رواية من نظرة عين الفصل العاشر 10 بقلم هند سعدالدين

رواية من نظرة عين الفصل العاشر 10 بقلم هند سعدالدين

ـ مش كفاية كده أسبوع عسل بحاله.. 

ـ لسه ماشبعتش منك.. 

شدني من دراعي، قعدت على السرير، وهو مغمض عينيه شاور لي على كتفه، عشان أجي أنام جمبه.. 

عملت نفسي مأخدتش بالي.. 

ـ شغلك متعطل يا أستاذ.. 

شاور لي تاني.. 

استسلمت.. 

نمت جمبه، فتح عيونه.. 

أخد كفي وحطه على دقنه، ملست عليها.. 

ابتسم لي بهدوء.. 

ـ صباح الورد يا زهرة.. 

ـ صباح الفل.. كنت عا... 

حط صوابعه على شفايفي.. 

ـ خليني أعد النمش، أنا وصلت ل عشرين واحدة في الخد اليمين.. 

ـ البنات جايين النهاردة طيب؟

هز لي راسه، وكمل مشاورة على وشي..

ـ ١٥، ١٦، ١٧.. عندك حسنة على شفايفك..

ـ احكي لك حكايتها..

ـ احكي..

ـ كان يا مكان، يا سادة يا كرام، ما يحلى الكلام إلا بذكر النبي عليه الصلاة والسلام..

ـ عليه الصلاة والسلام يا زهرة..

ـ شطور.. كان في أميرة في بلد السند، الأميرة دي كانت شديدة الجمال، كل اللي يقف قصاد جمالها من شدته يتعمى..

مع كل شخص بيتعمى كان بيطلع لها شامة على وشها، الناس بقت تخاف منها، وهي بقت تلبس وشاح خفيف على وشها عشان يخفف من حدة النور اللي بيطلع من وشها واللي بيعمي العين، باباها كان صعبان عليه بنته كبرت، وكل ما يقول لحد من الوزراء أو أعوانه يتجوزها يخاف، لحد ما شاف شاب شغال في الجنينة بتاعته، حكم عليه يتجوز بنته ويجيب للمملكة أمير، الشاب مرفضش، وليلة جوازهم..

ـ كملي يا زهرة..

حطيت راسي على المخدة ومالك قام سند بكوعه على المخدة، وكان منتبه جدًا..

ـ وقفنا فين؟

ـ ليلة جوازهم..

ـ المهم ليلة جوازهم كان عاوز يشوف شكلها، ويعرف ليه الناس خوفوه منها، رفع الوشاح لحد نص وشها واداها قبلة، الأميرة حست إنها مش خايفة من الشاب جوزها، الوهج اللي طالع من وشها بدأ يختفي تدريجيًا وشال الوشاح من على وشها ولاحظ إن في حسنة لونها أسود على شفايفها..

ودي كانت ضريبة الحب اللي دفعتها الأميرة..

وزي أي أميرة، كانت فاكرة إن الضريبة مرة واحدة مش بتتدفع كل يوم.

ـ ثواني يا زهرة، هو الشاب اتعمى؟ 

ـ لأ متعماش، هو برضه طلعت له نفس الحسنة في شفايفه، وعاشوا في تبات ونبات وخلفوا ولي عهد المملكة..

ـ حلوة أوي الحدوتة، كل يوم احكي لي حكاية..

ـ اتفقنا..

بدأ يميل عليا..

ـ بما إننا اتفقنا، أنا عاوز حسنة على شفايفي، وتبقى ضريبة الحب بتاعتي..

قرب أكتر، وغمضنا عيوننا وتوهنا سوا.

#من_نظرة_عين

ـ الحلقة العاشرة

      الفصل الحادي عشر من هنا 

لمتابعة باقي الرواية زوروا قناتنا على التليجرام من هنا