رواية نسيان مؤقت (كاملة جميع الفصول) بقلم ملك ابراهيم
_عربية كبده؟! هتشتغلي علىٰ عربية كبده يا نوران؟!.
_وفيها إيه؟! طالما هاكلها بالحلال يبقىٰ خلاص.. أُمي محتاجة علاج بالشيء الفلاني، وأبويا مـ.ـات وسابنا علىٰ الفيض الكريم، ممعناش غير الستر والصحة بس راحة البال لا...
كانت نوران بتتكلم وهي قاعدة بتحضر العِدة بتاعتها علشان تبدأ تنزل تشتغل.. بتبصلها بسنت وهي بتقولها بهدوء:-
_فيه شغل كتير يا نوران.. مش تنزلي وسط الحارة وتشتغلي بالشكل دا!...
_واللهِ يا بسنت إللي مش عاجبه يشرب من البحر وإللي بيستعر مني ميعش معايا.. بعد إذنك...
وبتقوم نوران من مكانها وهي بتدخل أقرب أوضة بتقابلها...
____________________
_ماما، عامله إيه دلوقتي؟!.
كانت نوران بتقعد على السرير قصاد والدتها وهيَ بتمسك إيدها.. بتبصلها بنظرات كلها حب وهي بتقول:-
_هكون ديمًا بخير طول ما إنتي في حياتي ينور عيني.. ربنا يديمك ليا يا حبيبتي..
_إحكيلي يا ماما.. هو بابا مـ.ـات إزاي؟!..
ملامح والدتها بتتغير وهيَ بيظهر عليها التوتر الكبير.. وبتبدأ تتكلم من تاني وبتقول:-
_مـ.ـات من عند ربنا يا حبيبتي، إدعيله بالرحمة ديمًا..
_ماشي يا ماما، مع إني حاسه إنك مخبيه عليا سر كبير بس هصدقك، المهم بتاخدي علاجك وبتاكلي كويس!..
_أيوه يا حبيبتي، ربنا يديمك لينا وميحرمناش منك أبدًا..
وقبل ما تتكلم نوران بتلاقي بسنت واقفه علىٰ باب الأوضه وهيَ بتقول بسُخريه:-
_ربنا يديمها ليكي يا ماما، وبسنت ربنا يمشيها صح!..
_إنتي ديمًا كلامك عامل زي الطوب! خفي يا بسنت شويه لإني أختك الكبيره، وإللي بتنزل في الشوارع كل يوم علشان تصرف عليكي.
_هه، ربنا يديمك يا، يا أختي يا كبيرة...
وبتمشي من قصادها وبتفضل نوران بتبص عليها بيأس إنها مش هتتغير أبدًا، بتمسح والدة نوران على شعرها وهي بتقولها:-
_بكره تعقل وتفهم إن محدش هيكون قريب منها غيرك يحبيبتي..
_يا رب ياماما، يا رب يهديها.. استأذنك أنا بقى علشان هنزل أستفتح اليوم وأشوف وربنا يرزق..
_ماشي يا حبيبتي، ربنا يرزقك يا رب!...
____________________
_يا رب صبحنا وربحنا يا رب..
كانت نوران واقفه وهي بتستعد لـ بداية اليوم... ولكن فجأة بتلاقي رجالة واقفين قصادها وفي وسطهم شخص يبان عليه إنه الكبير..
بتبصلهم نوران ونظراتها مليانه بالبرود وبتنزل من علىٰ العربيه وهي بتقول:-
_خير يا عطوه! عاوز إي على الصبح...
_عاوز كُل الخير، مش ناوية ترجعي يا بنت أكرم ولا إيه؟!.
_لا مش ناوية يا عطوه، شغل معاك أنا بطلت وخلاص خلصنا وفضيناها.. مشوفتش عربية الكبده الجديدة بتاعتي! أصل هاكلها بالحلال..
_إللي بيخرج برانا يا بنت أكرم إنتي عارفه نهايته إيه، فـ مترجعيش تشتكي من إللي جاي.
ولكن قبل ما ترد عليه نوران بتلاقي فجأة صوت صريـ.ـخ من الناس بيتبعه ميكروباص جاي من بعيد بسُرعة عاليه جدًا وبيدخل في عربية الكبده بتاعتها..
نظرات عينيها بتتحول من البرود للصدمه، بتلاقي السواق بينزل وهو وشه كله مليان بالأكل ومش قادر يتنفس..
بتقرب منه نوران وهي بتمسكه من هدومه وبتقول بصدمة ممزوجه بالغضـ.ـب:-
_نهار إللي خلفوك أبيض دا أنا مش هحلك إنهارده!!.
يُتبع!!...
ڪ/ملك إبراهيم