"مارو_العاب الرحمه"
للكاتبه/لينا بسيوني
الفصل التاسع بعنوان "الاميرة ميريت"
"مـارو"
فوقت علي ريحه عطر نفاذة مغطيه المكان، فتحت عيني لاقيتني في مكان شبه المعبد، الاضاءة كانت خافته مصدرها ضوء الشمع قومت من مكاني وانا بترنح لحد ما قدرت اقف علي رجلي، لفيت بعيني علي المعبد اللي مليان تماثيل لقطط مصنوعه من الشمع، اتفاجئت بواحدة واقفه في اخر المعبد ومدياني ضهرها
كانت لابسه روب ابيض طويل، حوالين خصرها حزام وعلي راسها تاج ذهبي مزخرف ومرصع بالجواهر، سمعت صوتها بيقول:
ماسر قوتك؟!
معرفتش ارد عليها فسمعتها بتقول:
اجب ايها الغبي، فقد سالتك ابنه الالهه!!
قولتها:
انا مبعرفش اتكلم لغتكم!
لفت بظهرها لما سمعت لغتي الغريبه فبان وشها الجميل في اضاءة المعبد الخافته وعينيها الواسعه المرسومه بالكحل، فربت عليا فعرفت انها مصدر العطر
لما ريحته فاحت اكتر، كحت في منديل من قماش الكتان وقالت باستغراب:
هل تفهم كلماتي وماينطق به لساني؟!
هزيتلها راسي بالموافقه، فقالتلي:
اذا اجب علي اسئلتي!
هزيتلها راسي بالرفض، فبصتلي باستغراب، شاورتلها بايدى علي ودني وانا بقول:
اسمع وافهم ااها.
وشاورت علي بوقي وقلت:
انما اتكلم لاء.
طلعت الصدفه من ودني وحاولت اشرحلها، لكن مافهمتش مني حاجه، كل اللي فهمته اني فاهم لغتها لكن مبعرفش اتكلمها.
فقالتلي:
اي لغه تتحدث!!
معرفتش اشرحلها اي حاجه وطلع عيني علي ما عرفتها بالاشارة ان فيه حد ممكن يكون حلقه الوصل ما بينا،
شاورتلها وانا بلف ايدى في الهواء وبلف حوالين نفسي وبقولها:
اللي كان بيطوح الاسد معايا في الحلبه.
البنت بعتت الحرس عشان يجيبوا حنوش، حنوش دخل علينا المعبد وهو متسلسل، شاورت للحرس علشان يفكوا حنوش، اول مافكوه جرى علشان يطمئن عليا
فطمنته وسالته علي عيلتنا، قالى:
محبوسين في القفص المعدن ومتكبلين بالاصفاد والسلاسل.
بص علي البنت وقالي:
مين الموزة دى؟!!
قولتله:
بتقول انها ابنه الالهه!! وبتحاول تتواصل معايا لكن انا مش عارف ارد عليها فقولتلها عليك عشان تبقي حلقه الوصل و.....
قطع كلامي وقالي:
ما كنت طلعت الصدفه من ودنك واديتهالها وبدلتوا فيها رايح جاي مع الحوار.
قلتله باستغراب:
ايه دة هي لو حطت الصدفه في ودنها هتفهم اللي بقوله؟!
قالي:
ايوة ياعم ما انا قلتلكم بترجم لاي لغه.. علي حسب دماغ اللي لابسها.
قلتله:
مخدتش بالي خالـــــ.......
قطعت كلامي لما لاقيتها بتسال حنوش وبتقوله:
هل تتحدث لغتنا؟!
فرد عليها وقالها:
بطلاقه كالبلب.
فقالتله وهي بتبصلي:
من انتم؟!
قالها:
نحن عائله من الجن والانس.
قطعت كلامه وقالت وهي بتشاور عليا:
هل هذا من الجن؟!
قال وهو بيطبطب علي كتفي:
مارو!.. لا خالص.. ابننا مارو نصه جن والتاني انسان.
سالته باستغراب:
نصف جن ونصف بشرى!! كيف يفهم كلماتي ولا يتحدثها
حنوش حط ايده في جيبه وطلع الصدفه اللي كانت هتاخدها نورا، مد ايده علشان يديهالها وهو بيقول:
هكذا....
بصت علي الصدفه اللي في ايد حنوش باستغراب من غير ماتمد ايدها.
فـ حنوش قالها:
نحن لا نجرأ علي خيانه ابنه الالهه... ضعيها في اذنك كي تفهمي لغتنا.
اخدت الصدفه من حنوش وهي مترددة وحطيتها في ودنها، حنوش اتكلم عربي وسالها اذا كانت فاهمه او لاء
فتجاهلته وشاورتلي علشان اقول اي حاجه.
قولت:
تست تست..... واحد اتنين تلاته.
هزيت راسها وهي مبهورة بالصدفه وقالت:
ما اسمك؟
رديت:
اسمي ماهر وعيلتي بتدلعني وبتقولي مارو.
قالت وهي بتتجهأ حروف اسمي:
م ا ر و، يبدو كاسم اله...
اديتنا ضهرها، مشيت ناحيه كرسي ذهبي في وسط المعبد وقعدت عليه
وقالت وهي بتريح جسمها المرهق علي الكرسي:
كنت اسير متخفيه وسط في العامه في السوق ورايتك وانت تصارع الثور
ببساله وقوة لم اشهدها من قبل، عدت الي هودجي قبل ان تندلع الحرب بينكم وبين الكاهن الاكبر.....
قطعت كلامها وفضلت تكح كتير جدا وهي حاطه المنديل القماش علي بوقها، استرجعت انفاسها، كملت كلامها وقالت:
تقدمت بهودجي وامرت الكاهن الاكبر بالا يقتلكم وان يمنحكم فرصه اخيره للحياه.
قولتلها:
احنا مش مجرمين ومكناش نقصد نعمل اي مشـ..
قطعت كلامي وقالت:
ابهرتني في الالعاب تستحق اللقب الذى اطلقه عليك العبيد.. شجاع..
قوى، مقدام ولا تخشي الموت.. شعرت لوهله ان الموت يخشاك.
حنوش قالها وهو بيطبطب علي كتفي:
الواد مارو يعجبك اوى انا اللي مريبه.
بصيت لحنوش باستنكار فشال ايده من عليا.
البنت كحت تاني وفضلت تكح كتير فسالتها:
انتي كويسة؟!!
اخدت نفسها وابتسمت وهي بتقول:
من اين انتم؟! وما هذه اللغه الغربيه التي تتحدثون بها؟!
حنوش دخل في الحوار وقال:
احنا من هنا.. من مصر.. بس جينا من زمن تاني.
قالت باستغراب:
اي زمن؟! وكيف جئتم الي هنا؟!
حنوش قالها:
جينا من المستقبل، منعرفش جينا ازاي، اخت مارو الصغيره تعشق العبث بالسحر، قرات سحر فرعوني عن طريق الخطا وتقريبا هو السبب في وجودنا هنا، كل اللي اخت مارو فاكراه انها شافت صورة لكاهن متكا علي عصايه او....
قطعت كلامه وقالت:
هل قرات السحر من برديه؟!!!
قولت انا وحنوش بصوت واحد:
برديه!!
بصتلها باستغراب وقلت:
عرفتي منين ان اختي قرات برديه؟!
مردتش علي سؤالنا، سكتت شويه وقالت:
في استطاعي ان اعفو عنكم واخرجكم من العاب الرحمه.. لكن بشرط؟!
بصيت علي حنوش اللي كان مستغرب زيي وقولتلها:
ايه الشرط!!
قالت:
اركعوا لي!!
وشي اتقلب وبصيت علي حنوش، لاقيته راكع علي الارض وبيهز في راسه وهو بيقولي:
اركع اركع!
قولتله:
لا طبعا، استغفر الله العظيم مش هركع لبني ادم!!
حنوش نغزني، جز علي اسنانه وهو بيقول:
ياعم هي قلتلك اعبدها.. ماتركع يابني.. بتقولك هطلعنا من الالعاب، وشكلها عارفه بموضوع البرديه وممكن ترجعنا... ما تضيعش الفرصه.
قلتله:
لا يا حنوش انا لاديني ولا كرامتي يسمحولي اركع لاى شخص مهما كان.
البنت كانت بتبصلي بغيظ وغضب، وشها اتقلب تماما.
حنوش قالي:
اركع يا مارو عشان خاطر اهلك.
مردتش عليه وبصتلها بتحدى، حنوش قالي وكان هاين عليه يعيط:
طب اركع عشان خاطرى، ابوس ايدك.
رفضت تماما وقولتله:
كرامتي لا تمسح.
لاقيتها نادت بصوت عالي علي الحرس، دخلوا بسرعه، مسكوني انا وحنوش وبداوا يكبلونا بالاصفاد الحديد والسلاسل، حنوش لطم علي وشه وهو بيقول:
الله يخربيتك يا مارو!!
قالتلي بغضب قبل ما الحرس ما يخدونا ويطلعوا:
تتحدي الاميرة ميريت ابنه الالهة!... لنرى كيف سيكون حال كرامتك امام المحارب الاعظم.
الحرس رجعوني انا وحنوش القفص الحديدي مع باقي العائله واللي اول ما شافونا جريوا علينا وقالولي:
مارو انت كويس؟!!
قلتلهم:
انا كويس متخافوش....
رد حنوش وقال بخيبه امل:
لا خافوا.. مارو البغل ضيع من ايدينا فرصه اننا نطلع بره الالعاب وتقريبا كمان ضيع فرصه اننا نرجع زمنا تاني او علي الاقل نفهم ايه اللي حصل.
بصولنا باستغراب وسالوا عن اللي حصل فحنوش حكالهم كل حاجه بطريقته.
اتفاجئت برد فعل ابويا وقف في صفي وقال بفخر:
جدع ياد يا مارو..
نصير قال لابويا باستنكار:
انت بتشجعه.. عادي يعني بالنسبه ليك ان ابنك يضحي بيكم كلكم علشان ركعه.. ياجدع حرام عليكم، ده انتو بتركعوا لحريمكم وانتو بتقدموا خاتم الجواز.. ولا الركوع حلال في حالات المحن بس.
ابويا قال لنصير:
عايزة يركع لحد بيقول علي نفسه اله!! انت جني مؤمن يا نصير وعارف ان ده كفر!
حنوش رد:
الاعمال بالنيات يا نينو مكنش هيركع وهو في نيته انه بيعبدها يعني!..
عادى زى ما نصير قال كانه بيتقدملها للحواز مثلا وكان زمنا خلصنا من الكابوس دة.
قطعنا حوارنا لما لاحظنا حركه غريبه في الاقفاص اللي جنبنا وشوفنا الكهنه اللي وافقين علي الاقفاص بيكتبوا اسامي الناس اللي في كل الفقص في ورقه صغيرة، بيطووها وبيحطوها في اناء فخارى.
نصير قال:
دول بيعملوا قرعه!!!!! شكلها ليها علاقه بالمسابقه التالته.
ابويا قال:
اومال فين الكاهن بتاعنا!؟
حنوش رد بقلق:
انا مش مطمن!!
وفجاءة شوفنا........
يتبع...
