سكريبت في مشرحة حلوان (كامل) بقلم مصطفي ايمن

 سكريبت في مشرحة حلوان (كامل) بقلم مصطفي ايمن

دايمًا لما كان بيجي في بالي أسم حلوان كنت بتنفض و بيحصلي تشنجات و جسمي كله بيعرق بطريقة فظيعة و دا بيحصلي بسبب قرار خدته زمان و بندم عليه لحد دلوقتي!!

عزيزي المرعب النهاردة جاي اكلمك عن افظع تجربة و مخاطرة خدتها في حياتي و هي دخول مشرحة حلوان!!

أنا دايمًا بحب التحديات و كنت على طول بكسب فيها بس المرة دي خسرت و الخسارة كانت جامدة ليا و لصحابي 

في يوم من أيام الدراسة قررت أنا وصحابي (مسلم) و (بيتر) ندخل مشرحة حلوان من باب التحدي ، كنا كل يوم نعدي من عندها بعد ما نخلص محاضرات و كل يوم كنت بفضل ابص عليها و اتأمل فيها ، ممكن تفتكرني مجنون لأني لما ببص عليها بحس أنها تحفة فنية رغم انها متهالكة و كل حاجة فيها مكسرة 

- أيه يعم مصطفى مركز في المشرحة ليه كدا نفسك ندخلها ولا أيه؟!!

- و ليه لاء يا مسلم أنت عارف أنا بحب التحديات 

- اه بس الكلام دا في البلايستيشن مش في مشرحة بلاش هبل أنت و هوا و يلا نلحق نلعب كام ماتش قبل ما الليل يحل علينا 

قال الجملة دي بيتر اللي سحب في أيده مسلم و اتحركوا و أنا لسة واقف زي مانا باصص للمشرحة ، في حاجة شداني ليها معرفش أيه هي، بس قررت أمشي !!

بعد ما لعبنا و خلصنا يومها فضلت سرحان في المشرحة.. روحت البيت و أنا تفكيري كله في أني ادخلها على الأقل ساعة واحدة فقط، في اللحظة دي بعت على جروب الدفعة سؤال شعلل الجروب 

- في حد جرب يدخل مشرحة حلوان؟!!

بعد كام دقيقة لاقيت الشباب كلها بدأت تدخل تهزر معايا و اللي يقولي أنت لو دخلت هتتلبس و اللي يقولي دا فيها بتوع المخدرات و اللي فيها وفيها بصراحة ضحكت شوية بس الرعب الحقيقي من الشخص اللي دخل كلمني خاص و عايز يدخل المشرحة ومتردد!!

دخل كلمني واحد أسمه (حمدان) و هو معانا طبعًا في نفس الكلية و أول كلامه كان بيتعرف عليا و بعديها قالي جملة غريبة!!!

- لو ناوي تدخل المشرحة خلي بالك من زينهم 

طبعًا أول سؤال جه في بالي أقوله مين زينهم و اخلي بالي ليه منه لكن الشخص الغريب دا عملي بلوك و اختفى و الأغرب أن لما دورت عليه في جروب الدفعة لاقيت رقمه مش موجود اصلًا ـ استغربت جدًا من طريقته و قفلت الموبايل يومها وأنا مفيش في دماغي غير دخولي مشرحة حلوان

تاني يوم نزلت الجامعة و قابلت مسلم و بيتر و حضرنا المحاضرات وبعد ما خلصنا يومنا الطويل دا اتجهنا ناحية الكافتيريا نشرب حاجة و هناك لاقيت ورقة ملزوقة على الحيطة عن تغيب شخص بقاله اسبوع اسمه 

(زينهم عماد الدين) 

أنا الاسم علق معايا و فجأة افتكرت الشخص اللي كلمني امبارح و قالي على شخص أسمه زينهم معقولة يكون قصده نفس الشخص معقولة زينهم دا حاول يدخل المشرحة و اختفى من ساعتها!! في الوقت دا ندهت على مسلم و بيتر وخليتهم يشوفوا الخبر و بعد ثواني لاقيت بيتر بيقولي 

- أيوا يعني نعمل أيه شاب مختفي هنبحث عنه يعني؟!!

لاقيت نفسي بقول لبيتر بكل تلقائية

- أنا الشاب دا عارف مكانه!!

سمعت ضحكة عالية أوي من مسلم  اللي رجع للطرابيزة اللي كانوا قاعدين عليها وبيقولي:

- طب روح الحقه بسرعة يعم المحقق كونان 

- أنا مش بهزر يا مسلم في واحد امبارح دخل كلمني على الواتس وقالي لو دخلت مشرحة حلوان خلي بالك من زينهم 

- مالك يا مصطفى بقالك يومين مفيش سيرة على لسانك غير مشرحة حلوان و عايز تدخلها و امبارح الاقيك على جروب الدفعة بتسأل الناس وخليت كل واحد ملوش لازمة يدخل يضحك و يسف عليك

- يعم دول شوية أطفال لكن الغريب في اللي دخل كلمني دا والأغرب النهاردة أول مرة اخد بالي أن في شاب من الجامعة عندنا مختفي من اسبوع 

الحوار كان داير بيني و بين مسلم لكن بيتر كان ساكت و مش بيتكلم حاولت ادخله الحوار و قولتله 

- ساكت ليه يعم بيتر ما تقول حاجة لصاحبك دا؟!!

بصلي كدا وقالي :

- أنا لو هقول هقولك أنت يا مصطفى اللي بتحاول ترمي نفس في الجحيم 

امبارح عايز تدخل المشرحة من باب التحدي و النهاردة عايز تدور على شخص أحنا مش عارفين هل هو جوا اصلًا ولا لاء

- طيب وفيها أيه يا جدعان لو عملنا الأتنين و نعرف هل زينهم دا جوا فعلًا ولا لاء 

- مصطفى حاول تشيل الموضوع من دماغك شوية ومتركزش في موضوع المشرحة دا كتير 

_ المهم يلا عشان نلعب بلايستشين هشيلك أنت ومصطفى كتير النهاردة يا بيتر 

- لا يا حبيبي أنت تشيل مصطفى لكن أنا تقيل عليك 

فضلوا الأتنين يتكملوا مع بعض الا أنا اللي مركز في المشرحة و مفيش غيرها في دماغي و مش قادر انسى زي ما قال بيتر خالص

- مصطفى......مصطفى.....يبني أنت!!!!!!!!!

-أيوا يا مسلم في أيه 

- بقالنا ساعة واقفين يلا عشان نمشي و نروح نلعب !!

- لا لا انا تعبان و مش هروح النهاردة 

- يعم بلاش رخامة بقا يلا نروح و فكك من المشرحة دي 

- يعم روحوا أنا مليش نفس اللعب 

- تعالى يعم بيتر شوف صاحبك اللي مش عايز يجي دا!

- مالك يا درش كل دا عشان زينهم اللي منعرفوش دا و على المشرحة دي طيب تعالى يعم و أنا هدخل اصورلك نفسي و انا جوا واطمنك أن مفيهاش حاجة اصلًا 

فجأة مسلم عينه برقت و قاله :

- أنت عبيط هتدخل هناك لوحدك 

- أه عشان مصطفى يستريح و يخرج من دماغه المشرحة دي و انها مفيهاش حاجة زي ما بقوله 

- انت بتخاف تبص عليها اصلًا يا بيتر هتدخل وتتصور فيها كمان 

- مصطفى أنت بتستفزني عشان ادخل طيب يلا بينا 

- يبني يلا بينا فين!!! المغرب قرب تتأذن طيب بكرا الصبح حتى 

- لاء دلوقتي 

فجأة لاقيت بيتر اتحول و خد  الموضوع على محمل الجد و قرر أنه يدخل جوا لوحده و يصور نفسه عشان يثبتلي أنها مفيهاش حاجة و كل اللي في دماغي خيالات بصراحة أنا حاولت استفزه عشان يعمل دا و في نفس الوقت كنت عايز اعرف قيها حاجة ولا لاء ، اتحركنا على هناك و وقفنا قدامها و المغرب بيأذن 

- راجع نفسك يا بيتر مفيش هزار 

- ارجع انت بس كدا يا مسلم و في خلال 10 دقايق هخرج و معايا صورة و أنا جوا 

دخل بيتر فعلًا و بصراحة أنا كنت واقف قلقان أول ما بيتر دخل و اختفى عن عيونة افتكرته مش هيخرج تاني زي زينهم اللي منعرفش عنه حاجة ، المشكلة أن مر 10 دقايق و أكتر و بيتر مخرجش ربع ساعة و بيتر لسة جوا 

- الواد مخرجش ليه يا مسلم تفتكر حصله حاجة!!

- اهو يعم جاي مبسوط و بيضحك 

بصيت عليه بس بيتر مكانش مبسوط و بيضحك خالص زي ما بيقول مسلم ، بيتر وشه كله الوان بيتر مخضوض بيتر خايف من حاجة بس بيحاول يخبيها علينا عشان منقولش عليه خواف 

- ها فين صورة البطل بتاعنا و هو وسط الأموات جوا !!

الجملة دي قالها مسلم و هو بيضحك بس أنا كنت مخضوض من نظرات بيتر اللي اتغيرت تمامًا عكس ما كان معانا من شوية!! 

بيتر فعلًا طلع موبايله و ورانا الصورة و هو داخل المشرحة بس مكانش مبتسم دا كان مقشر أو ممكن تقول أنه بيعيط شايف حاجة أحنا مش قادرين نشوفها ، كنت ناوي اتكلم مع بيتر بس مسلم تدخل و قال يلا نروح على البلايستيشن بس بيتر رفض و قرر أنه يمشي بدون سبب بعديها مسلم قالي نروح أحنا لكن أنا برضه رفضت و قررت ارجع البيت و أنا مصدوم من بيتر اللي خرج  بني أدم تاني خالص

يومها رجعت دخلت الحمام خدت دش و دخلت غرفتي و طلبت من أمي تجهزلي الأكل دخلت و أنا عمال ببعت رسايل لبيتر و برن عليه بس مش بيرد لأن عزيزي المرعب أنا جه في دماغي سؤال هموت لو بيتر مجوبش عليه حالًا بل ممكن اتجنن!!

الصورة اللي بيتر ورهلنا لما خرج من المشرحة كانت عبارة عن أنه قاعد على سلم و وشه مخطوف بس مش دي المصيبة الغريب في الصورة أنها مش سيلفي يعني من الأخر كدا مش بيتر اللي ماسك الموبايل لاء دا في حد مصوره!!! و دا مستحيل يحصل لأنه داخل لوحده اصلًا!!!

حاولت كتير ارن عليه بس بيتر مش بيرد ، المهم سبت الموبايل جمبي و بدأت اكل من الأكل اللي أمي جابته و بعد خمس دقايق لاقيت الموبايل بينر و المتصل بيتر !!

سبت اللي في ايدي بسرعة وفتحت عليه و لما فتحت سمعت خروشة و صوت حد بينهج وبيجري جامد صوت انفاس كتير أوي 

- بيتر سامعني رد عليا يبني أو اقف في حتة فيها شبكة 

-صهصهصهصه 

اصوات خروشة و مفيش حد بيرد عليا خالص بس فجأة لاقيت جملة واضحة بتتقال 

- مصطفى الحقني أنا في المشرحة لحد دلوقتي و مش عارف أخرج منعوني من الخروج!!!!

يتبع................... 

#مصطفى_أيمن_شحاته

#رعب_عالماشي

#قصص #رعب #خوف

               الفصل الثاني من هنا