سكريبت زمن ظالم (كامل) بقلم سها طارق
البيت كان مضلم، لمبة الصفرة في الصالة بتدي إحساس خانق، والشارع تحت مليان دوشة وضحك الناس اللي بتتكلم علينا. ريحة دخان السجاير مالية الجو، وجوزي واقف قدامي، إيده متشابكة ووشه متجهم، صوته عالي بيقطع السكون.
جوزي:
شايفة خلفتك الزبالة عاملة ف الناس اي اسمعي يا مرا، ابنك دا ميدخلش البيت تاني... دا بقا شغال بلطجي في ديسكوهات ، وسوابق وسمعة وحشة. أنا بيتي شريف، ميدخلوش عيل يبوظ اللي بنيته بعرق السنين. ولو اختارتي ابنك، يبقا ف داهية معاه. كفاية الملايين اللي اندفعت عشان يطلع من السجن، وأنا اللي اتفضحت.
أنا ببصله بعيون كلها نار، إيدي بتترعش وأنا ماسكة طرف الطرحة، ورديت بحدة:
غوره ف داهية بعيد عني، أنا مبقتش طايقة وهتبره منه، دا خرب بيتي، الله يجحمه.
وفجأة الباب اتفتح بعنف، كريم دخل، عينه حمرا كأنها مولعة، نفسه متقطع، كأنه شايل جبل فوق صدره. واقف قدامي، إيده بتتسند على الحيطة، صوته مبحوح.
أنا زعقتله وأنا ببصله بغيظ:
اسمع يا ض، من النهاردة ملكش عيش هنا. دورلك على خرابة غير البيت دا. أنا اتفضحت وخسرت فلوسي كلها فيك، أنت عرتني قدام الناس. أنا تعبت منك، ومش هخسر جوزي وبناتي عشان واحد زيك.
كريم رفع راسه فجأة، صوته اتكسر بس طلع صرخة:
كفاية بقااا! حرام عليكي! إيه مش بترحمي؟ أنا ذنبي إيه؟ أنا عيل عندي 12 سنة، الشرطة تاخدني من وسط الميدان، يتهموني إني باعاكس بنات وأنا عيل! اتضربت واتبهدلت على حاجة مش فاهمها... ويوم ما البنت تشهد وتقول مش هو، يطلع ظابط ابن حرام يقوله: خليه كمالة عدد! ويلبسه تهم اعتداء وتعدي على سلطات. وأنا لسه مش فاهم حاجة، عاوز أرجع لحضن أمي!
كريم بيصرخ، دموعه بتنزل وهو بيخبط صدره بإيده:
هااا، ذنبي إيه يا يما؟ قوليلي ذنبي إيه إني أروح الأحداث وأنا بالسن دا؟ مفيش قدامي غير طريقين: يا أما أكون ريس بالدراع والكل يخاف مني، يا أما أعيش كريم الجبان طول عمري!
مش ذنبي إن لما اطلع واشتغل مش الاقي إلا الشغل اللي اعمل بي كيان هيكون دا ايواا اشتغلت ف ديسكوهات، وصاحبت وعرفت ناس وحشه وبقاا عندي رجاله بقيت قوي عشان يرجعلي الظابط اللي ظلمني يطلب إن اشتغل معاه تاني ويوم ما ارفض اتسجن بس بطلع منها زي الشعرة من العجين تعرفي لي عشان مبقتش الضعيف
قوليلي ذنبي اي اخطب تطلع خاينه وامها واختها عاوزيني لغرض وسخ ف دماغهم
ايوا فصحتها وخليت سيرتها على كل لسان،
ورجعت اشتغل ف تنظيم حفلات مع اخويا بس لا مش متوافقين لان كل واحد بدماغ
وف الفتره دي احب بنت ولما اسيب الشغل مع اخويا تسيبني وتبعد وتتخطب هي كانت ملاك ومش تستاهل واحد وحش زيي سوابق واشتغل فكل القرف دا فعلاً
تعرفي كله كان يهون قصاد كلمه حلوة منك تعرفي المحامين الكتير اللي من كل البلاد وقفت معايا واتحولت القضية راي عام بس هل اتحاكم اللي ظلمني لا هل اخد جزاء بردو لا
عرفيني مين اختارلي الحياة دي أنا لا دي حياة اتفرضت علي
أنتِ أول واحدة قسيت علي وهانت قلبي
أول واحدة بعتني واستعرت مني وأنا ماليش ذنب
الصالة كلها اتجمدت، لحظة صمت تقيلة، حتى صوت الشارع تحت اختفى من وداني. أنا واقفة مش قادرة أتكلم، جوزي بيبصله بكره، وبيسيب القوضة ويخبط الباب ويمشي.
كريم مسح دموعه بسرعة، صوته بقا أهدى بس كله وجع:
أنا مختارتش العيشة دي... مش حاببها... بس الزمن دا مبينفعش أكون غير كدا. ولو على جوزك وفضايح زي ما بتقولي، همشي. أمشي لحياتي المقرفة اللي أنتِ بتعايريني بيها، وأنا ماليش ذنب فيها.
الباب اتقفل وراه، والبيت غرق في سكون مخيف. أنا وقفت في نص الصالة، عيني على الباب، قلبي بيتقطع، بس عقلي بيقول: كريم هيأذينا كلنا... وأنا مش هخسر حياتي عشان عيل زيه.
وحشتوني يسكاكر
#تمتتتتتتتت
#زمن_ظالم
#مشاعر_كاتبة
#سهىٰ_طارق_استيرا
تمت