سكريبت زعفرانة والمتحف (كامل) بقلم محمد عبدالرحمن
_لابسة فرعوني ليه يا زعفرانة؟
_عشان المتحف. وبعدين بتسأل ليه؟ ما أنت عملت صورتك فرعوني ومبسوط.
_عشان دي بلدي وحضارتي، إنما أنتِ عفريتة، لا ليكي دعوة بحضارتنا ولا متاحفنا، مالك ومال المتحف؟ أنتِ أخرك تبقي تُحفة وتتحطّي هناك.
_يعني الست لطفات أحسن منّي في إيه؟
_مالها الست لطفات؟
_لابسة فرعوني من الصبح، ولمَّا شُكري جوزها قام من النوم قالت له: دوواو نِفر.
_يعني صباح الخير بالهيروغليفي، إيه الغريب يعني؟
_ماهو شُكري ما يعرفش بقى، أول ما فتّح عينه وشافها قدامه طلع يجري وفضِل يصرخ.
_بيني وبينك شكل الست لطفات من غير حاجة يخلّيه يتخض، ما بالك لما يقوم يلاقيها لابسة فرعوني وبتقول له كلام هيروغليفي.
_عندك حق، ما هو برضه طلع يجري على البلكونة وفضل يصرخ ويقول: الحقوني؛ لعنة الفراعنة ظهرت في الشقة.
_ماعندوش حق لأنها لعنة لطفات مش الفراعنة.
_ما هي الست لطفات راحت وراه وفضلت تشِد فيه وتقول له: أنا مراتك يا راجل، لكنّه ماكانش مصدّقها وفضل مصمّم إنها لعنة الفراعنة.
_وبعدين حصل إيه يا زعفرانة؟
_ولا حاجة، راحت قلعت هدوم الفراعنة وشالت الغطا الفرعوني من فوق راسها.
_وبعدين؟ صدَّق إنها مراته؟
_لأ اتخَض أكتر لمَّا شافها على طبيعتها.
_الله يكون في عونه شُكري دَه، بيصعب عليّا.
_المهم بقى الست لطفات قالت له: لازم تودّيني المتحف.
_وشُكري جارنا وافق؟
_وافق طبعًا هوَّ يقدر يرفض، بس قال لها لمّا يفتحوا المتحف للزوّار.
_طبعًا عشان الست لطفات تروح تحُط بركتها هناك.
_أكيد.. وأيّ بركة.
_لحظة أشوف مين بيخبَّط.
***
_دوواو نِفر يا أستاذنا.
_صباح النور يا أستاذ شكري.
_كويّس إنك ترجِمت كلامي، كنت حامِل هَم إنك ما تعرفش المعنى وأقعد أشرح.
_لأ وأنت ما شاء الله عليك في الهيروغليفي، كاهن معبد في نفسك.
_أنا مش بحب أتكلم عن نفسي كتير، بس بالك أنت، أنا أخدت حتّة خضَّة لمَّا صحيت من النوم.
_خير اللهم اجعله خير.
_فتحت عيني لقيت المصريين القدماء قدامي.
_المصريين القدماء!
_قصدي الست لطفات مراتي، بيني وبينك أوّل ما شُفتها افتكرت لعنة الفراعنة نزلت على الشقة، بس طلعِت يا سيدي لابسة لبس فرعوني وبتحتفل بافتتاح المتحف.
_عملت خير يا أستاذ شُكري، مصر كلّها بتحتفل، مش هاتيجي على الست لطفات.
_ما أنا قُلت كِدَه برضه.
_المهم تقضّوا يوم سعيد، وكُل سنة وأنتوا طيبين.
_طبعًا أنا فخور جدًا، بالك أنت أنا لمَّا بحثت في شجرة العيلة لقيتني بنتمي لجدّي إياح ياه.
_إياح ياه مرّة واحدة؟
_أومال يا أستاذنا.
_وطبعًا إياح كان متجوّز جدّتك إيَّاحه.
_عرفت منين يا أستاذنا، شكلك قارئ تاريخ كويس.
_وهل يخفى القمر يا أستاذ شكري، وبعدين أنا جاري يبقى جدُّه إياح إله القمر عند القدماء المصريين ومعرفش؟
_أنا إنسان متواضع ومش بحب أتكلم عن نفسي، ولا بحِب الوسايط.
_ربنا يزيدك تواضع يا أستاذ شكري.
_وإيّاكم يا إبني.
_أومّال إيه الشَّاش اللي أنت لافف نفسك بيه دَه؟ سلامتك أنت محروق؟
_محروق إيه بس أنا بحتفل.
_بتحتفل بالشَّاش؟
_أنا هشرح لك، أنا بحتفل بالمصريين القدماء، أصل لقيت الست لطفات مراتي لابسة فرعوني، ولو لبست زيّها هاتفتكر إني بقلّدها ومش هخلص، قُمت لافِف جسمي في شَاش وعملت نفسي موميا، وأهي برضه من رموز الحضارة.
_ربنا يرحمك يا أستاذ شكري. قصدي ربنا يسعدك. المهم ماتكونش حطّيت زيبق كتير، أصل قرأت في برديَّة إنه بيعمل انتفاخ للمومياوات.
_ما شاء الله عليك يا إبني، موسوعة، فعلًا الزيبق بيعمل انتفاخ، جدّي إياح ياه وجدّتي إيَّاحه قالوا كده. بعد إذنك بقى أروح أكمل احتفال مع الست لطفات، أحسن تفتكر إني رُحت المتحف وسيبتها ومش هخلص.
_اتفضل يا أستاذ شُكري.
***
_إيه اللي أنتِ لبساه ده يا زعفرانة؟
_حلو؟
_اتحلى وَبَرِك عفريتة مناخوليا، هلاقيها منِّك ولا من الست لطفات وشُكري جوزها؟ إيه الشَّاش اللي أنتِ لبساه ده؟
_أصل عجبني الاستايل بتاع شُكري جارنا، قُلت أعمل زيُّه، وأهو تجديد برضه. كل سنة وأنت طيب.
_كل سنة وأنتِ موميا يا زعفرانة، عقبال التابوت عشان أرتاح منِّك خالص.
***
تمت...
حبّيت أحتفل معاكم بافتتاح المتحف المصري الكبير من خلال أكتر شخصية بتحبوها، إن شاء الله تعجبكم.
#زعفرانة_والمتحف
#محمد_عبدالرحمن_شحاتة
#أخصائي_رعب
تمت