رواية ما بين العناد والهوي الفصل الثاني 2 والاخير بقلم امل عبدالرازق

رواية ما بين العناد والهوي الفصل الثاني 2 والاخير بقلم امل عبدالرازق 

وردة: يا صباح الورد يا فريدة، عامله إيه يا حبيبتي، يا رب تكوني نمتي كويس 

فريده: صباح الفل يا طنط، نمت كويس الحمد لله، بس انا وجودي هنا عامل ليكم قلق، حضرتك سايبه بيتك وجايه تنامي معايا في شقتي عشان اكون مطمنه، بجد أنا بعتذر جدا

وردة: يا حبيبتي بتعتذري على إيه متقوليش الكلام دا تاني عشان مزعلش منك، أنا أصلا بنام على سرير وعمك فتحي على سرير عشان ولاد حسام بيباتو معايا، فمش هتفرق المكان وبعدين أنا مبسوطه دا انتي جتيلي من السما سر بيني وبينك عمك بيتكلم وهو نايم وبينشف دمي

فريدة: اذا كان كدا ماشي و اهو كله بثوابه 

ورده: أيوه كدا اضحكي وفرفشي، كنت عايزه أعرف رأيك في عمر ابني يا فريده 

فريده: مش فاهمه قصدك يا طنط 

ورده: انتِ شايفه عمر ازاي، انا عايزاكي تطمني وتفتحي قلبك وتقولي كل حاجه واعتبريني صاحبتك مش والدة عمر واوعدك كل كلمة هتتقال سر بيني وبينك 

فريدة: عمر دا أكتر واحد مستفز وطيب في نفس الوقت وأكتر واحد بيضحكني، هو اتغير معايا شويه بعد ما خطب بس ملاحظة إنه بدأ يتعامل معايا زي الأول، مش بيفشل إنه يهون عليا وبرتاح جدا في الكلام معاه ومش هنسى وقفته جنبي بعد وفاة بابا وكل يوم رايح جاي من القاهرة لكفر الشيخ ودايمًا كان بيخرجني أنا وجدو عشان يهون علينا، بشوفه انسان محترم وناجح من صغره ما شاء الله، إحنا بنختلف في حاجات كتير وهو بيحب يمشي كلامه عليا وبيعاملني على إني طفلة عندها ٢٣ سنة، روحي يمين يا فريده المفروض أقوله حاضر، بس أنا مش بحققله اللي في دماغه أبدا إلا لو كنت مقتنعة، وبجد مش شيفاه غير أخويا وبحس بالأمان وهو موجود

وردة: أنا عارفه معنى اللامعة اللي في عينيكي والابتسامة دي كويس، انتي محتاجه تصفي ذهنك وتفكري هل ممكن عمر يكون اخ وزوج وصديق ولا لأ، دوري في قلبك كدا يمكن تلاقي حاجه، نفس الكلام إللي قولتيه عنه قاله عليكي وذكرك بكل طيب، عمر مر بتجربة مش كويسه وبيحاول يتعافى من آثارها وللأسف كلنا فضلنا نزن عليه لأنه مش صغير دا ٢٩ سنه يعني يتجوز ويفتح بيت وللأسف كان اختيار غلط والحمد لله ربنا ستر وهو لا كان متعلق بيها ولا حاجه وقال جوازه والسلام 

فريدة: بس هي لسه مصممة ترجعله وتصرفاتها غريبه 

وردة: تقوليلي نفسك في إيه يا وردة، هقولك نفسي أغمض عيني والاقيها اختفت من حياتنا، أنا أول مرة أشوف بنات كدا، ما تعملي فيا جميلة وتوافقي على ابني ونيجي كلنا نعيش في القاهرة 

فريدة: يعني عندك النية تمشي من هنا وتروحي القاهرة 

وردة: ليه لأ شويه هنا وشويه هنا وممكن عمر وانتي تستقروا هناك دراستك وشغله بس الأول تعقلوا عشان معرفش اسيبكم في مكان لوحدكم هتفرجوا علينا الناس، فكري بقى وقوليلي قرارك عشان كلنا نفرح 

فريدة: حاضر، بقولك يا طنك أنا كنت عايزه انزل الكلية ضروري عشان اشوف هعرف أحول ولا هعمل ايه، وفي عندنا عملي لازم اروحه 

وردة: طب بسرعة إلبسي عمر رايح وهخليه ياخدك معاه في طريقه 

_________

فيروز: هنعمل ايه يا أماني، عمر خلاص هيخطب وأنا مبقتش في حياته، أنا جيت على كرامتي وسمعت كلامك كفايه لحد كدا 

أماني: بقولك أنا عايزه رقم شوقي اللي كنتي بتكلميه وكان ماسك عليكي صور وبعتها لعمر عشان ياخد منه فلوس 

فيروز: شوقي دا أكبر غلطه في حياتي ضحك عليا بإسم الحب وأنا صدقته، وفي الآخر طلع حوار بيعمله عليا مع شوية عيال زيه، عايزه رقمه تعملي ب ايه انا ما صدقت يبعد عني 

أماني: عايزاه يظبطلي كام صورة مع ولاد لفريدة عشان عمر يبعد عنها ويرجعلك،  عارفه لو بقيتي مع عمر هيبقى عندك الفلوس والعربيات والفسح هتعيشي ملكة وسعديه وغيرها بيشوفوا شغل البيت وانتي هتكوني ست هانم عايشه تتدلعي، فوقي معايا عشان مافيش وقت 

فيروز: خدي الرقم بس انا مش هبان في الصورة وانتي حرة 

أماني: احسن بردو بس خلي بالك عشان حسام فاضله تكه ويقولي خدي هدومك وعلى بيت اهلك، مش عايزينه يحس بينا تاني 

_________

مراد: واخيرًا جيتي دا أنا بقالي ساعات منتظرك 

عمر: مين المحترم؟ 

مراد: انا مراد زميل فريدة في الكلية، انت اكيد اخو الدكتورة فريده عمر كانت دايما بتكلمني عليك

عمر: دا بجد انتو بتتكلموا كمان يا فريده 

فريده: دا دكتور مراد زميل وادمِن جروب الدفعة وهو اللي قالي على امتحان النهارده فقولتله إني جايه معاك 

مراد: أنا بجد كنت عايز اتعرف عليك من بدري وبسمع عنك وعن نجاحك كتير، وبما انك موجود هنا كنت عايزك في موضوع، بس الأول عايز فريده في كلمتين على انفراد 

عمر: انفراد إيه يا مراد ويومنا حلو زيك، روحي يا فريده مع مراد عايزك في موضوع سر 

فريده: حاضر بعد اذنك يا عمر 

عمر: اذن مين يا اختي اقفي عندك انتي وهو، انتي رايحة معاه فين هو أنا بطيخة واقفه معاكم ولا طالعلي حاجه في راسي مش واخد بالي منها، خير يا بابا عايزها في إيه ما تتكلم هنا

فريدة: اهدى يا عمر مراد زميل فاضل ومشهور على التيك توك مش قصده يضايقك

عمر: تصدقي اسمه نفسه مستفزني، يا رب صبرني واقدر امسك نفسي، خير يا مراد يا مشهور 

مراد: عادي عايز اخد منها ميعاد مناسب نخرج فيه سوا عشان عاملها مفاجأه 

عمر: يا مفاجأتك يا بنت عمي انتي بتخرجي مع مراد كمان يا فريدة، يا ترى مستخبي ليك إيه تاتي يا عمر 

فريدة: عمر تماسك أرجوك، هروح معاه اشوف عايز ايه وهرجع 

عمر: والله لو اتحركتي من مكانك يا فريدة هجيب مراد من شعره اللي مفلفله دا، دا لابس حظاظة وسلسلة 

فريده: قولتلك تماسك يا عمر كلها دقايق وهتعدي

عمر: كلمة كمان وهيحصل حاجه مش كويسه، يلا اركبي عشان نمشي من هنا 

مراد: خلاص يا استاذ عمر، انا هتكلم قدامك، وعامل حسابي في الدبلة بقولك تتجوزيني يا فريده 

عمر: وانت نازل على ركبتك اللي تتكسر ليه 

مراد: ها يا فريده موافقه تتجوزيني ونعيش مع بعض أحلى قصة حب وخلي بالك اضحكي عشان بيصورونا وهتنزل الفيديوهات على الفيس عندي وهنطلع تريند 

فريده: الأول تاخد رأي أبيه عمر أخويا الكبير 

عمر: بيصورا مين انت في حاجه في دماغك، فريده مخطوبة يا اخويا قوم امشي من قدامي بسرعة بدل ما تطلع تريند بس على زوقي 

فريده: ايه دا هو انا مخطوبة يا ابيه عمر وانا مش عارفه 

عمر: اسكتي انتِ

مراد: يا استاذ عمر أرجوك بلاش تبوظ اللحظة الرومانسية دي، مخطوبة إزاي ومافيش في إيديها دبلة 

فريدة: استنى بس يا مراد يعني إيه اسكتي انتِ

عمر: بقولك اسكتي انتي وخلاص 

فريده: طب مش ساكته، وبعدين تخرج مع مين يا مراد انا لا عمري خرجت معاه ولا هخرج هو مجرد زميل وعيب اللي بتعمله دا، وبطل تضايقني وعمر خطيبي وهنلبس الدبل النهارده، ملكش انت دعوة بينا ولو صورتني صورة ونزلتها أنا هعمل شكوى فيك وانت عارفني ماليش في الغلط، قال عايزني في موضوع قال

عمر: دي فريدة اللي اعرفها، بقولك يا مراد ما تجيب الدبلة دي وتاخد بدالها فلوس بدل ما تيجي عليك بخسارة 

مراد: يلا مش مشكلة عشان اجيب واحدة تانيه لنادين زميلتنا في آداب تيكتوكر زيي وهتفرح أوي بالتريند، خد الدبلة جايبها ب ١١ ألف جنيه 

فريده: هتعمل ايه بيها يا عمر 

عمر: تتجوزيني يا فريده؟ 

فريده: انت بتقول ايه، ونازل على ركبتك ليه 

عمر: هو مراد بيعملها عشان التريند بتاعه بس أنا عايزك في الحلال على سنة الله ورسوله، ها قولتي إيه خلصي ركبتي وجعتني 

فريده: استنى افكر .... خلاص موافقة 

________

فيروز: شوفتي الفيديو اللي نازل لعمر وفريده كل صفحات الفيس منزلاه ومبسوطين بيهم، أنا بجد مش مصدقه اللي بيحصل، فين كلامك اللي قولتيه ليا وعمر مستحيل يخطبها ومش هتكوني غير ليه، أهو خطبها قدام مصر كلها 

أماني: شوفي بقى الفيديو دا لصالحنا شوقي عمل الصور وحط وش الواد اللي اسمه مراد وكدا ثبتت عليها اكتر وعاملها بإتقان كأنها حقيقية

فيروز: يعني هنعمل ايه دلوقتي 

أماني: شوقي اشترى خط وهيبعت الصور لعمر النهارده 

فيروز: أنا خايفه أوي يا أماني 

أماني: بقولك انتي تهدي بقى أنا مش عايز توتر لأن الموضوع بعيد عننا خالص خالص، شوقي واخد مني ٢٠ ألف عشان المصلحة تخلص فكوني ثابته كدا ومتنزليش من الشقة، ويبقى يوريني هيخطبها إزاي 

_______

رياض: أنا بخاف لما تجتمعوا مع بعض في مكان اصلا، ايه إللي عملته دا يا عمر 

عمر: هو انا كنت هعرف منين ان في حد بيصورنا وهينزل الفيديو، وبعدين عادي وقفته عند حده واتعلم الأدب بكل هدوء، دا بيقولي عايزها على انفراد يا جدو 

فتحي: هو عيل مستفز بردو بس المفروض يتكسف مش ينزل الفيديو 

فريده: هما كدا يا عمو أهم حاجه عندهم اللايكات والمشاهدات ولو على حساب كرامتهم وحُرمة بيتهم، كلهم عايزين مشاهير ومعاهم فلوس مقابل اي حاجه عادي

عمر: مافيش حد مش عايز فلوس بس ليها طرق كتير تيجي بيها بالحلال ومن غير قلة قيمة وأدب، عايز تبقى مشهور براحتك بس اتشهر بالخير وكن قدوة طيبة وحسنة لأن الاطفال بيتعلموا منهم والكبار كمان، إنما أمثال مراد دول مشاعرهم كلها مش حقيقية ولا كلامهم وممكن يعملوا أي حاجه عشان يتشافوا وقدوة غير صالحة تمامًا

ورده: معاك حق يا عمر بس انت طلعت رومانسي وإحنا منعرفش 

عمر: دي حركة أنا عملتها عشان كنت عايز اضايق ميرو 

فريده: طول الطريق وإحنا راجعين يقولي مش هلاقي زيك و ان شاء الله هعوضك عن كل حاجه وهشيلك جوا عيني 

عمر: أنا يا بنتي، طبعا محصلش

فريدة: إيه دا الموبايل طلع بيسجل من غير ما تاخد بالك، إني آسفة 

عمر: طب خلاص الله يسترك، بصراحة يعني أنا طالب إيد الآنسة فريدة منك يا جدو ومش هلاقي زيها ومش عشان الوصية بتاعتك يا جدو، لأ دي الحقيقة انا مش هلاقي زي فريدة ويا بختي بيها 

رياض: ولا احنا هنلاقي زيك يا حبيبي بس كنت اصبر الشهر مش اسبوع دا انت واقع خالص 

عمر: يلا يا جدو أهو اكسب فيها ثواب 

فريده: اصلا مين قالك إني هوافق 

عمر: انتي وافقتي قدام الدنيا كلها، استني انا نسيت موبايلي في العربية هروح اجيبه 

________

وردة: عمر بقاله ٥ ساعات برا انا قلقانه عليه  

فريده: أنا لما طلعت اشوفه لاقيته خد العربية ومشى وبرن عليه مشغول 

وردة: استر يا رب 

دخل عمر فجأة وقال: معلش اتأخرت عليكم 

ورده بلهفة: كنت فين يا عمر قلقتنا عليك وأخوك طلع يدور عليك 

عمر: معلش يا ماما حقك عليا، فين جدو؟

وردة: دخل يرتاح في غرفته

حسام: يا اخي دوختني عليك، كنت فين ؟

عمر: كويس انك جيت يا حسام، خدي يا فريده شوفي الصور دي 

فريدة بصدمة: إيه الصور دي؟! والله انا ما اعرف عنها حاجه،  والله مستحيل أعمل كدا 

عمر: متحلفيش لأنك مش محتاجة تحلفي وعارف إنك بريئة من كل دا

حسام: أنا مش فاهم حاجه منكم، صور إيه 

عمر: بص يا حسام انت عارف غلاوتك عندي وعارف انا بحترمك ازاي انت اخويا الكبير وعلى راسي من فوق بس الموضوع بقى لا يُطاق، يعني إيه مراتك تكلم واحد يركب صور لفريده مع شاب، انا عايزه افهم هي عايزه مني ايه ومش سايبانا في حالنا ليه؟ قل لمراتك ان انا وصلت للولد اللي عمل كده ودلوقتي مقبوض عليه وقولها كمان انها هتحصله لأنه اعترف وقال كل حاجه وشوفت الكلام بينهم ومسجلها وهي معاه في الموضوع ده، انا اسف يا حسام هي اللي اضطرتني اعمل كده انا اول ما شفت الصور عرفت انها لعبه على طول لان فريده مستحيل تعمل كده واضمنها برقبتي ده انا اضمنها اكتر من نفسي، كلمت هشام صاحبي وتتبع موبايل الولد ده ووصل ليه بكل سهوله 

حسام: روحي يا سعيده ناديلي أماني واقعدي مع الولاد فوق 

________

فريده: عمر انت بجد مصدقتش عليا كدا 

عمر: مستحيل اصلا عقلي يصدق حاجه زي دِ،  دا انتي فريده رفيقة الدرب مش معرفة كام يوم 

أماني: خير يا حسام بعتلي عايز إيه؟

حسام: اللحظة اللي كنت مستنيها اخيرا، بصي بقى أماني انتِ طالق ولمي هدومك وروحي بيت أهلك، وعشان انتِ ام ولادي أنا هسيبك تعيشي في الشقة اللي في بلدكم جنب أهلك دا في حال لو الولاد حابين يكونوا معاكِ بس ما اعتقدش ،عشان مش انا اللي اعمل كدا وولادي لما يكبروا يزعلوا مني ويقولوا ساب ماما في الشارع، بس بعد ما تقضي مدتك في السجن لأن الشرطة على وصول ومن حفر حفرةً لأخيه وقع فيها 

أماني: انت بتقول إيه حسام، أهون عليك تعمل فيا كدا، دا مراتك أم ولادك 

حسام: شريكك اعترف عليكي وأنا وولادك مش فارقين معاكِ عادي،  حذرتك كتير و انتِ مكبرة دماغك ومش عامله ليا اعتبار ولا احترام ، اطلعي ودعي عيالك،  و ان شاء الله هجيب ليهم أم تحافظ عليهم ويكون قلبها طيب، كان اختياري ليكي من الأول أكبر غلطه ندمان عليها، الرضا لمن يرضى وانتِ عمرك ما كنتي راضية وعينك على اللي في إيد غيرك وربنا بيجازي كل واحد على افعاله، فيها إيه لما ننضف من جوانا ونحب الخير لغيرنا بس دول فئة موجودة في حياة كل واحد فينا واكيد ربنا هيساعدنا ونرتاح منهم، بقولك يا عمر ما خير البر عاجله ونخلي الشبكة بعد بكرا ونفرح كلنا 

عمر: انا عن نفسي موافق ونخليها فرح كمان المهم رأيك يا عروسه 

فريده: لأ خليها خطوبة والفرح بعد ما أخلص السنة دي 

فتحي: أنا مع فريدة بس هنكتب الكتاب عشان عمر يعرف يوصلك الكلية مش هيحصل تاني انكم تسافروا لوحدكم كدا من غير كتب كتاب 

وردة: يا ألف نهار ابيض، وهنشوف عروسه لحسام ويبقى الفرح فرحتين 

حسام: لأ يا ماما انا عايز ارتاح من الزن شويه واخد استراحة مقا.تل  شجاع ونسافر كلنا سوا، أصلها قفلتني من الجواز كله 

فريده: بقولك يا عمر أنا عايزه اروح الملاهي مع ولاد حسام وناكل آيس كريم 

عمر: طب روحي جهزي شنطتك عشان كلنا هنروح المصيف. وصحيح يا أماني قبل ما تمشي قولي لفيروز مش عايزين نلمحها في بلدنا كلها تاني، مش لو كنتي سالكة من جواكي كان زمانك بتفرحي معانا،  يلا مش مشكلة أم السعد هتطلع تقولها 

 وصلت الشرطة وخدوا أماني، وساعتها الكل فهم إن كل واحد غلطان ليه حساب، والجزاء دايمًا من نفس نوع العمل.

اللي قلبه نضيف وبيحب الخير للناس، ربنا بيعوّضه براحة وطمأنينة مش بتتشرى بالفلوس.

ويا بخت اللي يشغل نفسه بتطوير روحه وحياته، ويسيب الناس في حالها… لأن السلام الحقيقي بيبدأ لما الواحد يبص لجواه قبل ما يبص لغيره.

#تمت

#ما_بين_العناد_والهوى

للكاتبة #أمل_عبدالرازق 

تمت

لمتابعة باقي الرواية زوروا قناتنا على التليجرام من هنا