رواية حواديت رمضان الفصل الخامس 5 بقلم فيروز عادل
-ايه مشاعرك وده اول رمضان ليكي وانتي مدام؟
بصتلهم الاربعة وانا بيترسم على وشي ابتسامة لما لقيتهم باصين ليا بإهتمام.. مؤخرًا بالذات مع بداية رمضان وانا بحب جدًا قاعدة البنات اللي بنقعدها مع بعض بالليل دي.
جاوبتهم وانا باخد المج بتاعي من ملك:اينعم نفس البيت ونفس العيلة ونفس كل حاجة بس رمضان ده احلى رمضان يعدي عليا في حياتي كلها.
حطت سلمى ايديها على خدها:ولا كان باين عليكوا حاجة ياسوسة انتي وهو كل شوية ده علي ابن عمي وهو يقول دي فرح اختي.
غمزتلها فريدة:انتي اللي مغفلة ومكنتيش فاهمة ده الواد عمر القزم ابن اختك كان عارف انتي اللي نفسنا تعيشي معانا شوية.
جاوبتها وهي بتشرب من المج بتاعها:لا اعيش معاكوا ايه انا ربنا ينجيني من البيت ده واتجوز وامشي من هنا.
بصت ليا وهي بتكمل:حركة متهورة دي يا فوفا انك تتجوزي ابن عمك وتكملي حياتك في ام العيلة دي.
رفعتلها حاجبي:ولما اقوله بقى؟
"انا جيت وعايزك تقوليلي جدًا بصراحة."
بصينا كلنا ورانا لما سمعنا صوته جاي علينا ف سلمى اتكلمت:ازيك يا ابيه ما شاء الله عليك كنا لسه في سيرتك.
بص ليا:انتي مبتزهقيش من العيال دي؟ ده انا بشوفهم بصدع.
قابلت كلامه ملك بإبتسامة:مقبولة منك ياعلي يا اخويا.
ضحكت وانا ببصلهم:مقدرش للاسف دول قدري.
فريدة اتكلمت وهي بتشاورله:خد مراتك وروحوا شقتكوا علشان هتبدأ تعك.
مسك ايدي ف قومت معاه واحنا الاتنين بنضحك وملك بتتكلم بصوت اعلى علشان نسمعهم:هنستناكوا على السحور هااا؟
علي اتكلم بصوت عالي هو كمان علشان تسمع:لا مش هنيجي تاني انتو قرفتونا بصراحة.
-طب عالفكره بقى هقول لجدك.
-اتهدي بقى شوية يحرباية اتهدي.
فتح باب الشقة وخرجنا منها واحنا بننزل من العمارة ورايحين ناحية تالت عمارة في الشارع.. شارع طويل نوعًا ما بس مقفول وكله بتاعنا!
احنا عيلة كبيرة شوية.. شويتين تلاتة كده.
كنا ماشيين في الشارع ضاممني له، الجو برد رمضان في البرد جميل اوي.
رفعت عيني ابصله فبص ليا هو كمان:العيال فوق بيقولولي ايه مشاعرك في اول رمضان وانتي مدام.
ابتسم:وقولتيلهم ايه بقى؟
بصيت قدامي وانا بتنهد بعد نفس طويل:قولتلهم اني حاسة بأجمل مشاعر في الدنيا وانه احلى رمضان عيشته لحد دلوقتي.. يعني ربنا انعم عليا وعيشت لحد ما شوفت دعواتي وهي بتتحقق قدام عيني.
بصتله فـكان لسه باصص ليا وبدأ يتكلم:كل رمضان كنت بدعي ب اللي احنا فيه ده دلوقتي.. كنت بدعي اللهفة اللي بشوفها في عينك مشوفهاش لاي حد تاني ابدًا.. تفتكري بنحلم؟
بصيت قدامي واحنا داخلين العمارة:ده يبقى احلى حلم حلمته في حياتي وياريت ماحدش يصحيني منه.
فتح باب الشقة وهو بيضحك فدخلت ودخل ورايا وانا بتكلم:ادخل بقى خد دش وفوق خالص على ما اعمل حاجة نشربها علشان فيه حاجات كتيرر هفضل احكيلك عليها لحد السحور، واعمل حسابك كمان انك هتاخدني نصلي الفجر انا مش هتنازل النهارده والمرة دي بجد بقى.
كنت بكلمه وانا ماشية للمطبخ رجعتله تاني بسرعة وانا بقف على اطراف صوابعي وببوسه من خده:عملتلك بسبوسة.
سبته ومشيت للمطلخ تاني وانا سامعة صوته من بره:والله مفيش بسبوسة غيرك!
………
#حواديت_رمضان🌙
#حكاوي_فيروزه💃