رواية لانك قدري الفصل الثامن 8 بقلم حور حمدان

رواية لانك قدري الفصل الثامن 8 بقلم حور حمدان

اعتماد واقعة مغمي عليها ودماغها بتنز ف يا فندم

دا كان كلام العسكري

رد عليه كريم بهدوء وبرود وقال سيبوها مكانها شوية وهتفوق

بصله صلاح بصدمة وقال ازاي دا يعني انت بتستهبل يا كريم ولا اي عايز تسيبها لحد ما تموت اتقي ربنا يا اخي وحتى احكم بالعدل

ضحك كريم وخبط على المكتب بعصبية وقام وقف وقال عدل وهو فين العدل في الي بتعملوه وعملتوه في اختي اختي اليتيمة كانكم استغليتوا كونها يتيمة الاب والام وعلى اساس ملهاش ضهر ولا سند بس لا لا يا استاذ صلاح انسى انا اختي ليها ضهر وسند وحتى لو مكنتش ظابط كنت هاخد حق اختي تالت ومتلت منكم اختي الي مشفتش منها غير كل خير وكل الاصول طلعت منها وحقيقي لو في حد قليل الاصل هنا فهو انتم

وقف ادم بعصبية ومسكه من رقبته وهو بيقول بطل جنان وطلع امي بدل ما اقسم بالله اقتلك

زقه كريم بعصبية ونده باعلى صوت عنده وقال يا عسكري

دخل العسكري بسرعة وقال اوامر يا فندم

شاور كريم على ادم وقاله خد الحيوان دا ارميه في السجن واعمله محضر تعدي بالضرب على ظابط في مكتبه كمان

صلاح بوجع جواه يا بني حقك عليا بس بالله عليك سيب ادم وحتى متخرجش اعتماد بس على الاقل خليهم يفوقوها

رجع بص كريم للعسكري وقال خده الحبس يا بني وفوقوا الولية الي اسمها اعتماد دي وعالجوها

كان صلاح لسه هيتكلم بس كريم قاطعه وهو بيقول ما خلاص بقى يا حاج صلاح متقرفناش وامشي يلا بدل ما احطك جنب ابنك، انا كل دا عامل حساب للعشرة وعشان انت راجل طيب بس يلا بقى من هنا فضيناها يا حاج

قام صلاح وخرج وهو مش عارف يعمل اي واول ما جه عند الباب لقى في وشه ادهم بصله ادهم باستغراب وهو بيقول امال فين ماما وادم يا بابا

اتنهد صلاح بحزن وقاله في الحبس

ادم بزهول حبس طب ماما في الحبس وعارفين انما ادم ادم دخل ليه

سابه صلاح وركب العربية وجري ادهم هو كمان وركب وكمل كلام بزعل

ما ترد عليا يا بابا

صلاح بوجع وزعل بان على ملامحه

امك والي عملته في ريم وكريم اخوها اما عرف راح وراجع الكاميرات وخد مقطع فيديو وامك بتكب زيت على السلم

وصل امك انضربت في السجن واغمى عليها وحالتها حاله

واما العسكري قال لكريم كدا وقاله سيبها مكانها ادم اتعصب ومسك في كريم فكريم عمله محضر تعدي هو كمان

وبدل ما كان شخص واحد محبوس بقوا اتنين

اعمل اي يا ادهم اعمل اي مش عارف يا بني انا عارف ان ظلم الي امك عملته وبتعمله والله بس مهما كان دي ست كبيرة مش هتتحمل السجن ابدا

ادهم قاله بزعل

بس بصراحة يا بابا ماما غلطانة وغلطانة اوي كمان

انت متخيل انها بالي عملته قتلت روح ومش اي روح كمان دا حفيدها ابن ابنها

دا في مثل بيقول اعز الولد ولد الولد ففي ازاي امي تعمل كدا

سكت صلاح معرفش يرد اصل هيقول اي هيقوله امك ست مفترية وقادرة

شغل ادهم العربية وكمل كلامه وقال معندناش غير حل واحد ملهوش تاني دلوقتي نروح لريم نخليها تكلم كريم وتحاول تقنعه يشيل المحضرين الي على ادم وماما

وربنا ييسر بس والموضوع يتحل وميكبرش وميوصلش لمحاكم

هز صلاح راسه بيأس وهو بيقول في سره

منك لله يا اعتماد قولوا امين

بعد وقت وصلوا المستشفى وتحديدا اوضة معتز

كانت لسه ريم قاعدة مكانها جنب معتز وكلهم كانوا ساكتين

اول ما صلاح دخل قام نوح وقاله بخوف ها يا بابا فين ماما حصل اي وفين ادم

قعد صلاح وحط ايده على وشه بتعب وقال قولهم انت يا ادهم انا مش قادر اتكلم يا بني

وفعلا بدأ ادهم يحكيلهم كل حاجة تحت نظرات صدمة من الكل وخاصة ريم

اينعم ريم زعلت على ادم وحماها الي بتعتبره زي باباها بالظبط بس في نفس الوقت فرحت بوقفة اخوها جنبها وخوفه عليها

اتكلمت ريم بسرعة وهي بتقول متزعلش يا بابا صلاح من كريم حقك عليا

قالها صلاح بضيق من الموقف الي هو فيه

مش زعلان يا بنتي والله وهو بصراحة ليه حق يعمل اكتر من كدا

انا مش عارف لو حد عمل كدا في بنتي هعمل فيه اي دا مش بعيد ان كنت حبستها ومطلعتهاش نهائي انا عارف يا ريم انك زعلانة على ابنك الي راح

بس ربنا كريم وهيعوضك بداله اضعاف مضاعفة وانا واثق من دا بس كمان يا بنتي حماتك والله ملهاش في السجون ولا بهدلتها ولا ادم كمان عشان خاطري يا بنتي خلي كريم يخرجهم وانا اوعدك والله الي هتعوزيه كله هيتعمل

دموع ريم نزلت وقالتله خاطرك غالي عندي يا بابا والله بس

طبطب معتز على ايدها وهو بيقولها عارف انك شلتي واتحملتي فوق طاقتك واكتر بس عشان خاطري ووعد مني قدام ربنا ان لو عملت اي حاجة تانية انا اول شخص هكون ضدها

اتنهدت ريم بارهاق وهي بتقول حاضر يا معتز

ممكن تليفون عند منكم او حد فيكم يكلم كريم يجي عشان انا مش هقدر اروح له

وفعلا طلع صلاح فونه من جيبه واتصل على كريم وفعلا كريم رد عليه وقاله انه هيجي

اما في السجن كانوا عالجوا اعتماد وقعدت وهي خايفة من الستات الي قاعدين قدامها بس بصت على ايدها ورقبتها ملقتش الدهب

من خوفها منهم مقدرتش تنطق

واحدة منهم كلمت الي جنبها وقالت يا ساتر يا رب اي الولية البومة دي من ساعة ما دخلت وانا مش طيقاها سبحان الله

ردت الست الي جنبها بضحك وهي بتقول اه والله يا اختي اصل القبول من عند ربنا ودي وشها يقطع الخميرة

كانت اعتماد هترد عليهم بس من خوفها منهم مقدرتش ترد ولا حتى تنطق

في المستشفى كان كريم في دخلة للمستشفى لقى سمر واقفة بتتكلم في التليفون

قرب ووقف وراها سمعها بتقول والله ما كان قصدي يا بنتي انا اتكلمت عادي معرفش انه صعب كدا وهيحبسها هو انا هعمل حاجة تتسبب في حبس امي

سكتت سمر شوية وقالت عايزة الصراحة يا ميرال لولا انها امي ما كنت سكت لها انا اصلا والله قلبي واجعني على ريم ريم دي اغلب من الغلب وطيبة بشكل حقيقي بندم ندم عمري ان قضيت معاها 8 سنين وانا بعيدة عنها

كريم مين يا ميرال بس الي افكر فيه دلوقتي دا انا بترعب منه اصلا دا حرفيا اول ما بلاقيه بعت لي بخاف اتأخر ثواني في الرد فبرد عليه جري بحس انه ممكن يعجني

ضحك كريم غصب عنه فلفت سمر بسرعة وهي بتقول اي دا ازيك يا كريم تعال اتفضل هما قاعدين جوا مستنينك

قالها كريم بابتسامة طب وانتي مش قاعدة معاهم ليه جوا يا سمورة

سمر بصت له باستغراب وقالت له افندم

قالها بهدوء بقولك وانتي مش قاعدة معاهم ليه جوا

ابتسمت وقالت له كنت بكلم ميرال

ميرال اه قولتيلي بتكلميها عشان تنمي عليا على العموم ماشي يا ستي بس على فكرة انا مبعجنش بني ادمين بس عادي ممكن اعجن امك بس وبعد كدا اعتزل الشغلانة

ابتسمت سمر باحراج وهي بتقول هو انت سمعت انا اسفة والله

ابتسم لها ودخل الاوضة من غير ما يرد عليها

قالت سمر بينها وبين نفسها اي البني ادم العبيط دا

بس نفضت كل الي كان في دماغها ودخلت الاوضة جري وراه

اول ما دخلت سمعت ريم بتقول لكريم

عشان خاطري يا كريم سيبها المرة دي وكمان خرج ادم

اتكلمت ملك هي كمان وهي بتقول بالله يا كريم ادم مش عامل حاجة طب حقك عليا

بصلها وقال انتي بالذات تستكتي انا اصلا على اخري منك انك مكلمتنيش لما البيه اتجوز عليكي ازاي تسكتي ولا اختي الي عايشة عيشة زي الزفت وساكتة انا حقيقي مش عارف انتم متحملين كل دا ازاي وليه اصلا وعشان مين

قالت قمر بهدوء عشان اجوازتنا يا كريم

يعني معتز وادهم ونوح يستاهلوا اننا نتحمل عشانهم وادم كمان مش وحش هو

قالت سمر بسرعة اه والله مش وحش تلاقيه اتحسد

بصلها كريم نظرة سريعة وقال اسكتي انتي

قالت سمر في سرها اما انك غتت بصحيح

بص كريم لمعتز وقال بضحك وانت يا ابو نسب مش هتدافع عن مامتك واخوك

معتز لف وشه واتكلم بحزن هتكلم اقول اي بس يا كريم دي مهما كان امي وقلبي واجعني عليها والله

استغرب كريم اصلا من حالته فرد عليه، طيب انت مين الي عمل فيك كدا

سمر بسرعة اصله عمل حادثة وو

رجع بصلها كريم وقال هو انا مش قولت اسكتي انتي

قاله نوح بزعيق جرا اي يا كريم هتسوق فيها ولا اي ما خلاص يا عم بقا متبقاش رخم

طب اسكت انت كمان بدل ما احطك جنب اخوك

قربت سيليا من نوح وقالت له في ودنه بالله تستكت مش هتحمل انه يحبسك انت كمان دا شكله مفتري

راح كريم جنب ريم وقعد على الارض وبصلها وقال يا قلب اخوكي شوفي الي انتي عايزاه وتحبيه وهعملهولك وافتكري ان ليكي ضهر وسند تتسندي عليه طول الوقت وعمره ما يميل ابدا

مش عايزك ابدا تزعلي ولا تتكسري لا عاش ولا كان الي يزعلك ويكسرك يا ريم

تعرفي اني لولا عارف ردك وعارف ان قلبك طيب مكنتش ابدا سمحت انهم يخرجوا بس انا عارف انك هتسامحي وانا كمان سامحت عشانك وعشان جوزك والحاج صلاح وعشان حاجة تانية هقولك عليها بعدين قال جملته الاخيرة وهو بيغمزلها

ابتسمت ريم وطبطبت عليه وقالت ربنا يديمك ليا يا حبيب اختك

رجع كريم بصلهم ووجه كلامه لصلاح ومعتز، انا المرة دي عملت باصلي وباصل اختي وسبتهم وسحبت المحضرين بس اقسم بربي المرة الجاية هنسى اصلا اني عرفتكم وهستخدم سلطتي الي عمري ما استخدمتها ضد اي مخلوق ووقتها حقيقي لا هراعي نسب ولا هراعي اصول لانكم هتكونوا مراعتوهاش اصلا يلا اسيبكم انا

ووطى على ريم وباس دماغها وراح ناحية معتز وضربه على ايده المكسورة وهو بيقول سلامتك يا ابو نسب

قال معتز بوجع اهه يا متخلف ابعد ايدك يا غبي

ضحك كريم وهو خارج وبص لسمر بنظرة محدش خد باله منها غيرها وهو بيشاور لها على الفون بمعنى انها تفتحه يعني

بعد شوية وقت مسكت سمر الفون وهي بتفتحه وبتحاول تخرج من الاوضة وفعلا خرجت وفتحته لقيت 4 رسايل من شات كريم

فتحت الشات بخوف وبدأت تقرأ الرسايل

تعرفي لو مكنتش سمعت كلامك كانت مهما تقول ريم مش هوافق على كلامها

خرجت مامتك واخوك عشان اختي وعشان مكسرش بخاطرك بعد الكلام الي سمعته منك

يلا على الله بقا وعلى رأي المثل، لاجل عين تكرم الف عين غيرها

وحاجة اخيرة انا والله مش بعض فمفيش اي داعي تخافي مني يا سمورة، ومتنسيش تقولي لميرال على كلامي دا ها ابقى اشم خبر بقا انك حكيتي لها وقتها مش هعجنك بس دا انا هجلدك

ابتسمت سمر على اخر رسالة وهي بتقول في سرها اي حكايتك بقا يا سي كريم

وقفلت الفون من غير ما ترد ودخلت تاني على الاوضة

بعد ساعة ونص الباب اتفتح ودخل منه ادم ووراه اعتماد الي كانت متبهدلة على الاخر دخلت وهي بتقول

منك لله يا ريم انتي واخوكي على الي عملتوه فيا يا عالم يا حرامية بقا انا تحبسوني وتسرقوا دهبي مني يالي ربنا ينتقم منكم يا عالم يا مفترية

اشوف فيكم اسبوع يا رب مش يوم بس

سكتت لما لقيت قلم نزل على وشها وحرفيا رن في الاوضة كلها ووو يتبععع

#يتبع

#البارت_الثامن

#لانك_قدري

#حكاوي_كاتبة

#حور_حمدان

         الفصل التاسع من هنا 

لمتابعة باقي الرواية زوروا قناتنا على التليجرام من هنا