روايات حديثة

رواية عاقر (كاملة جميع الفصول)بقلم ايمان شلبي

 

رواية عاقر (كاملة جميع الفصول)بقلم ايمان شلبي




 رواية عاقر الفصل الاول



-انتي اتجننتي يابت عايزه تقنعي جوزك يتجوز عليكي ؟!




اتنهدت بحزن وانا بقعد علي طرف السرير:


-فكرك يعني سهل عليا اقوله كده 




ردت بغيظ :


-وليه تقوليله من اساسه !




عيوني لمعت بالدموع ورديت بنبره ممزوجه بوجع 




-عشان هو من حقه يبقي اب 




رفعت راسي وانا ببصلها بحزن:


-انا عمري ما هقدر اخليه يبقي اب 




قامت وقفت وهي بتقرب مني وبتمسك ايدي بشفقه 


-ياسمين حبيبتي كرم اخويا بيحبك ومش فارق معاه اي حد غيرك و.....




قاطعتها وانا بهز راسي بنفي:


-بس هو من جواه زعلان ونفسه يبقي اب زي اي بني آدم طبيعي 




















حتي مامتك وباباكي ياحنان ،هما اه قالولي اكتر من مره أن ده نصيب وإن هما مش زعلانين بس اكيد نفسهم يفرحوا ويشوفولهم حفيد 




ارجوكي ياحنان عشان خاطري ارجوكي اقنعيه يتجوز و....




-لا مش هقنعه استحاله اعمل كده 


-عشان خاطري يا حنان عشان خاطري لو بتحبيني اقنعيه 




ردت بعصبيه :


-انتي مجنونه رسمي بجد مفيش حد عاقل يعمل كده 


انتي ازاي اصلا تفكري في حاجه زي كده 


معني كده بقي انك مش بتحبي اخويا ومش بتغيري عليه 


مفيش ست ممكن تطلب طلب زي ده إلا لو كان جوزها مش فارق معاها !




قعدت علي طرف السرير وانا بحط وشي بين ايديا وبعيط بحرقه وصوت عالي 




حاسه قلبي هيخرج من مكانه من كتر الحزن 


الكل مفكر انه سهل عليا اللي بقوله وعايزه اعمله 




مكنتش اتوقع في يوم اقول لجوزي اتجوز عليا 


لكن كنت مضطره


انا بحبه ،بغير عليه ،بخاف عليه اكتر ما بخاف علي نفسي




بحس أنه طفل صغير تايه وانا ملاذه الوحيد 


اول ما قابلته حسيت أنه كان بيغرق وانا كنت طوق النجاه




مقدرتش أنكر أن أنا كمان كنت غرقانه وتايهه وسط الحياه وهو شدني وخباني جوه قلبه 




قصه حبنا والظروف اللي قابلتنا لو اتحكت هتتكب من ضمن الاساطير 


















واجهنا ظروف كانت اقوي من اي حاجه لكن قدرنا مع بعض نتخطاها 




افتكر اليوم اللي دخلنا فيه البيت يوم فرحنا 


احنا الاتنين اخدنا نفس طويل واحنا بنبص لبعض بنظره قادره تحكي كل المشاعر اللي جوانا 




وقتها عيطت لكن المره ديه كانت دموع فرحه 


لذه الوصول للحلم اللي طال انتظاره مفيش اجمل منها 




لكن اوقات الحلم بيتحول لكابوس مُفزع 


لحظه اكتشافي اني استحاله اخلف كانت اصعب لحظه في حياتي 




وقتها مشوفتش منه أي رد فعل يدل علي حزنه!


بالعكس خباني بين ضلوعه وهو بيقولي بكل رضا 




"انا مش عايز حد غيرك " 




ابقي انانيه لو حرمته من أنه يكون اب 


كان لازم اعمل كده 


لازم اقنعه يتجوز حتي لو ده عكس إرادتي 




حتي لو من جوايا بتحرق كل ما اتخيل ان في واحده ممكن تاخد مكاني في قلبه 




فوقت من شرودي علي ايد " حنان" اللي بتطبطب علي كتفي 




-كفايه عياط 


كرم عمره ما هيسيبك صدقيني هو بيحبك 




اتنهدت وانا برفع راسي وبهز راسي بيأس 




-مفيش قدامي غير حل واحد عشان يوافق 




ردت بقلق :


-هتعملي ايه ؟




رديت بجمود :


-هطلب الطلاق 




ردت بذهول وهي بتتنفض :


-انتي اتجننتي طلاق ايه اللي تطلبيه 




مسحت دموعي وانا برد بهدوء وثبات مُزيف:


-اخوكي من حقه يعيش حياه طبيعيه زي اي بني آدم 


ابقي انانيه لو حرمته من أنه يكون اب 




اخدت نفس طويل وانا بضغط علي ايدي وبحاول معيطش 




-انا عشان بحبه لازم اعمل كده 


لازم اقس*ي عليه وعلي نفسي ...




هزت راسها بيأس وهي بتاخد شنتطها وبتبصلي بعتاب قبل ما تخرج 




-صدقيني محدش هيندم غيرك 


فكري قبل ما تاخدي قرارك ،ومتفتكريش أن كرم ممكن يسيبك بالساهل 
























قالت كلامها وخرجت من الاوضه وانا واقفه دقات قلبي سريعه ،صوت نفسي مغطي الاوضه ،عيوني بتلمع بالدموع 




جوايا براكين لو خرجت هتحرق البحر واليابس !


نفسي أصرخ بكل الوجع اللي جوايا 


مكنتش اتمني نوصل للحظه ديه ابدا 


قلبي مكس*ور ميه حته 




اتمني بس لو ارجع بالزمن شويه ومقابلهوش 


اتمني كنت افضل علي مبدأ اني عمري ما هتجوز 




قبل ما اشوفه كنت مقرره اعيش لنفسي 


اشتغل ،واحقق ذاتي 


مخليش الحب يدخل قلبي لاني عارفه نهايته هتكون ايه 




لكل بدايه حب نهايه معظمها بتكون بشعه 


دايما كنت شايفه أن قلبي أضعف من انه يتحمل النهايه الحزينه 




كنت مقرره أنه عمري ما هسمح للحب يأثر علي حياتي 


كنت مقرره الغي قلبي ومشاعري واحكم عقلي بس 




لحد ما شوفته اول مره 


وقتها عقلي وقف عن التفكير 


قلبي هو اللي فضل يدق بشكل واضح وصريح 




حاولت اسيطر عليه لكن مقدرتش !


يوم ورا التاني ورا الثالث ومع كل مره كان بيقرب مني كنت بضرب بكلامي عرض الحائط 


.
















معاه بدأت أتخيل حاجات عمري ما اتخيلتها في يوم 




فستان خطوبه ،دبله مزينه صوابعي ، ،فستان فرح ،بيت دافي ، بنت واقفه في المطبخ بتحاول تتعلم اكله عشان الشخص اللي بتحبه ،قهوه بتحاول تعملها للمره المليون وبتفور كالعاده ، اطفال بتجري هنا وهناك 




بدأت مخططاتي تتغير 


احلامي بقي هو جزء منها 




قطع تفكيري دخوله الاوضه 


وفي الحقيقه معرفش جه أمتي وازاي 


معرفش انا بقالي قد ايه قاعده بفكر من الاساس




قرب مني وباس راسي وهو بيقولي بنبره دافيه :


-وحشتيني 




رفعت راسي وانا ببص في عيونه بدموع :


-وانت كمان 




حاوط وشي بقلق :


-مالك انتي كويسه؟




بلعت ريقي وانا بشيل أيده وببعد خطوه لورا باخد نفس طويل قبل ما أقوله الكلمه اللي صدمته ووجعتني 




-طلقني 




















سكت لحظه بيحاول يستوعب كلامي وهو بيبصلي بذهول وبيهز رأسه 




-انتي قولتي ايه ؟




رديت بجمود :


-قولت طلقني ياكرم 




رد بذهول اكبر :


انتي واعيه انتي بتقولي ايه ؟


-ايوه 




زعق في وشي بنفاذ صبر :


-لا مش واعيه اكيد مفيش حد واعي يقول كده !




اخدت نفس طويل ورديت بثبات عكس اللي جوايا :


-لو سمحت ياكرم انا عايزه اتطلق 




-مفيش زفت طلاق 


















دموعي نزلت بعد ما حاولت أكتمها لكن مقدرتش 


-لو سمحت متتعبنيش اكتر من كده 




اخد نفس طويل وهو بيمسح علي وشه وبيحاول يهدي أعصابه 




قرب مني وحاوط وشي وهو بيقولي بهدوء :


-انا سبق وقولتلك مش عايز حد غيرك 


انتي ليه مش عايزه تصدقيني 




رديت بدموع :


-عشان انت من حقك تكون اب و...




قاطعني بعصبيه وزعيق :


-مش عايز اكون زفت مش عايز كفايه بقي حرام عليكي كفايه اللي بتعمليه في نفسك وفيا ده 




رديت بدموع وعصبيه :


-انت اللي كفايه ارجوك بقي ارحمني وخلصني من العذاب ده 




-عذاب!!


-ايوه وجودي معاك عذا"ب ،انا مش قادره استحمل نظره السفيه اللي بشوفها في عينك وعين اهلك 










..








انا بقيت حاسه انك مكمل معايا شفقه 


مفيش بني آدم ممكن يرضي يعيش مع واحده مبتخلفش 


مفيش بني آدم يستحمل يعيش عمره كله من غير ما يشيل حته عيل يتسند عليه لما يكبر 




رد بسخريه:


-ياااااه للدرجادي معندكيش ثقه فيا 

ولا في حبي ليكي !




غمضت عيني وانا بضغط علي ايدي بقوه وبرد بنبره حاولت متكونش مهزوزه :




-انا اسفه بس....




رد بجمود :


-حضري شنطه هدومك عشان هوديكي لأهلك 




رديت وقلبي بيتنفض :


-ه ه هتطلقني 


-مش أنتي عايزه كده 




اه ياياسمين هطلقك 







مدونة الرسم بالكلمات
بواسطة : مدونة الرسم بالكلمات
تعليقات



حجم الخط
+
16
-
تباعد السطور
+
2
-