google.com, pub-6403815486397132, DIRECT, f08c47fec0942fa0 رواية مارو العاب الرحمه الفصل السابع " بحيرة التماسيح "
روايات حديثة

رواية مارو العاب الرحمه الفصل السابع " بحيرة التماسيح "


"مارو_العاب الرحمه" 

للكاتبه/لينا بسيوني

الفصل السابع بعنوان"بحيرة التماسيح" 



صحينا علي صوت خبط قوى، فوقنا لاقينا نفسنا نايمين فوق قارب كبير وتماسيح ضخمه بتخبط في القارب 

مسكنا بسرعه انا وابويا ونصير وحنوش المجاديف

بتاعت القارب وفضلنا نضرب بيها التماسيح اللي بتهاجمنا، كنا بنضربهم فوق مناخيرهم وفي عينيهم

التماسيح بعدت عن القارب وهاجموا قارب تاني كان الناس اللي فيه لسه مفاقوش من المخدر اللي كان في الاكل. 

بصيت بعيني علي البحيرة واللي كان في اخرها مضيق ضيق جدا ميعديش غير قارب واحد، فهمت اننا علشان نوصل للبر التاني لازم نعدى من المضيق. 


الجمهور كان واقف علي ضفاف البحيرة بيتفرج وبيشجع بالطبول والمزامير 


كنا واقفين في المركب وبنحاول نستوعب المشهد بعد ما كل الناس اللي في القوارب فاقت. 

الفوضي عمت البحيرة، القوارب كلها بدات تخبط في بعضها والناس اللي عليها هاجموا بعض بالمجاديف 


ابويا قال لنصير بلهفه: 

ادينا طلعناه برة القفص اهو، انقلنا بقي يا نصير. 


حنوش قال: 

مش هينفع برضه، القارب والبحيرة متعزم عليهم، مش بقولكم الفراعنه دول ولاد لاذينه، لازم نتحرك بالقارب بسرعه ونعبر البحيرة. 


ابويا قالنا: 

اوزنوا القارب... نصير ومارو خليكوا ناحيه الشمال 

وتعالا يا حنوش جنبي علي، اليمين، وانتي يا سندس اقعدى في نص القارب وخدى البت في حضنك علشان تبقوا في الامان. 


اتوزعنا بسرعه وكل واحد كان واقف وماسك في ايده مجدافه،  خالتي سندس قعدت في نص القارب وخدت نورا في حضنها وتبتت فيها،  بدانا نجدف بعيد عن التماسيح والقوارب اللي بتخبط في بعضها وفينا

ركزنا في اننا نعبر المضيق للبر التاني، الناس اللي علي القوارب التانيه ماسبوناش نعبر من جبنهم،  هاجمونا واصطدموا بينا علشان يوقعونا وفيه منهم اللي كان بيضربنا بالمجداف. 


اتفاجئنا بقارب بيقرب علينا بسرعه واصطدم بينا بقوة

كان هيقلبنا كلنا في البحيرة بس عرفنا نوزن القارب تاني قبل ما يختل،  سمعنا بعدها خالتي سندس بتصوت وبتبص علي ايديها الفاضيه وبتقول: 

يالهووووووى الحق ياسيدى... نورا وقعت في المايه!! 


كلنا بصينا علي البحيرة فلاقينا نورا بتعوم وبتهرب من التماسيح اللي بتطارها. 


نطيت بسرعه في المايه علشان انقذ نورا،  ابويا ونصير وحنوش فضلوا يضربوا اللي اصطدموا بالقارب بتاعنا علشان يوقعوه. 


خالتي سندس كانت بتصوت وبتقول: 

يالهوووووتي غيتونا... ياخلق... الحقونا ياناس. 


عومت بسرعه ناحيه نورا،  شيلتها من البحيرة بدارع واحد ورفعتها لفوق، التماسيح بدات تهجم عليا رفصت تمساح منهم برجلي في بطنه فاتنطر بعيد خالص

هجم عليا تمساح تاني فضربته بقضبه ايدى في مناخيرة، حاول تاني فاديتله اكتر من بوكس في عينه فسحب نفسه من عندى وجرى ناحيه ناس تانيين واقعين في البحيرة. 


عومت بسرعه وانا شايل نورا علي دراع واحد لحد ما وصلت بيها للقارب بتاعنا ورفعتها عليه،  خالتي سندس خدتها مني في حضنها وهي بتعيط، جيت اطلع علي القارب اتفاجئت بتمساح قفش في رجلي وسحبني قبل ما اطلع،  وقعني في المايه تاني وبدا يتدحرج ويلف بيا وهو قافش علي رجلي التدحرج مع التمساح بيرهقه فبيقف فترة يريح وبعدين يكمل لف تاني انتهزت الفرصه اللي وقف فيها وفضلت اضربه برجلي التانيه في صمام الحنك.ففتح فكه لااردايا، طلعت رجلي من بوقه ومسكت فكيه الاتنين بايدى، صرخت وانا بفسخ فكيه وبفصلهم عن بعض. 


طلعت تاني علي القارب وانا رجلي بتنزف مكان عضه التمساح،  خالتي سندس صوتت لما شافت الاصابه في رجلي، ابويا قال لحنوش يجدف بالقارب لوحده وقال لنصير وهو بيرفع مجدافه: 

معايا يا نصه نوقع ولاد الهرمه دول!!! 


حنوش انطلق بالقارب وهو بيجدف بسرعه رهيبه في الوقت اللي ابويا ونصير كانوا بيضربوا الناس اللي فوق القوارب بالمجاديف وبيوقعوهم في البحيرة

حنوش سخن اكتر وجدف بسرعه ناحيه المضيق وكان بيقلب اي قارب في سكته، وصلنا للمضيق، بصينا ورانا لاقينا كل القوارب مقلوبه في البحيرة والناس اللي كانوا فيها بيعوموا وهم بيحالوا يهربوا من التماسيح قبل ما تفترسهم. 


وصلنا لبر الامان بالقارب، اول ما وصلنا عيلتي اتلمت حواليا عشان يطمنوا علي رجلي، الجمهور اللي كان بيتفرج علي المسابقه كان بيهتف بحماس وبيقول: 


كني... كني.. كني!! 


حنوش بص الجمهور اللي حوالين البحيرة وقال: 

علي ما اعتقد كده الناس دى بتهتفلك يا مارو!! بيقولوا كني..  يعني قوى وشجاع. 


الكاهن خنوم قرب لينا ونط في القارب وهو في ايده قماش من الكتان وطبق فخار جواه خليط من الاعشاب 

مسك رجلي وطهر الجرح بالماء وهو بيتمتم بتعزيمات 

دهن بالخليط ولف رجلي بالكتان، بعد ما خلص خد طبق الفخار وباقي القماش، لف بظهره ونط بره القارب وهو بيقولنا: 


مبروك الفوز.. استعدوا المسابقه الثانيه. 


بعدها اتفاجئنا بالقارب بيطلع دخان من كل حته

دورنا علي مصدر الدخان، مالقنهوش فضلنا نح جامد وبعدها اغمي علينا... 


حسيت بروحي بتتسحب مني وشوفت جسمي في الكهف بيترعش

روحي طافت حوالين جسمي ورجعتله تاني. 


فوقت لاقيتني جنب عيلتي في قفص خشب لوحدنا ومفيش جنبنا اقفاص تانيه كنا وسط حلبه كبيبرة شبه الملعب. 


الجمهور كان قاعد في مدرجات الحلبه في حاله تراقب وبيبصوا كلهم في الاتجاه المعاكس لينا كانهم مستنين حاجه. 


عيلتي كلها وقفت ما عدا انا وبصوا في الاتجاه اللي بيبص فيه الجهمور 

فجاءة باب القفص اللي احنا فيه اتفتح كلهم اتخضوا ورجعوا لورا 


نصير قرب ناحيه الباب بص برة القفص وقال: 


مفيش حاج...... 


قطع كلامه لما............ اتصدمنا كلنا من اللي شوفنا


يتبــع.. 

رابط البارت الثامن

تعليقات



حجم الخط
+
16
-
تباعد السطور
+
2
-