رواية للقلب كلام اخر الفصل السادس 6 بقلم اسماء علي
_ أشرقت!
" هِمست بيها بصدمه بعد ما عيني وقعت علي أشرقت المرمية علي الأرض بدون حركه. "
" جريت ناحيتها بسرعه ونزلت علي رُكبتي وأنا بعدل رأسها علي رجلي بقلق.. وإستغربت لما لقيت بلاستير علي بوقها كاتم صوتها، وآثار صوابع علي وشها. "
" بصيت علي الآثر بغضب كبير معرفش ليه؟، وحاولت أقوم أشرقت وأنا بضرب علي وشها بخفه. "
_ أشرقت! أشّ
" بس مفيش إستجابة، شلتها بين إيدي بسرعه وخرجت من الحمام، بل ومن المطعم كله وحطيتها في العربية.. "
" مديت جسمي وأنا واقف جنبها وهي قاعدة علي كرسي والباب مفتوح، أخدت زجاجة البرفان اللِ كانت موجودة في العربية، و رشيت منها علي إيدي وقربت إيدي منها عشان تشمها وتفوق.. "
" بعدت رأسها عن إيدي فجأة وهي بتضيق ملامحها بإنزعاج، راقبت إنفعالتها بهدوء شديد وأنا ساند علي الكرسي ومميل ناحيتها.. "
" إتحركت لقُدام فجأة وهي بتاخد نفسها بصوت عالي وبتحرك رأسها حواليها كإنها بتدور علي حاجه، إتعدلت وأنا برجعلها عشان تسند ضهرها تاني، وقلت بهدوء: "
_ إهدي يا أشرقت! متخافيش أنا معاكِ.
" رفعت رأسها ليا بخوف وهي بتتنفس بصوت عالي، وحركت نظرها حواليها تاني، مديت إيدي أخدت زجاجة المياه بهدوء وقلت: "
_ إهدي يا أشرقت وإشربي.
" مسكت الزجاجة بإيد مرتعشه، مسكت إيدها كمحاولة إني أطمنها، حركت عينها عليّ، غمضت عيني وأنا بحرك رأسي بهدوء عشان تهدأ.. "
" شربت، وسندت رأسها علي الكرسي وغمضت عينها، قربت منها وحطيت إيدي علي وشها، فتحت عينها فجأة، هزيت رأسي بخفه، وقلت: "
_ إيه اللِ حصل يا أشرقت؟
" فضلت بصالي كتير من غير أي إجابة، ونزلت رأسها وهي بتحاوطه بكفوفها، وقالت بصوت خافت: "
_ طاهر!
" ضيفت عيني بعدم فهم، وقلت: "
_ مين؟
" رفعت وشها ليا، وقالت بدموع: "
_ طاهر، إبن عمي.
_ هو اللِ عمل فيكِ كده؟
" هزت رأسها بهدوء، مسحت وشي بغضب وبصتلها، وقلت: "
_ قالك حاجه؟
" هزت رأسها بمعني " آه "، نزلت لمستواها، وقلت:"
_ قالك إيه؟
_ أنا... أنا مش هقتلك المرادي، بس خليكِ عارفة إن أنا عيني عليكِ في كل مكان وفي أي وقت ممكن تلاقيني قدامك.
" بصتلها بجمود، وغمضت عيني بغضب كبير وأنا بتوعد لِ اللِ إسمه طاهر ده، وفتحت عيني ومديت إيدي مسحت دموعها بحنان، وقلت: "
_ متخافيش يا أشّ، ميقدرش يعملك حاجه طول ما أنا موجود، أنا مش هسمحله إنه يئذيكِ أو حتيٰ يقرب منك.
" هزت رأسها وهي بتمسح دموعها، إبتسمت بلطف وقلت: "
_ طلع شكلك حلو وإنتِ بتعيطي.
" رفعت عينها ليا فجأة، وقالت بكبرياء مصاخب ببقايا الدموع اللِ في عيونها: "
_ أنا حلوة في كُل حالاتي.
" وكإن اللِ كانت بتعيط من شوية دي إختفت وظهرت أشرقت اللِ انا عارفها، ضحكت بلطف، وقلت: "
_ يا سيدي يا سيدي!
إوعي الواد الواثق.
" رمت طرحتها لورا بغرور مصطنع وهي بتمسح دمعه فاره من عيونها بإبهامها بكبرياء هادي، وبصيتلي بطرف عينها وضحكت، ضحكت بصوت عالي عليها وإتحركت بعيد عنها وقفلت الباب وأنا مازلت بضحك وركبت جنبها. "
_ أشرقت!
_ إممم، نعم؟
" حركت رأسي ناحيتها بهدوء، وقلت: "
_ طاهر شافك فين؟
" إتعدلت في مكانها، وقالت: "
_ أنا كنت داخله الحمام وأول ما دخلت فجأة سمعت صوت الباب بيتقفل فلما بصيت ورايا لقيته..
_ وحصل إيه بعد كده؟
" رفعت عينها ليا بتوتر، وقالت: "
_ فضل يقول مين الشخص اللِ إنتِ كنتِ قاعده معاه ده؟ وبتعملي إيه هنا؟ وهربت من الفرحه ليه؟ وأسإله غيبة كتير من دي.
_ وقولتيله إيه؟
" رفعت سبابتها قدام وشي بتوتر وبسرعه، وقالت: "
_ أنا مجبتلهوش سيرة بإن إحنا متزوجين، وإن انا قاعدة في بيتك ، أنا مجبتش سيرة اي حاجه تخصك والله يا تميم.
" صفيت العربية علي جنب، وبصيت لها بهدوء، وقلت وأنا بمسك إيديها اللِ كانت في الهواء: "
_ حتي لو جبتيلوا يا أشرقت، دي حاجة مكنتش هتضايقني وبعدين إنتِ قاعدة في بيتك زي ما هو بيتي ومش عايز أسمع الكلام اللِ ملهوش لازمه ده..
لو إتحطيتي في أي موقف، والموقف ده يستدعي تقولي إنك مراتي قولي ومتتردديش... تمام؟
" أخدت نفسها براحه، وهزت راسها، وقالت: "
_ تمام، وشُكراً أوي يا تميم بجد.
" سبت إيدها ورجعت شغلت العربية، وأنا بقول بمرح: "
_ بس يا هبلة، حد بيشكر جوزه.
_ يا خبر!
إزاي نسيت إنك جوزي.
_ قولي لنفسك يهانم، ما هو اصل الإهتمام ما بيطلبش.
" حطت إيدها علي كتفي بزعل مصطنع وكإنها بتراضيني، وقالت بتثميل: "
_ حقك عليا يا سي تميم، متزعلش نفسك!
عيلة وبتغلط.
" ضحكت بصوت عالي وأنا برجع رأسي لورا، مسخرة أقسم بالله... لولا إن عارف إنها بتمثل لكُنت صدقت إنها زعلانه بجد وبتحاول تراضيني ولا كإنها واقعه في حُبي من الدور العاشر مش السابع. "
_ ناقصك جائرة أوسكار يا بت يا أشرقت.
_ قولتلهم بس مصدقونيش والله يا سي تميم.
___
" عدي كذا يوم، والأمور ماشية بخير
حال البيت طبيعي، وأشرقت عاملة حس وبهجة في البيت مش طبيعية."
" بابا إتعود عليها وعلي الحس الفكاهي بتاعي، ولازم علي العشا نلحق الحج الوالد بالبخاخه بتاعته قبل ما نفسه ينقطع من كُتر الضحك، وأشرقت تقوله دي آخر مرة يا حجوج عشان متروحش مننا.. "
" حجوج، آه والله أشرقت أخدت علي أبويا بشكل كبير أوي وبقت بدلعه وقال إيه؟ أبويا الحاج بيقولي إتجوزها يا تميم وخليها قاعده معانا.. إسكت يا حج ما إنت متعرفش اللِ فيها. "
" وماما اللِ كان يومها كله كان مع خالتي بقت بتقضيه مع أشرقت البسكوته " الست الوالدة مسمياها كده"، حتي النادي اللِ كانت بتروحه قطعته من وقت ما الست أشّ جَت البيت. "
" ولا وبدأت تعلمها الطبخ عشان لما تتجوز حماتها متعيبش عليها وتقول معرفوش يربوا ولا يعلموا، وأشرقت تقولها " كلامك عال وكل حاجه يا فوفا والله بس مش داخل نفوخي. "، تضحك ماما وهي هتعمل إيه غير كده لو دخلت في جدال مع اشرقت مش هتكسبه إطلاقاً ، نظراً لإن أشّ ليها أسلوبها الخاص في الإقناع."
" وليها طابع تاني علي خالتو، بالرغم إنها مش بتطيق ميرنا إلا إنها حبت خالتو وخالتو كذلك وحتي أشرقت بتقولها في وشها كده إنها مش بتطيق ميرنا " أقولك الصراحه يا فاتن، بتك دي متتعاشرش لله وللوطن كده. "، تضحك خالتو وماما علي كلامها بقلة حيلة، وترد عليها خالتو وتقول" معلش يا أشرقت إستحمليها زي بنتنا برضو. "، تهز اشرقت رأسها بعدم إقتناع وتقول"
إديني مستحمله، ومستنيه ربنا ياخُدنا بالدور. "
" سُكر البت أشرقت دي والله، حياتنا نورت بمجِائها. "
" أما عليا بقيٰ فهي ٰ أثرت وأثرت، أنا بقيت تلقائيا أول ما عيوني تلمحها ببتسم، ولما نبقي لوحدنا بعيد عن العيلة وتهزر معايا وهي قريبة مني بحس إن طفل لسه جاي جديد علي الدنيا ومش بعرف أضحك غير في وجودها، ووقت ما ميرنا بنت خالتو بتبقي هنا وأشرقت تحب تلعب في عداد أصعابها شويه تيجي تقعد جانبي وتتكلم معايا في الشغل اللِ أنا معرفش عنه حاجه بس بسيرها عشان عارف تفكيرها " كانت بتفرجني علي الرسومات اللِ بترسمها. "..
" والحاجة الحلوة إنها بتقولي علي كل حاجه هتعملها وبتفكر فيها، وخداني بير أسرارها وصديقها الوحيد، علاقتنا بدأت تتطور بس بعيونا بس... أو يمكن بعيوني بس الله أعلم. "
_ إلا قوليلي يا أشرقت؟
_ إيه يا فاتن!
" ضحكت بخفه علي طريقتها، بتقول لِ خالتو يا فاتن حاف بس هي خالتوا اللِ عودتها."
" كنت جاي من الشغل لما سمعت صوت خالتو وهي بتكلم أشرقت. "
_ عندي ليكِ خبر!
_ خير اللهم إجعله خير!
" قربت من الصالون بهدوء، عشان أسمع هما هيقولوا إيه؟؛ لإن قلبي مكنش مرتاح من الخبر ده. "
_ عندي ليكِ عريس!
" ضيقت عيني بإستغراب، وبصيت علي اشرقت اللِ مسمعتش صوتها، لقيتها بتوزع نظرها بتوتر علي الأرض ووشها شحب مرة واحده. "
" في الوقت ده دخلت أنا الصالون، وقلت: "
_ السلام عليكم يا قوم!
_ وعليكم السلام ورحمة الله وبركاته.
تعاليٰ يا تميم!
" حركت عيني علي أشرقت اللِ رفعت عينها ليا بتوتر، وإبتسمت إبتسامه مجامله ومحتها تاني، إتنهدت بهدوء وإتقدمت قعدت جنبها بس علي بُعد بسيط منها. "
_ قلنا رأيك يا تميم!
_ في إيه يا خالتو؟
" إبتسمت وقالت وهي بتبص علي أشرقت: "
_ هأخد أشرقت لِ ريّان.
" عدلت اشرقت طرف طرحتها بتوتر وهي بتبصلي بطرف عينها، أخدت نفسي بهدوء وأنا بحط إيدي علي رقبتي، وقلت: "
_ بس أشرقت مش هتتجوز؟
_ ليه يا إبني؟
" قالتها ماما بإستغراب، تدخلت اشرقت بسرعه، وقالت: "
_ هو مش قاصدة يا فوفا بالمعني الحرفيّ، أنا بس مش مستعدة لِ حاجه شبة دي دلوقتي.
_ براحتك يا بنتي، وقت ما تبقي مُستعدة، أنا مش هلاقي أجمل منك لِ ريّان.
" إبتسمت أشرقت بلطف، وقالت: "
_ حبيبتي يا أم ريّان.
_ أشرقت تعالي عايزك دقيقة.
" قلتها بجمود وأنا بشاور لِ أشرقت، وقمت وقلت: "
_ بعد إذنك ياماما، بعد إذنك يا خالتو.
_ إتفضل يا حبيبي.
" قامت أشرقت وقالت: "
_ إوعكوا تفتحوا موضوع جديد قبل ما أجي.
" ضحكت ماما وخالتو، وقالت ماما:"
_ هو إحنا بنعرف نفتح مواضيع غير بيكِ يا أشرقت.
_ ثبتيني بكلامك يا فوفا للأسف.
" ضحكت عليها، وقلت: "
_ يلا يا أشرقت!
" خرجت وهي سبقتني،
طلعت الحديقة، ووقفت هناك وأنا عيني علي طيف الست أشرقت، وقفت قدامي بهدوء، ورفعت إيدها تحركها علي جبهتها بتوتر. "
_ أشرقت أنا مش عايزك تعشمي خالتو بحاجه!
" رفعت رأسها بإستغراب، وضيقت عينها، وقالت: "
_ حاجه إيه مش فاهمه؟
_ ريّان!
إقفلي الموضوع مع خالتو!
_ لية؟
إحنا مسيرنا هنطلق، وأنا من حقي أتجوز.
_ بس مش هطلق!
" هزت رأسها بسخرية، وقالت: "
_ يعني إيه؟
_ يعني هتفضلي علي زمتي.
_ بس ده مكنش إتفقنا.
_ إتفقنا كان بينص علي الجواز ما جبش سيرة الطلاق.
" بصيتلي بغضب، وقالت: "
_ بس أنا لو حسيت إن خطر إخواتي بعد عني، أنا هطلق.
" نزلت لمستواها، وبصيت في عينها، وقلت بعشق: "
_ في أحلامك يا أشّ.
_ وبخصوص خطوبتك من ميرنا!
إنت مسموح ليك تُخطب عادي وأنا متكلمش، لا يا سي تميم أنا كمان مسموح ليا أتجوز.
" ضحكت بخفه، وقلت بفحيح: "
_ مسموح ليكِ تتجوزي، وأنا مسموح ليا أقتل اللِ هتتجوزيه وأخليه جُثة.
#يتبع
#أسماء_علي
#حواديت_أيلول
#للقلب_كلامٌ_آخر.
يا تري إيه اللِ هيحصل في البارت جاي؟ هل تميم فعلاً هيُخطب ميرنا؟ وإيه هيكون رد فعل أشرقت علي خطوبتهم يا تري؟؟
تراقبوا القادم! 💗