقى خفيفه , وفى وسط الزحمه أخبط الزبون خبطه خفيفه على كوعه الشمال .. الحركه دى بتصرفه عن ايدى التانيه اللى قلبت جيبه من شويه .
علمنى أبويا أزاى اختار زبونى وأن النشل لازم يكون فى الزحمه ..
يوم قبض الموظفين نقف معاهم طابور قدام مكنة الفلوس علشان نقبض أحنا كمان ... الزبون كان يسحب الفلوس من المكنه ويحطها فى جيبى بدل مايحطها فى جيبه .
ورثنى اليافطه الخشب اللى بتخش فى بعضها عاشق معشوق ... ودى بقى بنفلتر بيها الزباين اللى خارجين من محطات القطر والمترو والاتوبيس .
اليافطه الخشب عباره عن يافطه بنحطها قدام محطة الاتوبيس مثلا , اليافطه مكتوب عليها ( أحذر النشالين ).


أى حد بيشوف اليافطه .. بيحط أيده لا أراديا على جيبه علشان يتأكد أنه متنشلش ... أحنا بقى بنراقب الناس وهى بتحسس على جيوبهم .. ونقلبهم !!
الحركه دى بتسهلنا كتير لاننا بنعرف على طول الجيب اللى الزبون حاطط فيه الفلوس أو الموبايل !!!
وبنراقب رد فعل الناس اللى بتشوف اليافطه .. اللى بيتلهوج ويحط أيده بسرعه على جيبه .. بيقى جيبه مليان وخايف يتنشل.. زبون معبى و بيشم نفسه لما يتمم على المحفظه اللى فى جيبه ميعرفش ياولداه أنه دلنا على مكان الفلوس ووقع فى الفخ .
طبعا مش محتاج أقولك أنى اللى بيشوف اليافطه ويكمل عادى .. ده فى جيبه خمسه مكرمشه وأتنين جنيه ورق متهرولين ونص جنيه فضه لونه أخضر من العفن !!
علمنى أبويا الحاج علاء أزاى أفتح الخزن
أول خزنه فتحتها كانت وأنا عمرى 12 سنه وكانت خزنه ديجتال ..
الخزن انواعها كتيره فيه الديجتال وفيه خزن بمفتاح وفيه بمفتاحين وفيه

المصفحه واللى ضد الحرق ... وفيه اللى بتضرب أنذار لما حد يخبط عليها أو لما تدخل رقم غلط وكلهم بعرف أفتحهم ...
فيه اللى بفتحها بمغناطيس قوى فى حجم الصابونه بسقطه فى شراب وأحطه بالشراب فوق القفل بالظبط..
الخزن اللى بتتفتح بالمغناطيس السنون بتاعتها قفلها بيبقى صينى وبتبقى مصنوعه من النيكل وبيتجذب للمغناطيس القوى وببيتفتح بسهوله !!!!
هتقولى ايه لازمة الشراب هقولك عشان لو حطيت المغناطيس من غير الشراب مش هعرفه اشده بعد ما افتح الخزنة عشان بيبقى لازق جدا فى الخزنة !!
وفيه اللى بفتحها بكلمة المرور الفائقه وده باسورد لو حطيته تقريبا فى نص الخزن اللى فى مصر هتفتح ... ولو حطيته فى 90 % من الخزن المصريه اللى فى الفنادق هتفتح ... الباسورد 888888
أسهل خزن بفتحها الخزن الديجيتال .... بفتحها برقبة شماعه بس تكون حديد ... شماعه من اللى بنعلق عليها الهدوم!!!
الخزنه الديجتال بيبقى ليها ارقام وفوق الارقام 3 لمبات صغيرين بيدوا ضوء أخضر لما تحط الرقم السرى صح وبعدها تفتح الخزنه .
واما بقى لما بتحط الرقم غلط ال 3 لمبات دول بيدولك ضوء أحمر والخزنه تقفش منك!!!
الخزن دى طبعا بتبقى من الحديد . ومتثبته فى الجدار ومش هتعرف تحركها من مكانها ....
السؤال ده ليك أنت ... أيه هى نقطة الضعف اللى فى هيكل الخزنه !!؟
فكر شويه قبل ما أقولك
معرفتش !!؟ ... هقولك
ال3 لمبات الصغيرين اللى بيدوا أضاءه ...


دول من الازاز عادى وممكن يتكسروا ..
هتكسر اول لمبه واللى جمب القفل بمفك يكون سنه رفيع زى الابره !!!
وبكده تكون عملت خرم جمب القفل بالَضبط هتدخل رقبة الشماعه الحديد من الخرم .. هتلاقى القفل عامل زى الشنكل بتاع الباب .. هترفع اللسان ... هتفتحتلك الخزنه وتاخدك بالحضن !!
الخزن عشقى ومنها خدت أسم شهرتى " صفيحه " علشان بحمد الله وبعونه مفيش صفيحة خزنه وقفت قصادى ... كل الخزن فتحتلى دراعتها وخدتنى بالحضن
قررت أتخصص فيها خاصة بعد ماقعدت مع نفسى و لقتنى حرامى عره ومعنديش أخلاق ... بسرق من الناس الغلابه .
وقررت أبقى حرامى نضيف وارقى نفسى من النشل فى الاتوبيسات , لسرقة الناس الاغنيه اللى عايشين فى قصور وفلل
.بس المشكله كانت في حاجه واحده بس !!
تعرف المثل اللى بيقول :
قيراط حظ ولا فدان شطاره ...
أهو ده أتعمل مخصوص علشانى ... أنا حرامى شاطر أوى وطموح بس مشكلتى فى حظى النحس وبختى المصدى واللى هحكيلك عنه نبذات صغيره .
خططت مره لسرقة فيلا صاحبها جواهرجى كبير ... وفضلت لابد قدام الفيلا بتاعته شهرين كاملين براقبه
لحد مافى يوم لقيته واخد مراته وعياله وشكلهم كانوا رايحين مصيف ،والفيلا هتفضى .. ..مقشره خالص أهى .
فى نفس الليله بليل نطيت فى الفيلا ودورت على الخزنه ولقيتها فى المكتب بتاعه .
كانت خزنه بقرص دائرى ... المحيط بتاع القرص بيبقى مرقم من فوق بداية من الصفر وبيزيد الرقم فى أتجاه عقارب الساعه ,وعلشان تفتح لازم يدخل الرقم السرى عن طريق لف القرص على الارقام بالترتيب .


اللى متعرفوش بقى ان القرص الدوار ده متصل بعمود جوه الخزنه.. وكل رقم ليه دوره واحده بس .. هبسطهالك
لو قدامك خزنه بقرص دائرى أول حاجه هتعملها هتلف القرص لفات كامله فى أتجاه عقارب الساعه .. ده علشان ترجع كل تروس القفل فى مكانها الطبيعى
لو أنت جديد فى الكار أنصحك تستخدم سماعه دكتور !!
علشان تسمع حركة التروس وأنت بتلف القرص براحه .
حتحط السماعه قريب أوى من القرص علشان تسمع القفل وهو بيكلمك !!
تبدأ تلف القرص براحه خالص فى عكس أتجاه عقارب الساعه وتسمع ... هسمع طقطقه ... فكك منها ركز على صوت النقر كأن ترس بيخش فى ترس . .. أعرف الارقام اللى بتسمع فيها النقر
.وعيد من تانى بس المره دى أبدأ من عند الارقام اللى سمعت عندها النقر وخدهم ورا بعضهم ... اللى بيحصل جوه الخزنه أن كل التروس بتترص جمب بعضها لفوق وبتتجهز للفتح .. أول ماتجهزها ...
لف البكره كلها لفه كامله و بسرعه .. هتفتحلك الخزنه وتاخدك بالحضن

زى مافتحتلى وجيت أخدها بالحضن لقيتها فاضيه !!!
ولقيت نور الاوضه بيتفتح وواحده عجوزه واقفه قدامى وبتكح جامد ونفسها طالع بالعافيه .. وبتشاورلى ألحقها !!!!
جريت عليها وقولتلها :
مالك يا ست .. فيه حاجه !!؟
قالتى بصوت خرج بالعافيه :
ألحقنى ... يابنى ... بخااخ الربو ... نفسى .
قولتها :
فين ياحاجه ؟!!
قالتلى وهى بتكح جامد:
مش ... فاكره ... يابنى
قعدتها على كرسى وجريت أدور على البخاخ فى الفيلا مالقتهوش خالص !!!
وبعدين الست بتموت !!!
جريت من الفيلا زى المجنون وفضلت أدور على صيدليه قريبه والحمد لله لقيت صيدليه .. الصيدلى سألنى عن نوع البخاخ معرفتش وقولتله يجيب من كل نوع واحد !!
خدت كيس مليان بخاخات وطلعت على الست العجوزه لقيتها بتخلص خالص ..
فتحت كيس البخاخات وقولتلها :
:
أى واحد فيهم!!!؟
شاورتلى على واحده .. حطيتها فى بوقها و فضلت أضغط عليها من فوق اكتر من مره
زاحت أيدى من كتر الاكسجين اللى دخل صدرها و خدت نفسها ورجعت تانى ...
قولتلها :
أيه ياأمى أنت كويسه دلوقتى !!؟


قالتلى :
أها يابنى كتر خيرك .. هو أنت حرامى !!.
قولتلها :
أها يا أمى .. بس والله الخزنه كانت فاضيه ومسرقتش حاجه .
قالتى :
صادق يابنى ... أصل صحاب الفيلا باعوها أمبارح ونقلوا حاجتهم لفيلا تانيه!!!! مفضلش غير حبة العفش دول وأنا !!
قولتلها وانا مصدوم :
وانتى مين ياحاجه !!؟
قالتى :
انا الخدامه ..وسابونى والله يابنى من غير حتى مايدونى شهريتى ... يرضيك الكلام ده يابنى .. عالم ضلاليه .. أجيب الدوا منين دلوقتى .. انا ست عيانه وصاحبة مرض ....
وفضلت تعيط وتتشحتف
فطبطبت عليها وقولتها :
معلش يا أمى .. ربنا يتولاكى ويتولانا برحمته .. دلوقتى أنا عايز 400 جنيه حق البخاخات
صوتها أتغير وقالتلى :
يابنى هو أنت أيه معندكش دم ... بقولك معييش فلوس ... مادونيش شهريتى
وفضلت تعيط !!!!


مديت ايدى علشان أخد باقى البخاخات اللى فى الكيس علشان أرجعها الصيدليه وأخد حقها
لسه أيدى بتلمس الكيس لقيتها ضربتنى على أيدى جامد
وقالتى :
بتعمل أيه !!!
قولتلها :
هاخد باقى البخاخات أرجعها .. مش أنتى فى أيدك بخاخ أهوه !!
قالتلى :
أمشى ياله من هنا بدل من أصوت والم الناس عليك .. أمشى !!
مشيت وأنا بقولها :
حار ونار فى صدر أهلك .
فى مره تانيه راقبت فيلا بتاعة اتنين عرسان فى التجمع ... لسه متجوزين ،راقبتهم من أول ما أشتروا الشبكه واللى كانت بالشئ الفلانى!!
راقبتهم 3 أشهر ، ولاحظت أن الزوج على طول بره البيت وأوقات بيبات يوم الاتنين فى الشغل
فحددت معاد السرقه يوم الاتنين وبليل خالص لما تكون مراته نايمه
نطيت فى الفيلا و دورت على الخزنه ولقيتها وكانت كمان ديجيتال .. طفشت الخزنه وفتحلتى دراعتها والمره دى كانت مليانه على أخرها فلوس وعلبه قطيفه فتحتها لقيت فيها خاتم الماظ .. تقريبا كان جايبه هديه لمراته .. فضيت الفلوس فى الشنطه اللى معايا .
وسيبت العلبه القطيفه والخاتم الالماظ علشان برده حرام أبوظ للراجل المفاجأه اللى عاملها لمراته .....
أتسحبت من الاوضه اللى كان فيها الخزنه ، وطلعت على أوضة النوم علشان أقلب الشبكه واللى جيت مخصوص علشانها .
فتحت الباب براحه ومديت راسى .. وياريتنى ما مديتها
وياريتنى كنت خدت الفلوس ومشيت !!
فوجئت بمشهد خلانى أتمسمرت فى مكانى!!!!
تعليقات



حجم الخط
+
16
-
تباعد السطور
+
2
-