رواية حواديت رمضان الفصل الثالث 3 بقلم فيروز عادل
-دي اول عزومة لاهل خطيب اختك مش عايزة حاجة غلط تحصل.
-عيب عليكي والله يا ماما انتي تعرفي عني كده؟
بصتلي بقلة حيلة:متجيش جنب العصير خالص مش هينفع تدلقيه النهارده.
-ليه بس كده ده ربنا ما يقطعلنا عادة حتى.
-معلش ياحبيبتي تعالي على نفسك النهارده.. وكمان مترغيش كتير مع حما اختك.
-عالفكره ياماما انتي اوڤر جدًا ده عمو حسن!
-ما انا عارفة انه عمو حسن هو انتي هتعرفيني عليه، عمو حسن صاحب ابوكي بقى دلوقتي نسيبنا فاهمة حاجة؟
حطيت الاطباق اللي في ايدي على السفرة وانا راجعة وراها المطبخ تاني:نفسي يا امي تبطلي توتر زيادة ماهو الضغط العالي ده مجاش من شوية.
-وحاجة كمان.
اتنهدت:انا صدعت.
لفتلي:بتقولي حاجة؟
ابتسمتلها:بقولك قولي مليون حاجة ده كله الا انتي يادودو.
-مش لازم اقول يانور قومي اعملي شاي يانور قومي هاتي الحلويات يانور كذا.. نبقى فاهمين بعض بالنظرات كده وتصحصحي وتفتحي مخك معايا.
-بتطلبي مني حاجات صعبة جدًا والله.. بس حاضر هحاول.
بصينا للعروسة اللي دخلت المطبخ علينا:شكلي حلو؟
قربت منها وانا ببوسها قبل ما اخرج للسفرة تاني:شكلك قمر موت.
مشيت وانا سامعة صوت ماما بيتدي شوية تعليمات لفرح هي كمان.. ماما لو الدنيا ممشيتش بالمسطرة خصوصًا في عزومة اي حد بيتعزم عندنا لاول مرة ف حياتنا بعد العزومة بتكون صعبة جدًا الحقيقة.. تهزيق ايفري وير.
بس وقفت مكاني بصدمة وانا برجع للمطبخ بعد كام ثانية من وقفتي وانا متنحة!
-ماما انتي قولتي ايه؟
عقدت حواجبها:ايه.. بقولها لما حماتها تيجي تقول…
قاطعتها:لالا مش لفت النظر ده قصدي على اللي قبلها.
-يحيى؟!
بصتلها بصدمة تاني:ايه جاب سيرة الواد ده بقى!
-ماهو جاي معاهم.
رديت بانفعال وانا باخد الطبق اللي في ايديها وبحطه على جنب:ليهه ليه جاي وليه معزوم وليه محدش قالي.
بصيت لفرح اللي كانت كاتمة ضحكتها وانا بكمل:ليه؟
رجعت بصيت لماما تاني وهي مضيقة عينيها بنظرة مباحث مرعبة:مش شايفة انك اوڤر شوية؟
بلعت ريقي واتعدلت:اقصد.. اقصد انه مش من العيلة ف ليه يعني هو اي رخامة وخلاص.
بصيت لفرح لما اتكلمت:بابا صمم انه يجي معاهم وأكد على عمو حسن مخصوص انه ميجيش الا بيحيى.
بصيت لماما:يعني ايه ميجيش الا بيحيى دي؟
اخدت الطبق واتكلمت وهي بتمشي من قدامي:واحد طول حياته عايش مع عمه بعد موت ابوه وامه حتى لو شغله في محافظة تانية هو مستقرش هو دايمًا بيروح ويجي على عمه ومراته واخواته.
بصيت لفرح بعد ما ماما خرجت وضربتها في ايديها:مقولتيليش ليه؟
-معرفتش الا العصر والله، ولما عرفت افتكرت انك عرفتي.
بصينا لبعض احنا الاتنين بتوتر لما لقينا جرس الباب بيرن وبابا رايح يفتحلهم وبيستقبلوهم هو وماما،
علميًا عمو حسن المفروض مخلف ولدين عمليًا بقى هما تلاتة.. من كتر ماهو مش بيفرق بينهم ولا هو ولا مراته عرفت لما كبرت ان يحيى يبقى ابن اخوه مش ابنه!
معداش وقت كبير وكان المغرب بيأذن، وبصراحة ياجماعة من بعد الاذان وخصوصًا بعد الفطار وانا في حرب نظرات مع ماما..
ما يا أمي اقسملك بالله انا ما فاهمة حاجة.
قربت من البلكونة بتعب وانا بهرب.. واقفة من ساعتها قدامي تلت ثواني ويغمى عليا.
وقفت بخضة لما لقيته جوه وعالطول لفيت علشان اخرج بس للاسف وقفني صوته.
-استني طيب خارجة ليه.
لفتله:ماكنتش اعرف انك هنا، مش عايزة اضايقك ان..
قاطعني وهو بيقدم كام خطوة لحد ما وقف قدامي:مظنش اني ممكن اضايق من وجودك حواليا ابدًا.
ابتسمت:ما يمكن علشان متعرفنيش كويس.. ده انا ازهق بلد.
ضحك:طب ما نتعرف، ده انا حتى نفسي.
-قصدك انك لما تتعرف عليا هتزهق مني؟
-انتي ليه بتنكدي عليا وانتي مش راضية حتى تبلي ريقي بقالك سنتين!
شاورت على نفسي:انا نكدية؟
رفع ايده الاتنين:انا مش قدك.
ضحكت وانا ببص ورايا:يالهوي نسيت ماما دي هتعلقني.
بصتله وانا برجع بضهري:انا لازم ارجع لماما مع..
قاطعني:انا عايز العزومة الجاية تكون بعد خطوبتنا احنا.
وقفت مكاني بخضة:ايه؟!
-عمي هيكلم ابوكي.. علشان مترجعيش تقولي اتفاجأت ومش عارف ايه وحوار ادوني وقتي يافرح اللي بقاله سنتين ده انا جبت اخري منه بصراحة.
-عمو حسن هيقول لبابا ايه؟
ضحك وهو بيتكلم قبل ما يخرج بره:هيقوله اننا هناخد منه بناته الاتنين ورمضان الجاي هنعزمه عندنا احنا.
فضلت واقفة مكاني بحاول استوعب لحد ما لقيت فرح داخلة الاوضة بحماس غير مبرر:عرفتي؟
-انا مش فاهمة حاجة!
بصينا لماما احنا الاتنين لما دخلت علينا الاوضة:هنفضل واقفين كده كتير.. استوعبي ياحبيبتي انتي وهي وانتو في المطبخ يلا عايزين دور شاي!
……….
#حواديت_رمضان🌙
#حكاوي_فيروزه💃