سكريبت امل ومنير (كاملة جميع الفصول) بقلم دينا الحمزاوي
_يا بنتي حرام عليكِ، بطلي مرقعة فاضيه، وقومي ذاكري بقى.
بصيت لماما وأنا بقلب عيني بملل:
_مش هذاكر يا أمي، قولتلك مش عايزة أذاكر.
_وفلوس التعليم دي يا روح أمك؟ بعدين إزاي يعني مش عايزة تذاكري، مش عايزة تبقي ناجحة زي الناس اللي هناك دي؟
_لا مش عايزة.
قولتها ببرود، لقيت ماما بتزعق وهيا بتقولي:
_يمرك، مررتيني، هو عندي مرارة واحدة وخلاص فقعتيها.
اتفتح الباب ودخل منه حسام أخويا وهو بيقول:
_إيه في إيه مالكم صوتكم جايب لآخر البيت ليه؟
_تعالى شوف أختك الفاشلة أخرة صبري اللي مش راضية تذاكر.
قعد حسام جمبي وهو بيمشي ايده على شعري بحنان وبيقولي:
_مالك يا أمل يا حبيبتي؟مش عايزة تذاكري ليه؟
_مليش انا في المذاكرة والكلام الفاضي ده.
_يا حبيبتي كلام فاضي إيه بس ده مستقبلك! يعني مش عايزة تبقي حاجة حلوة لما تكبري.
_لا مش عايزة.
_طيب منفسكيش تحققي أحلامك؟
_لا نفسي.
_يبقى ذاكري عشان تحققيها.
_بس أنا أحلامي مش محتاجة مذاكرة!
_هو في أحلام بدون مذاكرة؟
_آه اتجوز، كل البنات بتتجوز بدون مذاكرة.
بص حسام لماما وفضلوا يبصوا ليا بصدمة بعدين قال حسام:
_يخرب بيتك هيا دي كل طموحاتك في الحياة، تتجوزي؟
_هو فيه أحلى من الجواز وحلاوة الجواز؟
_هتشل، هتشل، ياربي.
عوجت ماما شفايفها بغيظ في حركة شعبية وبتقول:
_دي ناقص المعفنة تكون حاطة عينها على عريس كمان تبقى كملت.
_أيوه ما أنا فعلًا حاطة عيني على عريس.
ضحك حسام وهو بيقولي:
_ده مين ده بقى.
قولتله بهيام:
_الواد منير صاحبك.
اختفت الإبتسامة من على وشه ووقف صرخ وقال:
_نعم يا روح أمك؟
_إيه مالك؟ مش إنت اللي سألت!
_إنتِ بتبصبصي لصاحبي يا بجحة؟!!.
_مسمهاش ببصبص ليه لو سمحت، أسمها معجبة بيه.
_كلهم نفس المعنى، بعدين إنتِ حتة عيلة صعلوقة 13 سنة ركزي في التعليم يابت.
_لا انا هركز في المطبخ عشان اتجوز قرة عيني.
قالتلي ماما:
_طيب ذاكري الأول ياعين أمك، يعني إنتِ عايزة الواد الدحيح ده يبص لواحدة فاشلة؟
_تصدقي صح خلاص أنا هذاكر أهو!
________
كنت قاعدة بذاكر دخلت الأوضة على حسام أخويا وانا بعيط بتمثيل، لقيت منير حبيبي قرة عيني قاعد معاه.
وقف حسام وقالي بخضة:
_مالك بتعيطي ليه؟ حد زعلك؟
_لا بس فيه سؤال مش عارفة أحله .
_يا شيخة خضيتيني كل ده عشان سؤال؟ إيه هو؟
_في الإنجليزي، خد بص.
_لا لا، أنا مليش فيه، خلي منير يشوفه هو دحيح.
ضحك منير وقالي:
_تعالي يا أمل. وريني السؤال اللي واقف قدامك.
قربت منه وهو فهمني السؤال.
ابتسمت ليه بكسوف وقولتله:
_ميرسي يا منير تعبتك معايا.
_لا ولا تعب ولا حاجة، تعبك راحة.
سكت شوية وبعدين كمل:
_يلا ذاكري بقى وشدي حيلك عشان تطلعي اللي نفسك فيه.
_ياه ياريت فعلًا أحقق اللي نفسي فيه.
_طيب ياستي نفسك تبقي إيه؟
_نفسي أبقى مراتك.
قولتها بتلقائية، فهو وشه جاب ألوان، وحسام أخويا مسكني من قفايا وهو بيرميني بره الأوضة مش فاهمة مالهم دول، هو أنا قولت حاجة غلط؟ أنا عايزة اتجوز.
______
النهاردة فرحي.
أيوه زي ما سمعتوا كده وأخيرًا النهاردة فرحي على اللي اختاره قلبي وحاطة عيني عليه من وأنا صغيرة.
ايوه ايوه احسدوني براحتكم.
أنا اتجوزت اللي بحبه وانتوا لا.
كان حسام واقف جمب أمه في القاعة وهو بيقول:
_آه يا زمن البت المفعوصة دي تتجوز قبلي، وأنا الكبير؟طيب ليه يا دنيا.
وقف عماد اخوه جمبه وهو بيقول:
_تصدق البت أختك دي برنسيسة؟
_ليه؟
_كانت دائمًا تقول وهيا صغيرة أنها عايزة تتجوز منير وفي الآخر اتجوزته القدرة.
ضحك حسام وقال:
_كانت حاطة أهدافها من وهيا صغيرة مش زينا جاتنا نيلة.
لقوا شيماء بنت خالتهم بتدفن وشها وسطهم وبتقول:
_فعلًا جاتكم نيلة عشان أنا قدامكم أهو ومفيش كلب فيكم كان حططني في أهدافه.
ضحك عماد وهو بيبعد وشها عنهم:
_لا يختي بعد الشر شوفي حسام أحسن.
لفت شيماء لحسام اللي ضحك وقال:
_خديلي ميعاد مع خالتي وجوزها.
_إنت بتتكلم جد؟
_أيوه والله.
_لولولولولي، وأخيرًا هتجوز، وبوري هيتلم، روح ياشيخ إلهي يارب يجمع هدومي وهدومك في غسالة واحدة.
تمت😂🤍