رواية بين نارين الفصل الثالث 3 بقلم ناهد خالد
الجزء الثالث من (#بين_نارين)
ما تهزرش انتَ بتفكر تتجوزها.
- وليه لأ؟ مش انتَ نفسك لسه قايل انها شخصيه محترمه مش هحتاج حاجه اكتر من كده وحد اكون واثق انه كويس.
- يعني انتَ خلاص قررت إنك هتاخد الخطوه دي؟ طب وبسمله؟
ظهر الحزن على وشه بوضوح وهو بيجاوب:
- اخر كلام مع بسمله انها مش ناويه تكمل معايا لو اتجوزت, بس انا قررت اتجوز من غير ماتعرف.
- يعني هتتجوز في السر؟
- مش بمعنى جواز عرفي,هتجوز رسمي طبعا بس الخبر مش هيوصلها, ده الحل الوحيد اللي لقيته.
- اه ولما مراتك تحمل ولا يبقى عندك طفل ساعتها هتعمل إيه؟
- ساعتها الوضع هيكون مختلف, انا مش ضامن اني لو اتجوزت هيتكتبلي الخلفه فعلًا, فخليني اخد اول خطوه من غير ما هي تعرف بحيث لو ما حصلش نصيب وطلقتها يبقى انا ما خسرتش بسمله, ولو حصل حمل وقتها الموضوع هيبقى فيه كلام تاني.
بصله محمود بتردد وقال:
- مش عارف حاسس انك بتلعب بالنار, ونهاية كل ده مش حلو.
—------------------------
-بصي يا بنتي انا مش هاجي عليكِ ولا هاجي عليه بس حقي ربنا يتقال, امتى ربنا سمح للراجل انه يتجوز على مراته, لو كان فيها عِله, والراجل حاول معاكي كتير وميأسش في موضوع الخلفه, وبقاله سنين يعني ما استسهلش انه يروح يتجوز, واخر مره الدكتور قاله مش هينفع أي محاولات تانيه, يبقى كده فعلًا هو ماعندوش حل تاني, اقولك على حاجه, لو الموضوع كان العكس والعيب كان فيه هو انا عن نفسي كنت هفضل ازن على دماغك لحد ما تطلقي وتشوفي مصلحتك, ليه بقى, لأن كان مُنى عيني اشوفلك عيل وما كنتش هرضى تضيعي عمرك وتفضلي وحيده طول عمرك عشان متمسكه بجوزك, طب دلوقتي الراجل يقدر يتجوز ويخلف و انتِ برضو موجوده معاه.
- هو انتِ هتقولي زيه يا ماما؟
- انا قلتلك من الأول لا هاجي عليكِ ولا هاجي عليه, بس انا بقول حق ربنا, يا بنتي الواحد لازم زي ما بيفكر في نفسه يفكر في غيره, انتِ دلوقتي لما بتقوليله لو رحت شفت حقك وعملته يبقى خلاص اللي بينا انتهى, انتِ كده بتريحي ضميرك منه! طب ازاي ما هو انتِ كده بتحطيله العقده في المنشار.
- يعني انتِ عاوزاني اعمل إيه؟ اقوله ماشي يا حبيبي وماله روح اتجوز, وانا هفضل موجوده معاك ومش مهم قهرتي.
-عاوزاكي تعقلي وتحكمي عقلك وتلعبيها صح, هتستفيدي إيه لما تطلقي منه؟ هتروحي تتجوزي واحد معاه عيال وتربيله عياله؟ ولا هتقعدي جنبي وانا مش عايشالك, يبقى العقل بيقول إيه انك تفضلي معاه ومدام الراجل من نفسه قالك انه مش هيخليكِ حتى تشوفيها ومش هتدخل بيتك ولا هتدخلي بيتها يبقى خلاص, خليه يتجوز, وهي كده كده بعيد عنك, وعيشي حياتك معاه زي ما انتِ عايشه, اقولك على حاجه كمان انتِ ممكن لو خلف بذكائك تحببي ابنه فيكِ, وبكده مش هتحسي انك لوحدك, هيبقى معاكي هو ومعاكي كمان ابنه اللي رايح جاي عليكم.
- بس كل اللي انتِ بتقوليه ده مش سهل انه يتنفذ.
قالتها بحزن وكسره واضحين, فردت امها وهي بتطبطب على كتفها:
- عارفه انه مش سهل بس مش مستحيل, فكري بس في اللي انا قلته وقرري تعملي ده وهتلاقي الموضوع بقى اهدى معاكي, ما لهاش داعي انك تخربي على بيتك يا بنتي, وخصوصًا ان الراجل زي ما تحمل سنين انتِ كمان من واجبك دلوقتي تشوفي مصلحته فين وتعمليها.
- هحاول.
قالتها في هدوء وعقلها بيسأل, ازاي الانسان ممكن يتنازل عن حاجه بتوجع عشان سعادة شخص تاني؟ وازاي ممكن يقبل ان الشخص اللي بيحبه يتقسم على اتنين؟ وهل فعلًا هتكون انانيه منها لو صممت تطلق لو هو عايز يتجوز؟
—--------------
بعد ايام…
-خير يا مستر سالم حضرتك طلبتني؟
بصلها بهدوء وقال:
- ايوه اقعدي يا نور عاوزك.
قعدت قدامه وهي مستنيه كلامه اللي قاله بعد ما سكت شويه كأنه بيرتب الكلام:
- بصي يا نور من غير لف ولا دوران كتير, ولأني دايمًا انسان صريح فانا هعرض عليكِ عرض من حقك تقبلي او ترفضي.
- تمام اتفضل حضرتك.
- انا متجوز بقالي 15 سنه, وللاسف في مشكله عند زوجتي في الحمل, يعني حاولنا كتير والدكاتره قالوا انه خلاص يعتبر ما فيش فرصه, فالحقيقه اني قررت اتجوز, عشان نفسي يبقى عندي ابن يشيل اسمي, في الفترة اللي فاتت كنت بدور على واحده تكون محل ثقه وارتاح لها انتِ عارفه ان الجواز عمومًا مش تجربه وخلاص, عشان كده كان لازم اكون حريص انها تكون شخصيه محترمه واكون واثق في اخلاقها وتربيتها, وبصراحه انا حسيت انك هتكوني الشخص المناسب, وطبعًا زي ما قلتلك يعني من حقك تقبلي او ترفضي.
ورغم صدمتها واحراجها من الموقف عمومًا, واللي عمرها ما توقعت ان ممكن سالم يعرض عليها حاجه زي دي في يوم من الايام, خصوصًا انها من اول ما اتعينت معاهم وهي عارفه انه متجوز, وكمان كلامه بالنسبالها كان صدمه من اعلانه رغبته الصريحه في الجواز:
- يعني حضرتك بمعنى اصح عاوز زوجه تخلفلك الابن اللي نفسك فيه.
- بصي بصرف النظر عن اسبابي انا, لكن عمومًا العلاقة بيني وما بينها هتكون علاقه طبيعيه جدا بين أي زوج وزوجته, مش عيب ان الواحد يقول رغبته الحقيقية في الجواز, على فكره انا لما جيت اتجوز بسمله اتجوزتها عشان كنت في الوقت ده محتاج استقر, كنت عاوز اكون عيله وبيت, لكن بعد كده خلال فتره جوازنا حبيتها ودلوقتي بقت عندي حاجه تانيه, فمعناه سببي للجواز مش هيخليني اني اعامل مراتي على انها واحده جايه تخلفلي وخلاص.
- طب وإيه اللي يخليني اوافق؟ يعني حضرتك عندك اسبابك انا إيه اسبابي؟
- إيه اللي يخليك توافقي انك زي ما قلتي ما فيش ولا فرصه كانت مناسبه لكِ, وانا مش بقولك وافقي انا بقولك فكري لو شفتي اني مناسب يبقى خلاص وافقي, انتِ قلت ان الشخص اللي في خيالك مواصفاته عادية او طبيعية, لو شايفه المواصفات دي فيا اعتقد هتكون سبب كفاية للموافقة.
- ايوه بس انا ما عنديش استعداد اتجوز بعيد عن اهلي, الحقيقة ان كان اول شرط او اول وصف في مواصفاتي ان مكانه ما يكونش بعيد عن بيت اهلي, لان والدتي محتاجاني ومحتاجه خدمتي ليها.
- تمام, عمومًا انا ما عنديش مشكله اننا نأجر شقه في المكان اللي انتِ عايشه فيه, وكمان ما عنديش مشكله لو حابه تجيبي والدتك تعيش معانا في الشقه او تفضل في شقتها وتروحيلها وقت ما تكوني فاضيه.
كشكل عام كل اللي بيقولوه كويس, وكمواصفات فهو فعلًا فيه اغلب المواصفات اللي هي كانت عاوزاها, لكن طبعًا الموضوع مش سهل ومحتاج تفكير.
- طب ويا ترى المدام عندك موافقه على الموضوع ده؟
يتبع...
يا ترى نور هتوافق؟
وهل سالم هيقول لبسمله؟ ولا هيتجوز من وراها؟؟؟
#ناهد_خالد
#بين_نارين
#مجرد_رسالة
#الرسالة_الخامسة_عشر