رواية اوتار احد من السيف الفصل الثاني والثلاثون 32 والاخير بقلم زهرة الربيع
اوصاف التفتت وراها وكانو على طرف الجبل ونعيم حاول يبعد بس رجله انزلقت و اللي فياض خاف منه حصل وقع في المنحدر وشدها معاه
فياض صرخ اسم اوصاف وجري على المنحدر وقدر يمسك ايدها في اخر لحظه..... ووقع نعيم في القاع
فياض سحب اوصاف بسرعه وهيه بقت تبص لتحت بدموع وقالت بصدمه...نعيم ...نعيييم
وبقت تبكي جامد وفياض شدها ليه وقعد على الارض واتكأ على العربيه وهو مش قادر ياخد نفسه من الرعب للحظه افتكر انها خلاص وقعت معاه ومش هيلحقها
عند دياب كان رايح جاي بقلق وبيقول...استر يارب استر ....الغبي قولتله يستنى نروح وياه ...غبي كلمة غبي قليله عليه
عقبه قال بقلق...ممكن تهدى حبه عشان نفكر
دياب قال بقلق..نفكر في ايه احنا معارفيتش طريقهم كنا حصلناهم و....
بس قطع كلامه لما جاتله رساله من فياض مكتوب فيها...انا لحقت اوصاف خلاص ..واحنا بخير وجاين
عقبه جري على دياب وقال....ده هو
دياب قال بسعاده..الحمد لله يارب الحمد لله
غفران قالت بلهفه..ايه لحقها
دياب اتنهد وقال .....لحقها وجايين
عقبه ابتسم وبقى يحمد ربه بسعاده
في الوقت ده جيه هادم اللذات خطاب وقال بغضب...دياب تعالى وياي هنروح نشوف الغبي اللي اسمه نعيم خطف اوصاف
دياب بصله وغمض عنيه وهو بيحاول يتمالك اعصابه وقال....مرايحش مكان
ابوه داس على اسنانه بغضب وقال..انت ليه عقلك اصغير...قولتلك الف مره كل ده ليك ...اقولك عنك ما جيت...انا رايح لحالي
ولسه هيتحرك دياب قال بحزم..متتعبش روحك ...مهتستفادش بحاجه...وكل اللي خططتله وقع على الارض يا ابوي ...تعبت روحك على الفاضي
ابوه بصله باستغراب وقال...قصدك ايه
دياب قال ...قصدي خلاص مبقاش فيه زله ماسكها على حد عشان ينفذ اوامرك...اوصاف مهتمضيش على ارضها...لان اللي كانت خايفه عليهم بقم في امان ...فياض وياها ..وعمي وياي
ابوه بصله بدهشه وقال...وياك
بقلم...زهرة الربيع
دياب قال بحزم...اه وياي....بقى في عهدتي خلاص...انا كنت اقدر احميه من البدايه...بس اوصاف مقالتليش على اللي حاصله لانها عارفه انك لاوي دراعي بغفران واللي كنت عايز تحكيهولها...بس دلوك خلاص..غفران عرفت
ومسك ايدها ورفعها قدام ابوه وقال...مبقيتش تقدر تفرقنا ...ولو قربت لعمي هتلاقيني قدامه ...في وش سلاحك..ولو رايد تقتلني اعملها
خطاب بقى يبصله بذهول ودياب قال بسخريه وحسره....ايه متفاجأ ليه يا ابوي...ياما حذرتك من اليوم ده وقولتلك احنا مش محتاجين.....عيشتني في رعب ..خايف على البنيه اللي ربيتها على اديا وشلتها في قلبي ومتمنيتش غيرها وانت كنت عارف...ومع كده كنت كاسر ضهري وعيني بموضوعها...بس دلوك خلاص ...كل واحد عرف اللي ليه واللي عليه...وللاسف انت اللي خسرت يا خطاب بيه خسرت كل الناس وانا اولهم
قال كده وبص لغفران اللي كانت بتبصله بفخر واول مره يشوف النظره دي في عيونه نظرة فخر وامان واطمئنان كان بيتمناهم طول عمره ابتسم وقال...يلا نجيب عمي قاسم علشان نمشي من هنه
غفران هزت راسها بالموافقه ومشيت معاه وعقبه راح وراهم علشان يجيب قاسم معاه
خطاب فضل واقف بذهول وهو بيفكر في كلام دياب ..معاه حق هو خسر سلطته على اوصاف لان الشخص اللي كان هيهددها بيه بقى في امان...وخسر سلطته على غفران ومش هتوافق تتنازله عن الفلوس لانها عايزه تكمل مع دياب وكمان عايزه ترجع الفلوس لصاحبها..والاسوء انو خسر سلطته على دياب وبقى مضطر يتواجه معاه قبل ما يأذي غفران او ابوها فضل واقف بشرود ويأس ومش عارف يعمل ايه
عند فياض كان قاعد على الارض وهو بالعافيه بياخد نفسه من الخضه وغفران قاعده على الارض وبتبص للوادي وبتقول ببكا...نعيم....ااه....اااه يا نعيم ..هقول ايه لعمتي دلوك ...الله يسامحك يا نعيم... انا مسمحاك ..مسمحاك يا ود الناس
فياض بصلها بغيظ ووقف وشدها بغضب وقال...انتي عايزه تجيبي اجلي ...عايزه تنقطيني..عمال اقولك هتوقعي وانتي دايره تناكفي معاه..افرض كنتي وقعتي وياه كنت اعمل ايه انا ...وسايبه كل ده وعماله تبكي على الصرصار المنتن ده
اوصاف قالت ببكا...عمتي ...عمتي يا فياض
فياض اتنهد لما شاف حالتها وصدمتها وقال بهدوء...نصيبها كده يا اوصاف..وهيه يعني مكانتش متجوزه راجل عشان تزعل عليه
اوصاف قالت بانهيار...بس كانت ريداه..كانت ريداه مهتسامحنيش واصل
وبقت تبكي جامد وفياض شدها لحضنه بتردد وهو عارف ان ده غلط بس ضعف جدا قدام دموعها بقى يضمها ليه ويحاول يهديها وحس براحه وهيه بين اديه وقال...دي اقدار..وده يومه وساعته انتي ملكيش صالح ...بس بس استهدي بالله..باااس
اوصاف كانت بتبكي وبس في حضنه وفياض بلع ريقه وقال...اششش هدي هدي كل حاجه هتتنسي ...الا الحضن ده مهنساهوش واصل
اوصاف خدت بالها وحاولت تبعد بس مسبهاش وقال ...اششش بس متتحركيش الوقفه هنه بتخفف العذاب وتريح الاعصاب
اوصاف دفعته وبصتله بغيظ وقالت....جاك عصب سابع يا بعيد...ده وقت محن وقلة حيا
فياض ضحك وقال...الحق عليا اللي بساعد
اوصاف قالت بسرعه..لا يا اخوي ما تساعدش بارك الله فيك..يلا بينا نرجع عشان نشوف دياب حصل معاه ايه
وركبو العربيه وطلعو على اول الجبل
عند دياب كان في العربيه هو وعقبه وعمه
غفران قالت ...هما هيعرفو ازاي اننا مستنيينهم هنا
دياب قال...مفيش طريق غير دي للي جاي من بحري لازم هيعدو من هنه..انا حافظ المكان
غفران اتغاظت وقالت ...اه صوح حافظه...كنت نسيت
دياب كان عايز يضحك وقال....طيب ثواني يا جماعه هننزل دقيقه عايز اسأل غفران على حاجه...انزلي يا غفران عايزك
عفران اتفاجأت واتسعت عيونها بدهشه...وعقبه وقاسم ابتسموا فذاد كسوفها ونزلت بتوتر
دياب اول ما نزلوا مسك ايدها وبعد عن العربيه وغفران قالت بذهول...ليه نزلتنا كسفتني قوي ايه لزوم الحركات دي
دياب قرب منها وقال ..عايز اسمع اللي سمعته هناك ومقادرش استنى
غفران بلعت ريقها وقالت ....احم...هو...انا...انا...ما خلاص يا دياب قلتها مره كفياك عاد
دياب ضحك جامد وقال..هتتكلمي ولا اسألك قدامهم
قالت بسرعه وخوف و بدون اي تردد..بحبك...قولت بحبك...اوعى تقول حاجه قدامهم اموت فيها
دياب ضحك بسعاده وبص لعيونها وقال... عارفه يا بت كنت بحلم بالكلمه دي كل ليله...كانت احلام وعمري ما اتأملت انها ممكن تتحقق...بس للامانه مش وقت تتحقق هنه...الكلمه دي لو قولتيها واحنا في دارنا كانت هتفرق قوي...كنت ها..
غفران حطت ايدها على بقه وقالت بسرعه...دياب ابوي بيبص علينا ....كفاياك عاد وشي حساه اتحرق من الكسوف
دياب ابتسم وقال...وشك كيف القمر...ولما بتخجلي بيبقى كيف البدر ...بعشقك يا غفران...دايب يابت دايب
غفران ابتسمت وقلبها بيرقص من السعاده وتاهت في عيونه اللي بيلمعه بحبها بس قطع لحظتهم صوت فياض وهو بيقول...ايه اللي جايبكم هنه...دياب...ايه اللي حصل
دياب غمض عينه بغضب وغيظ وشدها من ايدها بقوه وراح بيها عندهم وقال...مفيش كنا مستنينكم...بس انا وغفران قلنا نتمشى حبه...عقبالك لما تتمشى وترحمني
فياض فهم قصده وضحك وبص لاوصاف وقال..ادعيلي ...حاكم انت دعاك للسما
عقبه ضحك وقال...يلا اركبو خوفتونا عليكم...اطلعوا وهنحكيلكم على الطريق
وعلى الطريق عقبه قال اللي حصل لفياض ...واوصاف قالتلهم ان نعيم مات
غفران قالت بحزن..البقاء لله يا اوصاف
اوصاف اتنهدت وقالت بتأثر شديد ...الله الباقي....الحمد لله اللي جات في نعيم ..خروف وفدانا
كلهم ضحكو مره واحده ودياب كان سايق وبيبص كل شويه على فياض وحمحم وقال....ليك عندي اعتذار يا عقبه..حقك علي ..كنت فاكر ان انت الي بعتهم
عقبه بصله باستغراب ولسه هيسال فياض قال بضيق...مش مقبول يا عقبه بعد ما فكرت اني ممكن اموتك وشكيت فيا
عقبه بصله بدهشه ولسه هيتكلم دياب قال..ميبقاش قلبك اسود يا عقبه ما انت كمان شكيت فيا قبل كده ولا ناسي
عقبه اننهد وفياض قال بسرعه....تفرق طبها يا عقبه بيه انا كنت...
بس عقبه قاطعه وقال..... بس انت وهو..هو ايه اللي عقبه عقبه..مش كفايه بهدلتو اللي جاب عقبه معاكم..اتكلمو زي الخلق...خلصنا هو شك فيك وانت كمان وخلصنا
دياب قال بضحك....كده يا فياض عصبت شيخنا ده العربيه ماشيه ببركته وانا اقول المطبات كترت ليه
فياض كمان ضحك وبصله بابتسامه ودياب كمان قال ..حقك عليا يا اخوي
فياض ابتسم وقال...وانت كمان حقك على راسي
غفران واوصاف مسكو ايد بعض بسعاده لانهم اتصالحوا
ومشيو بسعاده كلهم
اول ما وصلو نزلو عند بيت دياب ونزلو كلهم..و عقبه راح على بيت خالته علشان يرجع فاطمه وامها لبيتهم ودياب وغفران ومعاهم قاسم دخلو بيت دياب واوصاف لسه هتدخل عند دياب فياض مسك ايدها وقال رايحه فين انتي
اوصاف قالت....هبات يومين عند دياب لحد ما اجهز ورقي
فياض قال باستغراب..... ورقك ورق ايه
اوصاف اتنهدت وقالت...هسافر يا فياض قولتلك قبل كده
دياب قال بضيق..وقولتلك قبل كده مش هسيبك تسافري
اوصاف اتنهدت وقالت ...وهتمنعني باي صفه ان شاء الله
فياض قرب منها وقال....بصفتك مرتي...مرت فياض الناجي ..ايه رأيك تعجبك الصفه دي ...ولا مبقناش قد المقام
اوصاف ابتسمت بسعاده وداست على شفتها بكسوف وقالت..الصراحه فاجأتني ...كنت مستنيه تنطق قبل ما نقابل وجه كريم
فياض ضحك بخفه ومشى ايده على رقبته بحرج وقال...وه...هو انا مكشوف ولا ايه
اوصاف قالت بابتسامه ...مكشوف قويى...بس تقيل قوي قوي قوي يا ريس
فياض قرب جامد وقال...مش تقل وحياتك بس كنت متلخبط...معارفش الدنيا هتمشي كيف..بس دلوك مقدرش استغنى واصل....حبيتك يا بت الجبل ...حبييتك قوي
اوصاف بصتلو بحب شديد بيلمع في عيونها وصدمته لما زغردت جامد وفياض حاول يسكتها بس مسمعتلوش
طلعو دياب وغفران سوا وقالو بصوت واحد ....فيه ايه
اوصاف قالت بسعاده.....فيه فرح كمان ايام...... اجهزوا بقى
دياب ضحك جامد وقال...كنت عارف والله
وحضن فياض بحب وغفران حضنت اوصاف بسعاده بدون اي غل او غيره او زعل بينهم
ومرت الايام اتغير كل شيئ غفران رجعت الفلوس لقاسم ...ودياب اخدها هيا وعمه وبعد عن البلد كلها
عقبه اتجوز فاطمه وعاشو احلى ايام وعرفت قد ايه هو بيحبها طول عمره وكان بيساعدها في دراستها واول ما جيه معاد جامعتها اخدها وسافر اسيوط علشان تبقى جنب الجامعه
فياض اتجوز اوصاف وحفر الارض وطلع ورثها وباعه وعملها بيه وديعه في البنك لانه رفض تصرف منه ..اما هو بقى عمدة البلد لان خطاب تعب جدا في عدم وجود ابنه ...ودياب سافر ....فالناس رشحو فياض اول شخص لانه تربية العمده وبالفعل بقى عمدتهم ودي كانت الضربه القاضيه لخطاب لانه كان بيحلم باليوم اللي ابنه هيورث كل حاجه فيه واولها العموديه
بعد مرور سنه كامله في بيت جميل بيطل على البحر واقف دياب في البلكون ومعاه طفل رضيع بيبكي وقال بقلق عليه...غفران...غفراان
جات غفران وهيه بتمشي بتعب وقعدت على كرسي في البلكون وقالت...هاته يا دياب وبعدهالك عاد كل ما هيبكي هتناديني كده مهنخلصوش الناس زمانهم جايين
دياب ادهولها بقلق وقال...اول حاجه انا قولتلك ارتاحي انتي والده من اسبوع يعني لازم تريحي ...تاني حاجه مبقدرش اشوفه بيبكى افرض صوته تعبه
غفران ابتسمت وقالت ....يا حبيبي انا مبشتغلش انا يدوبك بوري الخدم الحاجات اللي معارفينش مكانها ...الناس اللي عازمينهم للسبوع كلها شويه ويوصلو...تاني حاجه متخافش عليه العيال في السن ده مبتبطلش بكا
دياب ابتسم وقعد قصادها وقال....ياستي اعتبريها حجه لجل اشوف امه ....ولا خلاص عشان اسبوع سي قاسم بيه نستينا
غفران مشت ايدها على دقنه وقالت ..انا اقدر انسى ابو قاسم نور عيني
دياب قال بحب..اووف يا وجع قلب ابو قاسم الايام دي
وقرب منها بس قالت بسرعه..دياب الناس بره وبعدين
دياب اتنهد بيأس وقال....هما هيمشو ميته
غفران ضحكت وقالت..... مش لما ياجو الاول
دياب لسه هيرد التليفون رن واتغيرت ملامحه للضيق وقال..ده ابوي
ورد وقال..ايوه يا ابوي
رد خطاب بصوت تعبان جدا واشبه بالبكا وقال..دياب...اتوحشتك قوي يا ولدي ..عامل ايه يا قلب ابوك
دياب قال بحزن..زين يا ابوي انا بخير......وانهارده سبوع قاسم ولدي
خطاب حس بسكين في صدره وقال...سميته قاسم...حلو الاسم يا ولدي ...ربنا يخليهولك ...طيب ربنا محننش قلبك على ابوك تعرفني مكانك يا دياب...عايز اطل عليك وعلى ولدك ...اتوحشتك يا دياب سنه كامله مشوفتكش يا ولدي حرام عليك
بقلم....زهرة الربيع
دياب لمعت عيونه بالدموع وقال...ملوش لزوم الكلام ده يا ابوي..ولو على قاسم هبعتلكم صوره وانا شايله تشوفه وتشوفني
خطاب نزلت دموعه وقال بضعف..انا راقد يا دياب..عيان يا ولدي ومفيش حد جنبي..حتى امك مش بتكلمني وبتقول اني انا السبب في مشيتك....قاعد لوحدي ومشتاق بس اقعد معاك زي زمان....ورب العز لو رجعت مهزعلك تاني واصل....ولا هسأل على اي حاجه تغور فلوس الدنيا بحالها...بس تبقى وياي....انا ادفع من عمري واضمك مره واحده يا ولدي
ومقدرش يتماسك اكتر وبقى يبكي بصوت مسموع
دياب نزلت دموعه لما سمع صوت بكاه وحاول يتماسك وقال...سامحني يا ابوي....مهقدرش... هبقى ابعتلك الصور.....مع السلامه
قال كده وقفل وهو في قمة الحزن بقى يمسح دموعه ويحاول يتماسك
غفران قالت بحزن....قوله على مكانك يا دياب...ولا روحله ..ده بردك ابوك
دياب اتنهد وقال...بعد اللي عمله وياك ..انتي بتقولي كده
غفران قالت ..انا ميهمنيش قد راحتك ...وعارفه قد ايه انت موجوع على زعله...روحله يا دياب
دياب اتنهد وقال...لو ايها نصيب الوشوش تتقابل هروح يا غفران ....ربنا يقسمها باذن الله
واتنهد وقال..مين مع العمال دلوك
غفران فهمت انه مش عايز يتكلم اكتر قالت ...ابوي وياهم ...روحله علشان انت عارف مش بيقدر يوقف على العكاز كتير
دياب هز راسه بالموافقه وخرج بقى يشرف على الخدم في التجهيزات مع قاسم اللي كان واقف على عكازه وبيحاول يساعده قد ما يقدر
بعد شويه كانوا كل المعازيم موجودين ودياب اتقدم بسعاده على عقبه اللي وصل كمان هو وفاطمه
عقبه حضنه بسعاده وقال..مبروك يا اخوي ربنا يجعله بار بيك وبأمه باذن الله
دياب قال بفرحه ..الله يباركلك يارب ...ويقوم الدكتوره بالسلامه
فاطمه ابتسمت بضيق وقالت...مبروك....عن اذنك يا عقبه هروح ابارك لغفران
ودخلت وسابتهم ودياب ضحك بخفه وقال...عدت سنه ومقدراش تنسى...مخها ناشف كيف اخوها
عقبه قال..فيه حاجات مبتتنسيش المشكله في مخك انت..ومتفكرنيش بالموضوع ده بدا ما الواد يتيتم في سابعه
دياب ضحك وقال..يا عم خلاص مكانتش غلطه....قولي حضرة العمده فين
عقبه قال بابتسامه.....كلمته قال جاي على الطريق بيس ماشين تاته تاته عشان اوصاف في شهورها الاخير..... شويه ويوصلوا باذن الله
دياب قال بابتسامه..يوصلوا بالسلامه..طمني عليك عاملين ايه في العيشه في اسيوط
عقبه قال الحمد لله ...واحلى حاجه المكان اللي اجرناه جار جامعة فاطمه...ربنا يكرمها وتخلص على خير ...المحاضرات صعبه ومحتاجه تركيذ والحمل قصادها تاعبها...كنت عايز نأجل الخلفه دلوك عشانها بس هيه موافقتش اصرت انها هتقدر توفق بين الاتنين
دياب ضحك وقال..مش بقولك كيف اخوها
وماله اخوها عاد
دي الجمله الي قالها فياض وهو داخل
ودياب جري عليه بفرحه وحضنه بقوه وفياض كمان كان مبسوط جدا جدا
وحضن عقبه وهو بيقول...اتوحشناك يا شيخنا والله
اوصاف قالت بسرعه...كفايه احضان لفهمكم غلط
دياب ضحك وضربها على دماغها بخفه وقال...كنت لسه هقول فين ام اربعه واربعين
وسلك عليها بسعاده ودخلو سوا البنات قعدو مع غفران اللي رحبت بيهم بحب ....والشباب كانو سوا
واوصاف اصرت على غفران تخطي حوالين الولد وبقت تدقله وتقول...اسمع كلام امك...متسمعش كلام ابوك...اسمع كلام خالتك اوصاف..ومتسمعش كلام ابوك....اسمع كلام عمك عقبه وعمك فياض..ومتسمعش كلام ابوك...بص متوجعش راسك اسمع لاي حد ماعدا دياب وقد اعذر من انذر
كلهم ضحكوا بسعاده ودياب قال لفياض ..والله مرتك كان فيها فيوز واحد وضرب
فياض قال بابتسامه...دي احلى حاجه في حياتي كلها
دياب قال بابتسامه....ربنا يخليكم لبعض...قولي عامل ايه في العموديه
فياض قال بسعاده..زين قوي وبفكر اترشح للدايره
عقبه قال بسعاده..ده احسن خبر
دياب قال..والله فعلا...ربنا يكتبلك خيرها ويكفيك شرها...والبلد عامله ايه
فياض اتنهد و قال .....زينه قوي وكل الامور تمام...مناويش ترجع يا دياب بدل ما انت لحالك هنه يا اخوي....لو خايف ابوك يرجع يضيق عليك صدقني مهيحصلش ده تعب واصل وبقى اغلب يومه في الدار مبيطلعش ...من بعد ما انت مشيت ومقدرش يلاقيك اتكسر قوي...وتعب اكتر لما الناس قالتله انه مبقاش قادر ...ولازم يشوفو عمده جديد...هو كان مستني اليوم ده علشان انت تبقى بداله مش انا يا دياب
دياب قال بحزن..انت قدها وقدود يا فياض...الناس هما اللي رشحوك واختاروك وانا متاكد انك هتسد....اما لو على ابوي انا مخايفش منيه...بس تعبت من وجع الراس ونفسي ارتاح مع مرتي وعيالي يا فياض ...كفايه كل الي عشته واللي حسيته
عقبه اتند وقال..بس ده ابوك بردك
دياب قال...هرجع..اكيد هرجع..... بس احس اني بقيت اقدر اعافر هناك وهرجع...انا صدقت ما ارتحت ...ولسوء حظي ان راحتي بعيد عن اهلي ..ده اللي واجعني
فياض لسه هيرد غفران نادت وقالت...تعالو خدو الحلو هيخلص منكم وانتو احرار
اوصاف قالت وهيه بتاكل...سيبيهم شكلهم شبعانين
فياض هز راسه بيأس وراحو سوا هما التلاته وكانو مبسوطين جدا بجمعتهم
عقبه وقف جنب فاطمه وحط ايده على بطنها بسعاده بحملها وهيه بقت تاكله في بقه وقال لها...بحبك
ابتسمت بحب واضح في عيونها وقالت...وانا بموت فيك....وبشكر ربنا عليك كل يوم ...ربنا يخليك ليا
عقبه ابتسم وهو بيحمد ربه على نعمته وتوفيقه وانه وصل للي كان بيتمناه
اما دياب كان شايل ابنه وغفران جنبه بتبوس في ابنها بفرحه وبتبص لدياب بسعاده وحب
دياب ابتسم وقال....واحده ليا بقى بغير يا بت
غفران ضحكت وقالت بغمز وجراه.....تخلص الليله بس وهعوضك
دياب ابتسم بحماس وقال...على خيرة الله نروح نمشيهم بقى
غفران ضحكت من قلبها وهزت راسها بيأس وقالت مفيش فايده فيك
اما فياض كان على زاويه هو واوصاف بصتله وقالت بحب...تفتكر هولد انا ولا فاطمه الاول
فياض قال...فاطمه في الخامس...انتي عديتي السابع اكيد هتولدي الاول...ولا عايزه تأجليه
اوصاف ضحكت وقالت....ده انا عايزه اولده انهارده قبل بكره....هجيب حته منك تونسني لما انت تغيب وعيون كيف عيونك اللي شوفتهم قبل ما اشوفك
فياض ابتسم بحب شديد وقال.....انا بقى عايز عيالي يورثوا عيونك انتي...العيون الدباحه دول الي قتلوني
اوصاف ابتسمت بحب وقالت ...ربنا يخليك ليا يا فياض ويديم جمعتنا على خير
فياض قال ..امين يارب ...وتقوميلي بالسلامه يا رزقي من السما ووش السعد عليا ❤️❤️❤️❤️❤️
#أوتار_أحد_من_السيف
#الحلقه_الاخيره
#بقلم_زهرة_الربيع
وخلصت روايتنا اللي عشناها بكل تفاصيلها.... ابطالنا قدروا يتخطوا المحن ويلاقوا السعاده مع نصيبهم اللي ربنا اختاره ليهم ...الا خطاب اتخطى قوته وجبروته وعايش في وجع قلب وبيتمنى لو يدفع كل الفلوس اللي كان بيجمعها بس يشوف ابنه تاني ويفرح بحفيده ...خسر كل شئ مره واحده وبقى وحيد بين اربع حيطان مجموعين من ماله اللي كان بينهبه من الكل
كنتم مع أوتار أحد من السيف بقلم زهرة الربيع اتمنى اعرف رأيكم فيها....واستودعكم الله على امل القاكم في رواية تانيه وابطال تانين قريبا باذن الله ..زهرتكم تحيكم ودمتم في امان الله مع من تحبون❤️❤️❤️
تمت