في يوم طبيعي طلعت الشمس وامر الله باستيقاظ ياسمين من نومها .فتحت عيونها الخضرا فتأذت من الشمس فرجعت قفلتهم تاني مطت شفايفها الوردية وقامت من السرير دخلت الحمام بهدوء (ياسمين عمرو الحاجري 21 سنة ....بنت جميلة جدا ملامحها انوثية متوسطة الطول وبيضة البشرة عيونها خضرا وشفايفها وردية وشعرها اصفر ناعم طويل جدا ......جدعة ,طيبة ,باردة تلج ,عنيدة شوية ,قوية ,معتمدة على نفسها).........في مكان اخر (فيلا سعد الدين الجوهري )
بنت ملامحها هادية بشعر طويل احمر مجعد قاعدة على سريرها وماسكة الفون .....بس الواضح انها صاحية بقالها مدة ...(نورهان سعد الدين الجوهري ....البيست بتاعت ياسمين ومن نفس السن .....قصيرة بيضا البشرة عيونها عسلي فاتح وشعرها احمر طويل مجعد .....طيبة اوي لدرجة الهبل ,هادية في طبعها )
سمعت صوت خناق وزعيق عالي نزلت من السرير فتحت بابها وجري عالسلالم الى ان لقت اخوها الكبير سلطان ماسك انس وبيزعق له (سلطان سعد الدين الجوهري 28 سنة .....ضابط في المخابرات المصرية ومن اكفأ الضباط في الجهاز.....شاب وسيم الى ابعد حد طويل جدا وجسمه رياضي حنطي البشرة عيونه عسلية و شعره بني غامق ....عصبي جدا ,مستبد ,متحكم ,منظم )
نورهان بدهشة :ايه ده في ايه يا سلطان بالراحة هوا عمل ايه لكل دة ؟!.......سلطان ملحقش يرد
انس باندفاع: الحقيني يا نور اخوكي هياكلني ,وكل دة ليه عشان جي بسأل عليكي ....(انس نصر الجوهري 19 سنة .....طالب في اخر سنه ثانوية ....ابن عم نورهان وسلطان .....طويل الى حد ما وجسمه نصف رياضي حنطي البشرة عيونه بنية فاتحة ......فكاهي ,طيب ,جدع,له هيبة بالرغم من صغر سنه)
نور وهي بتحاول تفك انس من ايد سلطان :معلش يا سلطان سيبه انت مأرنبه كدا ليه..... خلاص عشان خاطري ....وبعدين هوا مغلطش دة جاي يتطمن عليا
سلطان بعصبية :اه يتطمن عليكي ...يقوم يخش يزعق زي البهايم بالظبط كأنه لوحده في البيت .....(وجه كلامه لانس واتكلم بحدة ): بعد كدة لما تدخل تقعد هنا في الصالون وعندك الخدم نادي عليهم يقولوا لنا انك موجود ....البيت ده في نظام مش في زريبة هنا !!
انس بعفوية :وليه يا عم اللفة دي ؟...منا ممكن اطلع انادي عليكم على طول !
سليم بص لانس وبعدين نقل نظره لسلطان اللي كان بيولع من غضبه وغباء انس....همس في ودن نور :بقولك ايه ؟...اخوكي هيقتل انس انا ماشي عشان هتأخر عايزة حاجة ؟!
نور بنفس تون الصوت :لا شكرا ....بس انا مش عارفة اخلصه من سلطان ازاي ؟
سليم :لا حاولي عشان انا كدة تأخرت يلا سلام ....(اتكلم بصوت اعلى ):سلام يا سلطان ...وانت يا انس شكلنا هنسلم عالشهدا اللي معاك (ضحك ومشي) .....(سليم سعد الدين الجوهري ....توأم سلطان مع اختلافات بسيطة في الشكل واللي بتخلي سلطان اوسم منه بشوية.....محامي شاطر وبيحب شغله ....فكاهي ,جدع , بسيط ,عملي ,طيب )
نرجع لفيلا (عمرو الحاجري )
ياسمين وروقانها وبرودها وهي بتنقي حاجة من لبسها للمحاضرة تكون تنفع لخروجة بعدها ...وبعد تفكير لبست فستان اطول من الركبة ابيض وعليه جاكيت جلد اسود كوتشي ابيض شيك وسابت شعرها عامل زي شلالات الذهب على ظهرها
نزلت من الاوضة قابلت والدهاعلى السفرة اتنهدت بزهق وصبحت عليه بابتسامه صفرا :صباح الخير يا بابا
عمرو : صباح النور يا ياسمين
ياسمين بابتسامه مزيفة : بابا انا كنت عايزه اخرج النهاردة بعد الجامعه مع صحابي ..ممكن ؟!
عمرو : طبعا ... مفيش مشكلة
ياسمين : طيب انا نازله عشان عندي محاضرة ..
عمرو : محاضرة ايه الساعة لسه 12 ....مش انتي محاضرتك 2
ياسمين بزهق : انا لسه هروح اجيب نورهان ونروح انا وهي ..
عمرو : ليه هيا معندهاش عربية ؟
ياسمين ببرود :لا عندها...بس انا عايزة اوصلها النهاردة ممكن ؟
عمرو : طب هيا ساكنه فين ؟
ياسمين :بابا هوا انت مش ملاحظ انك نازل فيا اسئلة من ساعة ما قعدت؟....هوا في ايه بالظبط ؟..انا مش اول مرة اوصل حد من صحابي (قالت كدة وهي بتقوم من عالسفرة ومشيت ومستنتش حتى رد من عمرو )
ركبت عربيتها وراحت لفيلا سعد الدين الجوهري ...طلعت واول ما دخلت لقت نورهان مش جاهزة وبتفض خناقة بين سلطان وانس ابتسمت ببرود ودخلت قالت لانس:ايه يا عم انت على طول مضروب كدة ما اجيش مرة الاقيك بتضرب ؟؟
سلطان استغرب دخولها المفاجئ واتكلم بتهكم : وانتي مال حضرتك ؟!
نور برقت بعيونها وهمست في نفسها : يختااااااااي ....اه يانا يابا عاللي هيحصل دلوقتي
ياسمين بصت له بثقة في عيونه : انا! مالي ؟
سلطان بغضب: يخربيت اليوم الجميل اللي باين من اوله ,ايوة مالك انا بتخانق معاه عشان مش بيحترم قواعد البيت انتي مالك بقى ؟!وبعدين انتي مين دخلك البيت اصلا ...نوور مين دي ؟
نورهان بتوتر : صااا صاحبتي ياسمين يا سلطان معلش انا قولت للخدم اول ما تيجي يدخلوها
ياسمين بتكبر وبرود :انا صاحبة البيت اصلا
سلطان اتعصب ومسك انس زعق فيه:هنحترم نفسنا بقى ولا ايه ؟!
ياسمين حبت تضايفه :ايه ده هوا عمل ايه ؟!...ده حتى طول عمره كيوت (مسكت خدود انس وشدته ):اهو يا عم قمر اقسم بالله
سلطان كل ده ومش مصدق انها بتتعامل عادي ومش مدياه اي اهتمام ولا خايفة وباصة في عينه بجمود كده وعادي ..اتعصب واتكلم بصوت جهوري :كييييييوووووووووووت؟!
نور اتنفضت من مكانها .....حطت ايدها على كتف سلطان ومثلت الشهقة وقالت :ايه ده الساعة بقت واحدة واحنا عندنا محاضرة 2 يلا يبنتي ....وانت مش عندك شغل مهم ما تخلص بقى !!
سلطان بصلها وعينه بتطق شرر : انا ماااشي يا نور عشان لو قعدت اكتر من كدة ...هقتل عمد !
مشي سلطان وياسمين بتبصله من تحت لفوق بقرف وبتتريق على طريقة كلامه
ياسمين ببرود : ايه ده مين فاندام ده يا بنتي ؟....اه خلاص عرفت ده الرائد سلطان الخطير
نور بتنهيدة راحة :انا كنت بقرأ عليكي الفاتحة
ياسمين بضحك :لا يا بنتي مش للدرجة دي
نور بجدية :لا للدرجة دي ..خافي على نفسك منه شوية
ياسمين بضحك :انا اخاف ! ... يا بنتي انا عمري ما جربت الاحساس ده قبل كدة اصلا ....وبعدين انا معديش حاجة اخاف عليها
انس:هوا انا هواء ولا ايه منك ليها ما تخلصونا بقى انا كنت جاي بدري عشان العب بلايستيشن مع نور بس سلطان الله يحرقه وقفني عشان يعلمني الادب
نور : عشان تبقى تدخل تزعق بعد كدة !
ياسمين بصدمة مصطنعه: يالااااااااهوي
نور :ايه ؟!
ياسمين : انتي لسه مجهزتيش ؟! المحاضرة الساعة 2 يخربيتك
نور بفخر :ده هما 3 دقايق هوا انا زيك ؟!
ياسمين : طب اعملي حسابك خارجين بعد الجامعة عندنا حفله البسي حلو
انس : اصلا نور لو لبست خيش بتبقى قمرررر
ياسمين بتهكم : اه ومن يشهد للعروسة
في جامعة القاهرة
ياسمين باستهبال : والحمد لله انتهت اخر محاضرة لنا في هذا الاسبوع ....اوه كم انا سعيدة حقا !
نور بنفس ليفل الهبل : نعم نعم ولكن لماذا انتي سعيدة لهذه الاجازه الاسبوعية الخنيقة؟!
ياسمين :عشان يا اهبل خلق الله بدأ العد التنازلي لعيد ميلاد احلى وارق والطف انسانة خلقها ربنا
نور بصدمة : ايه ده ازاي نسيت !...ده بكره عيد ميلادي !
ياسمين بابتسامة : مش بقولك اهبل خلق الله ... بس الطفهم والله
نور بفرحة : ربنا يخليكي ليا يا جيسي بجد انتي اختي واكتر كمان
ياسمين :اومااااال يا بنتي ...المهم بالليل هاجي انا والبنات عندك ونعمل بارتي صغنونة كده عشان احنا بنحب نهيص الصراحة ....وبعدين فاندام اللي قاعد معاكي في البيت ده انا معرفش ممكن يعمل فيكي ايه وانتي لوحدك فلازم نييجي
نورهان :لا سلطان ميقدر يعمل معايا حاجة ولا يزعلني
ياسمين : ماشي يا ستي ربنا يخليهولك يلا بقى عشان نروح المول
نور : مول ايه وليه ؟
ياسمين : يا بت متبقيش غبية انتي مش عيد ميلادك بكرة ؟
نور : ايوة
ياسمين : يبقى اكيد رايحة عشان انقي لسيادتك هدية على ذوقك !
نور بكثوف : ماشي .......
في مكان مهجور (عنبر قديم )
سلطان : يعني مش هتعترف باللي عملوها معاك ؟......خلي بالك انا لحد دلوقتي هادي جدا معاك وبارد بس انت متعرفنيش لما بقلب !
المجرم : والله يا باشا انا لو اعرف حاجة عنهم كنت قولت ...هوا انا غاوي فرهدة وتعذيب يا بيه ؟!
سلطان بابتسامة شر : انا قولت اللي عندي وخلصت ومش هعيد تاني .....
سلطان نادى على راجل من رجالته ووصاه على اللي لازم يحصل ويتعمل مع المجرم !
يوسف : ايه يا عم مالك على الصبح متعصب كدة ومش طايق نفسك !.....(يوسف النشوآتي 29 ....بيست سلطان ومعجب بنور جدا ...شاب طويل وبشرته بيضة وعيونه بنيه غامقة شعره بني غامق ....مهذب ,طيب,جدع ,شهم )
سلطان بحدة خفيفة : يعني انت شايف ان مفيش حاجة النهاردة متخلنيش متعصب !
يوسف بهدوء : ايوة ...اهدا بس كدة وقولي ايه اللي حصل ؟!
سلطان بتنهيدة : النهاردة الصبح يا عم.....انس ابن عمي انت عارفه عيل تافه و مش متربي .... فورلي دمي! ... داخل وكأنه في زريبة... وعمال ينادي يا نووووور! يا سلطاااااان! يا سلييييم! ... لحد ما عصبني نزلت مسكت في خناقه !
يوسف بعقلانية : يا عم عيل بردو ... لسة صغير و مش فاهملك سكة .... بس ايه الجديد ما انت كل شويه تدب خناقة معاه ! .... ايه اللي حصل ؟ كمل
سلطان بتنهيدة غضب : واحدة صاحبة نور انا مش عارف دي صاحبة نور ازاي اصلا ؟!
يوسف بضحك : ليه يا عم مش للدرجة دي !
سلطان باشمئزاز : اصل انت مش فاهم بتتكلم ازاي ! .... باردة بشكل مش طبيعية !!
يوسف بتعجب : يااااااااه !! ... ايه كل ده في ايه قولي ايه اللي حصل ؟؟!
(سلطان حكاله و يوسف فاصل ضحك )
يوسف بضحك : طب والله بت عسل صحيح !
سلطان بص له باستغراب :عسل ؟!.... طب اطلع بره يا يوسف عشان مطلعش عصبيتي عليك !
يوسف بضحك : لا خلاص انا مش قدك ! ... يلا سلام ... (وخرج )
سلطان قعد على كرسيه ورفع رجله عالمكتب و غمض عنيه ... وافتكر نظرة ياسمين اللي خرقت عنيه ... اول مرة حد يبصله كدا ... بالجمود ده من غير نظرة خوف ولا حتى رياكشن رعب! ...لا ده حس ان نظرتها بتهاجمه و بتقوله انه انسان همجي و متعصب و غجري ... اتعصب وقفل ايده على شكل قبضة و رزعها عالمكتب بكل غل و غضب
بعدها بكام ساعة ... كل واحدة من صاحبات نورهان راحت البيت ... وكلهم كانوا مبسوطين جدا
اية :هو احنا هنقعد نرغي كدا كتير! ... فين الاكل؟!
ليلى : يا خرااااابي على فرس النهر اللي في بطنك ده ويا ريته باين عليكي ...الا ما كل ما بتاكلي بتخسي اكتر !
اية : خمسة النهاردة يوم الخميس ... يخربيت ارك ده ... حسبي الله و نعم الوكيل في عينك !
(السهرة كانت جميلة و قعدوا يضحكوا كتير)
انس كان نايم فوق وسمع صوتهم فاق وقال في نفسه : يااااااااااااااااه اخيرا هلعب بلاي ستيشن
(تحت وصل سلطان وسليم بعد يوم طويل... سليم دخل الاول ولقى البنات عاملين زينة و بالونات و هدايا و مشغلين اغاني و بيسقفوا و يتنططوا )
سليم همس لنفسه : اااه يا ولاد المجانين هتجننوا اختي معاكوا ! ... ( ابتسم بمكر ): دا انتوا ليلتكوا عسلللل ! ... وراح لنورهان واتكلم بابتسامة : كل سنة وانتي طيبة يا نور عيني
نورهان بكثوف : وانت طيب يا حبي
سليم بمكر : بقولك هي البت اللي اتمشكلت مع سلطان الصبح ... هنا ؟؟
نورهان ببراءة : اه
(سليم ابتسم و طلع على اوضته... سلطان ركن العربية و طلع ... استغرب من اللي هما عاملينه ... زينة ... مزيكا بصوت عالي ... رقص ... تنطيط ... ولا كأن في رجالة في البيت )
عقد حواجبه ونادى على نورهان بصوت مرعب : نورهااااااااااان !
تعليقات
إرسال تعليق