روايات حديثة

رواية مارو العاب الرحمه الفصل الثاني عشر " ابو الهول "

 "مارو _العاب الرحمه" 

للكاتبه/لينا بسيوني

الفصل الثاني عشر بعنوان "ابو الهول" 



صحينا لاقينا نفسنا رجعنا بالقفص وسط الاقفاص التانيه،  نصير قال: 


ما كانوا موتونا علي طول لازمتها ايه الفرهدة دى!! 


خنوم قرب علينا فـ محدش اهتم باللي هيقوله لاننا عرفنا اللي فيها، كلنا هنموت حتي لو كسبنا..مش هنعيش 


خنوم بص علينا، لاقانا كلنا شاردين الذهن، قال بدون مقدمات: 


المسابقه الرابعه ستكون في السحر، كل قفص سيرشح الامهر في السحر لمواجهه باقي الاقفاص، الساحر الفائز سيحصل علي دروع وسيوف له ولفريقه لتساعدهم في المواجهه الاخيرة. 


حنوش سال باستغراب: 

المواجهه الاخيره؟!! 


خنوم مردش علي سؤال حنوش وبصلنا وقال: 


لم ارى في حياتي مثل  تماسككم وتضحياتكم من اجل بعضكم البعض. 


بص علي الاقفاص المتبقيه وهو بيقول: 


قفصكم هو الوحيد المكتمل ولكن... 


خنوم اتلفت يمين وشمال، قرب علي حنوش وقاله حاجه في  ودنه، حنوش ملامحه اتغيرت، شوفت خنوم وهو بيشاور بصوباعه لحنوش كانه بيحذره وبعدها مشي. 


بصينا كلنا علي حنوش اللي كان متوتر وشكله بيقول ان فيه مصيبه، حنوش استجمع نفسه وقالنا: 


خنوم حذرني ان الكلام اللي هقوله دة ميطلعش برة لانه يعتبر افشي سر من اسرار اللعبه. 

ابويا قال لحنوش بنفاذ صبر: 


اخلص يا حنوش في ايه؟! 


حنوش قال بسرعه: 


واحد بس اللي هيعيش في العاب الرحمه، المسابقه الاخيرة عبارة عن مواجهه بين كل اللي في الاقفاص 


نصير قاله: 


هو دة اللي مقلقك، فكك يا حنوش احنا كده كده ميتين 


ابويا كان بيلف في القفص وهو بيفكر شويه وقال: 


هي المسابقه اللي جايه في السحر، صح!! 


هزينا راسنا فقال: 


معني ذلك ان السحر هيبقي مسموح في الحلبه!! 


حنوش قال وهو مضيق عينه: 


انت بتفكر في ايه يا نينو؟؟! 


ابويا رد: 


مش هنستني لما نضطر نقاتل بعض، احنا هنهرب قيل المسابقه الاخيره!! 


نصير قاله: 


ولو فرضنا اننا قدرنا نهرب... برضه هنموت كلنا!!! 


ابويا قاله: 


بطل احباط بقي!! كفايه طاقه سلبيه مش ناقصين، احنا بس نهرب من هنا وساعتها هيبقي فاضلنا حوالي يومين، لو معرفناش نتصرف يبقي علي الاقل هنموت  في الحته اللي عايزنها واحنا جنب بعض!! 


حنوش سال: 

عندك خطه يا نينو؟!! 


ابويا قال: 


تقربيا!! 


ابويا شرحلنا فكرته واللي كانت فيها مخاطرة كبيرة جدا، فضلنا مستنين لحد ما الحرس يجوا يرموا علينا الاكياس، جم رموا الاكياس وغبينا عن الوعي. 


صحينا لاقينا اتنقل للحلبه، الكهنه كانوا مرصوصين قدام الاقفاص وكل كاهن كان بيتكلم مع الناس اللي في القفص المسئول عنه، الحرس كانوا منتشرين في الحلبه تحت وفوق المدرجات وماسكين رماح واقواس. 


اتفاجئنا بالكاهن الاكبر قاعد في مقصورة خاصه بيه وسط الجمهور. 


نصير قال وهو بيشاور علي الكاهن الاكبر: 


اشمعنا المسابقه دى اللي حضرها وش البومه ده!! 

حنوش رد: 


اكيد عشان المسابقه سحر فلازم الكاهن الاكبر يكون موجود علشان يقدر يسيطر علي الامور في حاله خروجها عن السيطرة. 


نصير قال باحباط: 


يعني من الاخر  الخطه فشلت من قبل ما تبدا!! 


ابويا  قالهم: 


سيبوها علي الله، وبعدين متشغلوش بالكم انا اللي في وش المدفع مش انتم. 


خنوم قرب علينا وسالنا: 


هل اخترتم ممثلكم في السحر؟! 


ابويا رد وهو بيتقدم ناحيه باب القفص: 


اهـا....  انا.. 


الكاهن قاله: 


انتظر حتي ينطق الكاهن الاكبر كلماته. 


شوفنا الكاهن وهو  بيقوم من مكانة، رفع عصايته في السما وتمتم بتعزيمات، ارض الحلبه اهتزت كانه زلزال ورجعت ثبتت تاني، الكاهن الاكبر نزل عصايته وشارو للكهنه اللي واقفين علي الاقفاص، طلعوا مفاتيح  الاقفاص وفتحوا ابوابها، ابويا خرج من القفص ووقف قدامه زى باقي السحرة اللي خرجوا من الاقفاص. 


الكاهن الاكبر بص للسحرة اللي وافقين برة الاقفاص ومنهم ابويا  وقال بنبرة  تحذير: 


سالعن قبل ان اقتل كل من تسول نفسه الهروب من الحلبه. 

كل السحر وطوا راسهم في خضوع للكاهن ما عدا ابويا، الكاهن بصله، ابويا وطي راسه وهو بيبص علي الكاهن بطرف عينه. 

جلس الكاهن الاكبر علي كرسيه في المدرجات وخبط الارض بعصايته ثلاث خبطات. 


              فـبدات المسابقه.... 


اتقدم اول ساحر واتمشي في الحلبه لحد ما واقف قدم تمثال لاسد مصنوع من الحجر، الساحر غمض عينه وتمتم بتعزيمات، بعدها  فتح عينه وشاور علي تمثال الاسد.  التمثال اتهز في مكانه واتفاجئنا بالاسد بتدب فيه الروح. 

الاسد نط من فوق قاعدة التمثال وجرى في الحلبه وهو بيلف حوالين الساحر، الجمهور سقف بحرارة للساحر فانحني للجمهور في تواضع، الكاهن الاكبر شاور بعصايته علي التمثال الحجرى اللي بيجرى في الحلبه، فاتحول في وقتها لتراب. 


الساحر رجع ودخل قفصه، كل اصحابه في القفص كانوا بيحضنوه وبيحيوه علي خدعته، شويه  واتقدم ساحر تاني، نزل علي الارض وحط ايده علي رمل الحلبه وتمتم بتعزيمات فرعونيه، حبيبات الرمل بدات تتحرك وتتشكل علي هيئه افعي، الافعي فضلت تكبر وتكبر وهي بتلم في رمل الحلبه لحد ما بقت افعي ضخمه وطويله متشكله كلها من الرمل. 


الافعي كانت بتبص علي المدرجات كانها بتدور علي حاجه معينه، لحد ما اتفاجئنا بيها بتهجم علي الكاهن الاكبر واللي بسرعه شاور عليها بعصايته. 


الافعي انفجرت، تناثر الرمل اللي كانت متشكله منه وغطي الجمهور والمدرجات. 


بصينا علي السحر اللي عمل الخدعه لقيناه اختفي، الكاهن وقف ولف بعينه وهو بيبص علي ارضيه الحلبه والمدرجات، بعدها شاور بعصايته علي مكان معين في ارضيه الحلبه، سمعنا صوت صرخات وظهر الساحر وهو مصروع علي ارضيه الحلبه بعد ما كان مختفي في الرمال زى الحربايه، الحراس اللي حوالين الحلبه قربوا من الساحر  وطعنوه بالرماح لحد ما مات. 


بعدها دخل كام ساحر قدموا خدع عاديه منهم اللي رمي حزام فاتحول لثعبان كبير بينصاع لاوامر الساحر وبيتحرك علي حسب ما يؤمره ومنهم اللي حرك تماثيل شمع صغيرة وخلاها تتكلم وتجاوب علي اسئله الجمهور اللي في المدرجات، لحد ما جه دور ابويا، واللي فضل واقف جنب القفص بتاعنا وما اتقدمش لارض الحلبه. 


ابويا وقف وخلي باب القفص ورا ضهره، فجاءة اختفي بالقميص ورجع وهو متشكل علي شكل الملك "ابو ميريت" كل الموجودين وطوا راسهم لا اراديا في خضوع حتي الكاهن الاكبر نفسه، عقله توقف لثواني قبل ما يدرك الخدعه، واضح ان ابويا راهن علي انه هينزل راسه لا اراديا لما يشوف الملك قدامه، في لحظه ابويا فتح القفص اللي احنا فيه وحررنا. 


جرينا كلنا برة القفص، ابويا لف بالقميص بسرعه واتحول لتنين، نصير اختفي وظهر فوق ظهر ابويا(التنين) واللي زمجر بصوت عالي وهو بينفث النارفي الهوا فاندلعت الفوضي في المدرجات. 


الكاهن الاكبر رفع عصايته ولسه هيشاور علي ابويا (التنين)، اتفاجا بحد عدى من جنبه بسرعه رهيبه وخطف من ايده العصايه، الكاهن بص علي اللي خطف منه العصايه فلاقي، بنت صغيرة (اختي نورا)  واللي جريت بسرعه رهيبه بالحذاء وهي ماسكه العصايه واختفت بيها. 


الحرس اللي في الحلبه والمدرجات حاول يصيبوا التنين بالرماح والاسهم، لكن اسلحتهم مكانتش بتنفد او بتاثر في جلد التنين السميك. 


قلت لحنوش: 


بسرعه انقل سندس وشوف نورا فين واسبقونا علي الكهف. 


حنوش اختفي هو وسندس وفضلت انا وابويا (التنين) ونصير،  المدرجات فضيت من الجمهور اللي هرب في خوف وذعر، مفضلش غير الكاهن والحرس. 


مجموعه من الحرس رموا عليا رماحهم واسهمهم، تفاديتها وانا بجرى زى الزجزاج (بشكل متعرج) علي ارضيه الحلبه، قفزت قفزة عاليه ووقعت واحدة من الرماه اللي في المدرجات، خدت مكانه وقوسه ومارست هوايتي المفضله.... الرمايه. 

مطيت وتر القوس، ركزت اسهمي علي الحراس اللي فوق المدرج وجزء كبير منهم. 


لمحت الكاهن وهو مغمض عينه وبيتمتم بتعزيمات، بصيت علي ابويا لاقيته لسه تنين وبينفث النار علي باقي الحرس. 


لسه هنشن علي الكاهن، الارض اهتزت بعنف فوقعت من فوق المدرجات علي ارضيه الحلبه، الارض كانت بتهتز كان شئ ضخم بيدكها وبيقرب علينا. 


نصير ظهر جنبي علي ارضيه الحلبه، مد ايده وهو بيقولي: 


هات ايدك هاخدك علي ظهر ابوك ونهرب من هنا.. 


لسه بمدله ايدى، اتفاجأنا بحاجه ضخمه بتكسر المدرجات وبتقتحم الحلبه وقفنا ونسينا بوقنا مفتوح من الدهشه لما شوفنا التمثال الحجرى الضخم اللي دخل علينا. 


نصير قال بدهشه: 


ابو الهــول!!!!!! 


انتبهت للقوس اللي كان هيرشق في صدر نصير فمسكته بايدى قبل ما يصيبه، ابويا كان لسه بينفث النار علي الحراس اللي بيتدفقوا من كل حته وما بيخلصوش، بصيت لقيت ابو الهول رفع رجله وهيدوس علينا انا ونصير. 

نصير مسك ايظى بسرعه ونقلني فوق ظهر ابويا التنين 

اول ما ظهرت فوق ظهر ابويا اتفاجئت برمح جاي اتجاهي وكان هيرشق فيا وانا بتفاداه  وقعت من فوق ظهر التنين. 


اترزعت علي الارض وشوفت ابو الهول بيجرى ناحيتي، قومت من علي الارض وجريت باقصي سرعه عندى، 

لمحت ابويا ونصير بيطروا فوق خالص وبيختفوا في السحاب. 


فضلت اجرى لحد ما خرجت برة الحلبه، ابو الهول كان بيجرى ورايا بيشوط ويكسر اي حاجه في طريقه، بيوت، مسلات، شجر، بني ادمين. 

فضلت اهرب منه واجرى في الشوارع لحد ما ابويا ظهر فوقيا، حاول ينفث النار علي ابو الهول بس النار ماثرتش فيه، نصير ظهر وهو بيجرى جنبي وقالي: 


هات ايدك بسرعه... خلينا نخلص. 


مديتله ايدى ولسه هيمسكها اتفاجئنا بحيطه سد فرقتنا، هو دخل شارع وانا دخلت شارع شويه وظهر تاني وبيجرى جنبي في نفس الشارع وقالى: 


هات ايدك بسرعه وانجز. 


اديتله ايدى فمسكها واتنقلت معاه علي ظهر التنين اللي طار بينا في اتجاه الكهف. 


وصلنا الكهف واتصدمنا من اللي شوفناه.. 


يتبــــــــــع.....

رابط البارت الثالث عشر

تعليقات



حجم الخط
+
16
-
تباعد السطور
+
2
-