سكريبت خناقة قبل المغرب (كامل) بقلم هاجر صقر
• حاسب يا أستاذ.. السلم هيقع بيك وتيجي على بوزك، ونفطر عليك النهاردة بدل البط!
• عمر (بيلف وشه وهو ماسك سلك النور بسنانه) جرا إيه يا آنسة مريم؟ إنتي مابتفصليش؟ ده أنا قولت رمضان جه والناس بتهدى، إنتي لسانك زاد طوله شبرين مع الصيام!
• لسان مين يا أمور؟ أنا خايفة على الزينة اللي بقالنا أسبوع بنجمع تمنها، تقوم إنت بوقفتك دي تقطع السلك وتظلم الشارع، وساعتها مش هيفطروا عليك وبس، ده إحنا هنعلقك مكان الفانوس!
• عمر (بينزل من على السلم وبيمسح ايده في بنطلونه) طب تعالي بقى يا "ست العارفين" علقيها إنتي، وريني الشطارة.. ولا إنتي فابريكة كلام وبس؟ وبعدين ريحة المحشي اللي طالعة من عندكم دي خلتني مش شايف السلك من الفيشة، ارحمونا شوية!
• محشي؟ إنت شميت؟ ده أنا لسه مسبكة الصلصة! وبعدين إنت مالك ومال محشينا؟ روح خلي "طنط" تعملك شوربة خضار عشان "الاستجمام" بتاعك يكمل وأنت صايم.
• عمر (بيضحك وهو بيقرب تحت بلكونتها) طنط تعبانة، وأنا شكلي هفطر النهاردة "تمرات" وأنام.. بس عادي، فدا الشارع وزينة الشارع.
• مريم (بترفع حاجبها وبتقول بصوت واطي بس مسموع) يا عيني.. هيفطر تمرات! ده إنت غلبان أوي يا عمر.. طب استنى هنا، ماتتحركش من مكانك.
• عمر (بيستغرب) رايحة فين يا مجنونة؟ المدفع هيضرب!
(بعد خمس دقايق مريم بتنزل سبت من البلكونة بحبل، وفيه علبة محكمة الإغلاق ولفافة فيها قطايف سخنة).
• خدي يا سيدي.. ده محشي ورق عنب، والقطايف دي أنا اللي حاشياها بإيدي، عشان بس ما تقعدش تتهجى علينا وتقول "جيراني سابوني جيعان".
• عمر (بيفتح العلبة بذهول وابتسامة عريضة) إيه ده؟ ده بجد؟ ولا حاطة لي فيها شطة عشان تخلصي مني؟
• شطة في عينك! كل وإنت ساكت، وبكرة ترجع العلبة مغسولة وناشفة، وإلا والله ما هتشوف مني "بلحة" واحدة في العيد!
• عمر (بيقف قدام البلكونة وبيبصلها بحب) تسلم إيدك يا مريم.. بس بقولك إيه، العلبة دي مش هترجع فاضية.
• (بتحط إيدها في وسطها) وهترجع فيها إيه إن شاء الله؟ بقايا السلك اللي قطعته؟
• لا، هترجع فيها "دبلة".. أصل بصراحة المحشي ده محتاج حد يآكله كل يوم، وأنا قولت أدبس نفسي فيكي وفي لسانك ده عشان أكسب ثواب في رمضان.
• مريم (وشها بيحمر وبتمسك طرف الطرحة بخجل) دبلة؟ إنت صايم يا عمر وأكيد مهبط، روح أفطر وشوف بتقول إيه!
• صايم والله وصاحي وبقولك إني بحبك من رمضان اللي فات، بس كنت مستني أشوف "نفسك" في الأكل، مش بيقولو أقرب حاجة لقلب الراجل معدته ههههه وطلع مالوش حل.. ها؟ أكلم بابا بعد التراويح؟
• (بتضحك وبسرعة بتسحب السبت لفوق) لما نشوف.. لو المحشي عجبك، ممكن أفكر.. ولو العلبة رجعت ناقصة صباع واحد، هرفضك!
• (بيضحك بصوته كله والمدفع بيضرب) الله أكبر! ده أنا هاكل الصوابع والعلبة كمان! رمضان كريم يا مريم.
• (بابتسامة رقيقة) الله أكرم يا عمر.. يلا روح افطر بقى وبطل غلاسة!
تمت بفضل الله
بقلمي هاجر صقر
#خناقه-قبل-المغرب
تمت