 |
رواية قضية خلع الفصل الثاني 2 بقلم عمرو راشدالفصل الثاني استاذ حسام انا عايزة ارفع قضية خلع على جوزي = و ايه الجديد ، كلهم بييجو هنا عشان يرفعو قضية خلع ، لكن المهم ايه السبب بصراحة أنا مكسوفة اقولك = طب احنا ممكن نأجل المعاد لحد ما تبقي مش مكسوفة استاذ حسام ياريت تتعامل معايا بطريقة احسن من كدا = مالها طريقتي انا اسفة يعني ، طريقتك قليلة الذوق جدا = الانطباع الاول مهم جدا ودايما هو اللي بيفضل محفور في الذاكرة ، وانا أول انطباعي عنك انك شخص عشوائي بتهجمي على الناس في مكاتبهم على فكرة انا اعتذرت أكتر من مرة ، و بعدين انا معملتش جريمة ، ولو الموضوع مضايقك أوي كدا أنا ممكن امشي = انا مقصدتش انك تمشي ولكن خلينا نبدأ صفحة جديدة بدون اي انطباعات سابقة ، ودلوقتي احكيلي ايه السبب اللي مخليكي عايزة ترفعي قضية الخلع انا.. ، انا محرجة جدا والله = طيب هقولك حاجة كويسة ، اعتبرينا صحاب بص يا استاذ حسام ، انا جوزي بيتفرج على أفلام = نعم!! ، أفلام ايه ، حضرتك جاية ترفعي قضية خلع على جوزك عشان بيتفرج على أفلام ، طب وايه يعني ماهو كلنا بنتفرج على أفلام انا هفهمك ، اصلها مش أفلام عادية = أفلام رعب يعني ولا ايه لا أفلام.. ، أفلام مش كويسة = اممم فهمتك بصي ، اسمحيلي اقولك يا نادية عادي طالما هنكون صحاب ، انا هكون صريح معاكي ، السبب دا مش قوي واحتمال نخسر القضية من اول جلسة = ازاي مش قوي ، الحاجات دي بتأذيني القاضي ملوش دعوة ، الراجل قاعد في بيته يعمل اللي هو عايزه ، هفهمك اكتر طالما الموضوع مدخلش في سكة الخيانة يبقا القضية خسرانة = يعني ايه ، يعني انا هفضل مستحملة القرف دا وساكتة طيب اسمحيلي اسألك كام سؤال شخصي شوية ، هو ليه بيتفرج على الحاجات دي ، هل حضرتك مثلا مهملة في نفسك ولا بترفضي انه يكون معاكي ، انا اسف طبعا = خالص والله ، انا دايما مهتمة بنفسي جدا ولكن هو متعته كدا غالبا النوع دا بيكون ضعيف الشخصية أو غير متزن نفسيا ف بيلجأ للحاجات دي = انا حذرته اكتر من مرة ولكن الجديد انه بقا عنيف معايا ، وائل بقا شخص سادي طيب وهو دا اللي انا عايزه ، معقولة السبب دا موجود وتبقي ساكتة = هو دا يكسبنا القضية ومن اول جلسة ، قضية خلع بسبب العنف اللي بيمارسه معاكي جوزك = انت متأكد امال بضحك عليكي يعني ، متقلقيش يا نادية انا هفضل معاكي لحد ما اطلقك منه = نفسي اغمض عيني و افتحها الاقي نفسي خلصت من اللي انا فيه دا هيحصل ولكن انا هحتاج منك شوية معلومات اكتر عن وائل ، هستناكي بكرا ياريت متتأخريش " اتحركت ناحية الباب عشان اخرج ولكن وقفت و رجعت تاني هي القضية هتترفع امتا = مش فاهم اصل انا خايفة ، لو المحكمة بعتتله الجواب وانا موجودة معاه في الشقة معرفش ممكن يعمل فيا ايه = ممكن تباتي عند اهلك لحد ما الموضوع يخلص وهقولهم ايه = قوليلهم اي حاجة يا نادية ، قوليلهم انك مخنوقة من البيت وجاية تقضي معاهم كام يوم " خرجت ومشيت من عنده بفكر في رد فعل وائل لما يعرف ، انا خايفة اكون عملت خطوة انا مش قدها ، طب اعمل ايه ، ارجع والغي كل حاجة واستحمل العيشة مع وائل ، ولا اكمل واستحمل نتيجة قراري لان الموضوع مش هيتوقف عند رد فعل وائل بس ، حتى لو اطلقت مش عارفة هعمل ايه ساعتها ، حاجات كتير بتدور في دماغي ، مش عارفة افكر ، محتاجة اكون هادية عن كدا عشان اعرف ااخد قرار ، وصلت البيت ، فتحت باب الشقة ودخلت اهلا يا هانم ، الساعة في ايدك كام " بصيت في الساعة واتصدمت ، الساعة 11 ، انا ازاي اتأخرت كدا ، رجعت ابصله كنتي فين بقا ، وازاي تخرجي من غير إذني = كنت مع صحابي صحابك! ، صحابك مين دول ، هو انتي ليكي صحاب اصلا يا نادية = اه ليا بس مشغولين والنهاردة.. = انا مليش دعوة بكل الكلام دا ، ازاي تخرجي من غير ما تقوليلي كلمتك بس تليفونك كان مقفول = بغض النظر عن انه مكنش مقفول ، لو لقيتي تليفوني مقفول يبقا متخرجيش وتقعدي لحد ما تقوليلي و اوافق ، بس انتي خرجتي وكمان راجعة نص الليل انا اسفة مخدتش بالي من الوقت = اول و أخر مرة تعمليها ، بعد كدا مفيش خروج غير ب اذن زي اي ست محترمة بتعمل قصدك ايه = كلامي واضح مش محتاج شرح حاضر ، انا داخلة انام = لا تنامي ايه ، أنتي تدخلي تغيري هدومك وتيجي ، عايزين نقعد مع بعض شوية مش قادرة يا وائل ، تعبانة وعايزة انام = هو انا كل ما اكلمك تقوليلي مش قادرة انا فعلا تعبانة ، دا غير انه مش هينفع النهاردة = ليه ان شاء الله هيكون ليه يعني ، مش لازم افسر = ماشي يا نادية ، بلاش النهاردة عايز حاجة تانية؟ = لا خلاص بقا هعوز ايه ، ادخلي نامي واعملي حسابك انا هنام في الأوضة التانية من النهاردة لحد ما تبقي جاهزة " مشيت دخلت الأوضة ، كنت فرحانة لسببين ، اول سبب وهو ان الموضوع عدا على خير ، تاني سبب انه مش هينام جنبي وبمزاجه ، اترميت على السرير ، واحد اتنين تلاتة اربعة خمسة ستة سبعة تمانية تسعة... ، عارفة انكو مستغربين ايه دا ، ولكن هي دي الطريقة اللي بنام بيها ، بفضل اعد لحد ما انام ، طريقة أطفال انا عارفة بس على الأقل بتخليني اعرف انام بدل ما الجأ للمهدئات ، صحيت تاني يوم ، الساعة كانت 3 ، قومت خرجت من الأوضة لقيته قاعد في الصالة صباح الخير = صباح النور ، بقيتي تصحي متأخر كتير معلش اصل تعبانة = طب يعني تبقي عاملة حسابك ان عندك جوز المفروض تصحي تحضريله فطار انا اسفة ، تحب تفطر ايه = لا افطر ايه بقا ، سبقتك ، افطري انتي طب على فكرة ، انا خارجة النهاردة = رايحة فين عند ماما = ماما؟ اه ، بقالي.. كتير مشوفتهاش يعني = روحي بس متتأخريش " دخلت الحمام ، خدت دش وخرجت عشان البس و انزل ، جهزت نفسي وخرجت ، كان لسة قاعد مكانه ، فتحت باب الشقة ولكن وقفت لما سمعت صوته متتأخريش يا نادية = حاضر #بقلم : #عمرو راشد " خرجت و روحت على المكتب ، مكنش في ولا واحد موجود ، استغربت جدا ، حتى السكرتيرة مش موجودة ، خبطت على الباب و دخلت ، كان قاعد على المكتب ، اول ما شافني ابتسم و قال اهلا يا نادية ، عاملة ايه " رديت وانا مترددة وجوايا شعور بالخوف = الحمدلله اقعدي ، واقفة ليه " قعدت ، بدأت افرك في صوابعي ، نظراتي في كل مكان ، مرة عليه ومرة على الارض ، بدأ يلاحظ مالك = مفيش انا كويسة بصي يا نادية ، بحكم شغلي ف انا اتعاملت مع ستات كتير اوي ، يعني تقدري تقولي حافظهم ، ف مينفعش تقوليلي مفيش عشان شكلك بيقول ان في حاجة " بصتله وسكت لثواني = هو الناس اللي كانو هنا راحو فين هو دا اللي مخليكي قلقانة أوي كدا ، طيب عموما المكتب النهاردة اجازة أصلا طبيعي لما تيجي متلاقيش حد ، وقبل ما تفهميني غلط ، انا جبتك هنا النهاردة عشان عايز اسمع منك ومهتم جدا اعرف عن حياتك لكن مش عشان اي حاجة وحشة في دماغك " نسبيا بدأت اطمن ، ابتسمت تشربي قهوة ، على فكرة انا بعرف اعمل قهوة حلوة أوي = خليني اشوف واثق انها هتعجبك متقلقيش = وجايب منين الثقة دي عشان كل اللي شربها قال انها حلوة = ومش جايز يكونو بيجاملوك عشان متزعلش زي ما انتي هتعملي لما تدوقيها وتلاقيها مش حلوة بس هتقوليلي انها حلوة عشان مزعلش = هو انت عندك رد لكل حاجة كدا محامي بقا ، عموما يلا عشان منضيعش وقت ، تحبي نبدأ منين = براحتك زي ما تحب خلينا نبدأ من الأول ، متجوزة بقالك قد ايه = سنتين مفيش أطفال صح = صح ممكن اعرف السبب = وائل رافض يكون في اطفال دلوقتي اشمعنا = يعني هو شايف ان احنا لسة صغيرين ومحتاجين نعيش حياتنا شوية قبل الخلفة وصداع العيال وهكذا متأكدة ان هو دا السبب = هو دا اللي قاله مش هتسرع في الحكم عليه ولكن خلينا نكمل ، معاملته معاكي عاملة ازاي ، هل بيضربك مثلا = ساعات اه وانتي بتعملي ايه = بسكت ، هو انا عندي حل تاني و اهلك ، ليه مبتروحيش تحكيلهم = عشان اهلي من انصار الراجل يعمل اللي هو عايزه مفكرتيش تطلبي منه الطلاق = ماهو دي كان من اسباب انه يمد ايده عليا " ساعتها معرفتش امسك نفسي ، دموعي بدأت تنزل اهدي يا نادية ، لو سمحتي اهدي ، احنا هنا عشان نحل المشكلة دي ، كل حاجة هتتحل صدقيني " اتكلمت وانا بعيط انا استحملت كتير اوي ، كل يوم بقول هيتغير ولكن مبيحصلش ، انا وصلت لمرحلة اني بتمنى الموت لإني فعلا تعبت = بعد الشر عليكي ، أنتي خلاص بدأتي طريق الخروج من كل اللي أنتي فيه ، عايزين نكمله للاخر ، ممكن؟ " بصتله وسكت عايزك تهدي خالص ومتقلقيش ، كل حاجة هتخلص قريب = اتمنى طب نكمل؟ نكمل " ساعتها تليفوني رن ، خرجته من الشنطة لقيت وائل هو اللي بيتصل ، خوفت جدا واتوترت ، بصيت ل حسام عادي ردي = دا وائل انتي قايلاله انك فين = عند ماما طب تمام ردي وقوليله انك عندها " رديت ايوا يا وائل = انتي فين يا نادية مانا قايلالك هروح عند ماما " لقيته بدأ يضحك ماما ايه بس ، انا اصلا عند ماما!! #بقلم : #عمرو_راشد #قضية_خلع #يتبع رابط البارت الثالث |
***********************
***********************
تعليقات
إرسال تعليق