رواية حواديت رمضان الفصل الرابع 4 بقلم فيروز عادل
-هنقضيها نوم ولا ايه ده صيام ده؟
صحيت بخضة وانا بحاول افتح عيني من النور اللي ملى الاوضة بعد ما الستاير اتشدت:في ايه ياماما هي الساعة كام؟
-فيه اننا رايحين عند جدك قومي يلا اجهزي خليني الحق اروح اساعدهم.
-ما ياماما لو عاوزة تروحيلهم اوي كده روحي انتي ربنا معاكي وانا شوية وجاية.
سكوت دام لثواني قبل ما اقعد على السرير بخضة لما لقيت شبشب ست الكل مشرف جنبي على السرير.
واتكلمت من بره الاوضة وهي طبعًا بتجري ورا نفسها:قومي واتأكدي ان اخوكي صحي، انتو الاتنين هتشلوني.
فتحت الموبايل لقيت الساعة 10ونص الصبح طب ليه طيب، طب ننام عشر دقايق كمان طيب ملحقناش!
بس ما باليد حيلة عارفين ليه لان النهارده عزومة جدو، يوم مفيش فيه ولا راحة ولا نوم بس الحمدلله بيكون فيه احلى فطار في الشهر كله.
وقفت عند باب اوضته وانا بتكلم بتعب:اصحى علشان يظهر كده ان اليوم بدأ.
قعد على السرير وهو بيكلمني بنص عين اللي مفتوحة بس:هي الساعة كام؟
ملحقتش ارد عليه لما لقيت ماما جت وقفت جنبي وهي لابسة وجهزت:خمس دقايق وهنزل اروح لوحدي، براحتكوا.
حالة ذعر صابتنا انا ومحمد اخويا بنجري انا وهو ورا بعض في الشقة علشان نلحق نجهز تحت تهديدات ماما المستمرة بأنها هتمشي وتسيبنا.
اللي في الاخر انا ومحمد واقفين قدام الباب نص ساعة علشان ماما كل شوية بتفتكر حاجة جديدة كانت نسياها فبترجع تاني علشان تجيبها..
لحد ما اخيرًا وصلنا لبيت جدو.. من لحظة الوصول دي مستحيل تقعد في مكان واحد لمدة دقيقتين حتى!
بنتسحل انا وباقي البنات معاهم في المطبخ اما الشباب ف لازم لازم يروحوا يلعبوا كورة في الارض الكبيرة الفاضية اللي قدام بيت جدو ويرجعوا قبل الفطار بخمس دقايق وهما بيطلعوا في الروح من كتر العطش وبرضو مش بيحرموا.
بصيت لمرات خالي اللي كانت قاعدة بتحشي لما بدأت توجه كلامها ليا:مش ناوية خالص رمضان الجاي تقضيه في بيت جوزك؟
-لا مش ناوية واهدي هاا اهدي.
بصت لماما:انا مش فاهمة بنتك دي عايزة مننا ايه!
ردت عليا بغلب:انا غلبت معاها وابوها عايم على عومها لما خلاص طهقت منهم هما الاتنين.
خالتو جت وقفت جنبي:وماله فارس هاا؟ والله جميل ومؤدب وشاريكي بدماغك الجزمة دي.
سيبت اللي في ايدي:هو مش موضوع فارس ده المفروض اتقفل؟
بصيت لتيتة:مش انا ياتيتة قولت لمحمد اخويا وعمر ابن خالي قدامك انهم يقولوله اني مش بفكر في الموضوع ده دلوقتي وانه ميفتحوش مع بابا؟
-ايوه يابنتي… بس هو مسكتش وراح كلم ابوكي.
بصيت لماما:وليه محدش قال ليا انه كلم بابا؟
-علشان ابوكي قاله يسيبله شوية وقت لانك قافلة الموضوع دلوقتي خالص وصرب الحوار جزمة هو كمان.
بصتلهم ماما وهي بتكمل كلامها بتعب:يعني الواد ده مش ابن ناس يعني! يرضيكوا اللي بيعملوه فيه ده، ده بقاله اكتر من شهرين مستني اي رد.
كنت بصالهم وانا متابعة الحوار بذهول.. انا ليه مفيش اي حد جرب يقول ليا الموضوع ده؟
بس فوقت على ايد بنات خالاتي وخالي وهما بيسحبوني بره المطبخ.
بصيت لسارة لما بدأت تتكلم:سيبك من برنامج الستات ميعرفوش يكدبوا اللي جوه ده وتعالي نروحلهم.
شديت ايدي من ايديهم:لا لا مش عايزة روحوا انتو.
مسكوا ايدي تاني ومي بتتكلم:هنروح كلنا… وبعدين حرام عليكي ياحور بيقولولك بقاله شهرين مستني رد منكو لله!
خرجنا لبره وانا دماغي لحد دلوقتي مش عارفة تستوعب كل اللي اتقال جوه ده!
فارس ابن الجيران اللي عند جدو، وصاحب كل شباب عيلتنا.. من واحنا صغيرين واحنا بنلعب مع بعض في الشارع،
منكرش ان قلبي الحيوان بيدق وبتوتر اول ما بشوفه في كل مرة يمكن من زمان..
بس دايمًا بنكر ده قدام اي حد لاني بخاف!
ماشي انا جبانة وبالذات من الحُب.. بخاف اصلاً اقول بيني وبين نفسي اني بحب!
رغم ان كل اللي حواليا بيحلفولي ان عيني اول ما بتلمحه بتقول اني بحبه!
-طب ما توافقي ما انتي لما بتلمحيه بتتدهولي اهو!
بصتلها وانا الابتسامة بتتشال من على وشي:بقولك ايه جربي تسيبيني فحالي.
سبتهم ومشيت روحت قعدت لوحدي في جنب وانا بتفرج عليهم وهما بيلعبوا كورة..
ايه السر في اني بحب اشوفه بيعمل الحاجات اللي بيحبها؟
عينه جت في عيني ف ابتسامته زادت وهو بينهج وبياخد نفسه.. كمل لعبه اللي بعد كام دقيقة كان سايبه وهو جاي يقعد جنبي!
كنت متوترة بالذات بعد ماعرفت انه مستني رد من بابا.
-كل سنة وانتي طيبة.
ابتسمتله:وانت طيب.
فضل ساكت كام ثانية وبعدين اتكلم تاني وهو بيهز راسه بحركة تساءل:طب ايه؟ مش عايزة تقولي حاجة؟
بلعت ريقي:حاجة زي ايه؟
-اي حاجة قولي اي حاجة ياحور.
اخدت نفس:انا اسفة.. انا بجد معرفش انك اتكلمت مع بابا او انك مستني رد اصلاً، الموضوع سخيف بس انا والله مفيش اي حد عرفني اي حاجة.
-طب وبعد ما عرفتي؟
-هاا؟
اخد نفس ورجع بص ليا وهو بيبتكلم:انا مستعد استناكي عمري كله انا مش هزهق، بس انا مش فاهم وده اللي مضايقني.
-مش فاهم ايه؟
-رفضك من الاول.. اتقالي ان الرفض مش ليا ده لفكرة الارتباط عمومًا.
-انا بس… خايفة، ومش منك انا.. انا بحس اني مش جاهزة لكل ده دلوقتي مش عارفة.
بصتله وانا بفرك ايدي من التوتر كانت بتترسم على وشه ابتسامة خلتني احس اني هديت عن الاول نوعًا ما.
-طبيعي اي حد مننا يكون خايف شوية من الخطوة الجديدة اللي هياخدها في حياته.. اي خطوة مش بس ارتباط وجواز ده حتى لو خطوة تعليم او شغل جديد، بس ياحور اللي بيخاف مش بيعرف يعيش، لازم يجرب حتى لو هيندم بعدين هي الدنيا كده لان زي ما فيه احتمال انه يندم فيه احتمال ان الخطوة دي تفرق جدًا في حياته.. وانا اوعدك اني عمري ما هخليكي تندمي ابدًا، وعالفكره انتي ممكن توافقي ونتعرف اكتر وتعرفي قد ايه انا بحبك واحبك اكتر وتحبيني ونحب بعض وتبقي سبب هايل يخليني اكمل معافرة في الدنيا الصعبة دي.
ضحكت بعد ما خلص كلام ف رجع كمل كلامه:بالله عليكي يارب رمضان الجاي تكوني في بيت جوزك اللي هو انا تخلي عم جمال ابوكي يبل ريقي بأي حاجة.
سارة اتكلمت وهي بتمد ايديها بكوباية عصير:طب خد بل ريقك ياعريس المغرب قرب يأذن.
اخدها من ايديها:برتقان؟ مع اني كنت عاوزها شربات.
ردت عليه وهي بتضحك:معلش امسحها فيا المرة الجاية هجبهالك شربات.
بصت ليا وانا لسه قاعدة بصاله ومبتسمة:طب ايه ياصغيرة على الحب مش هنفطر ولا ايه.
قومت معاها بعد ما فوقت على كلامها وقربت منها وانا بضربها في دراعها علشان تسكت.
حمحمت قبل ما ابصله واتكلم:طيب سلام دلوقتي.
رجعت سارة اتكلمت تاني:دلوقتي؟؟ انتو هتشوفوا بعض تاني ولا اي…
سكتت وهي بتتوجع لما ضربتها تاني وهو بيقوم يقف وهو بيضحك:اه اصل هاجيلكوا بعد التراويح.
بصينا له احنا الاتنين باستغراب وانا بسأله:ليه؟
-هما هيبلغوكي بتحركاتي في علاقتنا امتى والله ده انا على اخري.
-ايوه بس مش وقته قولي بجد جاي ليه؟
-ما احنا عارفين ان ده اليوم العائلي بتاعكوا ف جاين انا وابويا بقى يكلم كل رجالة عيلتكوا علشان هو انتهت كل الحلول بصراحة.
بصينا لبعض انا وسارة بمفاجأة والابتسامة بتترسم على وشوشنا بس سعمنا صوت عالي من جوه بينادوا علينا، قربنا من البيت بسرعة بس بصتله لما نده عليا وانا ماشية:رمضان الجاي في بيتنا هااا؟
ضحكت ودخلت البيت مع سارة وانا ببصلها وقلبي غالبًا هيخرج من مكانه:شكلي رمضان الجاي مش هبقى معاكوا ولا ايه؟
……..
#حواديت_رمضان🌙
#حكاوي_فيروزه💃