رواية مش حب عادي الفصل الثالث والعشرون 23 بقلم ملك ابراهيم
#الحلقة_23
#رواية_مش_حب_عادي
#الكاتبة_ملك_إبراهيم
بعد كام دقيقه عربية الاسعاف وصلت وشالوا سيف ونقلوه المستشفى.. وسيف خاف يقول ان رحيم اللي عمل فيه كده وقال انه عمل حادثه في عربية نقل والعربية هربت.
رواية مش حب عادي بقلمي ملك إبراهيم.
الساعة 5 بعد الفجر.
رحيم رجع قصر الجبالي.
دخل اوضته وكانت حبيبة لسه نايمه.
غير ملابسه بسرعه ونام جنبها علي السرير.. اخدها في حضنه وهي نايمه.. مسد على شعرها بحنان.. قبـّل جبينها وهو بيهمس لها: اللي يقرب منك او يفكر يخوفك.. هتكون نهايته على ايدي.
...........
صباح يوم جديد.
في المستشفى عند أنس.
دخلت الممرضة عواطف صاحبة ميادة وحبيبة.. كان معاها الأدوية اللي أنس هياخدها.
عبد الرازق كان نايم على الكنبه اللي في الغرفة بعمق.. فاتح بؤقه وصوت الشخير بتاعه عالي وأنس معرفش ينام طول الليل من صوته.
عواطف قربت من أنس وقالت بأبتسامة: صباح الخير.. عامل ايه دلوقتي؟
رد أنس بضيق: انا عندي صداع جامد.. مفيش حاجة تضيع الصداع ده؟
ردت عواطف: معلش هو ممكن من تأثير السم اللي دخل جسمك.
اتكلم أنس بغيظ وهو بيبص على ابوه وهو نايم بعمق وصوت الشخير بتاعه بيعلى اكتر: لا هو مش من تأثير السم انا عارف من ايه.
خفض صوته عشان ابوه ميسمعش وقالها: هو ينفع انا اخرج واسيبلكم الحاج هنا مكاني.
عواطف ضحكت وقالت وهي بتركب محلول في ايديه: وباقي العلاج بتاعك مين اللي هياخده ؟
بص على ابوه وهو نايم وفاتح بؤقه بعمق وقالها: فضيه في بؤق الحاج مش هيحس.
عواطف ضحكت وقالت: لا طبعا مينفعش لازم انت اللي تاخده.. وبعدين انت متوصي عليك توصيه جامدة.
أنس بدهشة: مين اللي موصي عليا؟
عواطف بأبتسامة: ميادة.. بنت خالة حبيبة مرات ابن عمك.. هي صحبتي وكلمتني الصبح بدري ووصتني عليك.. اي حاجة تحتاجها قول يا عواطف بس وهتلاقيني عندك.
أنس بص قدامه بابتسامة وهمس بشرود: الله.. زفته خايفه عليا ؟
صوت شخير ابوه ارتفع اكتر وخرجه من الحاله الرومانسية اللي كان فيها..
أنس زعق وقاله: كفايه يا حاج بقى! قوم يا حاج هو مين فينا اللي جاي يقعد بالتاني!
ابوه قام بفزع وهو بيبص حواليه وقال: في ايه..؟ ايه اللي حصل؟
أنس رد عليه بغيظ: في ايه بس يا حاج.. صباح الخير.
عبد الرازق بص حواليه وشاف الشمس منوره الغرفة.. سأل وهو بيتألم من ضهره بسبب نوم الكنبه الغير مريح: هي الساعة كام دلوقتي ؟ انا معرفتش انام طول الليل!
أنس فتح عنيه بصدمة وقاله: كل ده ومعرفتش تنام يا أبويا.. اومال لو كنت عرفت تنام كنت عملت ايه؟ كنت طيرتني برا الاوضه!
ابوه قام وقف وقاله بغيظ: ما هي خفة دم امك دي اللي عامله فيك كده! انا هروح اغسل وشي.
عواطف كتمت ضحكتها وقالتله: وانا كمان هروح اشوف شغلي.. ولو احتجت اي حاجة نادي عليا.
اتكلم أنس بسرعه قبل ما تخرج: استني بس.. انا عايز رقم ميادة عشان اكلمها اشكرها.
عواطف خرجت تليفونها وقالتله على الرقم وهو سجله على تليفونه.
عواطف خرجت من الغرفة وأنس ابتسم وهو بيسجل رقم ميادة علي تليفونه وسجلها
"زفتتي♥️"
وبعتلها رساله على الواتساب "صباح الفل على أحلى زفته في الدنيا.. شكرا على التوصيه.. أنس"
بعت الرساله وهو بيضحك وبيبص على التليفون ومستني الرد.
رواية مش حب عادي بقلمي ملك إبراهيم.
في بيت خالة حبيبة.
قامت ميادة من النوم ولقت رساله على تليفونها من رقم غريب.. اول لما قرأت الرساله ابتسمت.. وبعدين اضايقت وهمست بغيظ: برضه بيقول زفته!
و ردت على الرساله وهي متغاظه " زفته في عينك.
وقفلت التليفون بغضب و رمته على السرير وقامت وهي متعصبه وهمست: اكتر إنسان مستفز في العالم.
ووقفت قدام المرايا بتاعها وبصت لنفسها وابتسمت وقالت: بس دمه خفيف.
رواية مش حب عادي بقلمي ملك إبراهيم.
في قصر الجبالي.
حبيبة ورحيم صحيوا على صوت دق عالي على باب الغرفة بتاعهم.
حبيبة كانت نايمه في حضن رحيم.. قامت بفزع وبصت له وسألته بخوف: في ايه؟
رحيم قام بسرعه وفتح الباب.. لقى رباب قدامه وهي اللي كانت بتخبط.. سألها بقلق: في ايه يا رباب؟ أنس حصله حاجة ؟؟
عيون رباب كانت بتتحرك على جوه الغرفة ورحيم واقف قدامها .. عايزه تعرف حبيبة بتعمل ايه ولابسه ايه!
ردت وعيونها على جوه: جدي بيقولك احنا رايحين نشوف أنس في المستشفى.. هتيجي معانا ؟
رحيم بص لها بضيق وسيطر علي غضبه وقالها: يعني أنس كويس؟
ردت وهي بتبص على جوه: زي القرد.
حبيبة ظهرت قدامها من جوه الغرفة وهي بتقرب تطمن في ايه.
رباب اول لما شافتها شهقت وقالت بقرف: ايه الألوان الوحشه اللي هي لبساها دي!
حبيبة استغربت وبصت على نفسها بدهشة وبصت لـ رباب تاني وشافتها بتبص لها بقرف!
رحيم غمض عنيه بضيق و رد على رباب بنفاذ صبر: قولي لـ جدك روحوا انتم وانا هاجي بعربيتي.
رباب كانت بتبص لـ حبيبة بقرف ومش عجبها بيچامة حبيبة وقالت: حاضر هقوله.
رحيم دخل وقفل الباب.
رباب مشيت ورجعت على اوضتها وفتحت الدولاب بتاعها ووقفت تبص علي هدومها بألونها الغريبه وقالت بفخر: هي دي الوان العرايس.. لازم العروسة تبقي ملعلعه كده لعريسها وتلبس الالوان المزهزه دي.. مش لابسه لون العيانين ده!
واخدت فستان وحطته عليها قدام المرايا وهي بتقول بغرور: يا سلام يابت يارباب.. اللون الحمصي ده هياكل مني حته.
رواية مش حب عادي بقلمي ملك إبراهيم.
في أوضة رحيم وحبيبة.
حبيبة وقفت قدام رحيم وسألته بقلق: هو أنس كويس؟
رد رحيم بأبتسامة وهو بيقرب منها وبيحط أيديه على خدها بحنان: اه يا حبيبتي الحمدلله كويس.. انا هغير واروح اطمن عليه في المستشفى.. وعايزك انتي كمان تجهزي عشان هنروح مشوار مع بعض بعد المستشفى.
حبيبة سألته بدهشة: مشوار إيه ؟
رد بهدوء وهو بيتجه للحمام: هتعرفي لما نروح.
حبيبة بصت قدامها بدهشة وخدت لبس عشان تجهز هي كمان.
................
بعد ساعة وصلوا المستشفى.
رحيم وحبيبة.
اول لما دخلوا الاستقبال..
حبيبة اتفاجأت ان والدها ومراته موجدين في المستشفى وعمتها قاعده بتعيط.
بصت لـ رحيم وقالت بدهشة: دا بابا وعمتي هنا!
وقربت منها بقلق وهي بتسأل والدها: بابا.. ايه اللي حصل؟ بتعملوا ايه هنا؟
رحيم قرب منهم ورا حبيبة بخطوات هادية.
والد حبيبة رد عليها بقلق: سيف ابن عمتك عمل حادثه ونقلوه هنا.. بيقول ان في عربية نقل خبطته.
رحيم قرب من حبيبة وحط ايديه على كتفها بحمايه وقال ببرود: لا الف سلامة عليه.
حبيبة بصت لـ رحيم واستغربت..
وبصت لـ عمتها اللي كانت قاعده بتبكي ومستغربه الحادثه إللي حصلت لـ سيف فجأة.
اتكلمت نجاة مرات ابو حبيبة معاهم بفضول: وانتوا حصل معاكم ايه امبارح بعد ما الفرح باظ.. ؟
وبصت لـ حبيبة بشماته واضحه في عنيها وقالت: معلش بقى يا حبيبة انا وابوكي روحنا قبل ما نطمن عليكم ونعرف ايه اللي حصل.. اصل انتي عارفه ابوكي رجله بتوجعه ومش بيقدر يقف كتير.
حبيبة بصت لـ ابوها اللي واقف جنب عمتها وعيونها لمعت بالدموع.
رحيم قرب حبيبة ليه وأيديه على كتفها بحماية وبص لـ والد حبيبة وقاله ببرود: الف سلامة على رجلك يا عمي..
وبص لـ مرات ابوها وقال: متقلقيش على حبيبة.. والفرح اللي باظ يتعوض ويتعملها فرح اكبر منه..
وبص لـ حبيبة بحب وقال: بس هي تؤمر.. وكل اللي تؤمر بيه يجيلها تحت رجليها.
مرات ابو حبيبة اتجننت اكتر وبصت لهم بحقد وغل..
ووالد حبيبة حط وشه في الأرض.
رحيم مسك ايد حبيبة وقالهم: عن اذنكم.. والف سلامة على المريض بتاعكم.
واخد حبيبة ومشيو.
حبيبة كانت ماشيه جنبه وهي حاسه بقلبها بينطق بكل كلام الحب.. هو مش بس بقى مالي قلبها وعقلها.. هو مالي كل حياتها ومكتفيه بيه عن كل الدنيا والناس.
عواطف الممرضة اول لما شافت حبيبة جريت عليها وهي بتقول بحماس: حبيبة وحشتيني.
حبيبة سابت ايد رحيم وقربت من عواطف وحضنتها وهي بتقول بأبتسامة: انتي كمان وحشتيني اوي يا عواطف.
عواطف ابتسمت وهي بتهمس لها بهزار: بقولك ايه مش هسيبك قبل ما تقوليلي وقعتيه ازاي؟
حبيبة ضحكت وقالت لها بهمس: هو اللي وقعني.
عواطف بهزار: لا ما انا لازم اعرف السر.. انتي وبنت خالتك بتوقعوا ولاد الجبالي ازاي يا حبيبة اعترفي.
حبيبة بصت لها بدهشة: بنت خالتي!؟
ردت عواطف بهمس: الهانم كلمتني الصبح بدري توصيني على أنس الجبالي .. وهو خد رقمها مني عشان يشكرها.
حبيبة ابتسمت بدهشة وقالت: معقول ..!
وبصت وراها لقت رحيم مستنيها..
اتكلمت مع عواطف بسرعه: هبقى أكلمك تحكيلي كل اللي حصل.. سلام دلوقتي.
واتحركت من قدامها بسرعه وقربت رحيم ومسكت في ايديه..
رحيم ابتسم وهي ماسكه في ايديه وكملوا طريقهم.. قال بصوته الهادي: الممرضة دي كانت زميلتك هنا وانا عامل الحادثه.. صح؟
ردت حبيبة بهدوء: اه.
اتكلم رحيم بغيره خفيفه ظهرت في نبرة صوته: دي اللي اخوها بيشتغل محاسب في شركة الكهربا تقريبا وكانت عايزاكي تتجوزيه! ؟
حبيبة وقفت مكانها بصدمة وسألته بدهشة: انت عرفت منين الكلام ده؟
رد بهدوء وهو بيضغط على فكه بغيرة: لما كنت هنا في المستشفى وكنت عايزك تفكي الكانيولا من ايدي.. سمعتكم وانتوا بتتكلموا.
حبيبة ضحكت وقالت: الذاكره عندك ماشاءالله يا رحيم.. بس عموما هي كانت بتهزر معايا.
حبيبة اتحركت عشان تكمل الطريق لغرفة أنس لكن رحيم مسك ايديها ووقفها وهو بيبص لها وقال بمشاكسه: تعالي هنا.. ايه بقى الحضن اللي انتي ادتيهولها ده؟
حبيبة اتكسفت وقالت: حضن ايه يا رحيم دي بنت.!! وبعدين صحبتي ومشوفتهاش بقالي كتير!
رد هو بيحط أيديه على كتفها وبيكمل معاها الطريق: وانا جوزك وبغير.. هو السلام بالايد قصر معاكم في ايه؟
حبيبة ابتسمت بخجل وفجأة لقت بنتين من الممرضات بيقربوا منهم وهما بيقولوا بحماس: حبيبة.. وحشتينا.
رحيم بص لها وقال: لأ إحنا كده مش هنخلص.. انا لازم اخرج ابن عمي من المستشفى دي بسرعه.
وسابها تسلم علي زمايلها برحتها ودخل هو غرفة أنس.
اول لما دخل غرفة أنس.. لقى امال مرات عمه قاعدة قدام أنس على السرير وعامله فرخة مسلوقه وحلة محشي وعماله تأكل أنس غصب عنه ورباب واقفه جنبهم شايله تورمس شاي ومستنيه أنس يخلص فطار عشان يحبس بالشاي.
أنس شاور لـ رحيم عشان يلحقه وهو مش قادر يتكلم من كتر الأكل اللي امه بتحطه في بؤقه.
رحيم ضحك وقال: ايه ده كله يا مرات عمي.. تعبتي نفسك ليه.. المستشفى فيها أكل.
ردت مرات عمه وهي بتأكل أنس: هو أكل المستشفى دا ينفع! شوف وشه اصفر ازاي! لازم يحط في بطنه فرخه عشان تقويه.
رد أنس وبؤقه مليان أكل بالغصب: هو انا قايم من الولادة! انا مش قادر اتنفس.
اتكلمت امه مع رباب بسرعه: بت ادي لـ اخوكي كوباية شاي يحبس.
ردت رباب: انا نسيت اجيب كوباية...
وبصت لـ أنس وقالتله: افتح بؤقك يا أنس وانا هفضي فيه.
رد أنس بغضب: عايزه تفضي في بؤقي الشاي مغلي!.. يعني مموتش من السم اموت من المايه المغليه!
اتكلمت رباب ببساطه: المايه المغليه هتطهر معدتك وتخليك تقوم تتنطت زي القرد.
أنس زعق فيها بعصبيه: دا انا هقوم اتنطت فوق دماغك دلوقتي يا رباب.. مشو البت دي من قدامي.
دخل الدكتور واتكلم بهدوء: صباح الخير.. إيه الزحمه اللي في الاوضه دي يا جماعة؟! وايه ريحة الاكل دي.
ردت ام أنس بفخر: دا المحشي بتاعي يا دكتور.. ريحته بتجيب اخر الدنيا.
اتكلم الدكتور بدهشة: ياستي تسلم أيدك.. بس المحشي ممنوع دلوقتي.. هو لسه معدته متضرره من السم اللي دخل جسمه!
ردت ام أنس بثقة: وهو المحشي هيضر معدته في إيه يا دكتور! دا انا بأكله محشي وهو عمره أسبوع لحد ما بقى قد البغل قدامك اهو.
أنس اتكلم بضيق: يا جماعة انا اتهزقت في المستشفى دي بما فيه الكفايه.. يا جدي.. عشان خاطري خدهم ومشيهم من هنا.. وخد ابويا معاكم.
ابوه قام وقف وقال بزعيق: بقى دي أخرتها بعد ما سهرت جنبك طول الليل! .. تقوله يا جدي خد أبويا معاكم!.. اما انت صحيح بغل على رأي امك.
رحيم ضحك وقالهم: خلاص يا عمي متزعلوش.. ارجعوا البيت انتوا وانا هجيب أنس البيت معايا وانا راجع.
خرجوا من الغرفة وأنس اتنهد براحه وهو بيشم نفسه أخيرا وقال: حتى الهوا بقى ريحته محشي!
اتكلم الدكتور وهو بيضحك: المستشفى كلها بقت ريحتها محشي.. ربنا يخليلك الحاجة.. بس اللي حصل دا مش لازم يتكرر تاني والفترة الجايه هتمشي علي انواع اكل معينه لحد ما المعده تتشافي بالكامل.
ومسك الدكتور قلم وكان في ملف في ايديه وقاله: في كام سؤال عايزه اسأله على ما نتيجة التحاليل تظهر..
وبص في الورقه وهو بيكتب وسأله: انت بتتعاطى او بتشرب اي حاجة؟
أنس بص للدكتور بصدمة وبص لـ رحيم لقاه بيضحك ..
رد أنس بقلق: حاجة زي ايه يا دكتور؟
رحيم اتكلم وهو بيضحك: لبن مثلا! من اللي انت بتشربه قبل ما تنام؟!
أنس بص للدكتور وهو مصدوم ومش عارف يرد..
الدكتور فهم وضحك وقاله: المهم اي حاجة كنت بتشربها من الحاجات دي لازم تتوقف.. معدتك مش هتستحمل اي حاجة
دخلت حبيبة في اللحظة دي واتكلمت بهدوء: السلام عليكم..
الدكتور اول لما شاف حبيبة ابتسم بسعادة وقال بحماس ظهر في نبرة صوته وهو بيقرب منها: حبيبة!!.. مش معقول... بقلمي ملك إبراهيم.
... يتبع
ياختاااااي🙆🙆😂 سلم من بعيد يا دكتور🏃😂
شكلنا هنحجزلك سرير جنب سيف في قسم العظام 🤝😂
الاوضه هتـو🔥لع بـ أنس والدكتور دلوقتي 😂