سكريبت عتبة المينا وحضنك الفصل الثاني 2 والاخير بقلم ڤونا
_الحقيني يا مريم جدك قاطع النفس
أتخضيت ومكنتش عارفة اتصرف ازاي،طلعت فوني بسرعة وطلبت الإسعاف
قربت منه بسرعة وحاولت اعمله اسعافات أولية لغاية ما الاسعاف تيجي،وفعلا وصلت بسرعة ونقلناه المستشفى
دخل الطوارئ وحاولو يعملوله كل حاجة عشان يبقي عايش
كنت أنا وماما برا الأوضة علي اعصابنا لغاية ما دخل چون وهو بيجري وينهج
_ايه اللي حصل
اتكلمت ماما بعياط_مش عارفه يابني نزلت الصبح عشان افطره لقيته واقع من طوله ومش بيتنفس
أتخض چون وفضل رايح جاي لغاية ما دكتور طلعلنا
قربنا منه بسرعة
أتكلم چون بقلق_جدو كويس
أتكلم الدكتور بتعب_الحمدلله اتلحق في الوقت المناسب
حمدنا ربنا والدكتور فضل يتكلم معانا شوية علي حالة جدو وبعدين دخلنا الأوضة اللي كان فيها
كان نايم بس شكله تعبان
لأول مرة أركز في تفاصيل جدو
كبر،جلده كرمش أوي،التعب بقي واضح عليه أوي
دموعي نزلت وأنا ماسكه ايده زي الطفلة وخايفة يمشي ويسيبني
وفي الجهة التانية ماما كانت بتعيط في صمت وچون بيحاول يكتم دموعه!
ده مش أي حد ده جده اللي عاش معاه عمره كله من بعد وفاة أهله!
أول مرة يشوفه في التعب ده!
بدأ جدو يفوق فقربنا منه بلهفة
بصلنا وابتسم_فكركم مــ..ت ولا ايه
اتكلمت ماما بسرعة_بعد الشر يا بابا متقولش كدا
ابتسم وبعدين بصلي وبص لچون واتكلم بخبث_مش ناوي تفرح قلبي بقي
بصيت لچون بأستغراب فاتوتر وقرب من جدو وباسه وهمس في ودنه_مش وقته يا عبده ها مش وقته
وبعدين بِعد وقال بصوت مسموع بغيظ_حمدلله علي سلامتك يا حبيبي
ضحك جدو من قلبه وبعدين بصلي وشدد علي ايدي اللي ماسكه ايده_والله يابت يا مريم تستاهلي حد أحسن منه
بصيتله بأستغراب وأنا مش فاهمة
چون برق وهو بيتكلم بسرعة_شكل التعب أثر عليك يا عبده
نام يا حبيبي نام
أنا مش فاهمه حاجة وفي الآخر لفيت لماما لقيتها بتضحك
اتكلمت بغيظ_لأ مهو حد يفهمني بقي في ايه
كان لسه جدو هيتكلم بس قاطعه چون_مريم تعالي معايا نجيب فطار
بالفعل روحت معاه وطول الطريق كنت ملاحظه كان بيحاول يتكلم بس متردد
هنا جبت أخري_چون في ايه ما تنطق
ـ مريم أنا بحبك
بصيتله بصدمة وفضلت واقفه مكاني مش بتحرك
كان باصصلي بهدوء منتظر ردة فعلي بس أنا كل اللي عملته سيبته ومشيت بسرعة
مشي ورايا بسرعة وفضلنا ماشيين ولا أكن حصل حاجة من شوية
هو متوتر وأنا مكسوفة والبقاء للأقوي
فضلنا ماشيين بلا هدف لغاية ما فجأة وقف قدامي
_كفاية بقي أنا مش هسكت تاني
بصيتله بصدمة فكمل_ أه بحبك وبحبك من زمان ومحدش يعرف غير جدو ووالدتك
اتنهد_كنت بحبك من وقت ما كنتي في ثانوي وجريت حكيت لجدو قالي أنتم لسه صغيريين وده شغل عيال بس أنا مسكتش وفضلت كل شوية افاتحه في الموضوع لغاية ما زهق مني وقالي خلاص هيفاتح مامتك عشان كده استغلينا وجودكم هنا وجدو فاتح مامتك انبارح وهي قالت هتبقي تاخد رأيك بس اللي حصل انهاردة مكانش في الحسبان
فضلت بصاله بهدوء والحقيقة مش عارفه اقول ايه أنا متلغبطة أوي بجد!!!
_أنا هرجع المستشفى
سيبته ومشيت وهو كان واقف مكانه مش عارف اللي هو عمله صح ولا لأ
راح جاب فطار ورجع المستشفى ملقاش مريم
_امال مريم فين
ـ راحت البيت ضروري عشان في حاجة محتاجة تتعمل من علي اللاب عشان الشغل
همهمت لمرات عمي بهدوء وبدأنا نفطر
"عند مريم"
روحت البيت عشان كان في ايميل شغل اتبعتلي وكان لازم أرد عليه
خلصت وكلمت يوسف اتطمنت علي الشغل وقفلت
جه في بالي كلام چون وافتكرت قد ايه إحنا كنا قريبيين زمان بس فجأة بعدنا بلا سبب وفي الحقيقة عشان أنا وچون كنا ناضجين فمزعلناش وقولنا الحياة ومشاغلها
كنت عماله أفكر ومش عارفه أخد قرار ولا حتي المفروض أقوله ايه لما أشوفه
حوارات الحب دي طلعت صعبة يا جدعااااان
مش هنكر إني مكنتش معجبة بيه لأ الصراحة كان في إعجاب صغير بس علي رأي جدو قولت ده كلام مراهقين
قاطع تفكيري خبط جامد علي الباب بطريقة بشعة
روحت فتحت وأنا متعصبة لقيتها نسرين وأمها سعاد
أول ما نسرين شافتني قربت مني وضر...بتني بالقلم
_تعاليلي يا خطافة الرجالة
لقيتها شدت شعري جامد وأمها واقفة بتتفرج علينا وهي مبتسمة
شدت نسرين شعري جامد
_مش بعد ده كله يتجوزك أنتِ في الآخر
زقيتها جامد وضربتها بالقلم_أنتِ شكلك اتجنيتي علي الآخر
قربت مني تاني عشان تضربني بس مسكت ايدها جامد وعوجتها لدرجة أنها كانت هتتــــــكسر
_اسمعيني بقي أنتِ وأمك لو فاكرين أنكم هتعملو معايا اللي اتعمل مع ماما زمان تبقو بتحلمو!!!
زقيت نسرين علي امها فبصلتي سعاد بغضب
_مستنيين ايه من تربية فلاحين
بصيتلهم بقرف_حوش حوش علي تربيتك يا حبيبتي
اتكلمت بنتها بغل_چون هيبقي ليا أنا بحبه
اتكلمت ببرود_وهو بيحبني أنا،ويلا خدي أمك في ايدك وامشي
كانت سعاد لسه هتتكلم فقاطعتها_أنا عامله احترام لعمي
كملت بأستفزاز_وانك ست كبيرة
بصتلي بغل وخدت بنتها ومشيت
قفلت الباب جامد ونفخت بضيق_هو يوم مش معدي
باقي اليوم كنت بخلص شغل اون لاين،لقيت چون بيرن عليا
فضلت باصه للاسم شوية ومردتش في الآخر وكملت شغل
دقايق والباب خبط جامد روحت فتحت لقيته في وشي وكان متعصب_مش بتردي علي الزفت ليه
بصيتله بهدوء_عايز ايه يا چون
كان بيحاول ياخد نفسه من العصبية_ازاي متتصليش وتقوليلي ايه اللي حصل
ـ وهو ايه اللي حصل
اتعصب_مريم متنرفزنيش
اتعصبت_چون صوتك!!!!
اتنهد بتعب بعدين بصلي واتكلم بهدوء_عايزينك تحت في شقة جدو
نزل بهدوء وأنا قفلت الباب بصمت،دخلت غيرت هدومي وبعدين نزلت شقة جدو لقيت نسرين وسعاد وعمي برضو
مبصتلهمش ودخلت حضنت عمي وابتسمت بحب هو الوحيد اللي بيحبني بصدق
روحت لجدو حضنته وكذلك ماما وقعدت جنبها
اتكلم جدو بحدة_انا عرفت اللي عملتيه يا سعاد أنتِ وبنتك
اتوترت سعاد وبنتها فكمل جدو بجمود_أنا مش هتكلم عشان عارف أن ليكم راجل وهو اللي يتصرف بس يكون في علمكم لو حد بس لمس شعرة منها أنا هيبقي ليا تصرف تاني مش هيعجبكم
وجه چون كلامه لنسرين_لو فكرتي مجرد فكرة أنك تلمسيها بس هتزعلي يا نسرين
اتكلمت نسرين بحقد_بس أنا بحبك يا چون وأنتَ عارف كدا
اتكلم بضيق_وأنتِ عارفه أنك زي أختي
قامت نسرين واتكلمت بعصبية_اشمعنا هي
وكانت لسه بتقرب مني بس عمي مسكها جامد وزعق_الظاهر إني دلعتك كتير،قدامي علي فوق أنتِ وأمك يلااا
بالفعل طلعو فوق ومتبقاش غير أنا وماما وجدو وچون
قومت أنا كمان عشان أطلع بس وقفني چون_مريم ممكن نتكلم
وافقت واستأذن من ماما ونزلنا نتمشي شوية
قاطع الصمت اللي كان بينا بهدوء_ممكن اعرف أنتِ رفضاني ولا لأ
اتنهدت_مش حكاية أني رفضاك أنا بس متلغبطة ومش عارفه مشاعري ايه بجد
ابتسم بهدوء_ايه رأيك نتخطب
بصيتله_بالسرعة دي
اتكلم بهدوء_أنا حابب نتعرف علي بعض أكتر ونقرب بس يكون بينا حاجة رسمي بس ساعتها لومرتحتيش اوعدك هحاول تاني
بصيتله بأستغراب فكمل بضحك_لأ جو لو مرتحتيش هبعد ده مش عندي أنا قاعد علي قلبك يا حبيبتي مش مهم أحاول مرة واتنين وعشرة عشان أكسب قلب مريومة
بصيتله وابتسمت_وأنا موافقه
وفعلا اتخطبتا وحددنا خطوبة سنتين بالعافية لأن چون مكنش راضي بال ٣ سنين
كنا بنتعرف علي بعض من أول وجديد وكل يوم حبي له بيزيد
كنت قاعدة أنا وچون علي السطح بنتكلم شوية ونهزر شوية بس قاطعنا صوت نسرين وكانت بصالنا بهدوء عكس كل مرة
اتكلمت بتوتر وهي بصالي_ممكن اقعد معاكم شوية
بصينا أنا وچون لبعض بعدين بصيتلها وابتسمت_طبعا اتفضلي
بالفعل جت قعدت جنبنا وكانت متوترة أوي فحاولت اطمنها
_عامله ايه يا نسرين
بصتلي بصمت بعدين اتكلمت_انا آسفه
بصيتلها بأستغراب أنا وچون فكملت_آسفه علي كل مرة قولتلك كلمة زعلتك أنا بجد عارفه إني زعلتكم كتير أنا وماما بس بجد آسفه أنا بجد ندمانة إني ضيعت من عمري وقت كبير كنت بضايقك فيه أحسن من أني أقرب منك كأخت
وهنا أدركت أن فعلا نسرين ندمانة من كل قلبها وفي الحقيقة سامحتها لأن هي ملهاش ذنب،والدتها اللي كانت بتزرع جواها الغل والكره ده كله
بصت لچون_أنا آسفه ليك برضو أنا اكتشفت أني مش بحبك ولا حاجة بس دي كانت فكرة ماما زرعاها جوايا مش أكتر لكن أنا بعد ما فوقت معرفتش أشوفك غير أخ وبس
ابتسم چون وطبطب علي راسها بحنان وضحك_حمدلله علي السلامة يا نسرو
ضحكنا وفضلنا نتكلم كتير أوي
----------------------------------
مش عارفه الوقت بيعدي بسرعة كدا ليه!!!!
ده فرحي أنا وچون بكرة!!!!
كنت في أوضتي فاتحه ألبوم الصور علي صور بابا
هو إزاي العمر عدي بالسرعة دي!!!
مش عارفه امتي وازاي كبرت بالسرعة دي وفرحي بكرة
لأ والأسوء أن بابا مش معايا!!!
فضلت اعيط كتير لغاية ما سمعت فوني بيرن وكان چون
كنسلت ومقدرتش أرد ففضل يرن
كنسلت تاني فبعتلي واتساب
_ مش بتردي ليه مالك
قولت بكذب_هنام وبكرة نتكلم
_مريم فيكي ايه!!!
ورن تاني فضل يرن لغاية ما زهقت ورديت
_ ألو
مريم في ايه
مش بتردي ليه
حصل حاجة
مريم
ألو
رديت بصوت باكي_وحشني أوي
وهنا فهم
خد نفس عميق وقال
_هو فرحان وفخور بيكي
عيطت_عارفه بس بجد وحشني أوي
مش عارفه اليوم هيمشي إزاي من غيره
كنت بعيط طول ما أنا بكلمه وهو كان صبور جدا وكان عارف يحتويني بجد
خرجت من الأوضة وأنا لسه بعيط، حسيت إني مخنوقة ومش قادرة أستحمل القعدة جوه، لبست هدوم مريحة ونزلت أجري على البحر.
الليل كان ساكت، والنسمة جاية ريحتها ملح وموج البحر بيخبط بخفة كأنه بيواسيني.
قعدت على الرمل وبصيت قدامي، المية السودة قدام عيني عاملة زي حضن كبير، حضن نفسي بابا يكون فيه دلوقتي.
رميت حصوة صغيرة على الموج، وقلت بصوت واطي:
ـ يا بابا… نفسي تكون معايا بكرة…
وفجأة لقيت حد قاعد جنبي، ماخدتش بالي غير لما حسيت بيده بتمسك إيدي.
بصيت لقيته چون، شكله كان قلقان وفضل ساكت شوية يبص للبحر معايا.
قال بهدوء:
ـ عارف البحر ده إيه؟
سكت وبصيتله مستغربة.
كمل بابتسامة:
ـ البحر زي الحب… ساعات هادي وساعات هائج، بس دايمًا موجود، مابيختفيش. زي حب أبوكي ليكي، مش هيتغير حتى لو مش شايفاه دلوقتي.
دموعي نزلت أكتر، مسكت إيده جامد وأنا ببص للموج كأني عايزة أصدق كلامه.
هو قرب مني وقال:
ـ وبكرة… وإحنا واقفين قصاد الناس كلها، هكون أنا الحضن اللي يسندك لما تبصي حواليكي وتلاقيه مش موجود.
الريح لعبت في شعري والموج علي صوته كأنه بيصفق لوعوده.
ضحكت بدموع، ولقيت نفسي لأول مرة من ساعتها حاسة إن قلبي أهدى…
وكأن البحر أخد حزني ورجعه طاقة أمل جديدة.
تمت
الحلقة الثانية
#بقلم_فونا
حواديت_مريم_وچون
عَتبة_المينا_وحضنك
تمت