رواية مدرسة الشبراوي الفصل الثالث 3 والاخير بقلم عمرو ليث
• علىٰ فكرة أنا عرفت زينب إللي أنت بتحبها، وعرفت أن هي إللي بتجيبلك صينية الأكل
: عرفتي إزاي!
• هي حكتلي كل حاجة
: وأنتي بتروحيلها ليه؟
• أنا معرفش أصلًا أنا شفتها بتحط صينية الأكل قدام الباب، وخبطت ومشيت وأنت فتحت أخدت الأكل من غير ما تعرف أن هي إللي بتجيبهولك
: مين قالك أني معرفش أن هي إللي بتجيبهولي، أنا عارف أنها هي إللي بتجيبه، لأني عارف اكلها، وعارف ريحة اكلها، وعارف طعم اكلها، أنا عارف أنها هي يا شمس بس مش قادر اواجها، مش قادر حاسس أني اتكسرت لما سابتني واتجوزت
• هي كان غصب عنها زيك
: أنا استحملت ضرب عشانها ميستحملوش حمار في ساقية، صوت صراخي كانت البلد كلها بتسمعه، كنت بتضرب عشان حبيتها، حبها كان ذنب يا شمس
• الحب مش عيب ولا حرام، دي فطرة جوانا، دي مشاعر الإنسان
: بتقولي الكلام ده لمين؟ بتقوليه لشخص اتربىٰ أن المشاعر مجرد دلع ولعب عيال، إحنا عاداتنا وتقاليدنا هي إللي بتحركنا، سواء صح أو غلط أهم حاجة نمشي عليها
• طب ماهي دي النتيجة، دي نتيجة عاداتكم الجاهلة
: الكلام ده فات عليه كتير مفيش داعي نتكلم فيه
• فعلاً فات عليه كتير، أنا مالي أصلًا أي إللي مدخلني وسطكم، أنا أي إللي جابني هنا أصلًا
رديت عليه ويدوب لفيت وشي عشان أمشي ..
• جاية عشان أنتي عايزة كده يا شمس، جاية عشان أنتي إللي مقررة تيجي وتكملي في حاجة أنتي عايزاها، يمكن في سبب لوجودك هنا
: أي السبب إللي يخلي وجودي مهم في بلد زي دي، بلد كل حاجة غلط بتحصل فيها
• معرفش أي السبب بس أكيد وجودك هنا له معنىٰ
بيكلمني بالألغاز مفهمتش كلامه، مفهمتش يقصد أي عشان أعرف المفروض أنا هنا ليه أو بعمل أي في مكان زي ده، مكنش عندي إختيار غير أني اكمل إللي جاية عشانه، مكنش في إختيار تاني ..
• أنا آسفة أني كلمتك وجبتك في وقت زي ده
: أنا اتخضيت لما لقيتك بتكلميني عشان محتاجاني ضروري
• ممكن تركن أني رفضتك لما اتقدمتلي كذا مرة، وتركن أني كنت بضايقك عشان أنا محتاجاك
: أنا راكن كل ده يا شمس ومبفكرش فيه عشان خلاص مبقاش في حاجة
• طب أنا كنت عايزاك في حاجة محدش غيرك هيساعدني فيها، بس في الأول متحكيش لحد أني كلمتك عشان ميتخضوش
: ماشي .
الساعة 4 بعد العصر لقيت شمس بترن عليا بتقولي أنها محتاجاني ضروري، لحقت لبست وروحتلها كانت الساعة وصلت 10 بليل عشان كانت في محافظة تانية، طبعًا بحاول اتخطىٰ فكرة أنها مش عايزاني، مش قابلة بيا أبقى زوج ليها، اتقدمتلها مرة واتنين وعشرة واترفضت، هتقولي طالما أنت عارف أنها هترفضك بتروح ليه تاني، هقولك عشان تستاهل أروح مرة واتنين وعشرة ومليون، طالما عندي امل 1٪ أنها هتوافق هفضل أروح، عشان اتعودت أني لو عايز حاجة أروح اخدها بالطريقة الصح مش الغلط، اتعودت أدخل البيت من بابه مش من الشباك، متعودتش اساعد واحدة أنها تخون أهلها عشاني، متعودتش اساعد حد علىٰ الغلط حتىٰ لو بحبه، الحب مش مبرر للغلط، الغلط ملوش مبرر، حتىٰ الحب مبقيناش نعرف إزاي نحب، العيب عمره ما كان في الحب، العيب فينا مبنعرفش نحب .
• عم خيري البواب هو إللي كان بيشاور لـ هاجر وهي في الفصل وخرجت ومرجعتش تاني؟
: أيوه
• والشخص إللي كان موجود في السرداب إللي في المدرسة كان حاطط صورة البواب وسهام
: والمديرة
• ونفس الجملة إللي كانت مكتوبة في المدرسة هي هي نفس الجملة إللي متعلم عليها بالفسفور في رواية اجاثا كريستي؟
: لقيت جمل كتير متعلم عليها
• واللي بيخطف العيال هو هو إللي كتب الجملة إللي في المدرسة، وهو هو نفس الشخص إللي بيقرأ كتب في المكتبة، ده معناه أننا بنتعامل مع شخص بيحسب كل خطوة بيعملها
: معنى كده أن البواب مش هو إللي بيخطف العيال
• الفكرة هنا أن إزاي إللي كان ظاهر في الكاميرات البواب!
: ممكن يكون هو فعلاً ويكون في غرض تاني غير الخطف
• قصدك أي!
: لا أفهم أنت بقا
• لا لا أكيد مش كده أن شاء الله مش هو السبب إللي في دماغي لا
: مايمكن يطلع هو السبب والخاطف استغل الفرصة دي
• يبقىٰ كده الخاطف موجود طول الوقت في المدرسة
: بالظبط الفكرة مين هو إللي هيبقى موجود وسطنا في المدرسة وبيخطف العيال وعارف كل حاجة بتحصل وبيستغل كل حاجة .
النهاردة الجمعة والمدرسة مبيكونش حد موجود، روحت أنا وعصام المدرسة عشان نشوف السرداب إللي موجود في مكتب الشبراوي، ورحنا المكتب وفتحت الباب إللي بينزلنا لتحت الأرض، وصلنا عند الأوضة إللي كان فيها الصور إللي شفتهم، وكانوا لسه موجودين، كل صورة محطوطة علىٰ مانيكان، أول ما قربنا منهم اكتشفنا أنهم مش مجرد صور دولـ ..
• دول ماسك!
: يعني أي ماسك؟
• يعني في حد بيلبس الوشوش دي وبيتصرف كأنه الشخص صاحب ملامح الماسك
: انتحال شخصية؟
• انتحال شخصية أي، ده انتحال بني ادمين
مسك عصام الماسك وفضل يفتش فيه لحد ما طلع منه جهاز صغير كده ورهولي ..
: وده جهاز صوتي بيشتغل بتقنية الذكاء الاصطناعي، الشخص كان بيستخدم اصواتهم إللي أول ما بيتكلم الجهاز بيحول صوته لصوت الشخص إللي منتحل شخصيته
• لا لا ده فيلم رعب، يعني أي منتحل شخصيته وصوته وشكله، لا لا في حاجة غلط
كنا واقفين مصدومين من إللي شفناه، حقيقي كنت مخضوضة ومش عارفة اتلم علىٰ اعصابي، قطع كلامنا واحد مسك في رقبة عصام وكان بيخنقه، عصام قدر يفك نفسه ويضربه في وشه، راح جري نحيتي وحط السكين علىٰ رقبتي، ولكن معداش ثواني كنت بخبطه بكوع خلفي في وشه ويرجع لـ ورا من الضربة، الشخص طلع سكين ضرب عصام في بطنه وجري، عصام مسك بطنه، الدم مغرق المكان، وأنا بخاف من شكل الدم، معرفتش اتصرف ولكن حسيت أني مكنتش شمس إللي اعرفها، لأني قدرت استغنى عن شخصيتي الهشة واظهر الشخصية الجبارة ..
• براحة يا شمس
: أنا آسفة أول مرة اخيط جرح
• والبتاع ده بيحرق ليه
: ده مخدر متقلقش
• مخدر علىٰ اخر الزمن ده أنا عمري ما شربت حباية بنادول
: مش وقت هزارك دلوقتي يا عصام أنا متوترة أصلًا مش عارفة ازاي جايلي قلب وبخيط أصلًا
فضلت باصص عليها وهي متوترة وقلقانة ومتلغبطة وخايفة، خايفة عليا، أول مرة أشوف لهفتها وخوفها عليا، لو هتفضل كده يبقى اتعور كل يوم عشان اشوف خوفها ده ..
• خايفة عليا ؟
: أكيد خايفة عليك مش أنا إللي ورطتك في الحوار ده من الأول
• بس كده
: ايوة يا عصام وبالله اسكت انا مش قادرة أمسك اعصابي مسيطرة عليها بالعافية
كنت فاهمة يقصد أي ولكن أنا مش واعية لتصرفاتي ولا لردودي ولا لمشاعري، مش متعودة أشوف حد بيعرض نفسه للخطر عشاني، ويتعور عشاني، ويخاطر ويكمل عشاني، شايفة لمعة عيونه وهو بيبصلي انا وبخيطله وناسي أنه مجروح، وشكلي هنسىٰ انا كمان أني المفروض جيباه عشان يساعدني .
رنيت علىٰ سهام عشان افهم منها أي حاجة أو تقولي أي معلومة تفيدني ولكن اتخضيت لما قالتلي ..
• أخدت أجازة اسبوعين يا شمس عشان أمي تعبت واضطريت أقعد معاها، انا مشفتكيش غير أول يوم دراسة وبعتلك الجدول علىٰ الواتس
يعني أي مشافتنيش غير أول يوم بس، أمال مين إللي كنت بشوفها وبتكلم معاها في المدرسة دي، جسمي ارتعش مش الخوف، مبقتش فاهمة هو في أي ولا أي إللي بيحصل، كان النهار طلع وأنا مكنتش نمت طول الليل مستنية أروح المدرسة الصبح اسأل المديرة علىٰ الفيديو بتاع الكاميرات إللي ظهر فيه البواب ..
• إحنا معندناش كاميرات في المدرسة أصلًا
: بس أنتي قولتيلي هتكلميهم يشوفوا الكاميرات عشان يعرفوا مين إللي خطف البنت
• أنتي كويسة يا شمس، أنا اليوم ده مشيت بعد الحصة التانية كان في اجتماع في المنطقة التعليمية، يعني مكنتش حاضرة ساعة إللي حصل
فضلت باصة ليها ومخضوضة، يعني أي مكنتيش موجودة، أمال مين إللي قالي أنها هتخليهم يشوفوا الكاميرات عشان يعرفوا مين اللي خطف البنت، وازاي مفيش كاميرات، أمال البواب اتصور إزاي!
دماغي صدعت، لقيت عصام واقف جمبي مصدوم هو كمان، في حد بيحرك الأحداث وبيعمل كل حاجة زي ماهو عايز، في حاجة غريبة محدش واخد باله منها، لقيت عصام بيقولي ..
• إحنا نروح لـ البواب زيارة نشوفه عمل كده ليه ولا بيساعد مين
روحنا قسم الشرطة إللي موجود فيه عم خيري البواب، عملنا المستحيل حرفيًا عشان نشوفه، بالعافية وافقوا أننا نقابله دقيقتين بس من ورا الباب، ولكن طلع ميعرفش إللي حصل أصلًا ..
• أنا كنت نايم في الأوضة إللي في المدرسة، صحيت علىٰ صوت الحكومة وهي بتكسر الباب وبيقبضوا عليا، بيقولوا خطفت بنت من المدرسة وأنا أصلًا مخطفتش حد والله
: بس أنت متصور يا عم خيري وكانت معاك البنت فعلاً
• والله مش أنا يا مس شمس أنا أصلًا كنت نايم ومعرفش نمت أمته ولا إزاي أصلًا
: يعني أي نمت ومش عارف نمت إزاي؟
• أنا بغيب كل فترة بصحى الاقي نفسي نايم في مكان شكل، مبفتكرش نمت إزاي وبصحى مش فاكر حاجة
: ده زهايمر؟
• لا أنا صحتي وعقلي كويسين الحمدلله
بصيت لـ عصام لقيته سكت وشكله بيفكر في إللي أنا بفكر فيه ..
• كده سهام مكانتش موجودة غير أول يوم والخاطف كان بيستخدم وشها طول الوقت
: وكان مكان المديرة عشان ميلفتش الانتباه ولا يسبب دوشة في المدرسة ويسيطر علىٰ الوضع
• وكان بينيم البواب عشان ياخد راحته ويلف براحته في المدرسة، شخص كأنه علىٰ مسرح عرايس وبيحركهم كلهم من فوق
: أنت مستوعب أن الفيديو إللي راح النيابة كان ظاهر فيه البواب ومعاه هاجر ده كان من ضمن ترتيباته عشان يخليهم يلبسوا قواضي الخطف كلها لـ البواب!
• دي مش دماغ حد سهل
: دي دماغ واحد بيقرأ لـ اجاثا كريستي
• بيعشق الغموض
: وبيحب يتحكم في كل حاجة بتحصل
• تفتكري هنعرف نوصل لشخص بالعقلية الجبارة دي!
: أكيد في ثغرة يا عصام مفيش حد هيعمل حاجات كتير من غير ما حاجة تسقط منه
• صح يبقى كده ندور علىٰ التفاصيل
فهمنا أننا قصاد شخص سابق الكل وبيحركهم كلهم، بيعمل كل حاجة من غير ما يظهر، بيعرف يتحكم في الأحداث كويس، حسيت دماغي صدعت من كتر التفكير في الموضوع، ولكن مضطرة أكمل عشان حياة العيال إللي يستحقوا يعيشوا حياة سوية .
• هتنام فين؟
: علىٰ الكنبة إللي في الصالة
• ماهو في أكتر من أوضة فاضية
: أنا حابب أنام علىٰ الكنبة بس
• وأنت أي حاجة بتحب تعملها بتعملها
: أي حاجة بتريحني بحب اعملها ولو هعمل كتير عشان اعملها وارتاح معنديش مانع
• معنى كده أنك كنت حابب
: حابب أي؟
• أنك تيجي
: اجي فين!
• تساعدني
: الوقت اتأخر يلا روحي نامى
• ماشي
رده قفلني قفله وحشة منه لدرجة أنه حسسني أني مدلوقة عليه وهو إللي مش عايزني، ينهار أبيض لتكون الأدوار اتبدلت، وبقيت أنا إللي عايزاه وهو إللي بيرفض، لا لا أنا هروح أنام قبل ما دماغي تسوحني .
• في حاجة مش مفهومة
: حاجة أي!
• اسم الشبراوي
: ماله؟
• المدرسة إسمها مدرسة الشبراوي، والمكتب إللي فيه الباب مكتوب عليه مكتب الشبراوي، وصاحب البيت إللي قاعدين فيه إسمه توفيق الشبراوي
• يعني قصدك أن توفيق وراه حاجة؟
: أكيد وراه حاجة إسمه محشور في كل مكان
• ما هو يمكن يكون مجرد لقب واي حد في العيلة إسمه فلان الشبراوي
: طب وهو حد ظاهر من العيلة غيره؟
• لا
: يبقى ده معناه أي!
• لا ثانية عم توفيق أصلا راجل كبير ومستحيل يعمل حاجة او يخطف حد
: مقولتش يخطف أنا بقول أكيد هو له علاقة باللي بيحصل
• معتقدش لأنه متجوزش أصلًا ولا معاه عيال، هي البنت الوحيدة إللي كان بيربيها كانت بنت أخته واتوفت
: بس أنا ملاحظ أنه مبيخرجش من البيت
• ايوة ماهو زينب هي إللي بتجيبله الأكل
: دي إللي كان بيحبها وابوه كان بيضربه عشانها
• ايوة
: طب بالنسبة للقصة بتاعت العيل إللي اتخطف إللي قولتيلي عليه إللي حكتهالك زينب مقالتلكيش مين إللي خطفه؟
• لا بس إللي قالته أن الولد أصلًا مشي من البلد من زمان
: بقولك أي
• أي؟
: تعالي ندور علىٰ أي حاجة في مكتب توفيق
• ليه؟
: نشوف أي حاجة
دخلنا مكتب توفيق عشان ندور علىٰ أي حاجة في المكتب، أي ورقة أي صورة أي حاجة مفيش خالص، المكتب مفيهوش غير المكتب بتاعه والكتب بس، ولكن وقفت ثانية كده لما افتكرت كتاب مش بيسيبه من أيده خالص، رجعت بصيت لقيته علىٰ المكتب بتاعه، لقيت عصام بيبص عليا ..
• دي رواية لـ اجاثا كريستي
فتحت الرواية مكنش فيها أي حاجة، ولكن الغريب أن في جمل متعلم عليها بقلم جاف بنفس الطريقه إللي متعلم بيها الروايات إللي جبتها من المكتبة، ثانية الكتاب متعلم عليه من زمان، العلامات دي قديمة، فضلنا نفتح في المكتبة وطلعنا منها كل الروايات إللي اغلبها كانت لـ اجاثا كريستي، وكلهم جرايم، وكلهم مجهولين، واغلبهم إنتقام، اغلب الأبطال بينتقموا من الناس علىٰ غلطة ملهش ذنب فيها، علىٰ حياة مخترهاش، البطل بينتقم لنفسه عشان يخلص من الشعور إللي كان بيعيشه زمان، عايز يشوف الشعور ده في كل عيون إللي كانوا بيعاقبوه ..
• توفيق!
: توفيق هو إللي خطف الولد وكتبه بأسمه!
• معقول يكون الولد قرأ الروايات إللي كان بيجيبها توفيق من صاحبه سعيد إللي فاتح المكتبة وقراءها الولد إللي كان مخطوف وقرر يبقىٰ البطل!
: بس مش في خياله
• ده في الواقع
: وبينفذها بالظبط وبيخطفهم في نفس اليوم إللي اتخطف فيه!
كده وصلنا لرابط إللي بيربط كل التفاصيل ببعضها، عرفنا مين إللي خطف الولد إللي بيخطف العيال، وعم خيري البواب مطلعش هو إللي بيخطفهم، وتوفيق إللي مش بيطلع من البيت عشان الناس متعرفوش ويفتكروا قصة الولد إللي جابه، ويربطوا خطف ولادهم بالولد الغريب إللي جه البلد، حاولت أهدى شوية واظبط دماغي إللي هتفرقع من الصداع، مش قادرة ارتب المواضيع كلها، حاسة أن التفاصيل دي كتير جدًا علىٰ دماغي إللي مش قادرة تستوعب، ولكن إللي كان مهون عليا هو وجود عصام معايا، شايل عني شوية وبيطمني، قعدنا مع بعض شوية، ورتبنا المفروض هنعمل أي، وعصام هيظهر في المدرسة ازاي عشان يقدر يكون معايا طول الوقت، ولكن لقيته بيسأل عن سهام والمديرة كتير، واسأله غريبة ..
• وأنت مالك أصلًا
: هو أي إللي مالي بقولك الفستان بتاعها بيكون ضيق ولا واسع
• أنت عايز تعرف ليه أصلًا
: التفاصيل مهمة يا شمس عشان نعرف نمسك الشخص إللي بيخطف العيال
• طب ما نروح السرداب أو نبلغ عنه
: وأنتي يا ناصحة هتلاقيه قاعد لحد دلوقتي أصلًا هناك، ده تلاقيه مشي من ساعتها عشان مكانه اتعرف
• ايوة صح بس بردو مش هقولك
فضل يضحك علىٰ طريقتي في الكلام معاه عشان عايز يعرف الهدوم إللي بتلبسها سهام ضيقة ولا واسعة، هو ماله أصلًا وليه يبص عليها، أنا مش بغير علىٰ فكرة ولكنه كائن مستفز .
عدىٰ أسبوع والامور كانت ماشية بشكل طبيعي في المدرسة، مكنش في حاجة غريبة بتحصل، الأيام كانت عادية جدًا، وسهام رجعت، والمديرة كانت اغلب الوقت في مكتبها، وعصام كان موجود معايا طول الوقت وبيتحرك في المدرسة عشان يشوف أي حاجة مش طبيعية بتحصل .
صحيت في يوم الصبح ملقتش عصام في البيت، وتوفيق بقاله 10 أيام مش ظاهر، اختفى فجأة، ولكن لقيت عصام داخل عليا وهو بياخد نفسه بالعافية ..
• خليل
: خليل مين!
• الولد إللي خطفه توفيق الشبراوي إسمه خليل
: عرفت إزاي؟
• من العصايا بتاعتة، في قاعدة العصاية من تحت كانت باين انها متغطية بغطا حديد، أول ما فتحت الغطا بتاعها من تحت وقعت منها شهادة ميلاد خليل توفيق، خليل قعد مع توفيق 6 سنين، ولما اختفى وبدأت حالات الخطف تحصل 5 عيال اتخطفوا، بس مكانوش بيتخطفوا في أول من كل سنة، لا كانوا بيتخطفوا في أول كل ترم، يعني في السنة بيخطف إتنين، ودي السنة التالتة، وناقص عيل يتخطف عشان يتم 6 ويبدأ يعاملهم بنفس المعاملة إللي كان بيشوفها من توفيق
: واشمعنا 6 ؟
• عشان ده عدد السنين إللي قعدهم مع توفيق، والرقم ده ناقص واحد ويكتمل
: بس ده أول الترم التاني بكره!
ملحقتش استوعب الكلام إللي بيقوله عصام، معقول فعلاً خليل هيعمل كده مع العيال، وبيخطف العيال بحسب عدد السنين إللي قعدهم مع توفيق الشبراوي!
نظرية واقيعية جدًا، ولكن المرة دي هيتنكر في شخصية مين عشان يخطف العيل السادس!
كنا واقفين في نص المدرسة وعنينا علىٰ كل شخص بيتحرك، مركزة مع كل حركة بتحصل في المدرسة، ولكن عصام قالي هعمل حاجة وجاي بسرعة، ولقيته وصل ووقف قدام الباب بتاع المدرسة، مسألتوش عملت اي عشان مكنش في دماغي أي حاجة دلوقتي، لقيته بيقرب مني وبيبصلي ..
• هي سهام من إمتى بتلبس كوتشي!
: معرفش بشوفها طول الوقت بتلبس جزمة
• غريبة يعني انا الفترة الاخيرة بشوفها بتلبس جزمة
: عادي يعم أي تلاقيها اشترت واحدة جديدة كفاية تنمر علىٰ الخلق
• لا مش تنمر دي مش سهام يا شمس دي مش حركة سهام في المشي
: بتقول أي!
لقيت عصام جري نحية سهام قبل ما تدخل المدرسة ..
: خليل
أول ما عصام قال خليل سهام بصتله ووقفت قصادة من غير ما تتحرك، ومعداش كام ثانية وفتحت الشنطة طلعت منها مسدس ضربت عصام بالنار وقع علىٰ الارض، ولسه هتجري لقيت نفسها وسط الحكومة إللي حاصرتها من كل حتة، جريت علىٰ عصام إللي اخد طلقة في دراعه، وقف علىٰ الأرض بعد ما اتسند عليا وراح نحية سهام، فضل واقف قدامها ومسكها من وشها عشان يشيل الماسك إللي علىٰ وشها، وكان فعلاً إللي لابس الماسك خليل توفيق الشبراوي، إللي اكتشفنا أنه بياخد تاره من إللي خطفه ويقفل المدرسة إللي بأسم توفيق الشبراوي عشان هو الوريث الوحيد ليه علىٰ الورق، وينتقم من الاطفال بالطريقة إللي انتقم بيها منه توفيق زمان، يمكن توفيق هو إللي زرع فيه حتة الانتقام من غير ما يقصد، لأنه سابله الكتب إللي شجعته أنه ياخد حقه وينتقم .
• مش عارفة أشكرك إزاي
: مفيش داعي إحنا عملنا خير المهم أن العيال رجعوا لأهلهم
• وأحنا كمان محتاجين نرجع لأهلنا، أنا هموت وأنام علىٰ سريري
: دي حقيقة أنا ضهري اتكسر من النومة على الكنبة
• مش أنت إللي كنت حابب
: مأنا خلاص مش هعمل حاجة بحبها ومش مريحاني
• يعني أي!
: يعني خلي بالك من نفسك
• هتمشي!
: المفروض
• ماشي
خلصت الأحداث والعيال رجعوا لأهلهم قبل ما خليل يعمل فيهم حاجة، وأنا رجعت لأهلي ولكن راجعة وفي جزء ناقص مني، في شعور قدر يخطفني زي العيال إللي اتخطفت، بس مش هينفع لأنه جه متأخر ومبقاش ينفع .
• طب أنتي بتعيطي ليه!
: عشان غبية، انا غبية كان قدامي وجالي مرة واتنين وعشرة وكنت برفض عشان مكنتش بحبه، وهو عمل كل حاجة عشان يوصلي، دخل البيت من بابه، دخل بالطريقة الصح عشان عايزني، وأنا إللي ساذجة وكنت مستنية اخد حد أنا بحبه وسبت حد عمل كل حاجة عشاني
• ده نصيب يا شمس
: كان قصادي، نصيبي كان قصادي وأنا إللي رفضت
• طب خلاص متعيطيش
: اتعلمت حاجة صعبة جدًا، أني دايمًا اختار إللي بيحبني مش إللي بحبه، إللي بيحبني هيعمل كل حاجة تحببني فيه، إنما إللي هحبه مش ضامنة هيحبني بنفس الطريقة إللي هحبه بيها ولا لا
• لو فضلنا كلنا مستنيين نتحب مش هنتجوز يا شمس
: أنا بقول نختار إللي بيحبنا لو كان موجود
كنت قاعدة مع صحبتي وبعيط، ولقيت امي بتخبط علينا، لحقت مسحت دموعي بسرعة قبل ما تشوفني ..
• شمس
: أي يا ماما
• عصام جه تاني أقوله أنك رافضة كالعادة ولا أقوله حجة جديدة!
لقيت صحبتي بتبصلي وبتضحك، وأنا ضحكت علىٰ ضحكتها انا وبمسح دموعي، هديت شوية وغيرت هدومي وخرجت ..
• أنا قولت أحاول مرة كمان يمكن تغيري رأيك فيا
: وأنت كنت بتشكك في نفسك ولا أي؟
• لا خالص بس انا قولتلك لما بحب حاجة بعمل أي حاجة عشانها
: مأنا عارفة وموافقة، مش عشان أنا استاهل تتعب عشاني لا، عشان أنا كنت غبية ومشفتش أنك بتعمل كل ده عشاني لدرجة أنك كنت هتموت بسببي
• آخر كلام؟
: آخر كلام
• طب خدي هدية بسيطة جبتهالك كنت هديهالك لو كنتي هتوافقي
: رواية ماذا لو!
• ماذا لو كان اللقاء يُخالف قواعد الواقع، ستُشاركيني تلك الجريمة؟
ضحكت وهزيت رأسي أني موافقة اشاركه الجريمة البشعة دي، عامةً أنا بحب مخالفة كل شيء، والاحلى أني هعمل كده مع حد بحبه للأسف .
تمت .
#مدرسة_الشبراوي الجزء التالت والأخير
#الكاتب_ليث
لـ عمرو خالد لـيث
تمت