"مارو_العاب الرحمه"
للكاتبه/لينا بسيوني
الفصل الحادى عشر بعنوان"جسد اثيرى"
فتحت عيني لاقيتني في القفص الحديدى وعيلتي جنبي، اول ما فوقت ابتسموا بعد ما كانوا بيعيطوا
وقربوا مني عشان يطمنوا عليا، بصيت علي جسمي
فلاقيته كله ملفوف بالكتان، اندهشت لما شوفت المكان اللي موجودين فيه..
نفس المعبد اللي قابلت فيه ميريت.
باب المعبد اتفتح واتفاجئنا بميريت بتجرى ناحيه القفص وهي ملهوفه وبتبكي الحارس فتحلها القفص
دخلته وقربت عليا، قالت وهي بتكح:
انت هبه الالهه.. انت ملاذى زمنقذى.
العيله كلها بصتلي وقالوا في صوت واحد ما عدا حنوش:
مين دى يا مارو؟!
حنوش قالهم:
اعرفكم.. الاميرة ميريت ابنه الاله.
ابويا قال:
الولية الي كانت عايزة تخلي مارو يركعلها.. روحي يا شيخه الهي تتحرقي في نار جهنم.
خالتي سندس جودت علي كلام ابويا وقالت:
الهي ما توعي تكسبي دنيا ولا اخرة يا كافرة يابنت الكلب.
حنوش كان بيتنطط وهو بيشاور علي ودنه، ابويا قاله وهو متعصب:
بتتنطط ليه؟!... عايز ايه!!... عايزنا نركعلها كمان.. لا يا حبيبي احنا ما يهمناش هي ولا اهلها ولاد الكلاب الكفرة اللي مش....
حنوش قطع كلام ابويا وقال وهو بيلطم:
ما تبس بقي.. بس منك ليها.. البنت فاهمه كل كلمه بتقولوها.
ابويا بصله باستغراب فحنوش قاله:
نسيت اقولكم اني اديتها الصدفه بتاعت نوشه علشان تعرف تتوصل معانا.
ابويا بص لخالتي سندس وحطوا راسهم في الارض وهما بيبصوا علي ميريت بطرف عينهم.
ميريت بصتلهم وقالت وهي بتكح:
لا عليكم، اعلم انك.....
مكملتش جملتها وفضلت تكح في المنديل، قالت وهي بتكح:
لقد اخرجتكم من العاب الرحمة.
عيلتي بصوا لبعض وهما فرحانين، قلت وانا بحاول اسند نفسي:
انا ملاحظ انك بتكحي كتير! هو في اله بيمرض!
قالت وهي مبتسمه:
تقصد يحتضر!!
سكتنا كلنا وبصينا لبعض، كملت كلامها وقالت:
جميع الكهنه والعرافين اكدوا انني ساغادر الحياه في ذكرى ميلادى القادمه، اي بعد ثلاثه ايام، وبالرغم من انني ابنه الاله الا ان ابي لم يستطع ان يجد لي الدواء.
ابويا قالها:
انتي عندك ايه؟! .... اصلي بعالج بالقران وحاسس انك ملبوسه.
فقالت باستغراب:
قران!!
نصير غمز لابويا وقاله وهو بيوشوشه:
ياعم والله القرآن لسه مانزلش
ابويا بصلها وقال:
ربنا يشفيكي، شكلك بنت حلال والله، كفايه لهفتك علي الواد مارو ولو اني مستغرب يعني، منين رمتيه للموت!! ومنين ملهوفه عليه كده؟!
قالت وهي بتبصلي:
كنت مخطاه، اردته ان يركع لي كي اشعر بالقوة وارضي غرورى لم اكن ادرك ان الالهه قد ارسلت لي هبتها.
وشاورت عليا وهي بتقول:
هذا الشئ!!! هو هبه الالهه، ارسلته لي ليكون منقذى.
خالتي سندس قالت لابويا:
انا مش فاهمه حاجه يا سيدى.. هي الوليه دى هبله!!
حنوش لطم وقال:
هي برضه اللي هبله ياستي قولنا بتفهم اللي بنقوله، نلم لسانا قدام الفراعنه، بدل ما نتجرص علي جدران المعابد.
قلت لحنوش:
استنا انت يا حنوش دى بتقول عليا شئ!!
نورا دخلت في الكلام وقالت:
انا مش فاهمه حاجه خالص...... ممكن حد يسلفني الصدفه بتاعته.
ابويا ادى نورا علي قفاها فجريت قعدت جنبي!!
خالتي سندس قالت:
ايوة صح يا وليه انتي ازاي تقولي علي مارو البغل شئ
ابويا اكد علي كلام سندس، حنوش كان بيدافع عن وجهه نظر ميريت والدوشه عمت القفص، نصير خبط علي القفص وهو بيقول:
بــــــــــــــــــــــــــــــــــــــــــــــــــــــــــــس.
كلنا سكتنا وبصيناله فقال:
نسأل الاسئله المهمه الاول؟!!
نصير بص لميريت، شارو عليا انا وحنوش وهو بيقول:
الجماعه قالولنا انك تعرفي موضوع البرديه وتقريبا عارفه احنا هنا ازاي فممكن واحدة واحده تفهمينا احنا جينا هنا ازاي؟!
ميريت قالت:
اين وجدتم البرديه؟!
ابويا قالها:
البرديه كانت عندى في الكهف وسط الكتب وباقي البرديات اللي ورثتها عن اجدادى.
قالت:
البرديه ستكون موجودة في مقبرتي بعد ثلاثه ايام، لكي تحفظ جسدى وروحي من العبث بهما ولكي اجد السلام في الحياه الاخرى، هي هديه من الكاهن الاكبر بمناسبه يوم ميلادى ووفاتي.
نصير سالها:
ممكن تقوليلنا نص البرديه؟!!
ردت ميريت:
في ذكرى ميلاد العظيمه ميريت ابنه الاله، ليعلم كل من يزعج روح الاميرة الطاهرة في مكان راحتها الابديه انه لن يترك له ارثا الا من النحس والرعب فلتعلق روحه في ذاكرها وتعذب حتي يفني جسده المصروع ولتغدو روحه في يوم ميلاد الاميرة الي جحيمه الابدى، انا الكاهن الاكبر اتحدث بقوة الكلمات، اتحدث باسرار التعاويذ والسحر.
وسكتت وقالت:
باقي البرديه عبارة عن تعاويذ اذا قرات في مكان لعن كل من فيه.
حنوش قال:
لعنه الفراعنه!!
فرددنا وراه بصوت واحد:
لعنه الفراعنه؟!!!
حنوش بص لنورا وهو مضيق عينه وقالها:
نورا.... البرديه اللي قراتيها كانت في صندوق من الصناديق اللي جبتها الكهف صح؟!
نورا بصيت في الارض وهي بتهز راسها بالموافقه.
نصير قال:
يعني احنا فين دلوقتي؟! انا مش فاهم حاجه احنا اتنقلنا بالزمن ولا اتلعنا؟!! يعني احنا موجودين هنا فعلا ولا لاء.
ميريت قالت:
انتم هنا وهناك، اجسادكم الماديه مصروعه في مكانها وزمانها اما ارواحكم فهي هنا في هذا الزمان، ستظل اجسادكم مصروعه في مكانها حتي تفني وستعذب ارواحكم هنا حتي الموت، سيموت جسدكم المادى معي يوم ميلادى.. اي بعد ثلاثه ايام.
ابويا قال:
انا توهت!! يعني احنا بنحلم ولا ايه بالضبط؟!
حنوش رد:
منقدرش نقول ان احنا بنحلم ولا نقدر نقول ان احنا في الواقع احنا ما بين الاتنين، نورا قرات نص اللعنه اللي في البرديه ولعنتنا كلنا، روحنا او جسمنا الاثيرى اتفصل عن جسمنا المادى واتنقل هنا زى ما بيحصل في الاسقاط النجمي وتقريبا ميريت واللي احنا شايفينه دة كله عالم اثيرى.. الموضوع معقد جدا.. لعنه الفراعنه زى ما قلتلكم.
ميريت قالت وهي بتاكد علي كلام حنوش:
تشتركون جميعا في كابوس واحد نهايته الموت.
خالاي سندس قالت لابويا:
هي الترجمه مش شغاله ولا ايه... انا مش فاهمه حاجه.
ابويا قالها:
دة انتي في نعمه انا فهمت وهتنقط وانا مصروع.
حنوش قال لـ ميريت:
بس اكيد في حل يرجعنا لاجسادنا تاني، احنا فيها اهوه ممكن نروح للكاهن ونقوله اننا اتصرعنا بالغلط.
قالت:
للاسف كلمات الكاهن قد تحررت وانطلقت ولن يستطيع احد ان يمسك لجامها.... اللعنه سقطت ولن.....
قطع كلامها صوت باب المعبد وهو بيفتح، دخل منه الحرس الملكي بازياءه المميزة، اصطفوا علي جوانب الباب ومر وسطهم رجل كبيبر لابس تاج ذهبي في مقدمته افعي وفي ايده صولجان واس ذهبي اول ما ميريت شافته طلعت بره القفص وقالت:
ابي!!!
ميريت جريت علي ابوها الملك وهي بتحييه باحترام وتبجيل، بصلها بغضب وشاور علينا من غير ما يبصلنا وقال:
صدق الحراس... كيف دخل هؤلاء العبيد المجرمين الي المعبد المقدس، شاور للحرس وقالهم:
اقتلوهم جميعا...
ميريت جريت علي القفص، وقفت قدامه، ركعت علي ركبتها وقالتله بتوسل:
يا ابن الشمس، ارجوك لا تقتلهم..
منتبهناش لباقي كلامهم لما نورا قالت بصوت عالي:
سارع!.... انا عارفه الكلمه دى.
بصينالها واحنا بنقول:
هشششش
تجاهلتنا وقالت بصوت عالي:
انا سمعتها بتقول سارع دى تقريبا معناها ابن الشمس... كان لقب بيتقال للملك.
ابويا ادها علي قفاها وقالها:
ماتتهدى بقي خلينا نسمع بيقولوا ايه!!
سمعنا الملك بيقول للحرس:
اعيدوهم الي العاب الرحمه.
الملك شاور للحراس، شد ميريت من ايدها وخرج بيها برة المعبد
الحراس قربوا علينا ورموا اكياس القماش.
ولم فوقنا كانت المفاجاءة.....
يتبــــــــع...
