"مارو_العاب الرحمه"
للكاتبه/لينا بسيوني
الفصل الثالت عشر بعنوان"روح مقسومه نصين"
وصلنا الكهف، لقينا حنوش ونورا وسندس مستنينا، اول ما دخلنا عليهم الكهف جريوا علينا وحضنونا.
نصير قال:
فرحانين علي ايه، احنا لسه في خطر برضه انتو ناسيين الحرب اللي جنبنا بتاعت الكلاب والسمك.. ايام سواد.
ابويا قاله:
حرب حرب، اهو ارحم من القرف اللي كنا فيه علي الاقل في ايدينا دلوقتي نستخدم السحر حتي لو كنا اجسام اثيريه.. منك لله يا نورا
نصير رد:
وهتعمل ايه بالسحر؟! ما ميريت قالتلك كلمات الكاهن لا ترد ولا تستبدل.
ابويا قاله:
هننفض ام الكتب والصناديق مقدمناش غير يومين علي عيد ميلاد وموت ميريت هانم.
بص لنورا وقالها:
حتي انتي يا جلابه المصايب دورى معانا.. عايزة تتعملي السحر يختي!!
اتفضلي فكي اللعنن اللي رميتها علينا وهاتي العصايه اللي في ايدك دى.
نورا خافت تروح لابويا، قربت عليا وادتني العصايه وفضلت وقفه جنبي.
نصير قال لابويا:
ريح دماغك مفيش حل للعنه الفراعنه، دة سحر قوى وبيقعد الاف السنين، مستحيل نقدر نرجع لاجسادنا تاني، انا عندى فكرة... ماتيجوا نموت نفسنا يمكن نفوق!
ابويا قاله بعصبيه:
ياخي ابعد عني خنقت امي.
حنوش رد علي نصير وقاله:
مش هينفع يا نصير نجرب حاجه زى كدا، لو متنا هنا هنموت هناك اكيد.
خالتي سندس كانت واقفه وعماله تقرص نفسها، ابويا بصلها باستغراب وقالها:
انتي بتعملي ايه يا سندس!!!!
قالت:
مش احنا نايمين، بقرص نفسي يمكن اصحي!!
ابويا بصلها وقالها:
بطلي هبل يا سندس مش ناقصه غباء!!
وبص لنورا وقالها:
معندكيش افكار يا مندوبه النحس... يا برميل الفقر.
نورا حطت راسها في الارض.
قلتلهم:
يا جماعه ارجوكم اهدوا، محتاجين نفكر بهدوء، اولا كدا احنا في النص لا ميتين ولا عايشين، اروحنا محبوسه هنا وحتي مش شايفين اجسادنا المصروعه.....
مكملتش كلامي وسكت لما افتكرت حاجه قولتلهم:
ثواني يا جماعه.. هو لما كانوا بيرموا علينا الاكياس وبنغيب عن الوعي كنتوا بتحملوا بحاجه او بتشوفوا حاجه وانتم مغمي عليكم؟!
هزوا كلهم راسهم بالنفي فقولتلهم:
انا كنت بشوف نفسي في الكهف وانا مصروع وشوفتكم جنبي وانتوا مصروعين، كنت مفكر انه حلم، تقربيا لما بغيب عن الوعي هنا بقدر اشوف جسمي المصروع
حنوش قال:
اها صح انت روحك مقسومه نصين، استحاله يكون تاثير اللعنه عليك زينا لو في ثغرة في للعنه هتبقي انت.
نصير قال:
يبقي نغيبك عن الوعي هنا وانت تحاول تصحي نفسك وتص...
مكملش كلامه اتفاجئنا بباب الكهف بيتكسر وبيدخل علينا حرس مسلحين برماح، حضرنا نفسنا للقتال لكن شفناهم بيوسعوا الطريق لحد معدى.
ميريت!!
شاورت للحراس فنزلوا رماحهم، قالت:
الكاهن تتبع عصاه وعلم انكم هنا، سياتي بجيش عظيم ليسترد عصاه ويقتلكم.
حنوش قالها:
سيبك من الكاهن دلوقتي، ابننا مارو بيقدر يشوف جسمه المصروع هل يقدر يفوق نفسه ويفوقنا، نقدر نفك اللعنه يعني؟!
ميريت قالت:
الامر ليس بهذه السهوله حتي لو راي جسده المصروع لن يستطيع ايقاظه او ايقاظ اي احد من المصروعين
قطعت كلامها وفضلت تكح كتير بعدها كملت كلامها وقالتلي:
ولكن اظن ان الحل في يدك!!!
قولتلها:
في ايدى ازاي؟!!
قالتلي وهي بتشاور علي عصايه الكاهن اللي في ايدى:
عصا الكـــاهن!!
قلتلها:
مش فاهم اشرحي!!
قالت وهي بتلف بعينها في الكهف:
هل قرات البرديه في هذا المكان؟!
قلنالها بصوت واحد:
اهـــــــــــا....
مدت ايديها علشان تاخد العصايه من ايدى، اديتها العصايه فخدتها مني وثبتتها في الارض وهي بتمتم بكلمات بعدها خبطت بالعصايه خبطه.... اتنين.... وفي التالته العصايه اختفت من ايديها.
قالت:
هذا ما استطيع فعله لمساعدتكم.
قلت باستغراب:
مش فاهم! ساعدتينا ازاي؟! وفين العصايه؟!
قالت:
بجوار اجسادكم المصروعه.
سالتها:
عملتيها ازاي دى؟! ونقلتيها ليه اصلا؟!
ردت:
لو كان في استطاعتك كما تدعي ان ترى جسدك المصروع فستحتاج الي عصا الكاهن الاكبر وتعزيمات لايعرفها سوى الكاهن نفسه لتوقظ جسدك......
نصير قالها:
الكاهن اللي جايب الجيش وجاي يقتلنا كمان شويه!
هزت راسها بالتاكيد، فابويا قال:
طب تمام خليه يجي!!
وبص لميريت وقالها:
شكرا يا استاذه ميريت... بس لازم تمشي دلوقتي عشان في حرب هتقوم ومش عايزينك تتعورى.
ميريت فضلت متنحه فيا.
سندس قالت:
شوف ياخويا البت متنحه في الواد ازاي!!
ميريت قربت مني ووشوشتني ففتحت ايدى، حطت في ايدي سلسله وقالتلي حاجه في ودني فابتسمت وقلتلها:
اوعــــــــدگ..
لفت بضهرها واتجهت لباب الكهف هي والحرس وقبل ما تخرج التفتت ليا وقالت:
اعلم اني ساراك مجددا.. سانتظرك لتحررني كما وعدت.
خرجت هي والحرس، نورا جريت عليا وخطفت السلسه من ايدى وقالت:
الله شكلها حلوة اوى.. دى عين حورس صح؟!
نتشتها من ايديها وقلتلها:
هاتي يا نورا عشان شكلها ملعونه هي كمان!!
ابويا ونصير سالوني فى صوت واحد:
هي قالتلك ايه؟!
كذلك خالتي سندس قالتلي:
ايوا صح هي قالتلك ايه ياواد يا مارو؟!
حنوش قال:
انا سمعت جزء من الكلام.. سيدى يا سيدى يا مدوب قلوب الفراعنه.
نورا قطعتنا وقالت:
يا جماعه احنا في ايه ولا في ايه مش في كاهن وجيش جاي علينا دلوقتي!!
ابويا ادها علي قفاها وقالها:
ما هو كله م تحت راسك يا مندوب النحس.. ليكي عين تتكلمي.
قاعدنا وبدانا نحط خطه، نصير قال:
احنا منعرفش الجيش اللي جاي دا عدده ايه اكيد الكاهن هيحاول يوقف استخدمنا للسحر او هيهاجمنا بحاجه قويه زى ابو الهول اللي هاجمنا بيه.
حنوش اكد علي كلام نصير وقال:
ومش هنعرف نواجه جيش كامل من غير سحر لازم نلاقي حل نقدر بيه نوقف سحر الكاهن.
نورا قالت وهي مدايقه عين واحدة:
طب ما نخطف الكاهن من وسط الجيش قبل ما الجيش يوصل.. ولا ندخل حرب ولا دياولوا!!!
ابويا قالها:
تعرفي مسمعلكيش صوت خالص... هنخطفه من وسط الجيش ازاي يا عقبريه زمانك؟!!
قلت لابويا:
نورا عندها حق احنا مش مضطرين نحارب... احنا هنخطف الكاهن.
وفجاءة حصل شئ مش متوقع.......
يتبــــــــــــــــــــــــــــع........
