روايات حديثة

رواية كارينغتون 2059 الفصل السابع " نابالم "


كارينغتون 2059
الحلقة السابعة بعنوان ( نابالم)

للكاتبه/لينا بسيوني

سيد الغابة قام من مكانه فسمعت واحدة من الستات بتقول :
وقت التسليم.. الذئاب على وصول.
الستات اتحركوا فى خلية منظمة، لموا جثث البنتين اللى دبحهم سيد الغابة فى شباك و علقوها على شجرة معينة ووقفوا صف فى انتظار الذئاب.
نورا كانت بتجرى وراهم وهم بيتحركوا وبتقولهم :
يا جماعة انتوا رايحين فين احنا لازم نقاوم.
لطيف كان بيحلق عليهم وبيقولهم :
لافونا حتتين السلاح خلونا نمشى من المورستان ده.
اما انا فرجعت تحت الشجرة عشان اصحى رضوان.
اخدت وقت كبير على ما صحيت رضوان , بعد ما صحيته اخدته فى ايده ورجعت لنورا ولطيف عشان نلحق نهرب قبل ما الذئاب يوصلوا.
اتصدمت باللى شوفته.
ابو عضلات اللى هرب من الافاعى واقف ومعاه 10 اشخاص اول ما شافنى انا ورضوان شاور علينا وقال :
والاتنين دول كمان ..واعتبروا ده عربون الاتفاق الجديد مع القائد الجديد ومن المرة الجاية الاضحية هتبقى 3 مش 2.
دورت بعينى على نورا ولطيف وسط الستات القرع ورجالة الذئاب.
عينى لقطتهم وهم بيتوشوشوا وحسيتهم بيحضروا نفسهم عشان يجروا.
الستات كلها كانت منتظرة رد سيد الغابة على أبو عضلات.
سيد الغابة اتسند على عصايته , قام من على كرسيه , وقف و صلب طوله وفضل يدك بعصايته الأرض.
ام دراع مقطوع قالت بصرامة وجدية :
سيد الغابة بيرفض تسليم الضيوف وبيرفض المعاهدة الجديدة .


أبو عضلات فضل ساكت لوهلة بعدها انفجر فى الضحك وانتقلت عدوة الضحك للرجالة اللى معاه فقهقهوا بطريقة هستيرية.
أبو عضلات مشى فى اتجاه سيد الغابة، حاول يمسك نفسه من الضحك وهو بيقول :
سيد الغابة!! انتوا صدقتوا الهزل اللى انتوا عايشين فيه ده !! انتوا بالنسبالنا عشة فراخ وسيد الغابة بتاعكم ده ديك برابر ... حتى شوفوا.
فى لمح البصر رشق خنجر فى رقبة سيد الغابة مباشرة.
سيد الغابة فضل واقف فترة بعدها وقع على الارض جثة هامدة بعد ما انفجر الدم من رقبته .
الهرج والمرج ساد فى المكان وكل الستات القرع صرخوا وهجموا على مجموعة رجالة الذئاب ونشبت معركة بين الطرفين.
نورا ولطيف جريوا ناحيتى أنا ورضوان وجرينا كلنا بعيد عن المدبحة.
فضلنا نجرى فى الغابة بلا واجهة لحد ما اتصدمنا لما لاقينا فى وشنا ابو عضلات بيجرى زينا فى الغابة وماسك دراعه اللى رشق فيه سهم من سهام ستات الغابة.
فضلنا واقفين متسمرين قصاد بعض لا احنا ولا هو عارفين نعمل ايه؟!!! نهجم على بعض ولا نهرب من بعض!!! المسافة ما بينا كانت متعديش الخمس امتار .
سمعنا صوت صريخ ستات قوى بيقرب علينا، التفاتنا لمصدر الصريخ فشوفنا جماعة من الستات بيجروا ناحيتنا .
التفتنا تانى لابو عضلات فشوفنا ضهره وهو بيهرب من الغابة .
الستات قربوا علينا وفى مقدمتهم ام دراع مقطوع.
نورا قالت :
احنا اسفين يا جماعة لو كنا السبب فى موت السيد..
لطيف قطع كلامها وقالها :
اسكتى انتى يا وش الفقر
وبص للستات وقالهم :
احنا مش بتوع مشاكل احنا ...


ام دراع مقطوع قاطعته وقالت وهى بتشاور :
الطريق من هنا .. احنا هنفذ امر سيد الغابة وهنخرجكم بره الغابة.
نورا قالت :
وانتوا ؟!! انتوا لازم تخرجوا ..تهربوا .. اكيد باقى الذئاب هيرجعوا عشان ينتقموا.. وجودكم هنا مبقاش له لازمة خاصه بعد ما مات سي السيد.. اكيد هيشنوا عليكم حرب .
ام دراع قالتلها :
الغابة وطننا، الحرب قامت من اول ما الشمس غابت، احنا هننتقم لسيد الغابة ولكل اللى ماتوا على أيد الذئاب .
نورا قالتلها :
وانا معاكم .. انا ممكن اعملكم خطة انم..
ام دراع قطعت كلامها وقالت :
دى مش حربكم ولا ثأركم..
نور قاطعتها وقالتلها :
ازاى يعنى !! اسمعى بس الخطة اللى هقولكم عل..
لطيف قاطعها وقال :
ما تتهدى بقى يا بت انتى ما قالتلك الحرب مش حربنا هو أى فرك وخلاص اكتمى بوقك الله لا يسيئك.
لطيف بص لأم دراع وقالها :
كتر خير يا ست.. ممكن تدلينا نطلع إزاى من المخروبة دى وتلفينا حتتين السلاح.
أم دراع لفت ظهرها واتكلمت مع الستات اللى معاها.
اتقدمت واحدة من الستات بالسلاحين وسلمته للطيف بعدها ام دراع بصتلنا وقالت :


أنا هوصلكم لاطراف الغابة..
خدتنا لحد أطراف الغابة بالاخص عند مصنع صابون مهجور , سلمت علينا بحرارة بدراعها السليم و اتمنت لينا الحظ السعيد.
قررنا ندخل المصنع عشان نريح بعد المشوار الطويل اللى مشيناه لحد اطراف الغابة .
باب المصنع كان مفتوح وكراتين وجرادل الصابون فى كل حته.
دخلنا وقعدنا جنب بعض فى ركن من الأركان وسط الكراتين
نورا قالت وهى بتبص حواليها :
المكان الوحيد اللى لسه بخيره ..اكيد طبعا ما هو محدش هياكل صابون !! تصوروا أن نفس اللى حصل ده حصل برضه فى الشدة المستنصرية على ما اتذكر كان فى وزير اهتم بتخزين الرصاص والصابون قبل الازمة عشان مش بيفسدوا وارباحهم اكتر ولما قامت الشدة المخازن مكنش فيها غير صابون ورصاص!!
لطيف قاطعها قالها :
ممكن يا ستى انتى تبطلى فتى وهرى ولفينى حتة صابونة من جنبك أكلها .
قالتله:
فى أيه يا عم!! أنت عبيط !!هو الصابون بيتأكل!!
قولتلهم :
بعد اذنكم يا جماعة صوتكم عشان أخويا رضوان عايز ينام .
لطيف قام من مكانه وقال :
انا هقوم ادور على اى طفح .
نورا قالتلى بعتاب وهى مضيقة عينيها :
مش عيب نسيب ستات مكسورة الجناح يواجهوا لوحدهم ذئاب بشرية

مجازيا وفعليا!!! ... أنا متصدمتش بنهاية العالم أنا اتصدمت بنهاية النخوة والرجولة!! ده حتى حتتين السلاح اخدناهم منهم.
قولتلها :
اسمعى كلام لطيف وبطلى هرى.
لطيف دخل علينا وهو شايل جردل أسود.
فتحه وشمه بعدها رزعه قدمنا وقال :
حتى ده مش مايه ... بنزين ...
نورا فطت من مكانها وقالت :
ايه ده... ده بنزين !!
لطيف قالها :
ايه هتولعى فى نفسك ولا هتولعى فينا ؟!
قالت :
لا يخويا هولع فى النخوة والرجولة اللى جواكم .. مش واخدين بالكم!!! صابون وبنزين !!
قولتلها :
ايوه يعنى عايزة أيه !!
قالت :
محدش فيكم هيفهمنى...
وراحت ناحية رضوان وهى بتقول:
هو الوحيد اللى هيفهمنى.
هزت رضوان عشان يصحى، رضوان صحى وعينه تقيله.
نورا قالتله :


فوق يا رضوان عايزة اعمل حبة سيرش على ويكيبيديا.
رضوان بصلها باستغراب فقالتله :
ركز معايا .. يلا قولى طريقة صناعة النابالم.
قالها بنمطية :
النابالم هو مادة كثيفة تشكل عند مزجها بالبنزين هلاماً لزجاً سريع الاشتعال بطيء الاحتراق يلتصق بالسطوح، وتصل درجة حرارته إلى أكثر من 1100ْم. ويستخدم في قاذفات اللهب والقذائف الحارقة وقنابل الطائرات.
خبطت رأسها وقالتله :
لا ما انا عارفة هو ايه النابالم، أنا عايزة طريقة صناعة قنبلة النابالم بالضبط.
لطيف خبط كف على كف وقال :
وعايزة تعملى قنبلة ليه يا بت الحلال؟!!
قالت :
عشان نساعد بيها ستات الغابة
لطيف خبط كف على كف وهو بيقول :
لا حول ولا قوة الا بالله .. حقيقى انا مبقتش خايف غير منك أنتى..
نورا تجاهلته وفضلت تحاول تطلع معلومات من رضوان.
بعدها فطت من مكانها وقالت :
تمام كده اوى هاتوا كام كرتونة صابون من دول و البنزين ويلا بينا.
لطيف قالها :
على فين؟!!
قاطعت لطيف وقولتله :
على فكرة نورا عندها حق عيب نسيب الناس كده.. أنت راجل صعيدى واكيد عارف الاصول!
قالى :
يا عم انا عارف الاصول بس يعنى الزمن ده مفهوش اصول وانا الصراحة عايز اشوف اهلى قبل ما اموت واطمن عليهم .
نورا قالتله :
وانا كمان نفسى أطمن على اهلى.. بس الاصول اصول فى أى وقت واخدى بالك يا عم لطيف.



لطيف قالها :
واخد بالى يا وش الفقر... عايزة كام كرتونة؟!!
قالتله بحماس :
على قد ما تقدر تشيل .. شيل
لطيف شال 6 كراتين وأنا شيلت جالون البنزين ونورا شالت السلاح ورضوان فضل حاضن هدوم جده ، دخلنا الغابة ورجعنا فى نفس الطريق اللى جابتنا منه ام دراع لحد ما وصلنا لمعسكر الستات ...
لقينا ام دراع بتقرب علينا وعلى وشها علامات الاستغراب , قالتلنا :
رجعتوا تانى ليه ؟!
نورا قالتلها بفرحة و حماس :
احنا جايين نحارب معاكم الذئاب.
ام دراع بصتلها بعدم فهم فنورا قالتلها :
انا بس عايزة جردلين معدن .. جردل كبير و جردل صغير.
ام دراع قالتلها :
موجود بس ليه؟!!
نورا قالت :
اسمعى اللى بقولك عليه ..
ام دراع قاطعتها وبصتلها بأستخفاف و قالت :
معتقدش انك هتقدرى تفيدينا بحاجة.. احنا بعتنا مرسال من عندنا لجماعة الامير نطلب منهم المساعدة هما جماعة كبيرة ومعاهم اسلحة .
ام دراع قطعت كلامها لما شوفنا واحدة جايه من بعيد بتجرى.
ام دراع قالتلنا :
اهى المرسال جات.
البنت قربت مننا وقالت وهى بتنهج :
وافقوا ... بس بشرط ...
ام دراع قالتلها :
ايه الشرط ؟!
قالت :
بعد النصر نبقى جوارى عندهم يعملوا فينا اللى هما عايزينه.
نورا قالت بصوت عالى :
لا طبعا ..


كل الستات بصوا عليها.
نورا طلعت فوق جزع شجرة مقطوع و خطبت فيهم وقالت :
يا ستات احنا عددنا حوالى 100 واحدة يعنى عدد كبير بالنسبة للظروف اللى احنا فيها .. أنا معرفش عدد الذئاب كام بس اللى اعرفه من التاريخ ان الفئة اللى على حق هى اللى بتكسب حتى لو كان عددهم صغير. اسمعوا كلامى انا اقدر اعملكم سلاح قوى وفتاك يقضى عليهم.
ام دراع شدت نورا ونزلتها من على جزع الشجرة وقالتلها :
انتى غريبة علينا كما انك صغيرة على انك تقررى مصيرنا !!
نورا قالتلها :
انا مش صغيرة ..
لطيف قال بسخرية :
دى صغيرة دى.. دى عجوز شمطاء
نورا زغرتله والتفتت الستات و كملت كلامها :
يا جماعة اسمعوا كلامى... تعيشوا يوم واحد بكرامه ولا تعيشوا العمر كله فى ذل .
علت الهمسات ما بين الستات وبدأت كل واحدة تتناقش مع اللى جنبها ومن صوت الهمسات بأن موافقة الستات على كلام نورا حتى أم دراع مقطوع ملامح وشها اتغيرت لما حست بجدية نورا و ثقتها ، بصت لنورا وقالت :
ايه السلاح الفتاك اللى بتقولى عليه؟!


نورا قالت :
قنبلة نابالم... بووووم ومش اى بوم هى خطيرة على اللى بيعملها بس دمار على اللى هتترمى عليه.. احنا هنعمل عجينة الموت.. مش محتاجين غير نار وجردلين معدن جردل كبير وجردل صغير هنحط فى الجردل الكبير مايه ونسيبها تغلى على النار وهنفضى فى الجردل الصغير البنزين ده وهنحط جردل البنزين فى المايه اللى بتغلى لحد ما البنزين يسخن ويغلى هو كمان بعدها هنبشر الصابون وندوبه براحه فى البنزين.. لحد ما البنزين ياخد لون الصابون والسائل يتحول لعجين زى المهلبية اهم حاجة البنزين ميشمش النار عشان مننفجرش كلنا بالغابة. بس كده ومبروك علينا قنبلة النابالم يا ستات .. عايزة اقولكم ان العجينة دى البرطمان منها قادر يفجر حجر كامل من احجار الهرم الكبير .
بدئنا فى تنفيذ خطة نورا ، عملنا عجينة النابالم وفق تعليماتها ولغمنا بيها الشجر بعدها اتقسمنا على أربع مجموعات.
مجموعة الستات العواجيز والأطفال ومعاهم رضوات ودول دخلناهم فى الحفر والخناق حماية لهم من الانفجارات ومجموعة تانية فوق الشجر ومجموعة ثالثة اتمركزت وراء جدار من الشجر المقطوع ومعاهم جزء من عجينة النابالم وازايز مولتوف عملتهالهم نورا.
الغابة اتأمنت من كل الاتجاهات... و فضلنا منتظرين الهجوم.
عدا يوم ... اتنين ... تلاتة .. محدش هجم !
الستات اللى على الشجر زهقوا وملوا واللى فى الخنادق طلعوا بعد ما الأكل اللى معاهم خلص عشان يجيبوا أكل تانى.
فى الوقت ده كنت انا ونورا وام دراع ولطيف فى كوخ سيد الغابة بنخطط وبنحط احتمالات جديدة للهجوم اللى اتأخر.
لحد ما فجأة وبدون سابق انذار سمعنا صوت العواء!!
تعليقات



حجم الخط
+
16
-
تباعد السطور
+
2
-