سكريبت دعوة جميلة من طفل (كامل) بقلم ولاء عمر
ــ عمو ممكن تسمّع لي علشان مش عارف احفظ وخايف الشيخ يز.عق لي؟
ــ تعالى مفيش مشاكل.
بدأت أقرأ السورةه حسيته متلغبط فقررت أقرأ كل آية واشرحها له:
ـ﴿يَعْلَمُ مَا فِي السَّمَاوَاتِ وَالْأَرْضِ وَيَعْلَمُ مَا تُسِرُّونَ وَمَا تُعْلِنُونَ ۚ وَاللَّهُ عَلِيمٌ بِذَاتِ الصُّدُورِ ﴾.
ــ يعني ربنا سبحانه وتعالى عارف كل حاجة، عارف كل في السماء وكل الكائنات اللي في السما زي الملايكة واللي بيحصل فيها واللي موجود وعارف اللي في الأرض وكل الكائنات اللي فيها وعالم إحنا بنعمل إيه، وعالم اللي في قلبنا واللي جوانا وعالم اللي بنقوله وهو عالم بما في الصدور يعني عارف اللي في قلبك وشايفه.
بص ليا باستغراب وقال بنبرة ظاهر فيها صدمته من الكلام اللي أنا مستغرب إنه إزاي ميعرفوش:
ــ يعني ربنا عارف كل حاجة
كل حاجة؟!
قولت بتأكيد:
ــ آه كل حاجة
كل حاجة.
ــ وعارف أنا بفكر في إيه ؟
ــ وعارف إيه اللي في قلبك من ناحية الناس وبتحبهم ولا بتكرههم.
كمل الولد كلامه وهو مستغرب وأنا بوضح له بكل هدوء وبحاول إن كلامي يكون سلس ومفهوم وبشرح له.
كان ولد صغير قاعد في المسجد يحفظ بعدما خلصنا صلاة الظهر ، لقاني قاعد فطلب مني اساعده في الحفظ علشان الشيخ ميزعقش ليه، كان بيواجه صعوبة في الحفظ فقررت أشرح له الآيات ومعناها حسب معرفتي ولعل وعسى الطريقة دي تخليه يحفظ أسرع .
ــ بعد الآية دي بتيجي وربنا بيقول فيها لسيدنا محمد صلى الله عليه وسلم يقول للكفار إنه﴿ أَلَمْ يَأْتِكُمْ نَبَأُ الَّذِينَ كَفَرُوا مِن قَبْلُ فَذَاقُوا وَبَالَ أَمْرِهِمْ وَلَهُمْ عَذَابٌ أَلِيمٌ﴾ .
يعني انتو متعرفوش أخبار الناس اللي كفرت قبلكم وجات عليهم نتيجة فعلهم لما كذبوا الرسل والأنبياء لما دعتهم لعبادة ربنا سبحانه وتعالى وحل عليهم عقاب شديد في الدنيا وبعده عقاب أشد في الآخرة نتيجة كدبهم وكفرهم.
حسيته مش فاهم فقولت أدي له مثال:
ــ يعني أقول لك، عارف قصة سيدنا نوح؟
هز برأسه كدلالة على عدم معرفته وقال:
ــ لاء.
ــ طيب قصة سيدنا ابراهيم.
نفس الهزة بتاعة الرأس.
ــ طيب سيدنا موسى.
كررها برضو.
قولت وأنا بحاول استوعب:
ــ أنت بجد مش عارف أي قصة من قصصهم؟؟
ــ آه.
ــ طيب إزاي بتحفظ القرآن يا حبيبي، يعني معداش عليكم اسم أي نبي منهم ؟
ــ خدت في المدرسة بس مش فاكر يا عمو.
يا حبيب عمو صعبت عليا والله، إزاي يكون عمرك تلتاشر سنة ومتعرفش قصة أي حد منهم، إزاي متعرفش حاجات المفروض كنا بنطلع وبنتربى عليهم.
ــ طيب والشيخ اللي بتحفظ معاه؟
ــ بيدينا السورة نحفظها وبس.
ــ يعني مش بيقول لكم حاجة تانية ولا بيشرح أي حاجة ؟
ــ بيدينا السورة وبس.
ــ طيب ومامتك وباباك فين؟
ــ بابا في الشغل وماما في البيت.
ــ محدش منهم بيقعد معاك ويحكي لك حاجة؟
ــ محدش منهم بيقعد معايا أصلاً يا عمو.
ــ بتقضي يومك إزاي ؟
بدأ يحسب يومه على إيده:
ــ بصحى من النوم، أغسل وشي، أفطر، لو يوم عندي مدرسة بروح المدرسة وأرجع أكل وأمسك الموبايل واسمع فيديوهات أو أروح ألعب.
قمة الاسى لما الأهل يجيبوا عيال ومحدش منهم يعرف عن دينه غير بسيط، محدش منهم بيقعد معاه ويوجهه أو يعرفه عن أي حاجة.
جه في بالي فكرة فقررت إني اطبقها وأنا بفتكر الحديث بتاع الرسول صلى الله عليه وسلم لما قال " إذا مات ابن آدم انقطع عمله إلا عن ثلاث... من ضمنهم كان .. علم ينتفع به..
ــ إيه رأيك تيجي هنا كل يوم بعد صلاة المغرب وكل يوم أحكي لك قصة حد من الأنبياء وبعد ما تخلص ليك هدية كبيرة عندي.
ــ بجد يا عمو؟
ــ أيوا يا سيدي و هات صحابك معاك كمان.
في محاولات مني إني أصلح حاجات المجتمع افسدها وبعد تلات شهور النهاردة سُهيل الطفل اللي كنت بشرح له معنى الآية عارف قصص الأنبياء ودخلنا على السيرة النبوية وبنعرفها إحنا الإتنين.
ومعانا كمان شوية من أصحابه اللي بقوا بييجوا علشان يسمعوا القصص.
ــ أنت نفسك في إيه سُهيل؟
ــ ما أنا قولت لك يا عمو، نفسي في كورة كڤر .
ــ مش أنا قولت لك إن ليك هدية ؟
ــ آه.
ــ طيب تعالى معايا.
خدته عند زاوية في المسجد جنب الباب، ميلت وجيبت له الكورة اللي نفسه فيها وكان قايل قبل كدا.
ــ ادي يا سيدي هديتك اهيه.
ــ عمو يارب تخش الجنة.
دعوة جميلة، من طفل ربنا وقعني في طريقه ووقعه في طريقي، مجرد طفل ولكنه بقى بمثابة ابن ليا، أتمنى أشوفه ولد صالح.
#ولاء_عمر
" اللهم أغفر للمسلمين والمسلمات الأحياء منهم والأموات."
تمت