.png)
نمر بفزع: فين حور؟ عز بص حواليه بسرعة هو وأسيل وبسمة بتبصلهم بتوتر. نمر بخوف: حور! عز وهو بينده على حور: حور! حور! انتي فين؟ وفي خلال عشر دقايق كانت البلد كلها مقلوبة على حور، وكل البلد بتدور عليها. ونمر هيتجنن وغضبه وصل لأعلى مراحله. فرج: مش لاقينها يابيه. نمر عينه احمرت بغضب: يعني إيه؟ يعني إيه مش لاقينها؟ حور لو ما ظهرتش خلال ساعة هقلب البلد دي فوق تحتها، انت سامع؟
فاروق بخوف من نمر: اهدا يابني، هنلاقيها. هتكون راحت فين يعني؟ نمر: معرفش، معرفش. نمر اتصل على زين: الو يازين، عايزك تيجي الصعيد حالا، في أسرع وقت. زين: في إيه يانمر؟ نمر: حور، حور معرفش راحت فين. زين بخضة: إزاي متعرفش يعني؟ نمر: معرفش، يلا يازين تعالى. زين: أنا جاي حالاً. قفل نمر الفون وخرج هو يدور على حور هو والبادي جاردات، والبلد كلها وصلها خبر اختفاء حور. نمر بقى يدخل كل البيوت ويدور في كل الأماكن.
عند حور، فاقت لقت عينها مربوطة ومش شايفة أي حاجة، في مكان مفيهوش أي صوت. حور ببكاء: أنا... أنا فين؟ دخل رجل باين عليه الخبث والشر: أهلاً، أخيراً صحيتي. حور ببكاء وخضة: أنا... أنا فين؟ أنا بعمل إيه هنا؟ الراجل: اهدي بس ياحلوة، أنا مش هاكلك. حور بعياط: ن... نمر، نمر فين؟ أنا عايزة نمر. الراجل اتخض شوية إنها تبع النمر: انتي تبع النمر؟ حور: حاجة متخصكش، انت هترجعني دلوقتي، انت سامع؟
الراجل بضحك: هههه، حلو الكلام ده ياقطة، ده إحنا هنطلع منك بمنفعة. أنا بقول البس النضيف ده ميجيش وراه غير حد نضيف. عند نمر، كان زين وصل بأسرع طريقة وقابل نمر وعز وكريم والرجالة، وكان منظرهم في هيبة جامدة جداً. وهو نمر وكريم ماشيين جنب بعض، ووراهم عز وزين والحراسة. نمر كان في جزء في قلبه واجعه وكان خايف عليها جداً، وكأنها بنته وقطعة من قلبه.
كل مكان بيدخلوا الناس بتقف برهبة وخوف. لحد ما جم في مكان في آخر البلد شبهه مقطوع، وكانوا مكملين مشي إلا نمر اللي وقف مرة واحدة وحس بنغزة في قلبه أو إن قلبه بينبض: حور في المكان ده. زين: إزاي يعني يانمر؟ نمر: مش عارف، حاسس إنها هنا، صدقني. فضلوا يدوروا في المكان لحد ما لقوا مخزن قديم وفي أصوات.
نمر شاورلهم يسكتوا ووقف ورا شباك إزاز مكسور، وشاف راجل واقف وشه في خط طويل علامة تشوه، ووراه رجالة كتير، وواقف بيكلم شخص بس نمر مش شايف بيكلم مين. ولكن قلبه مش حاسس بل متأكد إنها حور. نمر بلهفة: حور هنا. وفعلاً لمحها قاعدة، إيدها مربوطة بحديد. سلسلة حديد ربطين إيدها ورجلها في بعض، وعينها متغمية وبتعيط وبتشهق بكل قوتها. نمر بغضب ممكن يحرق البلد كلها: يا ولاد الكلب!
دخل من ناحية الباب الخلفي، ومجرد ما ضربها ضربة برجله كان وقع كله في الأرض. أما الراجل فبص وراه بخوف ورجالته نفس الكلام. نمر بخبث: وحياة أمي إن ما خليت النهارده آخر يوم في حياتك، مبقاش أنا النمر. حور صرخت بسعادة: نمر! نمر بصلها بلهفة وقال لرجالته بغضب وشر: خدوا كلهم على برا، وشايف الحديد اللي مربوطة بيه ده؟ أنا عايزك تضاعفوا وتربطهم بيه وتستناني برا بيهم، سامعني؟
خرجوا البادي جاردات وهما مكلبشين الراجل والاتنين اللي كانوا معاه بحديد قوي جداً. أول ما خرجوا، جري نمر على حور بلهفة وفك الحديد اللي على إيدها ورجلها. أول ما شالوه صرخت بوجع لأن الحديد عور إيده. نمر دموعه نزلت وخدها في حضنه بكل قوته، وكأنه هيدخلها جوا ضلوعه: آآآه ياقلبي، الحمد لله، الحمد لله إنك رجعتيلي. أنا مش هعرف أعيش من غيرك. انتي كويسة؟ عملوا فيكي حاجة؟ ابتدى يبص في كل حتة فيها زي المجنون.
حور بدموع: أنا كويسة، أنا كويسة، أنا بس عايزة أمشي من هنا. نمر: حاضر، حاضر، يلا. عز بابتسامة حضنها: ألف حمد الله على سلامتك. حور: الله يسلمك. زين بمرح: حمد الله على السلامة ياحور. حور: الله يسلمك. كريم: قلقتينا عليكي ياحبيبتي. حور بابتسامة: أنا كنت متأكدة إنكم هتلاقوني، عشان كده مخوفتش. نمر بابتسامة: شطورة ياقلبي. خدوها وخرجوا من المخزن، لقوا البادي جاردات واقفة ومكتفة الرجالة.
نمر: عز، حور متسيبش إيدك منها. حور خليكي ماسكة في إيد عز. حور: حاضر. نمر بصلهم بابتسامة كلها خبث وشر: أما انتوا فتعالوا معايا. مسك نمر رئيس العصابة بتاعهم من هدومه وجرّجره قدامه، والبودي جاردات ماسكة الاتنين اللي كانوا معاه، ووراهم عز وزين وكريم وحور. كريم: هتعمل إيه يانمر؟ نمر: كل خير، هعمل كل خير.
مشي بيهم لحد البلد نفسها، وكانت الناس كلها متجمعة. وقف نمر في النص وسط الناس وهو ماسك سمير من قفاه، واتكلم بصوت عالي جداً: ده اللي خطف حور، واللي يقرب على حاجة تبع النمر يبقى عقابه إيه؟
ضربه بالقلم على وشه: لما انت ياالا تتجرأ وتقرب من حاجة تخص النمر، مش هموتك وأريحك، لا، هخليك تتمنى الموت الأول. والبلد كلها عارفة مين النمر اللي ولا بيرحم ولا بيسامح، فأنا ولا هرحمك ولا هسامحك. أنا جيت وسطيكوا يا أهل البلد عشان أعرفكوا إن اللي هيقرب من حاجة تخص النمر بيبقى فيها موته. كمل طريقه وجرّجره وراه، وسمير بيصرخ زي الستات: ارحمني يانمر بيه، ارحمني. نمر وهو بيزعق: اخرس يااض.
مشي بيه لحد ما وصلوا مخزن كبير وقديم. نمر: دخّلهم جوه واقفل عليه. الحارس: حاضر يانمر بيه. مشي نمر هو وزين وعز وكريم وحور عشان يروحوا على البيت. أول ما دخلوا البيت، لقوا ناهد وأسيل قاموا جريوا عليهم. أسيل حضنت حور: حبيبة قلبي، انتي كويسة؟ حور وهي بتحضنها: الحمد لله، أنا كويسة. ناهد حضنتها: خوفتينا عليكي ياحبيبتي، حمد الله على سلامتك. حور: الله يسلم حضرتكم. نمر: حور، قوليلي مين اللي خلاكي تبعدي عننا كده؟
حور بصت لبسمة بخوف: ب...
تابع الفصل التالى من هنا
