سكريبت عتبة المينا وحضنك (كامل) بقلم ڤونا
_جدك تعبان ولازم نسافر اسكندريه انهاردة
بصيت لماما بصدمة_ماما أنا عندي شغل مش هقدر
_وأنا مش هروح وأسيبك لوحدك شهر!!
اتفزعت_شهر،مستحيل أفضل هناك شهر الشغل هيقع هنا وكل حاجة هتبوظ!!!
حاولت ماما تواسيني_اهدي بس كده كده مش لوحدك أنتِ في شركة ابوكي معاكي الواد يوسف و أنتِ برضو تقدري تتابعي أون لاين بس عشان خاطري تعالي
بصيت لماما بهدوء_حاضر يا ماما، هكلم يوسف واظبط معاه وبعدين احضر شنط الهدوم
حضنتني ماما وأنا دخلت أوضتي اتواصلت مع يوسف ابن عمي ومعايا في شركة بابا من ساعة ما اتوفي مسابنيش لوحدي
اتفقت معاه علي كل حاجة وبدأت أحضر شنطة هدومي وكل حاجة ممكن احتاجها خلال الشهر ده،خلصت ودخلت لماما اساعدها
_هنروح بالقطر؟
ـ لأ ابن عمك چون هيوصلنا بعربيته،لما عرف إننا جايين أصر يجي يوصلنا عشان منتبهدلش في القطر
همهمت ليها بهدوء وبعدين دخلت أوضتي أجهز
لبست بنطلون واسع وتيشرت أبيض قصير،فردت شعري الكيرلي،حطيت ميكب خفيف أخفي ارهاقي
_يلا يا حبيبتي چون وصل تحت
ـ حاضر يا ماما
نزلت ماما الأول وأنا أكدت إننا قافلين محبس الغاز والمياه وقافلين كل الشبابيك ونزلت وراها
قربت من العربية كانت ماما قاعدة قدام فقعدت أنا ورا
ابتسمت_عامل ايه يا چون
ـ بخير يا مريومة وأنتِ
_زي الفل
فضلنا طول الطريق بنتكلم إحنا التلاتة شوية وشوية نضحك ونهزر لغاية ما وصلنا الحارة اللي ساكن فيها جدو
وصلنا تحت البيت ونزلنا من العربية أخدنا شنطنا وطلعنا بيت جدو
هو بيت مكون من ٤ أدوار
أول دور شقة جدو وباقي الأدوار لأولادة الأتنين والتالت لبابا
فتح چون باب شقة جدو بالمفتاح اللي معاه ودخلنا
كان جدو قاعد علي الركنة وشكله مرهق
ماما قربت منه بلهفة_وحشتني يا بابا
حضنها جدو_مرات الغالي
بادلته الحضن وبعدين أنا قربت أسلم عليه بلهفة حقيقية
_وحشتني أوي يا جدو
ـ لو وحشتك فعلا مكونتيش غيبتي الغيبة دي كلها !!
_حقك عليا يا حبيبي أنتَ عارف الشغل وقرفه بقي
باس خدي_وحشتيني يا قردة
ضحكت وهنا أتكلم چون بغضب طفولي_ يعني مفيش وحشتني يا چون ده حتي أنا جاي من سكة سفر برضو
ضحك جدو_أنتَ في وشي ٢٤ ساعة يا زفت أما حتيتن الحلويات دول وحشوني أوي
فضل يهزر معايا أنا وماما شوية وبعدين قالنا ادخلو ارتاحو عشان جايين من سفر
دخلنا أوضة بابا القديمة وبدأنا نطلع هدومنا ونحطها في الدولاب ونمنا شوية
صحيت علي ايد عماله تلمس وشي فتحت عيوني براحة لقيته
محسن"كلب چون"
ابتسمت وخدته في حضني_وحشتني يا واد يا محسن
بوسته_دخلت هنا ازاي يا واد
قاطع كلامي خبط علي باب الأوضة بهدوء وظهر صوت چون
_أيوة يا چون
ـ معلش آسف لو صحيتك
قومت من مكاني وفتحت باب الأوضة_ولا يهمك
أول ما فتحت الباب محسن جري علي چون
ضحك وشده من ودنه_يعني يا بيه أنتَ هنا وأنا عمال أدور عليك
ضحكنا وفي الآخر قال_جدو قالي أشوفك لو صاحية تيجي عشان نتعشي
ـ حاضر روح وهاجي وراك
بالفعل دقايق وكنا قاعدين بناكل سوا أنا وماما وجدو وچون
چون من ساعة وفاة أهله وهو قافل شقته فوق وقاعد مع جدو
أهله وبابا كانو مع بعض في نفس الحادثة اللي حصلت ربنا أراد يسافرو السما سوا
خلصنا أكل ودخلت غسلت المواعين مرضتش أتعب ماما وقولتلها تفضل هي مع جدو تونسه
وأنا كنت في المطبخ دخل چون فجأة_شكلك هتتعبي معانا الشهر ده
ضحكت_ياعم كله يهون لأجل عيون عبده
ضحك_يا بكاشه
وقف يعمل شاي بالنعناع
طلعنا من المطبخ وطلعنا قعدنا في البلكونة كلنا
أنا دخلت في حضن جدو وبصيت لچون بأستفزاز
فضحك وماما بصتلي بكيد وخدته في حضنها
ضحكنا وفضلنا نهزر ونسترجع أيام حلوة لغاية ما الباب خبط وچون قام يفتح
دخلت نسرين بنت عمي وأمها سعاد وبكل غل قالت سعاد_بت الفلاح جاية هنا هي وبتها تعمل ايه!!
رديت ببسمة مستفزة_هو ده ترحيبك لينا يا مرات عمي
ردت نسرين بغيظ_لأ يا حبيبتي أنتم ضيوف تقال علي القلب
ابستمت بخبث_بس إحنا صحاب بيت يا نسرين ياختي تكوني نسيتي أن لينا شقة في البيت ده
كان الباقي بيكتم ضحكته علي غيظ سعاد وبنتها
ردت سعاد بغل_وجودك تقيل علي قلبي
هنا ماما ردت بكيد_ليه ده حتي أنا وبنتي سمباتيك وبنروح الچيم سوا
بصولنا بقرف وطلعو شقتهم وإحنا فضلنا نضحك
وبعدين جدو اتكلم بهدوء_أنا مرضتش أدخل عشان ده شغل ستات وأنا مش فايق
قربت من جدو وبوسته في خده_ريح أنت بس وحفيدك بتسد
ضرب كف بكف_أنتِ يا مضروبة بتجيبي الكلام ده منين
ضحكت_الدنيا بتعلم يا عبده
ضحك بغلب فچون اتكلم بغيظ_غريبة يعني بتقولك عبده ولما أنا بنطقها بتفتح دماغي
ضحك جدو_هي براحتها يا حبيبي
ـ أيوة ياعم من لقي أحبابه نسي احفادة
ضحكنا في جو مليان حب ودفئ
صحيت تاني يوم علي صوت زعيق
نفخت بضيق لأني عارفه باقي أيامنا هنا مش هتعدي علي خير
طلعت علي السلم لقيت سعاد وبنتها بيزعقو لماما فطلعت بسرعة
بصيت لماما_حصل ايه
اتكلمت ماما ببرود_ياختي مش عايزيني أدخل شقتي
اتكلمت سعاد بنرفزة_كانت شقة جوزك ودلوقتي خل..
قاطعتها أنا_ودلوقتي بقت بتاعت ماما وبأسمها عشان بابا كتبلها الشقة بمزاجه
بصتلي بصدمة_يعني ايه
كملت بضحكة باردة_يعني شقة أمي وبراحتنا نطلع ننزل ميخصش حد
مسكت ايد ماما ودخلنا شقتنا وإحنا بنضحك بكيد_عن اذنك يا طنط سعاد بقي عايزين نرتاح في شقتنا يوه يقطعني قصدي شقة ماما ست الكل
ضحكت وقفلت الباب وسعاد كانت واقفة متغاظة
اتكلمت ماما بقرف_الولية دي ما بتتهدش مش كفاية أنا اتجوزت ابوكي سيبنا الشقة بسببها
حاولت اهديها_معلش يا بت يا مامي متعكريش مودك عشانها
صح كنتي طالعة الشقة ليه
اتنهدت_الشقة فيها ريحة أبوكي يا مريم،أبوكي وحشني أوي
خدتها في حضني ودخلنا أوضته القديمة
وفضلنا نتفرج علي الصور القديمة اللي كل مرة بننبهر من بعضها ونعيط من بعضها...
خلصنا ذكريات حلوة وبدأنا ننضف الشقة من التراب
ماما خلصت جزء ونزلت تعمل الغداء عن جدو وأنا كملت تنضيف وخلصت وكنت عايزة أخد دش فنزلت تحت عشان هدومي في شقة جدو وبالمرة أنقل شنطي أنا وماما للشقة
نزلت أخدت دش وبدأت أجهز مع ماما الغداء،خلصنا وفضلنا ندردش مع جدو شوية لغاية ما چون وصل واتغدينا سوا
اتكلم چون بحب_تسلم ايدك يا مرات عمي كان واحشني أكلك أوي
ـ بالهنا والشفا علي قلبك يا حبيبي
_علي فكرة أنا مشاركة معاها
بصلي وضحك_تسلم ايدك يا مريومة
ابتسمت بغرور_شكرا
كملنا الغداء وطلعو قعدو في البلكونة وأنا دخلت المطبخ عملت عصير مانجو وطلعت قعدت معاهم
فضلنا نتكلم شوية وبعدين جدو خد علاجه ونام وفضلت أنا وماما وچون
_عامل ايه في شغلك يا حبيبي
ـ اهو الحمدلله يا مرات عمي الحمل تقيل شوية بس الحمدلله حامد ربنا
طبطبت ماما علي كتفه_ربنا يقويك يا حبيبي
وجهتلي ماما كلام_ أنا داخله أتفرج علي مسلسلي يا مريم
ـ ماشي يا حبيبتي
دخلت ماما وفضلنا أنا وچون
_ عامله ايه في الشركة
ـ اهو الحمدلله
_الدنيا صعبة عليكي ولا ايه
_ الحمدلله كله بيعدي،وكمان يوسف شايل معايا الدنيا
ابتسم_طول عمره جدع الواد ده
ضحكت بضيق_عكس أخته الحربوقة وأمه
ضحك بقلة حيلة_ربنا يهديهم
فضلنا نتكلم شوية في مواضيع عشوائية وبعد كده طلعنا أنا وماما شقتنا وچون دخل أوضته نام
صحيت مفزوعة علي صو..يت في البيت
نزلت بسرعة ودخلت شقة جدو لقيت ماما بتعيط
_الحقيني يا مريم جدك قاطع النفس
يتبع
#بقلم_فونا
حواديت_مريم_وچون
عَتبة_المينا_وحضنك