رواية تلميذ الجن الفصل الثالث والعشرون 23 بقلم جمال الحفني
الليل كان تقيل في وادي الأرنت
القمر باين نصه، والنص التاني مستخبي ورا سحابة رفيعة كأنها بتتجسس
كنت واقف قدام نار صغيرة مولعها من حطب السمر، ووشي مشدود
من يوم ما جن العهود فتحليعين البصيرة،وانا شايف حاجات عمري ما كنت اتخيلها … ظلال بتمشي جوه الظلال… همسات بتيجي من اتجاهات ملهاش اتجاه
وفجأة
الهوا سكن
والنار وطت كأنها بتسلم
وظهرجن العهود
لا دخان ولا فرقعة بس كأنه كان واقف طول الوقت وانا اللي مكنش شايفه
قاله بصوت هادي تقيل
"النهارده هتعرف حاجة أخطر من الطاقة… وأعمق من عين البصيرة."
بلعت ريقي وأنا متشوق للعلم الجديد اللي هيعلمولي وسألته هتعلم إيه؟
لف حواليه ببطء وقال "هعلمك طبقات الجن ورتبهم"
بعدها سكت شويه وبص للسما وكمّل "مش كل الجن زي بعض, زي البشر فيهم العادي وفيهم الوزير وفيهم الحاكم, احنا كمان لينا طبقات"
كنت عارف المعلومات دي بس حبيت أستزيد منه أكتر فسألته كإني معرفش حاجه, يعني إيه طلبات؟
مد إيده ناحية الرمل وبدأ يرسم دواير جوه دواير والرمل بيتحرك مع حركة صباع جن العهود, وقال "بص كويس, أول طبقة, هي الجن العابرين"
الدائرة الخارجية نوّرت نور باهت وكمل "دول اللي عايشين قريب من عالم البشر, وجودهم خفيف وتأثيرهم ضعيف, يقدروا مثلا يوسوسوا أو يحركوا حاجات صغيرة, أو مثلا يظهرولكوا في الكوابيس والأحلام"
هزيت راسي موافق وكملت, دول اللي بيسكنوا البيوت القديمة واللي بنقول على البيت إنه مسكون لما يسكنوه.
ابتسم ابتسامة خفيفة وقال "أيوه بس مش كل إحساس يبقى جن, أحيانا الخوف بيخلق أوهام مش موجودة والناس تفتكرها على إنها جن"
الرمل لف تاني والدايرة اللي بعدها نورت بلون أغمق
"الطبقة التانية جن الأثر"
حسيت بقشعريرة..
"دول بقى اللي بيعرفوا يسيبوا علامة في المكان, ريحة غريبة, حرارة مفاجئة, حيوان بيتصرّف بغرابة, دول ليهم قوة تأثير أعلى ووجودهم أقدم"
قولتله تمام كدا كدا أنت علمتني إزاي أفرّق بينهم, رد وقال "أيوه بس أكتر حاجه هتحس بيها هي التوازن, هتحس إن المكان طاقته مش متوازنة, مش ثابتة"
الرمل اتحرك للمرة التالته, والدايرة بقت أضيق وأغمق
"الطبقة التالتة, أصحاب العهود"
رفعت عيني فيه وسألته بسرعة, دول اللي زيك؟
سكت شوية وبعدها قال "أيوه, احنا اللي بنحفظ قوانين العالم الخفي, لينا علم ولينا حدود نقدر نعلّم, لكن مبنتدخلش في مصير"
قامت نسمة هوا خلّت بعض حبيبات الرمل تلف حوالينا في دايرة
"فوق الطبقات دي, فيه الرتب"
بدأت انتبه واركز أكتر لإنه قالها بنبرة فيها كتير من الحكمة
رسم خط طولي قسم بيه الدواير
"أول رتبة السامع..اللي يقدر يسمع همس العوالم"
"بعده الرائي, اللي يقدر يشوف ما وراء الحجاب"
سألته وأنا, بص في عنيا وقال "أنت من الإنس, بس وجودك هنا مش عادي, عينك اتفتحت على عالمنا ولسه قلبك بيتعلم تشوف وتفهم, السامع والرائي دول رتب للجن وانت بين الاتنين لإنك إنسان شايف بعيون الجن"
النار عليت فجأة
"أعلى رتبة الحافظ"
دا اللي يعرف أسرار الطبقات كلها, ويقدر يتحكم في حضوره, يختفي حتى عن عين البصيرة"
سألته بخوف, وفيه أعلى من كدا؟
سكت, سكت كتير وفي الاّخر قال "فيه, بس مينفعش تعرف دلوقتي"
فجأة جن العهود ضرب الأرض بالعصا بتاعته, والرمل اختفى, والوادي بقى ساكت خالص بعد ما كان بيتهيئلي إنه كان سامع الكلام بتاعنا وحاضر معانا
"اختبارك النهاردا بسيط"
أول مرة يعملي اختبار, شديت جسمي وقولتله قول
""في الوادي دلوقتي… فيه 3 كيانات. واحد عابر… واحد من جن الأثر… وواحد رتبته أعلى منك."
قلبي دق بسرعة
"اعرفهم… من غير ما تستخدم عين البصيرة."
سألته باستغراب, إزاي؟
ابتسم
"بالإحساس… بالخلل… بالصمت."
وسابني واختفى.
الوادي بقى تقيل
والنار بقت تفرقع
قفلت عيني
حسيت بالهوا
بالصمت
بالحشرات اللي فجأة سكتت ناحية الشمال
فتح عيني ومشىت ببطء
الجزء الشمالي من الوادي كان أبرد وقفت… ومديت إيدي ناحية حجر كبير الحجر كان دافي, ابتسمت وقولت دا عابر بيحاول يقلد أثر بس مش ثابت.
لفيت الناحية التانية وحسيت بضغط في ودني, قولت ده جن الأثر, وفجأة حسيت بحاجه بتراقبني, مكانش إحساس بالخوف أو الحرارة, بس كنت حاسس إني مكشوف, قولت بصوت واطي متساءل, دا الحافظ؟
الصوت جي من ورايا بيقول "لأ, لسه بدري على الحافظ"
جن العهود ظهر بس شكله كان مختلف, هيبته أكبر وعينه أعمق
"ده مجرد رسول"
لفيت بسرعة وسألته يعني فيه حد بيراقبني؟
قال "من يوم ما دخلت وادي الأرنت وأنت تحت المراقبة"
سكت شوية بعدين قرب مني وقال "العلم مش قوة, العلم مسؤولية ولو عرفت طبقات الجن لازم تعرف طبقات نفسك"
القمر خرج كامل ورا السحابة, والوادي نور نصه والنص التاني فضل في الضلمة, والمعلم اختفى.
الجزء الثالث والعشرون
#تلميذ_الجن
جمال الحفني