عادل: لا أنا مش سبت البيت ومشيت، أنا بس كان ورايا مشوار مهم وكان لازم أروحه. فيه حاجة يا هادية؟ هادية: أبداً. فريال: أمال هي بتقول غير كده ليه؟ عايزة تشوف رد فعلي، يعني عارفة عنك حاجة ولا لأ. دي قالت إنك اتخانقت معاها وسبت البيت ونزلت. عادل: لا لا مافيش حاجة، إحنا كويسين جداً مع بعض. وفي الوقت ده أنا روحت لماما وكنت مخنوقة أوي. كانت ماما مش موجودة، فتحت التلاجة وطلعت أكل وفضلت آكل. أنا كده لما بكون مخنوقة لازم آكل.
دخلت ماما: بسم الله الرحمن الرحيم. أنتي هنا من امتى وبتعملي إيه؟ يا نهار أبيض، أنتي مطلعة أكل الأسبوع كله وبتعملي تاكلي فيه؟ فريال: أكل أسبوع إيه دي تصبيرة عقبال ما تيجي المهد. أنا عايزة أسألك على حاجة بس من غير شتيمة، هو عادل كلمك؟ الأم: لا مش كلمني، هو فيه حاجة ولا إيه؟ أوعي يا بت تكوني زعلتيه. فريال: لا ما زعلتوش. المهم أنا ماشية، بس هاخد باقي الأكل ده معايا، لأني مش عاملة أكل ومش قادرة أقف في المطبخ.
الأم: خدي هنا يا بت، قولي لي فيه إيه. وفي الوقت ده رنت عليا هادية. هادية: أنتي فين يا بنتي؟ أنا قدام شقتك. بصراحة أنا خوفت عليكي فجيت أطمن. فريال: ثواني وطالعة لك. بقولك إيه، خلي الأكل خالص، أنا عرفت هعمل إيه. ودخلنا الشقة. هادية: ممكن أفهم بقي فيه إيه وإيه اللي حصل مع عادل؟ فريال: بقولك إيه، ما تساعديني في ترويق الشقة وتعالي نعمل أكل سوا. خليكي جدعة. هادية: عينيا ليكي، ده أنتي أختي حبيبتي والله.
فعلاً عملت كده معايا، والغريبة إنها مش سألت تاني فيه إيه، وبعدها مشيت. عادل جه. عادل: مساء الخير. مالك قاعدة كده؟ ومعقول ريحة الشقة حلوة كده؟ فريال: والله مش بيهون عليا زعلك، بس أنت عادي ممكن تزعلني. حقك عليا يا عمري. عادل: أنا نفسي ترجعي فريال بتاعت زمان، أنا بحبك ومش عايز أي حاجة تبعدني عنك. فريال: أوعدك هتغير يا حبيبي، وهعمل لك كل اللي نفسك فيه. تاني يوم راح الشغل وكان مبسوط إنه نزل في يوم واحنا مش متخانقين.
هادية: أستاذ عادل، حمد الله على السلامة. عادل: الله يسلمك. عايزك تجهزي الناس عشان عندنا ميتنج مهم أوي. هادية: عينيا لحضرتك. المهم، عجبك الأكل اللي عملته امبارح؟ بصراحة أنا مهنش عليا أعرف إن فيه مشكلة بسبب النظافة والأكل ومش أدخل. عادل: إيه ده، هو أنتي اللي كنتي عاملة الأكل؟ طيب امتى وإزاي؟
هادية: بعد ما قفلت السكة معاك، أنا روحت عند فريال وشوفت الشقة بتاعتها مبهدلة أوي ومعندهاش أكل. قولت يبقى هو ده السبب، فعملت لك الأكل. كان إيه رأيك في الجلاش؟ عادل: آه حلو، تسلم إيدك. بعد إذنك عشان عايز أعمل تليفون مهم. هادية: آه تمام. بس شكل فريال مش قالت لك إن أنا اللي كنت عاملة الأكل؟ أرجوك أوعى تقولها لتزعل مني. عادل: هادية، هو أنتي ليه بتعملي معايا كده؟ عشان صحبتك ولا عشان خاطري أنا؟
هادية: بعد إذنك يا أستاذ عادل. وبعدها خرجت من المكتب. اتصلت فريال. عادل: ألو، والله كنت لسه هكلمك. الجلاش اللي كنتي عاملة امبارح كان تحفة. ينفع تعملي لينا انهارده كمان؟ فريال: لا، أقصد يعني هناكل نفس الأكل يومين ورا بعض يا حبيبي؟ مينفعش. عادل: اعمل إيه، نفسي فيه. وبصراحة كنتي عاملة تحفة أوي. هتنسيني انهارده على الأكل. وكانت هادية واقفة عاملة تسمع الكلام اللي بينا.
هادية: أيوه كده، حس بيا بقي. أصل بصراحة حرام كل الحاجات دي تكون مع واحدة مستاهلاش. وفي الوقت ده دخلت آيه. آيه: إزيك يا هادية؟ عاملة إيه؟ مالك فرحانة كده؟ هادية: مين آيه؟ خير، أنتي إيه اللي جابك هنا؟ أقصد يعني غريبة. آيه: أصل بصراحة حسيت إن غلط في حق فريال وكنت عايزة أروح ليها، بس بصراحة مسكوفة أروح لها لوحدي. قولت أجي لأختي حبيبتي. هادية: فريال مش عايزة أعرفك تاني، ابعدي عنها. هي عندها اللي مكفيها.
آيه: مالك يا هادية؟ عمرك ما كنتي كده، فيه إيه؟ هادية: أبداً مافيش، بس أنا بصراحة بقيت بحب فريال أوي، وأي حد هيفكر يأذيها أنا مش هسكت ليه، مفهوم ولا لأ؟ آيه: تمام يا هادية، وصلت المعلومة. برضه مش هتقولي إيه اللي كان مفرح قلبك؟ هادية: حاجة مش تخصك، وامشي بقي. فعلاً مشيت. وبعدها عادل راح قال ل هادية: عادل: أنتي معزومة انهارده على الغدا معانا عندنا في البيت. هادية: اللي تشوفه يا أستاذ عادل.
وبعدها لقيت عادل جاي هو وماما ومامته وهادية. فريال: إيه ده، أنت عزمت الكل ولا إيه؟ أنا مش عاملة أكل إلا على قدنا. عادل: أنا عارف إنك شاطرة، وبعدين يعني أنتي قدها وقدود. يلا يا قلبي زودي الأكل بعد إذنك. هدخل أغير. فريال: والله حرام عليك اللي بتعمله معايا ده. بقولك إيه يا هادية تعالي معايا. وفي الوقت ده لقيت عادل خارج يقولي:
عادل: معلش يا حبيبتي، أصل إحنا مكنش خلصنا شغلنا كله في المكتب وهادية جايه معايا عشان نخلص. يلا يا هادية على أوضة المكتب. وطبعاً ماما كانت مع حماتي، ومكنش ينفع أقولها تعالي اعملي حاجة. المهم حاولت أفتكر أي حاجة من اللي عملتها هادية امبارح وعملت الأكل. حماتي: إيه ده، هو أنتي يا حبيبتي مش معصجة اللحمة قبل ما تعملي الجلاش ولا إيه؟ فريال: يعني إيه؟ معصجة اللحمة؟ أقصد يعني دي طريقة جديدة يا حماتي، قولت أخليكم تجربوها.
الأم: حرام عليكي يا بنتي، إيه الأكل ده؟ معقول لحد دلوقتي مش عارفة تعملي صنية جلاش؟ عادل: واللي أكتر من كده بقي، إنها كدابة. امبارح كان فيه مشكلة كبيرة بينا عشان خاطر الهانم بتروق الشقة كل فين وفين. لا، وقالت إنها هي اللي عاملة الأكل. مين اللي كان عامل الأكل امبارح؟ فريال: هو أنت جايب الكل عشان تحرجني قدامهم؟ فاكر كده إنك بتكسرني يا عادل؟ عادل: أكسرك إيه، أنتي عبيطة؟
أنتي اللي اتجوزتي وبرضه مش عايزة تشيلي مسئولية بيت وزوج؟ اتفضلي يا حماتي، ادخلي أوضة النوم هتلاقي السرير كله هدوم، والهانم بتنام في أوضة الأطفال عشان مكسلة تطبق الغسيل. هادية: أظن وجودي هنا مينفعش ولازم أمشي دلوقتي. بعد إذنكم. عادل: هادية، أنتي كنتي هنا امبارح صح؟ وانتي اللي روقي الشقة، مش كده؟ هادية: بعد إذنكم، أنا لازم أمشي. فعلاً مشيت. عادل: شوفتي يا طنط؟ مشغلة صحبتها معايا عشان خاطر تكون خدامة ليها.
وفي الوقت ده أنا كنت مخنوقة أوي ونزلت روحت شقة ماما وأنا عاملة أعيط. وبعدها ماما نزلت وحماتي. واتصل عادل ب هادية. هادية: أنت أحرجتني جداً يا أستاذ عادل، إيه اللي أنت عملته ده؟ معلش. عادل: تتجوزيني يا هادية؟
تابع الفصل التالى من هنا
