رواية حواديت رمضان (كاملة جميع الفصول) بقلم فيروز عادل
-رمضان لسه بعد بكره.. ياجماعة غدًا المتمم لشعبان والله انتو الرؤية لسه موصلتش ليكوا ولا ايه!
بصتلها بزهق:بقولك ايه انتي هتفضلي تندبي كتير ولا هتيجي تساعدينا؟
اتنهدت:امري لله.
دخلت البلكونة وسلمى جاية ورايا واحنا الاتنين بيترسم على وشوشنا ابتسامة، الزينة بتتعلق والشارع بينور شوية بشوية.
كل الجيران تحت الشباب بتعلق والعيال الصغيرة بتفرقع الصواريخ!
اتكلمت سلمى من جنبي:بت يافريدة انا كده حاسة ان رمضان بكره بجد.
بصتلها وانا بضحك:مقدروش يستنوا لبكره حتى بعد ما عرفوا ان لسه مفيش صيام بكره.
-ما تلاقي يو…
قطعت كلامها بخضة ليا انا وهي لما لقينا حاجة اترمت فجأة علينا.. كان فرع نور.
بصيت للشارع تحت بعصبية بدأت تهدى لما لقيته واقف قدام السلم وهو بيضحك:بالله عليكي يا ابلة ماتشبطي الفرع ده عندك وبطلي لوكلوك انتي والبومة
اللي جنبك دي.
بصتلها وانا بضحك:اخوكي بيشتمك تقريبًا.
قربت من السور وهو بتزعق نوعًا ما:طب ايه رأيك يايوسف مش هجوزهالك وابقى وري…
شدتها لوره وانا بحط ايدي على بوقها علشان اكتمها،
-انتي مجنونة صح؟
سابتني وهي بتضحك وبتبوسني قبل ما تمشي وتنزل:شبطي فرع الزينة يافريدة.
مشيت وانا حطيت ايدي على قلبي وباخد نفسي علشان اهدى، سلمى صاحبتي من واحنا قد كده.. جارتي اللي معايا في كل صغيرة وكبيرة، بس ده ميمنعش اني ساعات بكون محتاجة ارنها علقة.. مش ساعات ده عالطول.
خلصت فرع النور ونزلت انا كمان كان كل البنات في مدخل العمارة بيعملوا تمر هندي وسوبيا.. نقنع بعض ازاي ان رمضان بعد بكره لسه طيب؟
بس احنا ما بنصدق الايام دي تيجي، بنمسك فيها وبنخاف يوم واحد يعدي علينا ويضيع،
يمكن علشان دي الايام الوحيدة في السنة اللي بتحسسنا اننا لسه صغيرين،
حاولنا منقطعش عادتنا ابدًا من واحنا قد كده في اننا نزين شارعنا ودايمًا نحاول اننا نخليه يوم مميز مش زي اي يوم تاني.. رغم ان فيه كتير مننا مبقاش موجود، اللي عزل واللي سافر واللي اصلاً مبقاش مهتم بس ده ميمنعش ان لسه كتير اوي مننا بيستنى اليوم ده وكأنه بيخلينا نهرب من حياة الكبار اللي دخلناها فجأة دي!
بصينا لفرح لما اتكلمت بصوت عالي فجأة"جماعة كريم رجع من السفر."
حتى اللي سافر لسه قلبه مربوط هنا.. رمضان يعني مصر خصوصًا لو طول عمرك بتعيشه مع ناس حلوة بتحلي كل حاجة في الايام دي اضعاف حلاوتها.
كله خرج على الشارع كان كل الشباب بيحضنوا كريم اللي راجع مخصوص من قبل ما رمضان يبدأ علشان ميفوتش كل اللي بيحصل ده..
جه وقف جنبي:كل سنة وانتي طيبة.
-ماشي وانت طيب.
-ايه ماشي وانت طيب دي!
بصتله:اقولك ايه؟
-قوليلي موافقة.
ضيقت حواجبي:على ايه؟
-عم محمد ابوكي كان مصمم ان رمضان الاربع وانا اقوله لا هيبقى الخميس ان شاء الله واتفقنا اتفاق انه لو الخميس فنقرا الفاتحة قبل اول تراويح.
-نعم؟!
-ايه بعدها ولا ايه؟
ضحكت وانا مش فاهمة:يوسف انت مش هتبطل هزارك الرخم ده؟
-شوفي بتخلينا نسيب الموضوع الرئيسي ونمسك في حاجات غريبة.
بصيت لأريج اختي وهي كاتمة ضحكتها:بابا رجع من الشغل وعايزك في موضوع مهم.
بصتلها بعدين رجعت بصتله تاني..
اريج حطت كوباية التمر في ايده:حلو ده ولا عايز شربات؟
رجعت بصتله تاني وهو بيشرب:ده يعني ايه ده؟
-عايزين رمضان الجاي نقضيه مع بعض في بيتنا بقى.. هو دورنا مش هيجي ولا ايه!
…………
#حواديت_رمضان🌙
#حكاوي_فيروزه💃