google.com, pub-6403815486397132, DIRECT, f08c47fec0942fa0 رواية مارو العاب الرحمه الفصل الرابع عشر " الكاهن الأكبر"
روايات حديثة

رواية مارو العاب الرحمه الفصل الرابع عشر " الكاهن الأكبر"

 "مـارو_العاب الرحمه" 

للكاتبه/لينا بسيوني

الفصل الرابع عشر بعنوان"الكاهن الاكبر" 



الكاهن كان وسط جيشه اللي بيقدم ناحيه الكهف، راكب عربه حربيه بيجرها حصان وبيشاورلهم علي الاتجاه اللي هيمشوا فيه. 


ظهرت قطه وعدت من جنب جنود الجيش واللي وسعولها وهم بينحنوا باحترام وتبجيل، القطه مشيت بين صفوف الجيش لحد ما وصلت للعربه اللي فيها الكاهن وقبل ما الكاهن يلتفت ليها ويكتشف الخدعه، القطه لفت بسرعه واتحولت لابويا. 


ابويا حط سكينه علي رقبه الكاهن وهدده فالجيش كله صوب رماحه في اتجاه ابويا، الكاهن شاورلهم ينزلوا رماحهم قبل ما ابويا يضربه علي راسه ويغيبه عن الوعي، نصير ظهر جنب ابويا ونقله بسرعه هو والكاهن للكهف. 


الكاهن صحي لقي نفسه متكتف علي كرسي، حاول ينطق تعاويذ عشان يفك نفسه فحنوش قاله بالهيروغليفي: 


انسي الامر يا وجه البومه، لقد قرات التعزيمات التي تبطل السحر علي قضبان الاقفاص وكتبتها كماهي علي الكرسي الذى تجلس عليه الان مع اضافه شخصية للتعزيمه تجعلها غير قابله لاختراق. 


الكاهن قال: 


ماذا تريدون؟! 


نصير رد: 


كل خير يا روح امك.. قالولنا ان انت الوحيد اللي معاك الباسورد اللعبه، ترجمله يا حنوش الكلام بالظبط واتكي علي جمله ياروح امك. 


حنوش قال للكاهن: 


نريد التعويذة التي تبطل لعنه الاميرة ميريت.. ياروح امك!! 


الكاهن قال باستغراب: 


اي لعنه؟! 


ابويا قال للكاهن: 


انت هتستعبط ياوش البومه... ترجمله يا حنوش. 


الكاهن اتعصب جدا وقال: 


هل جنتتم، اتعرفون عقوبه فلعتكم، سالعنكم.... 


ابويا رفع السكينه علي رقبته فالكاهن قال وهو مرعوب: 


اشرحوالي بالتفصيل ماذا تريدون؟! 


حنوش قال: 


نريد تعويذه فك لعنه برديه الاميرة ميريت والتي نصها"في ذكرى ميلاد العظيمه ميريت ابنه الالهه ليعلم كل من يزعج روح الاميرة الطاهره في مكان راحتها الابديه انه لن يترك له اثار الا من النحس والرعب فتلعق روحه في ذاكرها حتي يفني جسدة المصروع.. ها افتكرتها يا وجه البومه؟! 


الكاهن قال: 


تذكرت.. تذكرت.. ولكن ما دخلكم بهذة اللعنه؟! 


نصير قاله: 


مش جايبينك علشان ندردش مع بعض ياروح امك.. انطق ايه التعويذه... ترجمله يا حنوش. 


حنوش قال لنصير: 


لا شكله فاهم وبيستعبط. 


ووجه كلامه للكاهن وقاله: 


انطق التعويذة اللي بتفك اللعنه. 


الكاهن قال وهو مضيق عينه: 


هل قراتم البرديه؟!!! 


حنوش قاله: 


نعم يا وجه البومه قراناها!!! 


الكاهن قال باستغراب: 


ما هذة اللغه الغريبه التي تتحدثون بها؟! 


نصير قالنا: 


مش بقولكم مفكرنا جايين ندردش، ادبحه يا نينو. 


ابويا عدى السكينه علي رقبته وبدا يجرحه، الكاهن اترجي ابويا وهو مرعوب وقال: 


ساقول ولكن علي ان افهم اولا ماذا حدث، كي اتمكن من المساعده!! 


قلتلهم: 


يا جماعه وش البومه عنده حق علي فكرة لازم يفهم ايه اللي حصل علشان يقدر يساعدنا.. احكيله يا حنوش اللي حصل. 


حنوش قاله: 


ركز معايا يا وجه البومه، ساقص عليك القصه من البدايه. 


حنوش حكاله علي كل اللي حصل، من اول ما نورا اللي قرات التعزيمه في الكهف فلعنتنا كلنا لحد ما خطفناه وجيبناه هنا ومجبش سيرة ميريت. 


الكاهن كان شارد وبيفكر، حنوش نغزة وقاله: 


هااا.. هل فهمت الان ما حدث يا وجه البومه؟! 


الكاهن قال: 


حتي وان اعطيتكم التعويذة، لن يستطيع اي انسان او جني رؤيه جسده المصروع.. فكيف سيوقظ نفسه بنفسه!! 


نصير قاله: 


انطق التعزيمه ومالكش دعوة انت، والا عليا النعمه لاقطع راسك والعب علي قرعتك سيجا... ترجمله يا حنوش. 


حنوش ترجم للكاهن كلام نصير، وابويا مشي السكينه تاني علي رقبه الكاهن فصرخ لما شاف رقبته بتجيب دم ونطق كلمات التعويذة وهو بيصرخ، حنوش شاور لابويا يوقف، وقال للكاهن: 


اعيدها حتي يحفظها ابننا مارو. 

وشارو عليا، الكاهن فضل يعيد التعويذة لحد ما حفظتها عن ظهر قلب وشرحلي ازاي تترمي بالعصايه. 


حنوش قال للكاهن: 


لو لم ينجح ابننا مارو، ستموت قبل ذكرى ميلاد الاميرة ميريت.. اتفهم يا وجه البومه.. اياك والخديعه. 


قلتلهم: 


دلوقتي معانا العصايه والتعزيمه، ناقص اغيب عن الوعي هنا علشان اقدر اشوف جسمي. 


نصير قال: 


الميزة الوحيدة اللي في اللعنه دى، ان الكهف اتنقل معانا للعالم الاثيرى اللي احنا فيه، يعني اكيد هنلاقي هنا تفاحه الجن. 


وبص لابويا وقال: 


فاكرها يا نينو، فاكر لما قطفت واحدة من اللي كان زارعهم جدك واديتهلك علي انها حشيش... فاكر عملت فيك ايه؟!! 


ابويا قال لنصير بصوت واطي: 


خلاص يا نصير العيال واقفه!! 


ورجع قال بصوت مسموع: 


بس دى قويه جدا! 


قولتلهم: 


عز الطلب كل لم اغيب عن الوعي هنا مدة اطول، هيبقي معايا وقت اكتر هناك. 


بدانا التنفيذ.. حطوني في اوضه الكهف وجابوا منقظ فحم مولع ورموا فيه ثمرة الجن، خرجوا برة بسرعه وبدا يتصاعد دخان الثمرة من المنقد، خدت نفس عميق من الدخان وغيبت عن الوعي. 


واتفاجئت من اللي حصل. 


يتبـــــــــع.. 

رابط الفصل الأخير من هنا


تعليقات



حجم الخط
+
16
-
تباعد السطور
+
2
-