روايات حديثة

رواية مارو " العاب الرحمة " الفصل الثاني




 مارو_العاب الرحمه"

الفصل التاني بعنوان"سمكه وكلب"
للكاتبه/لينا بسيوني
وقفنا فترة بنبص لبعض وبنحاول نستوعب اللي نصير قاله.
ابويا وخالتي سندس هجموا علي نوشه، فوقفت حاجز بينهم وبينها وانا بقول:
ثواني ياجماعه نفهم اللي حصل.
بصيت لنوشه وسالتها:
نوشه انتي نقلتينا ازاي؟!! قولي الصراحه انتي استخدمتي حذاء الجن؟!!
قالتلي وهي بتفكر:


بص انا بعد ما قريت البرديه اغمي عليا ومعرفش ايه اللي حصل بعدها، لقيت نفسي قدام الكهف.. ممكن اكون استخدمته؟!.. لا مستخدمتهوش..
حتي لو استخدمته كان مفروض انا بس اللي اتنقل مش انتو!!
سالتها:
فين البرديه اللي كنتي بتقراى فيها؟!
شاورتلي علي الارض.. علي الورقه المحروقه اللي كانت في ايدها.
حنوش دخل معايا في الحوار وسالها:
طب فاكرة الكلام اللي قراتيه في البرديه؟!
ردت وقالت:
مش فاكرة غير طشاش كده، بس البرديه كان فيها رسمه مميزة لو شفتها هعرفها.
حنوش سالها:
عبارة عن ايه الرسمه دى؟!!
ردت وهي بتفكر:
بص هو كان في واحدة لابسه تاج وواحد واقف وساند علي عصايه خشب... لا.. لا تقريبا كان ماسك تعبان.. لا بص مش فاكرة بالظبط بس لو شفتها هقولك هي دى.
حنوش بصلنا وقال:
شكلنا مطولين هنا!!
سالت نصير:
هو احنا فين بالظبط؟!
رد:
احنا يعتبر في الصحراء.. ومش عايز اقولكم ان في حرب قايمه جنبنا اصلا.
قولنا كلنا بصوت واحد:
حـــــــرب؟!!
نصير رد:



اها حرب اهليه علي الضيق كده، بين اقليمين، اقليم بيقدس سمكه اسمها القنومه.
واقليم تاني بيقدس الكلاب، اللي بيقدسوا الكلاب اكلوا السمكه فاللي بيقدسوا السمكه اعتبروها اهانه للاله بتاعهم وردوا عليهم واكلوا الكلاب، فقامت حرب بينهم!
فلتت ضحكه من نورا، فخالتي سندس ادتها بالقفا وهي بتقولها:
ليكي نفس تضحكي يا جلابه الخراب!!
ابويا قال لسندس:
سيبيها تضحك عليا النعمه لانفخها اصبري.
وبص لنصير وقاله:
طب انقلنا بقي يا نصير قبل ما الحرب تخش علينا!
انقلنا اي حته علي ما نشوف هنعمل ايه في الورطه دى.
نصير قال:
حاضر بس مش هينفع تتنقلوا كده، شكلكم هيبقي ملفت جدا وسط الناس،

ثانيه واحدة
اختفي وغاب شويه، رجع وهو لابس لبس فرعوني وفي ايدو كيس قماش، طلع منه لبس ووزعه علينا وهو بيقول:
البسوا الهدوم دى..
وبص لابويا وقاله:
طبعا انا معملتش حسابك، عارف انك مبتعلقش القميص السحرى لف بيه بقي وتخيل نفسك لابس زينا.
ابويا لف لفه كامله بالقميص، فشكل القميص اتغير تماما وبقي عبارة عن لبس فرعوني.
قولتله باعجاب:
الله عليك يا ولدى في الفرعوني، توت غنخ امون في نفسك!
حنوش سالنا:
طيب بالنسبه للغه هتتواصلوا مع الفراعنه ازاي؟!!! حد فيكم بيعرف يتكلم لغتهم؟!!
محدش رد عليه، فبصلي بتحدى وسالني:
البيه مارو بيعرف يتكلم هيروغليفي؟!
رديت وقلتله:
طشاش كده، اعرف بعض الكلمات ونطقها زى بول متمس واللي معناها فول مدمس عادى، ست يعني ست عادى، كحكح يعني راجل عجوز، نونو يعني عيل صغيرة، كاني وماني يعني لبن وعسل وتا بمعني دة.
خالتي سندس قالت:
بيتكلموا عربي زينا يعني!!!
حنوش قالها وهو بيتريق عليها:
اها بيتكلموا عربي مكسر!
بصلي وهو عايز يعلم عليا، قال:
يعني اخرك الكلمات اللي شبه العاميه المصريه!! اومال ايه بقي اللي بعرف في سحر الفرعوني!! وقسمتلي نفسك نصين وانت متعرفش اللغه اصلا.
قلتله:
الصراحه كنت لسه بتعلم ومحبتكش تعلم عليا!
قالي بفخر:
انا بتحدث اللغه بطلاقه ومش بس كده.. علشان انا عفريت طيب وابن حلال

هخليكم تفهموا اللغه.
اختفي شويه ورجع في ايده خمس صدفات صغيره، تمتم بتعزيمات، وهو بيشخشخ الصدفات في ايده، ناول لكل واحد صدفه وهو بيقول:
كل واحد منكم يحط صدفه في ودنه، انا رميت عليها تعزيمه هتخليها زى ترجمه جوجل كده، هتسمعوا بيها ترجمه فوريه لاي لغه...
نوشه كانت ماسكه الصدفه وهي مبهورة ولسه هتحطها في ودنها، ابويا خطفها من ايدها ورجعها تاني لحنوش وهو بيقولها:
انتي بذات هتمشي زى الاطرش في الزفه... ماشي يا نورا
لبسنا اللبس الفرعوني واتجهزنا عشان نتنقل كلنا، مسكنا في ايد بعض وغمضنا عنينا بعدها فتحنا عنينا واندهشنا من اللي شفناه...
تعليقات



حجم الخط
+
16
-
تباعد السطور
+
2
-