رواية ما بين حضنين الفصل الخامس 5 بقلم امل صبري
خالد بص ناحيه البوابه و وقف مكانه كأن الزمن رجع بيه سنين لورا وقال
: اي دا
حور بصت نفس اتجاه م باصص ابوها وهي مش فاهمه
حور: في ايه
خالد مردش عليها واتقدم خطوات لقدام ناحيه وحدة
خالد: نهى؟
نهى ابتسمت ابتسامه بسيطة فيها صدمه: خالد ازيك
خالد: انا الحمد لله... انتِ عامله ايه؟
نهى: الحمد لله بخير
نهى بصتله شويه وقالت: شكلك متغيرش كتير يا خالد
خالد ابتسم ابتسامة خفيفة: الزمن بيغيرنا كلنا
نهى: بس واضح إنك لسه زي ما انت
خالد: وانتي كمان… مفيش حاجة اتغيرت فيكي
نهى ضحكت ضحكة خفيفة: لا اتغيرت كتير… بس يمكن انت مش شايف
خالد سألها: انتي عايشة هنا بقالك قد ايه؟
نهى: بقالي سنة تقريبًا
خالد اتفاجئ: سنة؟!... يعني كنتِ قريبة كدا وأنا معرفش؟
نهى: الدنيا صغيرة يا خالد… بس ساعات بتخلينا نبعد عن ناس كنا فاكرين إننا عمرنا ما هنفارقهم
خالد سكت شوية وبعدين قال بهدوء:
الدنيا مش دايمًا بتمشي زي ما احنا عايزين
نهى بصتله نظرة فيها معنى:
ايوه… بس برضو في حاجات لو كنا تمسكنا بيها كانت ممكن تفضل
خالد حس إن الكلام بقى تقيل بص على الي جمبها لقي ولد صغير بصلها وقالها
: دا ابنك؟
نهى: لا دا مالك ابن ناديه اختي بس هي هناك اهي جايه
وبصت لحور وابتسمت: دي بنتك؟
خالد: اه حور
حور كانت واقفه مش فاهمه حاجة بس واقفه تتفرج
جت ناديه: مساء الخير..
بصت لنهى وهمستلها: مين؟
نهى: دا خالد
ناديه: آه... ازيك ي خالد
خالد: الحمد لله
حور كانت متابعه نظرات نهى وخالد الغريبه وبصت لخالد
: طب يلا ي بابا نروح
خالد: اه يلا ي حببتي.. عن اذنكو ي جماعه
ناديه: اتفضل
ناديه لـ نهى: هو ايه الدنيا
نهى: ايييه.. ناديه الراجل بنته ف ايده اسكتي
اللهم صلّ على محمد♡
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
عند خالد وحور
حور بصت لخالد: هي دي نهى الي كانت ف الصورة؟
خالد اتنهد: اه هي
حور: انا حسيت برضو شبهت عليها...
ضحكت وكملت: بس طلعت حلوة
خالد: طب يلا عشان نروح... قولتي لماما انك هتباتي معايا؟
حور: اه انا اصلا جبت هدوم المدريه معايا وسبتها هناك
خالد هز راسه وحرك العربيه و مشيوا
بعد ما روحوا حور كانت قاعدة على السفرة بتذاكر، ورفعت عينيها لقت خالد واقف في البلكونة ساكت وباصص للشارع كأنه سرحان
قامت راحتله وقالت:
حور: بابا… انت واقف هنا بقالك كتير
خالد اتخض واتلفتلها بسرعه: ها؟… اي ي حببتي في حاجة؟
حور بصتله شوية وقالت بنبرة فيها فضول
: انت لسه بتفكر في نهى صح؟
خالد سكت لحظة وبص بعيد
حور كملت:
حور: اصل انا اول مرة اشوفك كدا
خالد ابتسم ابتسامة خفيفة وقال:
في ناس يا حور… مهما السنين عدت… لما بنشوفهم بنفتكر حاجات كتير
حور: كانت مهمة اوي في حياتك؟
خالد حاول يغير الموضوع: ما تروحي تذاكري وبلاش رغي
حور ضحكت عليه:
حاضر انا كدا كدا رايحه انام... تصبح على خير
لا حول ولاقوة الابالله ♡
ـــــــــــــــــــــــــــــــــــــــــــــــــــــــــــــــــــــــــــــ
تاني يوم ف المدرسه
ياسمين: حور حور انتِ يبت
حور: اييه في ايه
ياسمين: شوفتي سارة؟
حور: لا مالها
ياسمين: قاعدة هناك بتعيط والبنات ملمومين عليها ولما سألتهم مالها وحدة قالتلي ان باباها ومامتها انفصلوا والموضوع انتشر والمدرسه كلها عرفت
حور سكتت
ياسمين: اييه سكتي ليه
حور: على فكرة صعبت عليا
ياسمين: هو ايه الي صعبت عليكي انتِ مش فاكرة عملت ايه!
حور: عشان انا حاسه بيها... ومحدش هيحس بيها غير الي اتحط ف الموقف دا
ياسمين: هي فعلا شكلها يقطع القلب
سبحان الله ♡
ـــــــــــــــــــــــــــــــــــــــــــــــــــــــــــــــــــــــــــــــــــــــ
بعد المدرسه وحور طالعه عشان تروح
سمعت صوت من وراها: حور حور
لفت للصوت لقت سارة
سارة: حور... حور انا كنت عاوزة اعتذرلك.. انا فعلاً حسيت بيكي لما اتحطيت ف الموقف.. الدنيا فعلاً دوارة... انا بجد اسفه
حور ابتسمتلها: حصل خير يا سارة
سارة: بجد؟... يعني مش زعلانه
حور: لا خلاص
سارة حضنتها: شكرا بجد
حور: على ايه بس احنا اخوات يا سارة
الحمد لله ♡
ـــــــــــــــــــــــــــــــــــــــــــــــــــــــــــــــــــــــــــــــــــــــــ
بعد فترة من الاحداث دي مروة وافقت على مصطفى واتجوزوا عملوا كتب كتاب على الديق كدا وندى كمان اتجوزت طارق.
وحور زي م هي شويه عند باباها وشويه عند مامتها وبنت مصطفى (ريناد) عايشه مع باباها ومروة ولكن علاقتها هي وحور مش احسن حاجة
في المدرسه
ياسمين لحور: بقولك اي هو مش انتِ و ريناد عايشين مع بعض ف نفس البيت
حور: اه لما ببقى عند ماما بشوفها.. بس مبنتكلمش مع بعض
ياسمين: بحسها غريبه اوي
حور: لا والله بحسها غلبانه جدا هي بس مش متعودة عليا ولا على ماما... وتقريبًا كدا معندهاش صحاب
ياسمين: هي اصغر مننا بسنة ولا اتنين؟
حور: لا سنة وحدة
ياسمين: طب ما تروحي تكلميها اهي قاعدة هناك
حور بصت عليها وقامت راحتلها
حور: ازيك يا ريناد
ريناد بصتلها ومردتش
حور قعدت جمبها: على فكرة احنا زي بعض
ريناد بصتلها
فحور كملت: اه زي بعض م انا مامتي برضو متجوزة ومبقتش اه زي الاول اكيد بس انا عارفة انها بتحبني واكيد عمو مصطفى بيحبك اوي برضو... لازم نتعايش مع الوضع... اكيد مش هنفضل عايشين مع بعض و منعرفش عن بعض غير اسامينا بس.. يمكن نبقى صحاب.. بصي انا موجودة ف اي وقت"شاورتلها على ياسمين"وبقعد هناك على طول.. لو احتاجتي حاجة انا موجوده
من بعد الموقف دا وحور وريناد فعلا بقيو صحاب جداا ودايما مع بعض
وف يوم حور كانت قاعدة بتذاكر، وريناد قاعدة جنبها
ريناد قالت فجأة:
على فكرة… انا كنت فاكرة إنك مش بتحبيني
حور بصتلها باستغراب: ليه بس؟
ريناد: معرفش… حسيت إنك متضايقة إني عايشة مع مامتك
حور هزت راسها:
لا خالص… انا كنت بس مش عارفة أتعامل ازاي
ريناد ابتسمت ابتسامة خفيفة: بس دلوقتي بقينا صحاب
حور ابتسملتلها: صحاب ايه… دا احنا بقينا اخوات خلاص
استغفرالله واتوب اليه♡
ـــــــــــــــــــــــــــــــــــــــــــــــــــــــــــــــــــــــــــ
بعد كام يوم خالد كان قاعد ف شغله على المكتب دخله زميله ف الشغل
محمد: ايه يعم انت قاعد هنا ومتعرفش الي بيحصل
خالد: في ايه؟
محمد: الموظفه الجديدة الي هتقى معانا جت وعند المدير دلوقت و هيجيبهالنا
خالد ملحقش يرد عليه لقيو حد خبط على الباب ودخل
: اتفضلي اتفضلي يا استاذة نهى
خالد: نهى!
يتبع..
_بقلم امولة
_البارت الخامس
_ما بين حُضنين