سكريبت السحر (كامل) بقلم محمد ابراهيم
بخصوص موضوع هاجر اللي ماتت بسبب السحر، ربنا يرحمها ويغفرلها..
عندي حكاية صعبة حابب أحكيها..
جاري كان ساحر، اسمه (و. ش)، وأمه وكام حد من قرايبه برضه سحرة.
ليه زوجة وعيال مالهمش أي ذنب، ومش عارفين حتى إنه ساحر. كان يقعد يكتب أعمال على ورق قدّامهم ويحطّها في درج باسمهم وباسم أهل مراتُه من غير ما حد يفهم حاجة.
وكان عنده بنت اسمها (خ. و)، البنت دي ربنا هداها وبقت مستقيمة وبتقاوم أبوها من غير ما تعرف إنه بيعمل إيه أصلاً.
وده اللي خلاه يشوفها عائق في طريقه، فقام مجوّزها لجِنّ
—يعني وهبها لواحد من خدامه—ودخل جوّة جسمها، ودخل فيها جِنّ كتير.
غير إنه حاول يتحرّش بيها ويغتصبها!!
وكان يمشي في البيت عريان قدّامها وقدّام أخواتها الصغيرين علشان يغرّيهم، لحد ما البنت بقت مش بتنام غير نص ساعة وهي قاعدة، أو لما أمها تبقى صاحيه وتنام جنبها.
كان جبروت، وهم لا حول لهم ولا قوة..
غضبه اشتد عليها أكتر؛ لأنها كانت بتقرأ وتحفظ قرآن وبتقاومه وبتدافع عن أمها وإخواتها.
وكان يمنع عنهم الأكل لحد ما يدوخوا ويقعوا على الأرض، وهو يقف يضحك عليهم، وبعدين يرمي لهم بيضتين يأكلوهم!
ويفضل يجدّد لهم السحر أول بأول، لحد ما عمل لهم سحر موت.
أنا من زمان وأنا بكره الراجل ده وإخواته، بس عمري ما كنت أعرف مراته وبناته، وكان له ابن اسمه (خ. و).
في يوم وأنا شاب مستقيم وبتمرّن كونغ فو، قَدَر ربنا رجلي إتكسرت، ابنه جه يزورني، ومن الزيارة دي اتعرفنا على بعض، وبالرغم إني ماكنتش طايقه زمان، بس حبّيته وبقينا أصحاب.
ولما العلاقة بينا قويت، بقى ييجي معايا المسجد واتعلّق قلبه بالصلاة. لحد ما في يوم قالّي إن أبوه عنده كتاب اسمه (ش.م)، كتاب مشهور لتعليم السحر.
وفي مرة سمعته بيكلم مُنَجِّم وبيبص على فيديوهات تنجيم، فأنكرت عليه وورّيته أدلة التحريم من القرآن والسنة.
في الأيام اللي النور كان بيقطع فيها بالليل، كنا نقعد بره البيوت ونتكلم، أبوه لما شاف ابنه متعلّق بيا، بدأ يبعده عني ويحط فِتَن بينا.
لحد ما في يوم قبل الفجر شوفت رؤية، شوفت جمل بيهجم عليّ وعضّني بين كتفي ورقبتي.
فسّرت الرؤية إنها سحر، خصوصًا بعد ما حسّيت بتغيّرات في صلاتي وتعاملاتي وإقبالي على أي حاجة.
ابنه بعدها بعد عني شوية، بس العلاقة فضلت موجودة.
لحد ما في يوم اتقدّمت علشان أخطب بنته، الأم والبنت وافقوا، إنما هو كان رفض وبدأ يخوّفهم مني، لكنه في الآخر وافق غصب عنه علشان ما يشكوش فيه، الخطة بتاعته كانت إنه يوافق ظاهريًا وبعدين يبعدني.
اتخَطَبنا، وأنا اتعلّقت بيها وهي اتعلّقت بيا، وهو كان بيسحرني ويسحرها علشان يبوّظ الموضوع أو يبعدني عنها.
في يوم لقيت أم خطيبتي بتكلّمني وبتقولي:
- بالله عليك يا راشد.. هاتلنا شيخ يرقينا بالقرآن.. انا وولادي تعبانين اوي.
وفعلًا كنت أعرف شيخ متمكن جدًا، راجل اتعرض لأذى شديد بس قوي وثابت.
أم خطيبتي كانت بتشوف حاجات غريبة في البيت، وأشكال مش طبيعية، وتشوف جوزها سهران يتفرج على بناته وهم نايمين، بس ماكانتش قادرة تعمل حاجة.
بعد خطوبتي لبنتها، بقت تستقوى بيا.
لقيت مكالمة وأنا جاي عليهم بالشيخ، لقيته هو.. أبو خطيبتي، لما رديت قالي بحدة:
-إرجع أنت والشيخ اللي معاك يا راشد.
استغربت، بس شيء الهى مخلانيش أسمع كلامه
المهم رحنا على أساس الشيخ يرقيهم، أكتشفت وقتها إن خطيبتي كانت مخبيه عليَّ حاجات كتير، زي إن أخوها الصغير كان مأذي، طفل عنده سنة مكنش بيمشي، وكل ما كان يسمع قرآن يتشنج، ويتخنق، ويبدأ جسمه يزرق!
وأخواتها البنات تقريبا نفس الموضوع!..
بيخرج منهم صوت غريب، عمره ما يخرج من طفل أو بنات في سن صغير، عرفنا منهم لما شافوا الشيخ، والغريب إن ابوها مكنش موجود..
لما عرفنا الحكاية، الشيخ قال:
-نقرأ عليكم الأول، والولد والبنات بعدين.
كنا واقفين انا والشيخ، وخطيبتي وامها واخواتها البنات، والولد الصغير.. وأخوها الوسطاني.
أول ما بدأ يقرأ، بدون مقدمات، التلاتة وقعوا كلهم على الأرض!.
أنا اتصدمت، وسمعت تمتمات وكلام غريب، وتصرفاتهم كانت واضحة، الكل مسحور!
بس اخوها الوسطاني طلع زيه زي ابوه؟!
كان بيمثل إنه ممسوس وبدأ يهجم على الشيخ، وعرفت من الشيخ إنه عمل كده علشان يوقف الشيخ، وخاف إن الجني اللي عليه يتكلم ويفضحهم.
بس الولد كان ضعيف، وبدأ الشيخ يسيطر عليه، وعرف منه كل حاجة، الشيخ بعدها قال إنهم بيعملوا سحر وبيحاولوا يوقعوا البنات في معاصي علشان السحر يقوى.
عالجناهم، وتحسّنوا الحمدلله، وإن كانوا لسه محتاجين وقت طويل للتعافي، والغريب بقى، إن أبوهم زي ما يكون فص ملح وداب، لحد دلوقتي مظهرش، والموضوع ده عدى عليه اسبوعين!
المهم اننا سيبناهم يكملوا علاجهم بنفسهم مع قيام الليل وسورة البقرة.
ربنا ينتقم من كل مؤذي، مش متخيل ازاي اب ممكن يعمل كده في عياله وبناته؟!!.
تمت.