رواية شهد (كاملة جميع الفصول) بقلم اسماء صلاح
شهد: "هي الفلوس شكلها خاسس كده ليه؟ أما أعدها كده."
قعدت على السرير وعدتها: "إيه ده! يا ناقص 3000.. راحوا
فين دول؟ ليكون ماما خدتهم، أما أسألها كده."
سابت الفلوس وخرجت: "ماما!"
سحر: "عاوزه إيه من ماما؟"
شهد: "ما لكيش دعوة عايزة إيه، خليكي في الفيلم اللي إنتِ بتتفرجي عليه على التلفزيون ده."
سحر: "بقى كده؟"
شهد: "آه كده."
سحر: "طب وطي صوتك بقى علشان أسمع الفيلم."
شهد: "مانيش موطية يا ماما."
جات والدتها : "ايه يا بنتي بتنادي عليا بصوت عالي ليه؟ الدنيا اتهدت!"
شهد : "سيبك دلوقتي من الكلام ده يا ماما، انت اخذت فلوس من الدولاب بتاعي؟"
والدتها : "لا مااخذتش، ليه؟"
شهد : "علشان الفلوس ناقصين 3000."
والدتها : "ازاي دي؟"
شهد : "زي ما بقول لك كده، فلو كنت خدتي قولي لي."
والدتها : "يا بنتي والله ما اخذت، وانا هاخد من فلوسك
اللي في الدولاب ليه؟ انا ما ابوكي ربنا يخليه لينا لما بعوز بيديني، وبعدين لو كنت اخذت اكيد مش هنسى يعني وكنت قلت لك علشان تبقى عارفه، بس انا ما اخذتش."
شهد : "امال راحوا فين دول؟"
والدتها : "هو انت عديت الفلوس؟"
شهد : "اه عديتهم، امال هعرف منين يعني يا ماما ان هم ناقصين 3000 الا اذا كنت عديتهم؟"
والدتها : "طب ما يمكن عدتهم غلط يا فالحه علشان كده طلعوا ناقصين."
شهد : "لا يا ماما ما عديتهمش غلط انا معدياهم صح، يمكن بابا خدهم."
والدتها : "وابوكي هياخدهم ليه؟ وبعدين من امتى ابوكي بياخد منك فلوس؟ قولي لي كده."
شهد : "امال يعني مين اللي خدهم؟"
سحر : "انا اللي اخذتهم يا شهد."
والدتها : "ايه! انت يا سحر؟"
سحر : "اه يا ماما انا."
وقامت.
شهد : "واخذتهم ليه بقى ان شاء الله؟ وبعدين ازاي تاخدهم من غير ما تقولي لي؟"
سحر : "ما انا كنت هقول لك يا شهد."
والدتها : "طب واخذت 3000 جنيه تعملي بهم ايه يا سحر؟"
سحر : "ماعملتهمش حاجه يا ماما، اديتهم لايمن."
شهد : "اديتهم لخطيبك؟"
سحر : "ايوه."
والدتها : "طب واديتهم له ليه؟ هو طلب منك فلوس ولا ايه؟"
سحر : "لا يا ماما ما طلبش بس هو كان محتاجهم، اصل التاكسي اللي شغال عليه اتخبط لما كان سايقه، وصاحب التاكسي اتخانق معاه ومسك فيه كمان لما راح له علشان التاكسي يعني اتخبط، وقال له ان انت اللي هتصلحه على حسابك وهو ما كانش معاها 3000 جنيه، فاديتهم له بقى علشان يصلحه."
شهد : "اديتهم له علشان يصلحه! وهي فلوسك علشان تديهم له؟"
سحر : "لا مش فلوسي يا شهد، فلوسك انت."
شهد : "ما هي فلوسي! بتديها له ليه؟"
والدتها : "اهدي بس يا شهد."
شهد : "اهدي ايه وزفت ايه يا ماما! بتدي له من فلوسي ليه انا؟"
سحر : "وفيها ايه لما ادي له من فلوسك يا شهد؟ ما هي فلوسك هي فلوسي، ما احنا اخوات يعني ما فيهاش حاجه."
شهد : "لا فيها! انا مش بشقه وبتعب كل يوم في المحكمه
وفي مكتب المحاماه اللي انا بشتغل فيه محاميه، لاخذ مرتبي وحوشه كل اول شهر وما اصرفش منه حاجه، علشان حضرتك تيجي تاخدي منه وتدي لايمن بتاعك ده!"
سحر : "ايه ايمن بتاعك دي؟ لو سمحتي لما تيجي تتكلمي عن ايمن تتكلمي كويس!"
شهد : "لا مش متكلمه كويس، وهتكلم زي ما انا عايزه.. ايه رايك بقى؟"
دخل والدها الشقه : "في ايه؟ بيزعقوا ليه؟"
والدتهم : "ها؟ لا ما فيش يا ابراهيم."
شهد : "لا في يا بابا، الاستاذه اخذت 3000 جنيه من فلوس مرتبي اللي انا محوشها من غير ما تقول لي، وراحت اديتهم لخطيبها!"
والدها : "ايه؟ 3000 جنيه!"
شهد : "ايوه يا بابا."
سحر : "ما انا عملت كده يا بابا علشان ايمن كان محتاجهم."
والدها : "وايمن كان محتاج 3000 جنيه في ايه؟ وبعدين ازاي تعملي كده من غير ما تقولي! ولا انت كنت عارفه يا عفاف؟"
عفاف : "لا والله يا ابراهيم ما كنتش اعرف، انا لسه عارفه قبل ما تدخل بشويه."
ابراهيم : "يعني عملت كده من غير ما تقولي لحد يا سحر؟"
سحر : "ما انا كنت هقول لك يا بابا انت وماما وكنت هقول لشهد كمان ان انا اخذتهم."
شهد : "كنت هتقولي لي! والله تلاقيكي ما كنت هتقولي لي ولا حاجه."
سحر : "لا والله كنت هقول لك بس انا قلت ادي الفلوس الاول بسرعه لايمن."
والدها : "وتديها له بسرعه ليه؟"
سحر : "علشان يصلح التاكسي يا بابا."
والدها : "تاكسي ايه اللي يصلحه؟ هو ايمن جاب تاكسي؟"
سحر : "لا يا بابا ما جابش تاكسي."
والدها : "امال تاكسي ايه اللي يصلحه؟"
عفاف : "التاكسي اللي شغال عليه يا ابراهيم اصل.."
وحكت له على اللي قالته لها سحر : "وانا ما كنتش اعرف اللي حصل مع ايمن ده، انا عرفت قبل ما تدخل بشويه بردك."
ابراهيم : "طيب بس بردك كان المفروض تقولي لنا يا سحر، انا وامك، قبل ما تدي له الفلوس، وتقولي لاختك قبل ما تاخديها."
سحر : "ما انا كنت هعمل كده يا بابا بس صاحب التاكسي كان مستعجل على تصليحه علشان كده عطيت لايمن الفلوس بسرعه."
شهد : "ما يولع التاكسي على صاحبه كمان! انا مالي ادفع ليه ثمن تصليحه؟ هو انا اللي خبطته؟"
سحر : "لا مش انت اللي خبطتيه، بس كنت عاوزاني اعمل ايه قولي لي كده؟ اقف اتفرج على ايمن لغايه لما صاحب التاكسي يؤذيه؟ وبعدين في ايه مالك؟ دول ما كانوش 3000 اللي اخذتهم يعني!"
شهد : "ما كانوش 3000! ايوه طبعا انت لازما تقولي كده، ما انت ما تعرفيش القرش بيجي ازاي لانك قاعده في البيت من ساعه ما خلصتي كليه خدمه اجتماعيه وما اشتغلتيش، لو كنت تعرفي القرش بيجي ازاي ما كنتيش قلت كده!"
والدها : "خلاص يا شهد."
شهد : "لا مش خلاص يا بابا، انا عايزه فلوسي والنهارده والا.."
سحر : "والا ايه؟"
شهد : "والا هروح بكره الصبح القسم وهقدم فيكي بلاغ سرقه!"
والدتها بصدمه : "ايه!"
...........نتبع
بقلم: Asmaa Salah