رواية حواديت رمضان الفصل السادس 6 بقلم فيروز عادل
-عايزين نشيل الكنبة دي من هنا علشان عزومة بكره.
-ولما نشيلها الناس هتقعد على ايه؟ وهنحطها فين اصلاً؟
لفيت وانا بكمل كلامي وبشاور قدامي:وهنحط هنا تلت ترابيزات جنب بعض بالطول وهنفزشهم بمفرش كبير.
لفيت وبصتله كان واقف بتعب مربع ايده وهو للاسف مضطر يسمعني:تلاتة ولا نخليهم اربعة؟
-اربعة ليه احنا هنعمل مائدة!
-انت شكلك ناسي العدد، احنا نراجع تاني.
بدأت اعد على صوابعي في محاولة منه انه يسكتني بس يأس وسكت وهو بيسمعني:عيلة عمو كمال اللي هو انتو.. خمسة، عيلة طارق اللي هو بابا اربعة كده تسعة وتيتة عشرة، ده غير عمك وائل ودول تلاتة من غير هالة وجوزها وحموزة ابنها وعمك سمير اتنين بس هو ومراته وعمتك احلام وبنتها فاطمة وجوزها وتوتا ولولو ولادهم وعمتك سناء ودي ارملة وعيالها مسافرين ده وعمتك صباح الله يرحمها.
-ايه هتطلع من التربة وتيجي هي كمان.
-بص بقى خفة دمك دي هي اللي معطلانا.
ضحك:ايوه مالها عمتك صباح الله يرحمها.
-داليا بنتها وكريم جوزها وعيالهم التلاتة جايين.. يعني كده.
وقفت للحظات وانا بعد على صوابعي تاني فجاوبني هو:كده 29.
بص قدامه للمكان بعد اتكلم وهو بيتنهد:احنا عاوزين كده ست ترابيزات.
ضحكت وانا ببص معاه انا كمان:هتقضينا زي كل سنة.. اينعم احنا بنزيد بس هتقضينا هتقضينا.
مشيت للمطبخ ف جه ورايا:طب والخطة ايه دلوقتي.. انا مش عارف اشمعنا احنا اللي هنعمل الحوار ده.
-اولاً علشان انا وانت سوا هننجز قبل ما يجوا وثانيًا علشان هما كلهم بيشتروا حاجات لاكل بكره وانا مش قادرة الف لفة امك وامي ومرتات اعمامك وعماتك دي خالص.
جه وقف جنبي وهو بيبتسم:بتعملي ايه؟
بصيت للكنكة اللي قدامي:بعملك قهوة.. برشيك علشان تعمل اللي انا عاوزاه من غير زهق.
-هو مادام انا معاكي ف انا مش زهقان عمومًا يعني.
-انت كداب ياسيف، بس هعديهالك بمزاجي.
-طب قوليلي.
-هاا.
-مش عايزة نخلي العزومة الجاية العيلة عددها تلاتين فرد خالص؟
ضيقت عيني:مين حامل؟
بصتله:ازاي انت عارف المعلومة دي وانا معرفش.
اتنهد بيأس:طب ما عدى على الفطار تلت ساعات ونص، نجيلك امتى عقلك يكون اشتغل طيب.
وقفت لثواني افكر بعدين رفعتله حاجبي:انا فهمت قصدك.
-حمدلله على السلامة والله.
حطيت فنجان القهوة في ايده:امسك دي ويلا علشان تشيل الكنبة.. مفيش تلميحات في رمضان حرام.
سبته وخرجت من المطبخ وهو جاي ورايا:يعني كتب كتابنا ميبقاش على العيد خالص؟
لفتله وانا برفع ايدي:انا حتى مفيش في ايدي دبلة! كتب كتاب ايه احنا يادوب قاريين الفاتحة، هي مرات عمي مأكلاكوا ايه النهارده.
-ياجميلة مش الاتفاق ان الخطوبة في العيد.. مش هاكل عليكي حقك هجيبلك الشبكة مع المأدون صدقيني.
-الكنبة.
-ده كتب كتاب مش فرح.
-الكنبة ياسيف.
بص وراه للكنبة بزهق واتكلم بانفعال:هما ليه حاطين كنبة في الجنينة؟!
ضحكت وانا بطلع الحاجة اللي هنعملها من الاكياس:لما تيتة تيجي هقولها انك معترض على ديكور بيتها وشوف بقى هتعمل فيك ايه.
-لو قولتيلها هتجوزك على العيد.
بصتله وانا بضحك وبرفع كتفي:يبقى هقولها.
رفع حاجبه بابتسامة:وده اعتبره تلميح؟
بصيت ورايا لما لقيتهم داخلين البيت باكياس كتير وصوتهم جايب اخر الشارع.. شوية بيضحك وشوية بيصوت،
لفتله تاني قبل ما حد يجي علينا:التلميحات حرام في رمضان.. خليك في الكنبة.
جم علينا اخواتي واخواته وولاد اعماممنا وهما بيسألوا:ها هنعمل ايه؟
بصتله وانا بشاورلهم عليه:سيف هيشيل الكنبة.
………
#حواديت_رمضان🌙
#حكاوي_فيروزه💃