رواية عالم موازي (كاملة جميع الفصول) بقلم هند سعدالدين
ـ هشوفك تاني؟
ـ مكتوب عليا أحبك في كل زمن وحياة، استناني يمكن الحياة الجاية تكون أرحم علينا..
زي النهاردة كُنا سوا!
كافيه في التجمع مليان ورد ووعود سابقة، هنا كانت أول مقابلة لينا، وهنا أول بحبك طلعت مني لقلبها..
الويتر جاي بيسألني أشرب إيه؟
_ قهوة بندق..
_ المكان بتاعك يا فندم لمدة ساعتين، جهزنا كل حاجة زي ما طلبتها، تؤمر بحاجة تانية؟
_ لأ كده كويس، هو أنا شكلي حلو يا مجدي؟
_ جميل يا فندم، هي مش الأستاذة كده اتأخرت؟
_ هي قالت لي استناها هنا، ليل جاية أنا عارف.
_ هشغلك مزيكا عشان تفك التوتر..
بطلع تليفوني وببص على صورنا ليلة إمبارح..
ببتسم بخبث..
| قاعد مَكانا وبسرح معاك، شايف بدا لك صورنا |
......
ليلة إمبارح بعد غيابها الطويل
بروح من شغلي، بخلع شالها المحاوط رقبتي، بلمس مكان بصمة ليل، ببتسم وأنا بستعيد ردها..
_ عشان كل اللي يشوفك يعرف إنك بتاعي لوحدي..
_ يعني أمشي في الشارع بالمنظر ده؟
بتبص لي بعناد طفولي وهي بتقولي "أه قولهم ده اثر فراشتي".
بستعيد ذكريات اليوم اللي رجعت لي فيه بعد الغياب والفراق..
| قلبي اللي حبك وياما اشتراك
حالف بغيرك مايرضي..
اتعب عشانك واقولك فداك
واستاهل تجيلي النهاردة|
صوت خَبط هادي على الباب، تلاقيه رجب جاي يسألني هنتعشا إيه، بكسل أقفل زراير قميصي المفتوح..
وقبل ما أنور اللمبة بفتكر إن بقالها شهر محروقة وبنسى أشتري واحدة..
بفتح الباب...
ببتسم؛ بتحرك إيديها وهي بترفع كتافها في علامة منها" جيت "
رافعة شعرها ديل حصان باستعجال، واضح من الخُصل الخارجة عن العشيرة، مش حاطة ميكب، النمش اللي على وشها بيقولي "هيت لك"
بشدها تدخل، واقفين ورا الباب، بتتنهد، بسألها..
_ هو الأسانسير مش شغال؟
بتحرك راسها بالرفض..
بمشي عشان أجيب لها كوباية ماية، بتمسك إيدي، بقف، بتشبك صوابعها بين إيديا، برفع راسها ليا، بتمد إيدها التانية تملس على وشي كإنها بتحفظه..
ليل رغاية معايا، سُكاتها مخيف، بتفرد لي دراعاتها..
من غير كلام بترمي في حضنها..
وبعد شوية وقت بتبعد عني ببطء، باخد إيديها وبندخل البلكونة..
بنقف جمب بعض قصاد سور البلكونة..
_ لسه بتحب الضلمة؟
_ لسه بحبك إنتي.
_ حجة البخيل..
_ حياتي من غيرك أبيض وأسود.
بتبتسم تاني وبحبها تاني!
بدندن" أحضنيني لو الغرام ممنوع"
امممممم وبتحضني تاني..
_ إنت بتحبني ليه؟
_ قدر ومكتوب، أمروني أحبك وأنا نفذت!
_ أنا جعانة أوي..
_ وحشني أكل من إيدك..
_ طيب في إيه هنا ينفع يتعمل..؟
_ مكرونة وبانيه..
....
ليل..
هفضل أحبك من غير ما أقولك، إيه اللي حير أفكاري!
حبي لبحر بيخليني دايمًا في صراع مع نفسي، ما بين أفضل معاه عشان قلبي عاوز كده وما بين عقلي اللي بيقولي " الحب لعنة، الحب بيضعف، الحب هيقضي عليكي"
لكني قررت أحط نهاية واروح له، فقدي ليه كان أكبر من قدرتي على التحمل..
بقوم الصبح بلاقي بحر محاوطني بدراعاته، بسحب نفسي عشان مقلقش نومه..
بتحرك ببطء..
_ رايحة فين؟
_ نازلة أخلص حاجات وجاية..
_ ليل..
بقف مكاني، بيترجاني صوته..
_ إنتي مش هتمشي صح؟
بجري أحضنه وبعيط بهيستيريا، كأني لسه مكتشفه الدموع، في ألم في قلبي..
بيطبطب عليا وبيتأسف لي على سؤاله، باخد إيده أحطها على قلبي..
_ اهدي أنا آسف، مقصدش حاجة أنا بس كان قصدي تطمنيني..
......
بحر..
|مش قولنا دايما هشوفك هناك غيرنا بإيدينا قدرنا|
ببص في الساعة، بتصل بيها ما بترودش!
بفتح العلبة اللي فيها خاتم محفور عليه ليل وبحر وتاريخ في المستقبل هيكون فيه فرحنا التاني..
برجع بالذكريات من تاني لأول يوم شوفتها فيه..
سألتها على طول..
_ هو إحنا متقابلناش قبل كده؟
_ اتقابلنا بس في زمن تاني..
_ ولما اتقابلنا حبيتك برضه؟
_ في كل زمن قدري أحبك يا بحر..
_ بحر؟
_ اسمك من اللحظة دي بحر.
_ إنتي متأكدة إني هحبك؟
_ أنا متأكدة إني بحبك من زمان.
| هنا ابتدينا وتاه الكلام
هنا اتلاقو الروحين..
هنا اتواعدنا بالحب اتعاهدنا، والوعد ده راح فين؟|
مسدج بتوصلني منها..
_ " فاكر أول يوم قابلتك فيه قلت لك إيه؟ "
بتصل بيها..
_ قولتي كل حاجة تخليني أقول عليكي مجنونة
_ قبل ما أمشي قلت لك إيه؟
_ يا ليل مش وقت ألغاز.. تعالي ونفتكر سوا..
_ خليك عارف إني هحبك في كل زمن أقابلك فيه، وإنك لو حبتني أكتر ده بيربط قلبنا سوا، علشان كده دايمًا فالغياب بنحس ببعض..
_ إنتي فين أنا قلبي بينبض بسرعة..
_ يا ريتنا اتقابلنا في ظروف وعالم يحبنا يقربنا ميبعدناش..
_ مش قولتي هتحبيني في كل زمن؟
_ وقالوا لي إني ملعونة، مكتوب لي أفارقك بعد ما أحبك!
_ تعالي يا ليل متبعديش..
.......
ليل..
| هنا انتهينا بكلمة سلام، هنا انتهت حياتي|
" على الركاب المسافرين على طائرة الإمارات العربية المتحدة التوجه نحو ......
بجر حبي وانهزامي لبحر مع شنطتي، ألم في قلبي بيزيد كل ما بتقدم خطوة، صوته على الخط..
_ قلبي بيوجعني، ليه يا ليل؟
_ عشان أنا همشي..
_ مش قادر يا ليل اتحمل الألم ارجعي، هموت من غيرك..
بقف على سلم الطيارة وأنا شايفة قلبي بيتفتت، بسمع صوت وقوع بحر، ببكي، بنصرخ من الألم، ثم..!
#الحلقة_الأولى
#عالم_موازي