رواية الغلطة الاخيرة (كاملة جميع الفصول) بقلم عمرو ليث
• أنت حضرتك ظابط وأنا مجرد روائية يعني دماغنا مش زي بعض
: أي المشكلة مش فاهم!
• أنت مش شايف أن في مشكلة خالص؟
: لا خالص أنا جاي حابب
• جاي حابب زي ما بتقول ولا جاي تستغل قدراتي؟
: هو أنا معرفش أي قدراتك بس عامةً أنا جاي أستغلها
• ودي بجاحة؟
: لا صراحة
• وبما أنك شخص صريح فأنا مواقفة
: موافقة أستغلك؟
• طالما برضاية اوكية موافقة
: اتفقنا
• أشرب الشاي
: نشربه في بيتنا .
المقابلة كانت سريعة جدًا وده مش عشان إحنا لسمح الله بنحب بعض من زمان ولا حاجة، لا خالص، إحنا قرايب ولكن مش قريب ولا من بعيد بس إحنا قرايب، بنشوف بعض كل فين وفين، وكل إللي بينا سلامات، ولكن لحسن حظنا أننا وقعنا في بعض، هتقولي وقعتوا في بعض إزاي، هقولك أن كل حاجة خلصت بسرعة، اتقابلنا واتخطبنا واتجوزنا في قعدتين بس، تحب تاخد التقيلة كمان!
أنا واقف في المطبخ بعملنا قهوة عشان الهانم مشغولة بتكتب روايتها الجديدة، وأنا بقوم بدوري كزوج صالح وكده .
• جت في وقتها والله
: بتشتغلي علىٰ أي لحد دلوقتي؟
• الرواية الجديدة مأنت عارف أن المعرض قرب يدوب الحق
: طب وليه كل الورق المتقطع حواليكي ده
• بحب أكتب كل التفاصيل علىٰ الورق قبل ما اكتبها في الرواية
: بتظبطي الأحداث يعني
• بالظبط كده
: لا ربنا معاكي
• وأنت صاحي ليه لحد دلوقتي!
: هنام إزاي وأنتي مش جمبي
• وده خوف من النوم لوحدك ولا عشان وحشتك
: من ده علىٰ ده
• وده معناه أني اسيب إللي في ايدي واجي أنام عشان أنت تنام صح؟
: مأنتي بتفهمي أهو
• وماله فداك الرواية واحداثها عنها ما أتكتبت يلا ننام
دايمًا بحسها بتجاريني كأنها عارفة أنا عايز أي بغض النظر عن ده هيريحها ولا لا، لاحظت كتير جدًا أنها بتحاول تعمل أي حاجة بتريحني أو بحبها حتىٰ لو علىٰ حساب نفسها، بتخليني كل مرة بحترم وجودها جمبي وإني كنت مفتقد حد زي سلوىٰ في حياتي، هي اه روائية وعايشة ميكس بين الخيال والواقع، ولكن أنا فعلاً كنت محتاج حد يعملي دوشة في حياتي يخليني حابب أشوفه وهو بيسيطر علىٰ عقلي وقلبي، وهي قدرت بتصرفاتها تعمل كده بسهولة .
صحيت الصبح علىٰ مكالمة من العقيد عماد بيه عايزني ضروري في المكتب عنده، أول حاجة جت علىٰ بالي أنه هيحاول يخليني ارجع تاني أو يغيرلي رأيي، ولكن إللي أكتشفته كان عكس كده خالص ..
• بس أنا قدمت أستقالتي هرجع إزاي
: أنت مش هترجع أنت هتشتغل علىٰ القضية دي من غير ما تكون ملزم بأي حاجة
• بس القضية اتقفلت وبقيت ضد مجهول
: القضية اه اتقفلت من 11 سنة ولكن آخر كام حادثة بتثبت أن الشخص رجع يعمل كده تاني، ولكن مفيش أي دليل والقضايا كلها اتقفلت ضد مجهول
• طب ماهو ممكن ميكونش شخص وتكون جماعة بتحرك ناس هي إللي تنفذ
: وده دورك أنك تكتشف الموضوع ده، والقضية لو اتحلت هتعود عليك بمكاسب كبيرة جدًا جوا الوزارة
• الموضوع مش بسيط دي اكتر من جريمة قتل أتنفذوا بنفس الطريقة من مجرم مسبش وراه أي دليل علىٰ حسب المحاضر بتاعت الجرايم
: ده كل الورق والتقارير بتاعت الجرايم، ودي مجسمات كان عاملها ظابط قبلك بتاعت الأماكن إللي كان المجرم موجود فيها وكان بيختفي قبل القبض عليه، خد وقتك ومعاك كل الصلحيات
• علىٰ خير يا عماد بيه بعد إذنك .
الموضوع جه فجأة بالنسبالي بعد ما قدمت أستقالتي من شهرين بس خلافات كتير جدًا حصلت بيني وبين اكتر من ظابط بسبب الشغل، وانتهت أني قدمت أستقالتي عشان حسيت أن الموضوع هيقلب حرب بيني وبين إللي حواليا وهتحط تحت ضغط بسببهم، ولكن أني أشتغل على قضية بشكل حر من غير ما حد يتدخل حسيت أن الدنيا هتبقى أحسن بكتير وهشتغل وأنا مش حاسس بأي ضغط، أتمنى أنها تظبط معايا المرة دي .
• قضية مقفولة من 11 سنة هتتفتح دلوقتي يا يونس
: هجرب يا سلوىٰ أنا هخسر أي يعني، وبعدين أنا هشتغل علىٰ روقان من غير ما حد يتدخل
• طيب والمفروض هتبدأ منين دلوقتي؟
: من بيت آخر ضحية ماتت من شهر
• طب واي إللي هتلاقيه في بيتها مش فاهمة؟
: التفاصيل يا سلوىٰ، لازم نشوف كل حاجة تخص الضحية من أول اوضته لحد المكان إللي مات فيه
• بس إللي قبلك ملقيوش حاجة
: وماله نراجع وراهم
• وأنا هيبقى ليا دور في الحدوتة دي ولا هبقى شفافة؟
: لا طبعًا هيبقى ليكي دور مهم جدًا
• هو أي؟
: أنا هشتغل وأنتي تعملي القهوة
• يبرودك
: سكر زيادة معلش
وسابتني ومشيت ودخلت المطبخ تقوم بالدور بتاعها، زعلانة ليه مش فاهم، مش هي إللي طلبت أن يبقىٰ ليها دور في الحدوتة، يبقىٰ تشتغل وهي ساكتة مش عايزين دوشة .
روحت بيت آخر ضحية ماتت وكانت بنت في العشرينات من أسرة بسيطة، ساكنين في شقة في الدور التالت، العيلة ملهاش في المشاكل ولا ليهم أعداء عشان تبقى بنتهم مقصودة مثلًا، أو ليهم مشاكل مع قرايبهم، يعني بأختصار البنت كانت ضحية عشوائية مش مقصودة نهائي، خبطت علىٰ الباب فتحت أمها إللي عندها 45 سنة وباين عليها الزعل والتعب، عزيتها في بنتها وطلبت منها أقعد معاها شوية عشان اسألها علىٰ كام حاجة وهي رحبت بيا جدًا وعملتلي شاي كمان، دخلت اوضة البنت ولقيت أمها واقفة ورايا وقالتـ ..
• من ساعة ما اتوفت وهي اوضتها علىٰ حالها كده محدش عمل حاجة فيها
: هي كانت رايحة فين ساعتها ؟
• كانت رايحة جلسة عند دكتورة نفسية
: هي بنتك عنده مشكلة نفسية؟
• أنا عرفت صدفة أنها بتروح ولكن معندهاش أي حاجة ولا في مشاكل بينها وبين أي حد عشان تتعالج
بصيت علىٰ كل ركن في الاوضة إللي واضح عليها الترتيب، البنت باين عليها بتحب التنظيم جدًا، عندها هوس في ترتيب كل حاجة، الكتب مرصوصة بالتساوي، الكوتشهات بتاعتها مترتبة كويس، النوت بوك إللي موجودة على التسريحة بتاعتها، قربت منها وفتحتها لقيت فيها كارت لعيادة دكتور جراحة قلب، وجمب الكارت فرع من شجرة الريحان ولكن نشف، أخدت الكارت حطيته في جيبي، وقعدت مع والدتها شوية سألتها أي الحاجات كانت بتعملها في آخر أسبوع قبل وفاتها، وبعدين سلمت عليها وسبتها ومشيت وأنا في مليون سؤال في دماغي محتاجين إجابة، واعتقد أن الاجابة قصاد عيني ولكن لسه موصلتلهاش .
روحت لعنوان العيادة إللي في الكارت واكتشفت أنها مقفولة من زمان لما سألت البواب بتاع العمارة إللي فيها العيادة ..
• العيادة اتقفلت من فترة كبيرة بسبب أن مكنش في حد بيجي ولا كانت معروفة
: طب الدكتور فتح العيادة في مكان تاني؟
• معرفش والله يا بيه العلم عند الله
: ماشي شكرًا يا عم صحبي
سبته ومشيت وأنا حاسس أن في حاجة غلط، وقبل ما أركب العربية لمحت زرعة ريحان موجود في بلكونة قصادة العمارة بتاعت العيادة إللي في الكارت، وفي يافطة مكتوب عليها، الدكتورة سماح دكتورة استشاري أمراض نفسية وعصبية، واعتقد أن الشكوك بتاعتي دلوقتي قربت تبقى في محلها .
• قولتلك أن التفاصيل البسيطة بتفرق
: لاحظت إزاي أصلًا حاجة زي دي؟
• افتكري أنك لو في مكان وعايزة تعرفي أي سر فيه اتعاملي معاه كأنك عايشة فيه من زمان، ركزي مع كل حاجة في المكان لحد ما تشوفي أي الغريب فيه
: واضح أنك متمرس في القضايا إللي زي كده
• الشغل يا سلوىٰ
: أنا ولا الشغل يا يونس!
• بيومي فؤادي
: مبهزرش
• هو أنتي ناسية أنك ليكي دور في الحدوتة إللي أنا شغال عليها ؟
: إللي هو أي؟
• تعملي القهوة
: يا بارد يا مستفز
• معلش أنا عارفها هرمونات نص الشهر دي معاكي عذرك
: مش عاجبك صح قول أن عندك مانع
• لا يا عم لسمح الله معنديش أي مانع، دي كفاية كوباية القهوة بتاعتك بلسم علىٰ القلب
: بجد!
• والله
: طب هروح اعملنا كوبايتين
• سكر زيادة
: عيوني
غلبانة موت والله، ولكن بتصعب عليا لما هرموناتها بتطفح عليها، بتقلب كائن غريب بينكد علىٰ نفسه وعليا وأنا مضطر استحمل عشان مبقاش زوج نكدي مبيستحملش مراته إللي يا عيني مضغوطة طول الوقت في شغل البيت والطبيخ و و و، أنا عارف كل الحوارات دي، ولكن هعمل أي هو ده الجواز، وهي دي الحقيقة .
روحت للعيادة بتاعت الدكتورة سماح بتاعت الأمراض النفسية، هو أنا مش متأكد أن هي إللي كانت الضحية بتروح عندها، ولكن اتعودت طالما شاكك من حاجة يبقى اتأكد منها، سواء شكي في محله، أو مجرد إحساس وهمي، أول ما دخلت العيادة ودخلت المكتب بتاع الدكتورة شميت ريحة برفان مريبة، عيني وسعت أول ما دخلت المكان، وأنا ببص علىٰ كل حاجة حواليا لحد ما قعدت قصاد الدكتورة علىٰ الكرسي .
• إحنا هنلعب مع بعض لعبة هسألك علىٰ كام حاجة بسيطة عشان نشخص بيها حالتك النفسية
: طب ما تيجي نبدل الأدوار ونشخص حالتك أنتي يا دكتورة!
لقيت وشها إحمر وقلب ألوان، كأنها أتفاجئت باللي سمعته، أخدت منها الكوتشينه بتاعتها، وبدأت اللعبة ..
• اختاري لون
: أزرق
• حساسة جدًا وبتخافي علىٰ إللي بتحبيهم
: ببقىٰ حريصة عليهم
• ساعات
: ساعات أي!
• اختاري حيوان
: عنكبوت
• بس ده مش حيوان ولا هو حشرة
: من العنكبيات
• بتساعدي غيرك عشان يوصل لمراده سواء خير أو شر
: بحاول
• اختاري رقم
: 2
• رقم زوجي بيحطك قصاد خيارين ولكن الخوف والتردد مخليينك مش بتبادري
: حريصة
• من مجهول ولا حاجة معينة!
: في حاجات مينفعش نعرفها عشان منخسرش حياتنا
• زي مثلًا أن البنت إللي اتقتلت من شهر كانت عندك قبل موتها بيومين
: كانت مريضة عندي وبتتعالج
• طب والتلات حالات إللي قبلها ؟
: أكيد صدفة
• ممكن تكون صدفة فعلاً لدكتورة زيك فاتحة عيادتها من 15 سنة، طب بالنسبة للكارت بتاع دكتور القلب إللي علىٰ مكتبك وكان مع البنت إللي اتقتلت؟
: عجبها الكارت واخدته
• فعلاً حتىٰ ريحته البرفيوم إللي فيه حلوة خالص شبه ريحة البرفيوم بتاعك
: عايزة أي؟
• عش العنكبوت
: متتعبش نفسك
• تفتكري الناس اللـي ماتت متستاهلش أتعب عشانها ؟
: وقتك خلص واتفضل عشان في مرضى هتدخل وراك
• هنتقابل تاني
: متمناش
كان واضح عليها الخوف والرعب، حسيت أن قلبها كان هيطلع من مكانه من كتر الخوف، وقبل ما أخرج من المكتب بصيت عليها ..
• متنسيش تسقي زرعة الريحان بتاعتك بتخلي المكان ريحته حلوة ومريح .
وسبتها ومشيت بعد ما عرفت أن الدكتورة هي بداية الخيط بتاعنا .
• عملت أي؟
: لما نوصل البيت
• طلعت ليها علاقة بالبنت صح؟
: طب اطلعي بالعربية ولما نوصل هحكيلك
توتر وخوف الدكتورة خلاني أشك أنها مجرد أداة حد بيستخدمها، وليها دور في الجرايم إللي بتحصل، ولكن كل ده مش كفاية عشان يثبت أي حاجة ضدها أو ضد أي حد، والمعلومات دي مش كفاية أنها تدين حد، خرجت من عند الدكتورة وكانت سلوىٰ مستنياني بالعربية ومشينا علىٰ طول .
• عرفت كل ده إزاي؟
: واضح أن البنت كانت بتحب الزرع لأني لاحظت في البلكونة بتاعتها زرع، وفرع الريحان إللي كان عندها أعتقد أنها اخدته من عند الدكتورة عشان تزرعه عندها وملحقتش، وغير الكارت إللي كان عند البنت إللي موجود علىٰ مكتب الدكتورة وفيه نفس ريحة البرفيوم بتاع الدكتورة
• تفتكر أن الدكتورة ليها علاقة باللي بيحصل؟
: اتوقع بنسبة كبيرة أن حد بيستخدمها تجذب الضحايا، لأن في المحاضر بتاعت الضحايا هما وبيسألوا الاهالي اربعة من السبع ضحايا قالوا أن ولادهم كانوا بيروحوا عند إستشاري نفسي، واللي زاد شكوكي أكتر وجود عيادة الدكتورة قصاد العيادة بتاعت الدكتور إللي في الكارت
• لا ثواني عشان افهم، قصدك أن اربعة من السبعة كانوا بيروحوا عند نفس الدكتورة قبل ما يموتوا بفترة بسيطة!
: بالظبط
• طب أي إللي كانت بتعمله الدكتورة ليهم أو أي إللي كان بيحصل عشان يموتوا
: محدش يعرف وده إللي عايز أوصله، هما بيموتوهم ليه
• التقارير بتاعت وفاتهم أكيد موجود فيها السبب
: كل التقارير بتقول أنهم بيلاقوهم متوفيين في أماكن مختلفة بعد ما حد بيبلغ
• في حاجة غلط
: أنا حاسس كده بردو، القضية مش واضحة كويس
• ماهي المعلومات كلها قدامك
: حاسس أنها مش كل المعلومات
• طب ما تسأل العقيد
: معتقدش أن لو في حاجة هيقولي
• طب هتعمل أي!
: هتصرف
وروحت أفتح ورق القضايا تاني، وشفت المجسمات إللي كانت معمولة قبل كده بالأماكن إللي كان فيها المجرم وبيختفي قبل ما يوصلوا المكان ..
• دي مجسمات أي!
: الأماكن إللي كان فيها المجرم
• طب واي القطع الزيادة دي؟
: مأنا مش عارف بيركبوا فين وسبتهم كده
لقيت سلوىٰ مسكت القطع الزيادة إللي مركبتش في المجسم وكان عبارة عن برج، لقيتها حطته ورا البيت في آخر الجنينة، بصيتلها وانا مذهول ..
• بتبصلي كده ليه؟
: ده ركب بشكل عشوائي ولا ده مكانه؟
• لا مكانه بص الفراغ بتاعه أهو
: مأخدتش بالي من المكان
• شغل دماغك يا حضرت الظابط التفاصيل مهمة
: طب وأنا اتأكد إزاي من البرج ده إذا كان في مكانه فعلاً ولا لا
• من جوجل
: أي!
• نصور المجسم ونعمل سيرش علىٰ جوجل عشان يظهرلنا المكان
ولقيتها بتصور المجسم فعلاً وبتعمل سيرش علىٰ جوجل، وبعد ثواني معدودة ظهرت نتيجة البحث وظهر شكل البيت الحقيقي!
لقيتها إبتسمت إبتسامة إنتصار، وفضلت ابص علىٰ الصور بتاعت البيت، حسيت من التقنية كأني ببص علىٰ البيت من فوق، ولحد ما وصلت للبرج إللي في آخر الجنينة ورا البيت ..
• موجود فعلاً
: طب ووجوده من عدمه هيفرق في أي!
• ندور هناك
: البيت مهجور يا يونس أصلًا
• ناخد جولة سريعة يا سلوىٰ
: معاك اذن أنك تدخل؟
• معايا ربنا
: ونعمه بالله
• يلا روحي قومي بالدور بتاعك
: قهوة؟
• سكر زيادة
بحب نظرات التفاهم المتبادلة بينا، ولكن ده مش وقت رومانسية، في قضية محتاجة تتحل، وفي ناس بتموت محتاجين نرجع حقهم، لسه مش عارف فين البداية إللي هبدأ من عندها، ولكن أعتقد أني بقيت قريب منها جدًا .
كنا واقفين قصاد البيت إللي في المجسم، واللي موجود في التقارير بتاعت قضية من القضايا، ولكن البيت واضح أنه مهجور مفيهوش أي حاجة توضح أنه في حد عدىٰ من جمبه حتىٰ، البيت كان تلات أدوار قدامه مساحة كبيرة فاضية، حواليه سور بطول إتنين متر ونص، مقفول بـ باب حديد كبير ..
• طب وهندخل إزاي؟
: بتعرفي تنطي من فوق السور؟
• بتقول أي!
: أي مالك عمرك ما هربتي من المدرسة
• لا هربت كتير
: وكنتي بتنطي منين!
• مكنتش بنط أنا كنت بطلع من الباب عادي
: والله!
• والله
سبتها بتتكلم مع نفسها وركبت فوق السور في قفزة عالية مسكت بيها أطراف السور، واتشعبطت لحد ما ركبت وعديت من الناحية التانية، ولسه بنضف أيدي وهدومي من التراب، وهنادي علىٰ سلوىٰ لقيتها واقفة جمبي!
• لا لا محتاج تظبط جسمك يا حضرت الظابط لازم تبقى رشيق أكتر من كده
: أنتي دخلتي إزاي!
• من الباب
: الباب!
• ايوة ماهو مفتوح
: إزاي!
• محتاج تشغل دماغك يا بيه مش هينفع استعجالك ده
ضحكت علىٰ اسلوبها الفُكاهي إللي لا ده وقته ولا مكانه، ولكن أهو بتسليني، وقفنا قدام البيت إللي واضح أنه مهجور من زمان جدًا، لفينا حوالين البيت لقينا الأرض بايرة، والشجر نشف من قلة الماية، ووصلنا للبرج إللي في ضهر البيت، إللي واضح أن طوله في نفس طول البيت ..
• هو البرج ده أي لازمته؟
: أكيد كان فيه حارس بيقف عليه
• طب سؤال مهم
: إتفضلي
• هو الحارس كان بيدخل البرج منين!
بصيتلها بدهشة علىٰ سؤالها إللي كان مهم فعلاً، البرج مفيهوش مدخل، يبقى كده البرج له طريقة دخول تانية ..
• طب ماهو ممكن ميكونش في حد بيدخله أصلًا
: برج بالحجم والعرض والطول ده محدش هيدخله يا يونس!
أكيد مش ديكور يعني
• إجابة مقنعة
: كده حاجة من الإتنين، يا أما البرج ده بيدخلوه من تحت الأرض، أو في مدخل سري من هنا بيدخلوا منه
• ما تسيبك من عالم مسمسم والروايات بتاعتك
بصتلي بصة غريبة وفضلت تلف حوالين البرج وتبص علىٰ الطوب إللي مبني البرج بيه، لقيتها بتخبط بضهر ايديها علىٰ الطوب وكأنها بتخبط علىٰ باب ومستنية حد هيفتحلها، ولقيتها وقفت مرة واحدة ..
• أي وقفتي تخبيط علىٰ الطوب ليه، حد رد عليكي من جوه وهيفتلحلك!
مردتش عليا ولقيتها بتسحب طوبة من الطوب بتاع البرج والطوبة طلعت في ايديها، ووقع طوب من حيطان البرج كانت مرصوصة كأنه باب للبرج واتقفل بالطوب المرصوص ..
• متتريقش تاني بقا علىٰ عالم سمسم بتاعي
ضحكت علىٰ طريقتها في الرد ودخلت البرج وهي دخلت ورايا، شغلت كشاف التليفون عشان مكنش في أي وسيلة اضاءة في المكان، مفيش ثواني ولقيت نار ولعت نورت المكان، بصيت لقيتها سلوىٰ واقفة جمب مصباح غاز من بتوع زمان ..
• في عالم سمسم بتاعي أي مكان زي كده لازم بيكون في نار بتنور في المكان عشان الاضاءة
: غريبة
• بس واقيعية
: ومغرورة
• بس أي رأيك؟
: عجبتيني
فضلنا نلف في المكان وطلعنا علىٰ السلالم لحد ما وصلنا لدور الأخير إللي في البرج، بصيت جمب الباب لقيت زرار دوستعليه،ه الأنوار بتاعت المكان كلها اشتغلت ..
• هو أي العبث ده
: مصباح غاز تحت ولمبات فينوس فوق!
• دي أكيد دماغ طبايخي
: أو سفرجي
• الله أعلم
بصيت علىٰ المكان لقينا تربيزات زي بتوع المستشفيات، وفي تربيزة عليها مشارط وادوات جراحة واضح انها مش قديمة، بصيت علىٰ سلوىٰ وسبقتني هي في الكلام ..
• المكان ده كان فيه حد هنا من فترة قريبة
: أنتي شميتي ريحة السجاير؟
• ده تبغ سجاير ملفوفة ريحته قوية وبتفضل في المكان لفترة
: عرفتي منين أنه تبغ؟
• عشان أبويا كان بيشربه وأمي اتخانقت معاه عشان الشقة كانت بتبقى ريحتها سجاير
: شاطرة يا سلوىٰ
• تلميذتك يا باشا
كملنا لف في المكان وملقيناش أي حاجة تفيدنا غير أن المكان كان فيه حد، ولكن كان بيعمل أي بالمشارط دي مش فاهم، أخدت سلوىٰ ورجعنا البيت تاني، بقيت حاسس أن لسه في حاجة مش مفهومة .
كانت الساعة 2 بليل والتليفون بتاعي رن، فتحت لقيته حد من إللي شغالين معايا، وكنت قولتله علىٰ موضوع الدكتورة سماح، ولكن الصدمة الكبيرة كانت لما قالي أن الـ ..
: الدكتورة سماح لقيوها ميتة في العيادة بتاعتها
وكده فهمت أنها كانت مجرد أداة بيستخدمها المجرم، وأول ما حس أنها ممكن تعترف اتخلص منها، ولسه بستوعب الخبر لقيت التليفون رن تاني ولكن كان رقم خاص مش ظاهر، فتحت ولسه هتكلم ..
• عش العنكبوت إللي بتدور عليه مبيستخباش في مكان، وخاف علىٰ العنكبوتاية إللي معاك عشان العقارب كتير اليومين دول وممكن تتلسع .
بصيت علىٰ سلوىٰ إللي نايمة جمبي، دلوقتي فهمت أنه عرف أن القضية اتفتحت وإني قربت أوصله، ولكن هيمسكني من ايدي إللي بتوجعني، وأنا مش عايز إللي حصل مع خطيبتي زمان يحصل مع سلوىٰ دلوقتي .
يتبع ..
#الغلطة_الأخيرة الجزء الاول
لـ عمرو خالد لـيث
#الكاتب_ليث