روايه سر المقبرة الفصل التالت بقلم سيد مصطفى
هذه الرواية متوفرة فقط على 👇
لمتابعه روايه سر المقبرة كامله اضغط هنا 👇
سر المقبرة
(٣)
دخلت على مراتي وبنتي قولتلهم أخرجوا عشان محتاجين ندخل الاوضة دي، خرجت مراتي ورمت السلام عليهم
ردوا عليها السلام، وبعدها خرجت بنتي واول ما شافت الشيخ فوزي فضلت تزوم عليه عنيها كانت مبرقة وهتطق شرار
هو مابصش عليها، بس قعد يقرأ في سره حاجات مش مفهومة وبدأ يشاور على الطلاسم والرموز اللي على الحيطه، وفجأة لقيت الطلاسم اللي بيشاور عليها بتنور !!!!
وقتها حسيت عيني بدأت تزغلل ومش شايف كويس ورجلي حسيت انها مبقتش شيلاني ومش قادر اقف عليها، وبدون مقدمات وقعت على الأرض وفقدت الوعي
**********
بدأت افتح عيني لقيت الشيخ فوزي ومحمود ومراتي حواليا
- اهو بدأ يفوق الحمد لله.
قالتها مراتي وعينيها ماليها القلق
-حمد لله على السلامة.
قالها الشيخ فوزي وهو بيطبطب على كتفي
-انا إيه اللي حصلي ؟؟
-انت فقدت الوعي والشيخ فوزي اله يباركله قرأ عليك لحد ما ربنا كرمك وفوقت.. هو انت ايه اللي حصل يا ابو محمود
؟؟
- بنتي كانت بتزوم على الشيخ فوزي وبعدها الشيخ فوزي فضل يقرأ حاجات بصوت واطي ويشاور على الرموز اللي علي الحيطه وفجأه الرموز دي نورت، اه نورت ، انا ساعتها حسيت وكأن في حرب بتحصل حواليا ومرة واحدة زي ما تكون صاعقة نزلت على راسي وبعدها مادرتش بالدنيا.. هي فين اسماء ؟؟
- البنت في اوضتها، الشيخ فوزي قرأ عليها ونامت
بس انا ماشوفتش اللي انت بتقول عليه ده ، ممكن يكون بتهيألك، انت شوفت حاجة من اللي قال عليها أبوك يا محمود؟؟
محمود حرك راسه بالرفض، وهنا انا اتعصبت عليهم وقولت..
-انتوا هتجننوني انا شوفت كل ده بعيني, مش صح يا شيخ فوزي ولا انا اتجننت فعلًا؟
الشيخ فوزي رد عليا بهدوء …
-أهدى.. كل اللي انت قولت عليه حصل ، بس المهم دلوقت بنتك في حد بعت لها جن مسيحي وانا لسه مش عارف ليه؟
هو رفض يبوح بكل اللي عنده فأنا سبته موقتًا وقلت المهم أن البنت تهدأ واجي أشوف حصلك ايه ؟؟
ام محمود قالت وهي مستغربة ….
- جن مسيحي إزاي ومين هيعمل فيها كده ؟؟
وعلى فكرة انا ماشوفتش اي حاجة من اللي انتوا بتقولوا انها حصلت، البنت كانت ماشية معايا عادي بعد ما خرجنا من الاوضه !!
الشيخ فوزي قالها …
-انا بقولك أن كل اللي شافه ابو محمود حصل والتفسير الوحيد لده أن في بعض الناس بيبقي عندهم شفافية أو طاقة روحانية بتخليهم يشوفوا حاجات غيرهم مايقدروش يشوفها.
قطعت كلام الشيخ فوزي وقولت ….
-بس انت بتقول أن بنتي حد بعت لها جن مسيحي! مين اللي هيعمل كده وليه ؟؟
رد عليا الشيخ فوزي وقال …
- ليه ؟؟؟هو ده السؤال اللي مش هسيبه غير لما أعرف إجابته، بس انا لما قريت عليها عرفت أن هو من الجن الماردة والموضوع مش هيبقي سهل بس متقلقش، الله المستعان ، أسيبك دلوقت يا حج عشان ترتاح، عايزك تشد حيلك عشان بكرة هجيب الرجالة ونبدا حفر ..سلامو عليكم.
********
الشيخ فوزي مشي وانا بدل ما كان عندي هم بقوا جبل هموم أم محمود قامت عشان تحضرلي حاجة أكلها وانا قعدت أفكر هو ليه حد يبعت جن مسيحي لبنتي وهو مين؟؟ احنا عمرنا مأذينا حد وبنتي من أطيب خلق الله والناس كلها بتحبها ، بس ده ممكن يفسر سبب تشغيلها لقنوات مسيحية وكمان سبب مرواحها للكنيسة!!! ممكن الله اعلم .. ومحمود كمان اللي حاله متغير ومش فاهم ماله، سيل من الاسئلة اللي كانت هتجنني، بصت للحيطان لقيت الطلاسم والرموز والأشكال الغريبة مغرقه الحيطة حسيت بضيق في صدري ودماغي بدأت توجعني ولقتني فجاة دخلت في النوم زي المغمى عليه
نمت وحلمت حلم غريب
انا واسماء ومحمود في مركب بالليل في عرض البحر معرفش احنا رايحين فين ولا جايين منين
شكل البحر بالليل مخيف والموح كان هادي ولكنه فجأة بدأ يزيد وا بدأنا نفقد السيطرة على المركب ، الموج بيزيد اكتر وحسيت بصوت خبط من تحت المركب الخبط زاد والمركب بتتهزر وكان حد عايز يقلبها ومرة واحدة لقيت بنتي فقدت توازنها وقعت في المايه، فضلت أصرخ زي المجنون ..
-أاااالحق يا محمود أختك بتغرق.
ومحمود ابني واقف متسمر مكانه بيتحركش، وبنتي بترفع أيدها وبتقول.
- ألحقني يا بابا،
اسماء بتغرق ومحمود هو الوحيد اللي بيعرف يعوم، قعدت أهز في جسمه واقول له وأنا بصرخ في وشه يااا محمود أختك بتغرق يا محمود ..ومحمود زي الصنم مبيديش اي ردة فعل، وزي ما يكون حد منيمه تنويم مغناطيسي، مابقتش عارف اعمل ايه !!
ملقتش حل غير اني ارمي نفسي في الماية وانا مابعرفش أعوم وفعلا نطيت في المايه وحاولت اسيطر علي نفسي وانا وم ولكن ماقدرتش وفضلت أطلع وأنزل ..كنت بغرق وحسيت أن روحي بتتسحب مني
وهنا قومت من النوم مفزوع وانا باخد نفسي بالعافية، كأني كنت بغرق فعلاً…
- أعوذ بالله ايه الكابوس ده.
ايه الحلم الغريب ده !! هو غريب لاني كنت في الحلم مابعرفش اعوم رغم إني بعرف أعوم كويس جدًا ، انا اه راجل كبير بس دي حاجة الواحد مابيفقدهاش حتى لو بقى عمره ١٠٠سنة!! وفي سوالف تاني ليه ابني كان طالع بالمنظر ده في الحلم واقف متسمر مكانه ،مش بيرمش حتى، كأنه مش معانا !!!
وبنتي ليه ماندهتش على محمود عشان ينقذها وندهت عليا انا بس !!!
انا خلاص دماغي هتنفجر من التفكير
هنا سمعت أذان الفجر
قولت هقوم أصلي بس رجعت وقلت هصلي إزاي في وسط الطلاسم دي، انا بيتي بقى عامل زي بيت عبدة الشيطان
فكرت شوية وبعدها قولت انا هصلي في البلكونة، ده المكان الوحيد اللي مفيهوش طلاسم على الحيطان ، قومت اتوضا وفي طريقي للحمام، بصيت علي بنتي في اوضتها لقيتها نايمه زي الملايكة، بنتي زي القمر ومن جميلات القرية، أن ماكانتش أجملهم، ربنا يشفيها، بس موضوع الجن المسيحي ده هيجنني ، انا اول ما النهار يطلع هتصل بالشيخ فوزي يجي واشوف ايه حكاية الجن ده، عشان اتاكد بنفسي هي فعلا عليها جن ولا ايه الحكاية
طلع النهار، اتصلت بالشيخ فوزي
- سلامو عليكو يا شيخ فوزي انت هتيجي أمتي؟
- وعليكو السلام انا قدامي ساعه واجيلك أنا والشيخ جمال
- تمام انا عايز احضر معاك وانت بتحضر الجن المسيحي اللي بتقول أنه على بنتي .
- بلاش يا حاج عشان ميحصلكش حاجه تاني .
- لا امتقلقش، انا هبقي معاك علشان افهم ايه الموضوع ده .
- تمام اللي يريحك .
مرت ساعة ، ووصل الشيخ فوزي والشيخ جمال، بس الشيخ جمال كان شكله مريب، ملامح حادة، وشه مش مريح لو هتقولي ليه هقولك معرفش هو إحساس، المهم دخلوا
الشيخ فوزي قال ..
- الرجاله هتيجي آخر النهار واحنا من النهارده هنقيم معاك في البيت عشان مش هينفع نفضل ندخل ونخرج كل شوية وخصوصًا أن في ناس تعرفني هنا في الشارع وهما اللي دلوك عليا وهيبقي الخروج في أضيق الحدود، يعني ممكن انا أخرج وادخل علي فترات، بحجه اني باجي ادي جلسات لبنتك، انما الشيخ جمال والرجاله مش هينفع يدخلوا ويخرجوا كل شوية عشان محدش يحس بحاجه ويبلغ عنا.
-مفيش مشكله البيت كبير و تقدروا تقعدوا في شقه محمود في الدور اللي فوق
- تمام
- دلوقتي انا هاصحي بنتي من النوم عشان نشوف قصة الجن اللي عليها ومين بعته
- ماشي صحيها.
دخلت صحيت بنتي وخرجت للشيخ فوزي وقولتله…
- اتفضل
دخل وأول ما دخل وحصل قدامي نفس المشهد اللي حصل المرة اللي فاتت، هي بتزوم عليه وهو قاعد يقول كلام مش مفهوم ويشاور على الطلاسم حاولت أهدا وأقرأ قرآن كتير عشان اتماسك لاني لازم افهم ايه اللي بيحصل.. واعرف الشيخ فوزي كلامه صح ولا هو اللي عمل فيها حاجه ؟!
وبدات الطلاسم في الاوضة تنور وانا ماسك نفسي بالعافية وقاعد أقرأ قرآن وأقرأ قرآن في سري لحد لما بنتي بدأت عنيها تبرق بشكل مش طبيعي ومرة واحدة لقيتها هجمت عليا وقالتلي بصوت مخيف:
- اسكت … اسكت لقطع لسانك
جسمي كله نمل من الخوف أعصابي مكونتش ملموم عليها قاعد ابصلها وانا مرعوب ومش قادر ادي اي ردة فعل اتخشبت حرفيًا
الشيخ فوزي قالها ..
-خليك معايا انا.
قامت قالتلته بصوت غريب عن صوت بنتي …
- انت عايز ايه ؟؟
- انت اللي عايز ايه منها، وانت ساكن جسدها ليه.. ومين اللي بعتك ؟
رد عليه وقاله ..
- انت مش هتعرف مني اي معلومة تاني غير اللي انا قولتلك عليه انا جن مسيحي ومن الجن الماردة..انا من الملوك.
- مين اللي بعتك ؟
- بقولك مش هقولك حاجه تاني ؟
- انا بامرك انت متعرفش انا مين واقدر اعمل ايه ؟؟
- انا عارف انت مين كويس وعارف تقدر تعمل ايه.. بس انت متعرفش انا مين واقدر اعمل ايه ؟؟
كنت شايف المشهد ده قدامي وحاسس إني بحلم ، وبعد مشادات بينهم وتحدي ووعيد بدأ الشيخ جمال والشيخ فوزي يقروا كلام غريب ورسم الشيخ فوزي علي الارض رموز وأشكال غريبة،،وفجأة الرسوم طلعت طاقة نار، انا اترعبت ورجعت خطوتين لورا ...
بدأ الجن يقوله…
- انا هتكلم بس مش هخرج منها ولا هقولك مين اللي بعتني بس هقولك حاجه مهمة ليك,، انا اللي بعتني.. بعتني ليها عشان أوقف الحفر اللي أنتوا هتبدأوا فيه ....
قال الكلمتين دول على لسان بنتي وبعدها البنت اترمت علي السرير وبدأت تتشنج بشكل غريب وبعدها أغمي عليها
جريت عليها ، بس الشيخ فوزي رفع ايده وقالي…
- أهدا متقلقش هي هتبقى كويسة.
قرأ عليها وقالي
-اعدلها هي نايمه دلوقتي .. يلا نطلع برة
عدلت جسم بنتي وغطتها وخرجنا، انا كنت متشتت وتايه وعشان كده سألت الشيخ فوزي..
- معناه ايه الكلام ده يا شيخ فوزي أن اللي بعته مش عايزنا نبدأ الحفر
- معناه أن في حد عرف بإننا هنبدأ حفر والحد ده استعان بدجال وعرف بموضوع المقبرة وعايز يوصل للمقبرة قبلنا والحد ده أكيد ومن غير شك، هو حد من الجيران اللي حوالينا والدجال ده بعت جن من الماردة للبنت لان هي اللي عندها كل علامات وطرق الوصول للمقبرة وبكده يبقى عطلنا وبدل ما تبقا البنت معانا تبقي ضدنا.. احنا دلوقتي بقى عندنا عقبتين ..
الاولى من الجن اللي مع البنت واللي واضح انه قوي و هيتعبنا
والتانية أن احنا لازم نسابق الوقت ونوصل للمقبرة قبل ما حد يوصل قبلنا فلازم نبدأ حالًا
اتصل الشيخ فوزي واستعجل الرجالة اللي هتحفر معانا وفعلاً جم بدري عن معادهم وكان عددهم اتنين، الشيخ فوزي قالي
- قول يا حج لمحمود يجهز وانت كمان اجهز عشان هتشارك معانا
سالته باستغراب …
- هشارك معاكم في ايه انا راجل كبير مقدرش أشتغل ؟!
-مينفعش لازم تساعد معانا في الحفر لازم نستغل أي طاقة موجودة معانا، عشان نوصل أسرع
- وانت هتحفر معانا يا شيخ فوزي ؟
- لا ..انا والشيخ جمال هنبقى على بوابة الحفر علشان نحميكم ومحدش منكم يتأذي
وفعلا جهزنا كل حاجة وبدأنا الحفر من غرفة معينة حددها الشيخ فوزي وخرجنا أول شوال من التراب مكان الحفر وهنا لقيت الشيخ فوزي قال للشيخ جمال أبدأ، الشيخ جمال قعد يكتب علي الشوال طلاسم ورموز
قولتله باستفسار….
- انت بتعمل كده ليه ياشيخ جمال ده تراب؟؟
قالي وهو مكمل كتابة في الطلاسم …
-علشان نحافظ على اللي احنا حفرناه
- مش فاهم ؟
-لان احنا ممكن بعد ما نحفر نقوم الصبح نلاقي كل اللي احنا حفرناه رجع تاني ولا كأننا عملنا حاجة.
بصتله بإندهاش وقولتله ..
- انت بتتكلم بجد ولا بتهزر؟
بصلي بملامحه الحادة وقالي …
- انا مابهزرش و مبحبش الهزار..احنا في ساحر بيحاول يعطلنا ولازم نعمل حساب كل حاجة.
لما قالي كده سكت وسيبته ورحت أكمل حفر، فضلنا نحفر أنا ومحمود ابني اللي مش فاهم ماله ومعانا الاتنين اللي جابهم الشيخ فوزي، واحد منهم اسمه صفوت وهو في الأربعين من العمر والتاني اسمه حلمي وده في التلاتين من العمر
الحاجه أم محمود جابت الغدا أكلنا واحنا بنشرب الشاي عرفت من كلامي معاهم أنهم بيشتغلوا من زمان مع الشيخ فوزي ولكن باليومية وملهمش دعوه بإيه هيخرج من المقبرة والشيخ فوزي بيدينا إختيار إما أننا نحفر معاه للآخر بدون مقابل ونشارك في الخير اللي بيطلع من المقبرة او نشتغل باليومية واحنا كنا بنختار الشغل باليومية وده لسببين ودول عرفتهم لما صفوت قالي..
- السبب الأولاني هو أن الموضوع ده بياخد وقت كبير ممكن شهور واحنا مش هنقدر نشتغل كل الفترة دي من غير مقابل لأننا محتاجين فلوس عشان نقدر نعيش، احنا عندنا مسئوليات وزوجة واولاد، والسبب التاني لان ممكن بعد كل الحفر ده كله منلاقيش حاجة
قولتله..
- يا سلام يعني ممكن بعد الحفر منلقيش حاجة.
رد صفوت:
- ممكن... في ناس كتير بتحفر وفي الآخر مبيلاقوش حاجه وفي ناس تحفر وتلاقي وتتغير حياتهم خالص
بعد خلصت فترة الراحة ،رجعنا للحفر تاني، وبدأنا نخرج شوال ورا شوال والشيخ جمال يرسم الرموز ويكتب الطلاسم وتترص بطريقة معينة، والشيخ فوزي قاعد يعزم ويقول كلام مش مفهوم لا فاهم ده قرآن. لا ايه بالظبط
وفجأة لقينا نار قامت في شوال من الأشولة واحنا لسه بنملاه مكوناش عارفين النار دي جت منين و لا ايه مصدرها، فضلنا نطفي فيها بالتراب اللي خارج من المقبرة ولكن مش عايزه تنطفي وتحس انها بتزيد وهنا الشيخ فوزي والشيخ جمال قعدوا يقروا بصوت اعلى لحد لما النار خمدت وانطفت
صفوت قال للشيخ فوزي..
- اول مرة يحصل معانا حاجه زي دي ..المكان أمان يا شيخ فوزي ولا احنا في خطر.
الشيخ فوزي قال ..
-متقلقش المكان أمان ، بس في حاجتين لازم نعملهم الاول علشان نبقي في أمان فعلاً… اول حاجة لازم كل الأشولة اللي معانا نكتب عليها الطلاسم قبل ما نستخدمها مش بعد ما نستخدمها، والحاجة التانية لازم نسيطر أكتر على المارد اللي مع بنتك يا حاج.
صفوت وحلمي في نفس واحد …
-هي بنتك عليها مارد يا حاج ؟؟؟
الشيخ فوزي :قال اه عليها مارد وانا هسيطر عليه متقلقوش
صفوت قاله بتوتر ..
- بس احنا كده في خطر يا شيخ فوزي وممكن يهاجمنا واحنا تحت في المقبرة
الشيخ فوزي لسه هيرد عليه ، لقينا فجاه هدوم صفوت ولعت وقامت النار في رجله من غير سبب حاول يطفي نفسه بس معرفش، حلمي قام جاب شوال وقام كاتم النار ليه ولكن النار قامت تاني ومسكت في ايد حلمي ، انت مبقتش عارف اعمل ايه ؟ حاولت اطفي النار بمش راضيه تنتطفي.. وهنا الشيخ فوزي مسك ازازة ميه كانت جانبه، قرأ عليها بسرعه وقام رماها علي النار اللي ماسكه فيهم النار، وقتها بس هديت وإنطفت ، ولكن إيد حلمي ورجل صفوت اتصابوا بحروق قوية، بسرعه نقلناهم للمستشفي وهناك الشيخ فوزي قال لصفوت وحلمي تكاليف علاجكم كلها عليا واليوميه بتاعكم هدفعها لحد ما تقوموا بالسلامة وساب لهم مبلغ
ومشي..بعد ما خرجنا من عندهم انا قولت للشيخ فوزي …
- دلوقتي الموضوع بقى خطر وممكن حد مننا يتأذي كفاية لحد هنا وبلاش نكمل في الموضوع ده
الشيخ فوزي قالي وهو كله غضب
- انا هروح أحرق الجن اللي علي بنتك وانهي موضوعه ده .
كنت اول مره اشوفه بالغضب ده ، بس انا قولتله ...
-كفاية اللي حصل للناس مش عايزين الموضوع يكبر اكتر من كده
-انت مش عايز بنتك يخرج منها الجن ده وتخلص منه.
-ايوا بس.
الشيخ فوزي رد عليا بحزم
-من غير بس انا هخلصك منه.
يتبع
#سر_المقبرة
#سيد_مصطفى
