رواية مش حب عادي الفصل الخامس عشر 15 بقلم ملك ابراهيم
#الحلقة_15
نجاة لمست الطقم الالماظ بـ أيديها وهي مش مصدقه.. بريق الالماظ كان بيلمع جوه عنيها اللي مليانه حقـ ـد وطمـ ـع..
اتكلم سيف بصوته الحاد وهو بيراقب لهفتها علي الطقم: بس انتي عارفه ان الطقم دا تمنه غالي.
ايديها اتجمدت فوق الطقم وبصت لـ سيف بصدمة وقالت: بس انا مش معايا تمنه.. انت عارف ظروف خالك!.
رد سيف ببرود: الطقم دا مش تمنه فلوس.. تمنه حاجة اغلى بكتير.
نجاة بصت له بفضول..
كمل كلامه وقال: تمنه حبيبة.
نجاة بصت له بدهشة وقالت: حبيبة بنت جوزي؟
رد سيف: مفيش حبيبة غيرها.
نجاة بلعت ريقها بخوف وقالت: بس حبيبة اتجوزت.. وجوزها..
قاطعها سيف بصوت عالي وتحذير: مش عايز اسمع كلمة عن جوزها.. اللي انا هقولك عليه تنفذيه من سكات.. دا لو انتي عايزه الطقم الالماظ اللي في ايدك دا.
نجاة بصت للطقم الالماظ وبصت لـ سيف وقالت: انا تحت امرك.. عايزني اعمل ايه بالظبط ؟
ابتسم سيف بثقة وقالها: كده تعجبيني.. اسمعيني بقى كويس وافهمي اللي هقوله.
..........
عند رحيم وحبيبة.
في مطعم راقي.
حبيبة كانت قاعده قدام رحيم وهو بيتكلم وهي بتبص له وعيونها متثبته عليه .. عيونها كانت بتظهر قد ايه بتحبه ومعجبه بيه وبكلامه وبطريقته وصوته اللي بيخطف قلبها.
رحيم كان ملاحظ نظراتها وشرودها معاه وهو بيتكلم.. ابتسم وقال: تعرفي ان انا بحب نظرة عيونك ليا اوي.
حبيبة اتكسفت وقالت: نظرة ايه؟
رحيم قال: وكسوفك وخدودك اللي بتحمر من اي كلمة بقولها.
حبيبة بعدت وشها في الاتجاه التاني وهي مكسوفه منه اكتر وبتحاول تخبي خجلها منه.
رحيم ابتسم وقالها: حابب ان كل مشاعر الحب بعيشها معاكي لأول مرة.
حبيبة بصت له وسألته بخجل: يعني ان انت عمرك ما حبيت قبل كدا؟
رد بصدق: لأ.. وعمري ما تخيلت اني احب.. بس انتي غيرتي كل حاجة.. غيرتي كل تفكيري ومشاعري.
بصت له بحب وقالت: وانا كمان.. كل حاجة بعيشها معاك لأول مرة.. حاسه ان انا بتغير من جوايا.
رحيم سألها بفضول: طب ليه دايما خايفه نقرب؟؟
حبيبة بصت قدامها بحزن وبدأت تحكيله عن خوفها من الحب.. عن علاقة ابوها القـ ـاسيه مع امها وهي مريضه.. خوفها انها تعيش نفس اللي امها عاشته.
رحيم كان بيسمعها وقلبه موجوع عشانها! كان نفسه يحكيلها ان مش هي بس اللي جواها جرح من الطفوله!..
هو كمان جواه جرح وانتقام وسر كبير مخبيه في قلبه.. كان فاكر ان مفيش مكان في قلبه للحب.. خايف الحب يقضي على القسوة اللي شايلها في قلبه عشان ينتقم.
حبيبة لاحظت شروده وعلامات غضب وقسوة ظهرت علي وشه وكأنه افتكر حاجة ضايقته!
حبيبة سألته بقلق: رحيم انت كويس ؟
رد رحيم بهدوء: اه كويس.. خلينا نرجع البيت.
حبيبة هزت راسها بالايجاب وخرجوا من المطعم.
ركبوا العربية ورحيم كان بيبص قدامه وساكت..
وحبيبة بتبص عليه ومستغربه انه اضايق فجأة ومش فاهمه إيه إللي حصل!
رواية مش حب عادي بقلمي ملك إبراهيم.
عند أنس.
كان واقف قدام عربيته وساند على العربية وهو بيـشرب سيـ ـجارة مع واحد صاحبه.
اتكلم صاحب أنس: انت كنت فين الغيبه دي كلها مختفي.. دا الايام اللي فاتت راحت عليك كام سهرة بس ايه.
رد أنس هو بيشرب السيـ ـجارة: جدي مركز معايا الايام دي وابويا قرفني في عشتي!
فجأة شاف ميادة بنت خالة حبيبة وهي خارجة من الصيدليه.. وشكلها بقت بتشتغل في الصيدليه دي بعد ما طردوها من المستشفى.
أنس رمى السيـ ـجارة علي الارض وقال صاحبه: بقولك ايه.. امشي انت وانا هبقى اكلمك.
صاحبه استغرب وقبل ما يقول اي كلمة.. لقى أنس اتحرك من قدامه بسرعه وهو بيقرب من البنت اللي خرجت من الصيدليه.
ميادة كانت ماشيه في طريقها عشان ترجع البيت..
سمعت صوت حد من وراها بينادي عليها.
أنس: اسمعي ياااا.. يا قريبة حبيبة.
ميادة وقفت واتفاجأت لما لقت اللي بينادي عليها أنس الجبالي..
أنس وقف قدامها وقالها: انتي قريبة حبيبة صح؟ انا فاكر اني شوفتك في المستشفى.
ردت ميادة بتوتر: اه انا.. خير؟
أنس بص لها من فوق لـ تحت بنظراته اللي بتضايق البنات المحترمة منه.
ميادة بصت له بضيق وكملت طريقها.
أنس اتحرك وراها بسرعه واتكلم وهو ماشي قريب منها: انتي مشيتي ليه.. احنا لسه بنتكلم.
ردت عليه ميادة وهي ماشيه من غير ما تبص ناحيته: إحنا مفيش بينا كلام عشان اقف معاك اتكلم.
أنس اتكلم بدهشة: هما بنات عيلتكم كلهم كدا؟
ميادة وقفت وقالت بعصبيه: كدا ازاي؟
رد أنس وهو بيبصلها: كلهم حلوين كدا.
ميادة اتكسفت وبصت قدامها وكملت طريقها.
أنس وهو ماشي جنبها: طب انتي اسمك ايه؟
ردت ميادة بضيق: اسمي زفته.
اتكلم أنس: الله.. أسم حلو اوي ولايق عليكي.
ميادة وقفت وبصت له بصدمة وقالت: لايق عليا أسم زفته؟؟
رد ببساطه: زعلانه ليه!.. انا كمان أبويا بيناديني يا زفت ومش بزعل عادي.
ميادة هزت راسها بدهشة وسابته ومشيت.
أنس نادى عليها وهي ماشيه قدامه: يا زفته..
ميادة لفت تبص له بضيق وغضب.
ضحك وقالها: قوليلي اسمك الحقيقي احسن.
ردت بضيق: ملكش فيه.
هز راسه وهو بيبتسم وقالها: اسمك ملكش فيه!! لا انا عجبني زفته اكتر.
ميادة اتعصبت عليه وقالت: على فكرة انت بارد.
أنس ضحك وقالها: وعرفتي إسمي دا كمان! دا انا جدي مش بينادي عليا غير لما يقولي يا بارد!!
ميادة ضغطت على ايديها بعصبيه وغيظ ومشيت وسابته.
أنس قال وهو واقف مكانه بيضحك: خليني أشوفك تاني يا زفته.
ميادة مشيت ومردتش عليه.
همس أنس وهو واقف يبص عليها: حلوة زفته.. ومختلفه.
رواية مش حب عادي بقلمي ملك إبراهيم.
صباح يوم جديد.
في شقة خالة حبيبة.
عطيات خالة حبيبة فتحت الباب ولقت نجاة مرات ابو حبيبة هي اللي بتخبط.
عطيات استغربت واستقبلتها جوه.
دخلت نجاة وقعدت وهي بتتكلم بطريقتها اللي كلها تمثيل ومكر.
قالت لـ خالة حبيبة ان ابو حبيبة باعت لـ بنته فلوس عشان تشتري جهازها من ملابس الجواز ومش عايز حبيبة تعرف ان الفلوس من ابوها.. وطلبت من خالة حبيبة انها تكلم حبيبة وتطلب منها تجيلها وتديها الفلوس دي عشان تروح تشتري اللي ناقصها ومتعرفش حبيبة ان دي فلوس ابوها.
خالة حبيبة استغربت لكن نجاة اقنعتها ان ابو حبيبة هياخد مهر كبير من العريس والفلوس دي اقل كتير من اللي حبيبة تستحقها..
وقالت لها ان حبيبة لازم تشتري ملابس جديدة وغاليه تشرفها قدام عيلة جوزها الاغنيا.
خالة حبيبة صدقتها للأسف.
ونجاة مشيت بعد ما قدرت تقنعها انها تبعت ميادة مع حبيبة يشتروا ملابس جديدة ويعملوا مفاجأة لـ حبيبة.
ميادة صحيت من النوم بعد ما نجاة مشيت..
عطيات حكت لـ بنتها اللي حصل وكانوا مصدقين ان نجاة عايزة مصلحة حبيبة وقرروا يفاجئوا حبيبة..
وميادة بعتت رساله على الواتساب لـ حبيبة تقولها انها عايزه تشتري فستان تحضر بيه الفرح وطلبت منها تروح معاها..
َوميادة كانت عايزة تشوف حبيبة لوحدها برا البيت عشان تحكي لها عن اللي أنس عمله إمبارح.
رواية مش حب عادي بقلمي ملك إبراهيم.
في غرفة رحيم وحبيبة.
صحيت حبيبة علي صوت رسالة من موبايلها.
رحيم كان لسه نايم على الكنبه.
فتحت الرسالة ولقتها من ميادة..
ردت عليها وقالت لها انها هتسأل رحيم ولو وافق هتروح معاها.
قامت من علي السرير وكان رحيم لسه نايم.
قربت منه وبصت عليه..
ملامحه هاديه وهو نايم..
قادر في كل حالاته يخطف قلبها..
رفعت ايديها بهدوء ولمست شعره..
حاسه وكأن قلبها بينطق أسمه مع كل دقه.
خافت يصحى ويشوفها وهي بتبص له بالطريقه دي.
بعدت عنه ودخلت على الحمام عشان تغير ملابسها.. دي اول مرة تصحى قبله.
اول لما دخلت الحمام رحيم فتح عنيه وابتسم..
حط أيديه علي شعره مكان لمسة ايديها..
قعد على الكنبه وهو فرحان.. كان حاسس بيها من اول لحظة صحيت فيها ولما قربت منه.. نظرات عيونها اللي كلها حب وهي بتبص له..
مثل النوم عشان متتكسفش وتبعد عنه..
كان مستمتع بقربها ولمسة ايديها..
اتمنى لو كان يقدر يفتح عيونه وميبعدهاش عنه ابدا.
بعد شويه حبيبة خرجت من الحمام واتفاجأت لما لقت رحيم صاحي.
قربت منه وقالت: صباح الخير.
رد رحيم وهو بيبص لها ويبتسم بحب: صباح الورد.
حبيبة اتكسفت وقالت: كنت عايزة اخرج النهاردة مع ميادة بنت خالتي.. عايزة تختار فستان تحضر بيه الفرح.
رحيم ضحك وقالها: والعروسة مش هتختار فستان الفرح؟
حبيبة اتكسفت وقالت: مش عارفه.. انا مفكرتش في فستان الفرح!
رد رحيم: بس أنا فكرت.. لما تخلصي مشوارك مع بنت خالتك.. هنروح انا وانتي عشان تختاري فستان الفرح.
حبيبة ابتسمت وهزت راسها بالايجاب.
رحيم دخل الحمام يغير ملابسه وحبيبة وقفت تظبط حجابها قدام المرايا..
بعد شويه رحيم خرج من الحمام وازرار القميص بتاعه مفتوحه.. وقف قدام المرايا جنب حبيبة وهو بيقفل أزرار القميص.
حبيبة اول لما شافت عضلات صدره البارزه في انعكاس صورته قدامها في المرايا.. خفضت وشها بسرعه وهي مكسوفه وغصب عنها شكت صابعها بدبوس الطرحه ونطقت بصرخه: ااااه.
رحيم اتخض عليها وساب ازرار القميص بتاعه مفتوحه وقرب منها يطمن عليها..
مسك ايديها وهو بيسألها بقلق: ايه اللي حصل؟
حبيبة بصت له وهي مش قادرة تنطق وكانت مكسوفه منه اوي.
ردت بصوت مبحوح: شكيت ايدي بالدبوس غصب عني.
رحيم قرب ايديها من شفايفه وقبّلها برقه وقالها: معلش يا حبيبتي.
حبيبة خفضت وشها بخجل وقالت بصوت يشبه الهمس: انا خلصت لبس.. هنزل استناك تحت.
رد رحيم بسرعه: لا استني هننزل مع بعض.. وقفل ازرار القميص بتاعه بسرعه واخد الچاكيت وقالها: السواق هيوصلك للمكان اللي هتشتروا منه وهيكون معاكم بالعربية لحد ما تخلصوا برحتكم.
حبيبة هزت راسها بخجل.
فتح درج وخرج منه فلوس وكارت بنك وقالها: خدي دول معاكي.
ردت حبيبة بتوتر: لا انا مش عايزه فلوس.. وبعدين ميادة اللي هتشتري مش انا.
اتكلم رحيم بنبرة صوت جادة: انتي مراتي يا حبيبة ودي فلوسنا.. اشتري اي حاجة تعجبك.
حبيبة بصت له بحب.
لمس خدها وقال بنبرة صوت فيها مشاكسه: يلا ننزل.
مسكت في ايديه ونزلوا مع بعض وهي الفرحة ماليه قلبها بحبه.
رحيم وصلها لحد العربية ووصى السواق عليها وفضل واقف لحد ما العربية اتحركت وهو بيبص لها وحاسس ان قلبه مش مرتاح وهي بتبعد.
ركب عربيته هو وكمان واتحرك علي المكتب.
........
بعد ساعة.
حبيبة وميادة كانوا في العربية.
في طريقهم لمول كبير برا البلد.
ميادة كانت قاعده بتتكلم مع حبيبة ومتوتره وعايزها تحكيلها علي اللي أنس عمله بس مكسوفه تحكي لـ حبيبة.
فجأة ظهر 3 عربيات وقفلوا عليهم الطريق.
السواق وقف بسرعه وحبيبة وميادة صرخوا بخوف..
اخر حاجة افتكرتها حبيبة انها شافت واحد ملثم بيفتح باب العربية من جنب السواق..
وفجأة ظهر واحد من جنبها وواحد من جنب ميادة و رشوا في وشهم مخدر..
آخر كلمة حبيبة نطقتها كان إسم رحيم.
............
بعد ساعتين.
في مخزن مهجور.
حبيبة كانت قاعده على كرسي وايديها مربوطين من ورا ضهرها.. وفي شريط اسود على عيونها.
فاقت على صوت بنت بتصحيها وبتقولها: حبيبة.. فوقي.
حبيبة اتكلمت بخوف: انتي مين؟.. انا فين؟
ردت البنت وهي بتبص لـ سيف المنصوري اللي كان واقف ورا حبيبة ومطمن انها مش شايفاه ولا حاسه بوجوده.. ومستحيل تتخيل ان هو اللي خطفها.
شاور للبنت اللي تبعه عشان تتكلم مع حبيبة.
البنت اتكلمت وقالت لـ حبيبة: انتي طبعا متعرفيش انا ابقى مين!؟
حبيبة اتكلمت بخوف وهي مش عارفه تفتح عنيها بسبب الشريط الاسود اللي عنيها.. كانت خايفه ومرعوبه ومش فاهمه إيه اللي حصل.. اتكلمت مع البنت بخوف: معرفش انتي مين.. ومعرفش اي حاجة.. هو انتوا خطفتوني ليه ؟؟
ردت البنت بعد ما شافت اشارة سيف لها: انتي مش مخطوفه.. انا جبتك هنا عشان اخد حقي من الراجل اللي ضحك عليا.. عشمني بالجواز ولما عرف اني حامل منه.. طلقني وقـ ـتل الطفل اللي في بطني قبل ما اشوفه.
حبيبة اتكلمت بخوف: انا معرفش انتي بتتكلمي عن مين!!
ردت البنت وهي بتبص لـ سيف : متعرفيهوش ازاي وانتي متجوزاه.. الراجل اللي بتكلم عنه دا يبقى رحيم الجبالي.. ومعايا صور لينا مع بعض وكل الرسايل اللي كانت بينا.. شكلك مش مصدقه ؟؟ ليكون قدر يخدعك انتي كمان زي ما عمل مع كتير قبلك.
ردت حبيبة بصدمة: مستحيل اصدق الكلام دا! انتي كدابه.. فكي البتاع اللي على عيني دا عشان أشوفك.
ردت البنت: مينفعش تشوفيني.. لأن انا قريبه جدا من رحيم ولو عرف ان انا قولتلك الحقيقيه هيقتـ ـلني.
حبيبة اتكلمت بصراخ: وانتي عايزة مني انا ايه؟
سيف شاور للبنت وهي فهمت الاشارة.
حطت مسدس فاضي على دماغ حبيبة وقالت لها: عايزة أخد منك حق كل البنات اللي خدعهم... بقلمي ملك إبراهيم.
... يتبع
سيف المنصوري بيلعب على تقيييل😱😱 طبعا هيمثل دور الفارس المنقذ اللي هينقذ حبيبة من اعداء رحيم المخادع🤔😂😂
تفتكروا حبيبة هتصدق خطتهم دي لما تشوف الصور بتاع البنت مع رحيم😱