سكريبت شيطان بشري (كامل) بقلم سها طارق
يا فضحتك يا محاسن… يا خيبتك يا حظك المنيل إزاي حامل يا بنت الكلب…
جبتِلي العار يا بت، إنتِ عندك 17 سنة!
جسمي بيرتعش ودموعي نازلة وصوتي بيترجف:
والله ما ليا ذنب… هو السبب… هو السبب!
مسكتني من شعري وقالت: مين هو؟ انطقي بدل ما اقتلك فضحتيني قدام الناس… ربنا ينتقم منك.
صرخت: ابن خالتي هو السبب… كان بيهددني، معاه صور ليّا، قال لو اتكلمت هيفضحني أكتر.
الأقلام بتنزل على وشي، وهي بتقول: أكيد إنتِ السبب إنتِ اللي أغرتيه… دا ابن أختي مؤدب
شدتني من شعري أكتر وقالت: اسمعي يا بت، لما أبوكي ييجي ويسألك عن ياسر، تقولي معرفش… فاهمة؟"
بصتلها بقهر وعيطت: حاضر… حاضر…
دخلت أوضتي، افتكرت اليوم اللي ياسر سرق فيه موبايلي وخد صوري وركبها على حاجات مش كويسة… وفضل يهددني واخد مني اللي عاوزه وبقااا يهدد أكتر.
عيطت وحسيت إني مكسورة… حتى أمي خافت على ابن أختها أكتر مني.
فضلت أخبط في الأوضة… وقلت لازم الحمل دا ينزل، مش هجيب طفل يتعاقب بسببي.
فضلت أخبط في بطني… مفيش فايدة.
طلعت من الشقة ورميت نفسي من على السلم…
صحيت على صوت الجيران: الحقوا يا محاسن بنتك بتموت.
اتنقلت المستشفى… أبويا جه، ولما عرف إني كنت حامل والجنين نزل، جرني وضربني قدام الناس.
رجعني البيت، الضرب مش بيقف… وأمي واقفة تدافع عن ابن أختها.
أبويا بيصرخ: أكيد إنتِ اللي غلطانة أكيد رحتي بمجازك ليه يا كلبة.
صرخت وأنا غرقانة دموع ودم: والله ما ليا ذنب… ياسر هو اللي عمل كدا وكان بيهددني
أمي تدخلت وقالت: ابن أختي مستحيل يعمل كدا
أبويا انفجر: لازم تموتي… الراجل مش هيتأذي، لكن إنتِ لازم تموتي لإن هنفضل بالفضحية دي العمر كله موتك أحسن.
صرخت: لا بالله عليكم… أنا بنتكم.
أنتوا المفروض تثقوا فيا أنا خوفت احكي ليكم عشان كنت عارفة مش هتصدقوني.
بصوا لبعض وبعدين ابويا دخل جوة وبقااا يتكلم مع امي ويقولها لازم نقتلها.
اول ما سمعت كدا.
هربت من البيت وأنا بموت… جريت، الألم بيقطعني لحد ما طلعت من المنطقة لكن فجاة… اتخبطت في عربية، فقدت الوعي.
صحيت لقيت واحدة صغيرة في التلاتينات، قالتلي: حمد لله على سلامتك… أنا آسفة، إنتِ اللي ظهرتي فجأة قدامي.
بصتلها وعيطت: عارفة… إنتِ مش ذنبك حاجة.
قالتلي: اسمك إيه؟
قلت: قمر.
ابتسمت وقالت: أنا نور… مهندسة.
ردت وقالت احكيلي ي قمر
بصتلها وقولت مينفعش أنا عاوزة امشي.
بصتلي بهدوء وقالتلي متخفيش احكيلي يمكن اساعدك.
حسيتها النجاة ليا بصتلها وعيطت وحكتلها كل حاجة.
ردت وقالتلي ياااه معقول لسه في عقليات كدا
لسه في أهل مش بيثقوا ف بنتهم
طب بصي على العموم أنتِ،
هتقعدي معايا، وهساعدك تاخدي حقك
البلد فيها قانون إحنا مش ف غابة وهجبلك حقكك من الزبالة اللي اسمه ياسر دا.
عدت شهور…وطول الشهور دي كانت بتجمع مني كل حاجة وكل كلمة واسكرينات واي تقرير من المستشفى وبعدين رفعت قضية ونور دعمتني.
النهاردة يوم المحكمة منتظرة لحظة العدل ل روحي وحياتي اللي دمرهم الحقير دا
وقفت بقوة… أهلي واقفين، وياسر جوه القفص.
القاضي نطق الحكم: 6 سنين.
ارتحت شوية… مش كتير، بس ناري بردت.
طلعت مع نور… حضنتني وقالت: مبروك يا قلبي.
حضنتها وقولتلها شكرًا.
وبصيت لقيت أهلي… قربت منهم وقلت: كل واحد عنده ابتلاء… ابتلائي كان فيكم إنتوا أم بلا رحمة، وأب شايف إن البنت دايمًا السبب أب ميعرفش يعني اي يحضن ولاده ويجبلهم حقهم من الوحوش اللي بتاكلنا عشان فاكرين مالناش سند تعرفوا أنا مش عاوزة أشوفكم تاني… كرهت وجودكم.
حاولوا يردوا… قلت: كفاية سمعت منكم واتوجعت كتير.
ومشيت… لأول مرة راسي مرفوعة.
رجعت البيت، كتبت قصتي على صفحتي… والناس اتقسموا: في اللي دعمني وقال إنتِ بطلة، وفي اللي لسه عايش بعقلية قديمة شايف إن البنت دايمًا السبب.
ساعتها فهمت إن السكوت هو اللي بيقتلنا، وإن الكلام هو اللي بينقذنا.
فعاوزة أقول لكل بنت: متخافيش من المجتمع اللي بيحاول يكمم صوتك إنتِ مش عار، إنتِ إنسانة ليكي حق تعيشي بأمان.
لو اتظلمتي، متسكتيش، لأن السكوت بيخلي الظالم يفتكر إنه أقوى صوتك هو قوتك، حتى لو الدنيا كلها ضدك.
افتكري إنك مش لوحدك، في ناس هتظهر في حياتك زي نور، يسندوك ويقفوا جنبك.
ولكل أم وأب: البنت مش شماعة تعلقوا عليها أخطاء غيرها.
البنت محتاجة حضن وأمان، مش ضرب واتهام.
الرحمة مش ضعف، الرحمة قوة اللي يغطي على الغلطان بيشارك في الجريمة لو بنتك وقعت في مصيبة، أول كلمة لازم تسمعها منك هي أنا جنبك، مش إنتِ السبب.
لأن كلمة واحدة ممكن تبني أو تهد إنسان.
الرجولة مش إنك تستغل ضعف بنت أو تهددها وتاخد منها اللي أنت عاوزة وتستغل ضعفها إنها بنت وتلعب على نقطة هتخاف متخليش لحظة شيطان تضيعك وخاف على بنات الناس زي أخواتك مهي دايرة وبتلف، واللي بتعمله بيترد اضعاف مهو ربنا هسيبك تتمتع لكن هيجي لحظة هيسحب منك كل حاجة وكدا رصيد الستر بتاعك خلص.
خليك راجل لإن الرجولة الحقيقية إنك تحمي، تصون، وتكون سند.
اللي بيهدد أو بيستغل، مش راجل… ده جبان.
المجتمع مش هيتغير لو فضلنا ساكتين القانون موجود، بس محتاج ناس تطالب بحقها.
يمكن كلمة منك تنقذ حياة حد، متستهونش بيها كلمة أنا جنبك ممكن تغيّر حياة إنسان بالكامل. افتكر إنك ممكن تكون سبب نجاة، وممكن تكون سبب هلاك… والاختيار في إيدك ياريت مش نيجي على البنت ونقول هي السبب الفساد زاد وانتوا مش معترفين بكدا عدم التربية والرقابة على ولادكم وصلتهم لمتوحشين بياكلوا ف اللي حواليهم والسكوت عن الحق وإن البنت لازم تتخلى عن حقها خلانااا نتعرض لابشع من كدا
بقااا القريب أول حد بياكل ف لحم قريبه اومال خلينا للغريب اي.
فالسكوت مش حل اللي بيقول خليها تعدي بيقتل روح، واللي بيقول العيب على البنت بيشجع الظالم. لازم نواجه، لازم نقول لأ، حتى لو الدنيا كلها ضدنا القوة مش إنك متتأذيش، القوة إنك تقومي بعد كل سقطة وتكملي.
وحشتوني يسكاكر
#تمتتتتتتتت
#شيطان_بشري
#مشاعر_كاتبة
#سهىٰ_طارق_استيرا
تمت