سكريبت الاصيل (كامل) بقلم امل عبدالرازق

سكريبت الاصيل (كامل) بقلم امل عبدالرازق 

ريهام: أنا مش عايزه اتجوز غير عيسى و يا أنا يا مراته، هاخده منها وهتكون هي في الشارع 

يسريه: متزعليش نفسك خالتك وعدتك انك هتكوني لعيسى وخلاص هانت، قومي يلا روحي الكوافير اعملي شعرك عشان انتِ عروسة 

ريهام: تفتكري الخطة دي ممكن تنجح يا ماما 

يسريه: هتنجح دا زغلول عامل شغل عالي اوي 

______

زهراء: بس انت من حقك تتجوز ويكون عندك ولاد يا عيسى 

عيسى: قولتلك اقفلي الموضوع دا بقى يا زهراء، أنا مش عايز من الدنيا غيرك انتِ بنتي وحبيبتي ومراتي وصاحبتي وكل دنيتي،  مش عايز غيرك يا زهراء 

زهراء: انت من حقك تكون اب، أنا قولتلك طلقني واتجوز وأنا راضية 

عيسى: اطلقك! أهون عليكي تبعدي عني، طب انتِ هتقدري تبعدي عني انا مش هقدر هعيش من بعدك يا روحي ازاي، لا انتِ عندك مشكلة ولا أنا خلاص بقى اللي ربنا كاتبه لينا هيكون، هنزل بقى اروح شغلي وبلاش نتكلم في الموضوع دا تاني، بحبك يا زهرتي 

زهراء: وأنا عمري ما اقدر اعيش من غيرك، أنا بقولك طلقني عشان مش هستحمل اشوفك مع واحدة تانيه غيري، انت حبيب أيامي وروحي يا عيسى، وفي نفس الوقت مش عايزه أظلمك معايا 

عيسى: انتِ لو بعدتي عني بتحكمي عليا بالتعاسة والحزن يا زهراء،  انا مش عايز غيرك 

زهراء: طب وهنعمل ايه في والدتك اللي في الرايحة والجايه بتقولي خلي عندك دم وابعدي عن ابني مكمل معاكي شفقة كفايه وخليكي حسيسة

عيسى: حقك عليا يا تاج راسي، أنا بحاول اتفاهم معاها وربنا يهديها، لازم اتحرك عشان هتأخر

زهراء: بقولك يا حبيبي حنين اختي هتيجي تقضي معانا اسبوع عشان بابا وماما رايحين يعملوا عمرة ومش هتعرف تقعد في البيت لوحدها 

عيسى: تنور يا قلبي والبيت بيتها

_______

دلال: مافيش صباح الخير يا ماما ولا انا مبقاش ليا لازمه خلاص والكلام الحلو ليها لواحدها 

عيسى: صباح الفل والياسمين يا ست الكل، عامله ايه يا ماما 

دلال: كويسة، بقولك جهز نفسك كدا عشان هنروح نزور خالتك النهارده 

عيسى: أنا مش فاضي عندي شغل كتير في الشركة والمدير قال إننا هنتأخر 

دلال: اتصرف وتعالى بدري انا خدت ميعاد من خالتك 

عيسى: خير يا ماما هي خالتي كويسة؟ 

دلال: اصل انت لو فضلت على الحال دا قلبي مش هيرضى عنك،  أنا عايزه افرح بولادك، زمان عاندتني واتجوزتها وكسرت كلمتي و اهي طلعت مبتخلفش، جه الوقت اللي تسمع فيه كلامي 

عيسى: أنا مش فاهم بردو، عرفتي بقى بقيت بخاف اجي عندك قبل ما امشي ليه يا ماما لأنك بتقولي نفس الكلام وأنا مبقتش قادر استحمل، أنا بحب مراتي ومش عايز غيرها ومبسوط ومرتاح معاها، اطمني عليا خالص وادعيلي اصل أنا وزهراء معندناش مشاكل تمنع الحمل ولسه العمر قدامنا وربنا يرزقنا 

دلال: ريهام بنت خالتك باقيه عليك وعايزاك ويا ضي عيني بترفض اي عريس يتقدملها على أمل انك تكون ليها بلاش تكسر بخاطرها 

عيسى: فارق معاكي ريهام والغلبانه اللي فوق دي نظامها ايه، دي بتتمنالك الرضا وحضرتك بتعامليها معاملة صعبة عيب ان حد يعاملها لخدم، سيبيني مبسوط يا ماما 

دلال: طب تعالى وصلني بس عشان نفسي اغير جو 

عيسى: حاضر ان شاء الله 

________

يسريه: الووو يا اختي بقى دا وعدك ليا يا دلال، هي دي زهراء اللي هتخلي ابنك يطلقها من تاني يوم وخلاص داخله في السنتين، بنتي هتبور جنبي ولا انتِ هنا

دلال: ما إحنا عملنا المستحيل وروحنا لزغلول يعملنا عمل يمنعها من الخلفة وقد كان وبردو الواد متمسك بيها، لازم نروح ليه تاني نخليه يعمل حاجه تبعد ابني عنها 

يسريه: نروح منروحش ليه، المهم تعالي بكرا وبلاش النهارده عشان ريهام راحت الكوافير وبتستعد لبكرا واتفقت مع المأذون، ويكون يوم الاجازة بتاع عيسى عشان ميلقيش حجة ، انتِ متأكده ان عيسى هيتحط قدام الأمر الواقع وهيوافق 

دلال: أنا هخليه يوافق متقلقيش، ابني مش هيكسرلي كلمة 

يسريه: وأنا بنتي متدخلش على درة يا دلال 

دلال: متقلقيش آخر الأسبوع هيكون رامي عليها اليمين ، واقولك حاجه هاتي المأذون بكرا والشهود وريهام وتعالوا عندي وكدا نبقى ضمنا ان عيسى هيكون موجود واهو افرس المحروسه اللي دايما فرساني

_______

في شقة زهراء وعيسى

حنين: انتِ هتفضلي خايبه كدا لحد امتى يا زهراء، الست القرشانة دي لازم توقفيلها ومتسكتيش على حقك، بطلي هطل بقى 

زهراء: هطل! ايه الكلمات دي يا حنين 

حنين: يعني دا اللي فارق معاكي، والسوسة اللي تحت دي نظامها إيه، بصراحة انتِ مستفزة، واحدة عايزه تبعدك عن حب حياتك وساكته ليها 

زهراء: حب حياتي إيه اللي يسمعك يقول اننا كنا بنحب في بعض قبل الخطوبة، لأ عيسى شافني لما جه يزور صاحبه اللي هو جارنا في العمارة وبعدها جه طلبني من أهلي، وبعدها اطمنت ليه واتحدى كل الصعاب عشان يجمعنا بيت واحد ويشهد ربنا إني حبيته حب مافيش بعده ولا قبله 

حنين: جواز صالونات يعني 

زهراء: اسمه زواج شرعي يا حنين، بيجي يشوفني ولو في قبول من الطرفين ربنا بيكرم وبييسر ويكون دا النصيب الحلو والحب الأحلى والمودة والرحمة اللي بتزين العلاقة 

حنين: عندك حق ربنا يرزقني ولو عندي واحدة زي اللي تحت مش هسكتلها، المهم هتعملي إيه معاها

زهراء: هعمل ايه يعني ربنا يهديها 

حنين: لو اتعرضتلك متسكتيش ليها ، ولا اقولك انا قاعده على قلبها لما اشوف ممكن تتجرأ وتعمل إيه، مش هتلاقي زهراء لأ هتشوف حنين 

زهراء: أنا مش عايزه مشاكل يا حنين و 

لسه زهراء هتكمل كلامها لقت حماتها فاتحه باب شقتها وداخله وبتقولها 

دلال: اي دا اتلم الشمل وهنعمل البيت ملجأ ، إحنا كان ناقصنا ام لسان كمان 

حنين: أهلا ازيك يا دودو وحشتيني أوي 

دلال: دودو لما ياكلك يا بعيده، إيه دودو دي هو انا بلعب معاكي في الشارع 

حنين: عرفتي منين انك دودو بس، دا أنا بدلعك بس انتي بتلقطيها بسرعة 

دلال: و انتي ياللي ما تتسمي جايبه البت دي هنا ليه هو احنا كنا ناقصين مش كفايه علينا انتي 

زهراء: اصل بابا وماما رايحين يعملوا عمرة وحنين 

حنين: انتِ بتبرري إيه يا زهراء، اولا أنا اسمي حنين يا دودو مش اللي ما تتسمى عيب على سنك واحدة أدي تقل منك وترد الغلط بالغلط، ثانيا يا قلبي أنا في شقة اختي لما اجي شقتك ابقي اسأليني أنا جايه ليه 

دلال: دا بيت ابني وبإشارة مني تكوني في الشارع 

حنين: وبيت اختي ويلا بقى عايزه اقعد مع وزتي شويه، وزغلول باعتلك السلام اصل صوتك كان عالي وسمعتك وانتِ بتتكلمي وأنا طالعة ، مش ساهلة انتِ بردو

دلال: زغلول مين دا اللي باعتلي السلام، وبعدين اختك أرض بور لا ليها حق في الشقة ولا غيره لأنها مش حاضنه 

زهراء: ربنا يسامحك يا ماما أنا مش بور بالعكس أنا معنديش اي مشاكل بس لسه مافيش نصيب 

دلال: اه من دموع التماسيح دي اللي بتضحكي بيها على ابني، هجوزه وهتشوفي وهترجعي لمكانك في الشارع وبكرا تقولي دلال قالت 

حنين: اوعي دمعة تنزل من عيونك يا زهراء، وربي ما حد هيكون في الشارع غيرك، أنا مش عايزه أقل منك لأنك أم عيسى المحترم المتربي اللي ربنا رحمه ومطلعش زيك، أنا ماسكه لساني عنك بالعافيه لو عايزاني اقول من زغلول هقول عادي، هغمض عيني وافتحها ومش عايزه ألمحك قدامي، و يا أنا يا انتِ بقى، هتشوفي هيحصل إيه 

زهراء: مين زغلول يا حنين 

حنين: إسألي دودو هي ادرى مني

دلال: حنين دمها خفيف مش طالعلها ليه يا زهراء، خمس دقايق والاقيكي تحت عشان نجهز لعزومة مهمة بكرا 

حنين: دمي خفيف زيك يا طنط، روحي شوفي اللي وراكي عشان زهراء مش فاضية 

زهراء: لأ أنا هاجي يا ماما ساعة وهكون وراكي 

_______

عيسى: وحشتيني يا زهرتي 

زهراء: انت كمان وحشتني اوي، هتخلص شغلك امتى 

عيسى: خلاص كلها ساعات وهجيلك 

زهراء: كنت رانن عايز حاجه 

عيسى: كنت عايز اسمع صوتك واطمن عليكي واشوف أمي عملت ايه النهارده، وعندي مفاجأه حلوة 

زهراء: تسلملي يا حبيبي، ماما كعادتها بتقول كلام يحسسني إني جبراك عليا ووجودي عبء و انت مكمل معايا شفقة مش أكتر، بالرغم إني معنديش أي مشكلة، بس أرجع واقول حقها أم ونفسها تشوف احفادها 

عيسى: أنا آسف بجد يا زهراء، خلاص هانت وشقتنا تخلص، جوزك مهندس ديكور شاطر وصمملك شقة ولا في الأحلام وبعد ما ننقل قريب من الشغل هبقى أجي انا أزور أمي واريحك من المشاكل 

زهراء: أنا مش عايزاك تبعد عنها، أنا بس نعيش كويسين من غير مشاكل ، وهرجع واقولك طلقني واتجوز أنا مش منعاك بس مقدرش أكون على زمتك 

عيسى: أنا رانن افرحك واقولك التأشيرة خلصت وكله تمام وهنروح نعمل عمرة آخر الأسبوع و انتِ بتقوليلي طلقني،  ماشي يا ستي متشكر 

زهراء: انت بتتكلم بجد يا عيسى 

عيسى: بجد يا قلب وروح عيسى، هنعمل عمرة زي ما بتتمني وانا بتمنى ونزور حبيبنا النبي صَلَّى الله عليه وسلم ونعيش أحلى ايام بجواره 

زهراء: يا رب يا عيسى، ربنا ما يحرمني منك ابدا، انا هقوم أجهز الشنط من دلوقتي، بحبك أوي 

_________

حنين: بقولك يا زهرة كنت عايزاكي في موضوع كدا لما تخلصي المكالمة بتاعتك 

زهراء: تعالي يا حبيبتي أنا خلصت 

حنين: حماتك مش هتجيبها لبر وعامله حوار مش سهل وعايزه افهمك اللي بيدور من وراكي، بصي أنا كنت بحسبك تحت والباب كان مفتوح ولسه هتكلم سمعتها بتكلم اللي اسمها يسريه وبتقولها كلام أنا لسه مش مستوعباه 

زهراء: خير يا حنين قلقتيني 

حنين: أنا هقولك كل حاجه 

_________

دلال: كويس انكم جيتوا بسرعة، كدا نعرف نخطط براحتنا، ومحدش يسمع بينا 

يسريه: جيبانا على ملى وشنا ليه يا دلال، وهو كان حد سمع بينا قبل كدا، مالك موطية صوتك كدا ليه 

دلال: البت اخت اللي متتسماش سمعتي وأنا بكلمك الصبح، وشكلها مش هتجيبها لبر، إحنا نعجل وكلمي المأذون جبيه وحلاوتها في سرعتها 

ريهام: إيه رأيك في شعري والميكب يا خالتو 

دلال: تحفة يا حبيبتي 

ريهام: عايزه ألبس في فستاني بس كمان شويه، هحطه في الأوضة اللي كان بينام فيها عيسى قبل ما يتجوزها، دا انا مش هسكتلها 

_______

زهراء: انتِ متأكده من الكلام دا يا حنين 

حنين: اهدي يا حبيبتي، دا اللي سمعته 

زهراء: بقى اللي مافيش في قلبها رحمة تعملي عمل عشان مخلفش، هان عليها ابنها اللي بيعيط لربنا عشان يرزقه بطفل وبتقولي أنا ارض بور ، كل دا عشان تجوزه لريهام اللي طمعانه فيه، كل دا عشان تثبت لنفسها انه تحت طوعها والكلمة كلمتها وتخليه يبعد عنها 

حنين: انا عايزاكي قوية عارفه انك مصدومة ودموعك غاليه عندي، أنا قولتلك عشان تعرفي اللي بيدور من وراكي وتفوقي وتعرفي تاخدي حقك وكفايه انتي سامحتي كتير، لازم توقف عند حدها، ولا هتسيبها تجوزه للبعبع قريبتها، دا أنا بخاف منها، بنت صاعبه ومسهوكة

زهراء: انسي زهراء القديمة، هتشوفي زهراء اللي هتاخد حقها وتكشف لعبتهم ، ماشي يا دلال انتي ويسريه 

حنين: متنسيش ريهام كمان 

زهراء: دي بالذات حبيبتي، قومي ننزل لحماتي أصلها وحشتني 

حنين: يا رب اشوفك قوية وواخده حقك قبل ما يفوت الأوان 

زهراء: قومي نعمل الغدا، وهتايلي البودرة بتاعة اللي بالي بالك من الصيدليه وروقي عليا بقى عشان حماتي بتحب اكلي الحاجه الوحيده إللي بتقبلها مني 

حنين: يا حلاوتك يا زهرة، طيران والصيدلية والعطار هيكونوا بين ايديكي 

زهراء: بقى تعملوا فيا كدا ، وأنا اللي مستحملة عشان عيسى وبقول يا بت عدي ومشي دنيتك واستحملت كتير وكنت بنام دموعي على خدي بسببكم، ماشي يا انا يا هما بقى ولازم عيسى يعرف كل حاجه 

_________

دلال : أنا عايزه البيت يلمع من النظافة، فهماني ولا اعيد 

زهراء: فهماكي يا حماتي ، هيلمع وهيكون جميل زي قلبك

دلال: وهي فين اختك الشملولة تيجي تساعدك 

زهراء: راحت مشوار وجايه 

دلال: قالتلك إيه بعد ما نزلت 

زهراء: ولا حاجه هي راحت تجيب حاجات ومقعدتش معايا لسه عشان تقولي حاجه 

دلال: طب كويس، انجزي عشان مافيش وقت، اعملي للغدا فراخ مشويه ولحمة ورقاق باللحمة وكفته و

زهراء : و إيه هو لسه في تاني، هو في مناسبة ولا ايه عشان كل دا 

دلال: أحلى مناسبه مستنياها بقالي سنين 

زهراء: طب جيبي شيف يطبخ عشان هطلع اجهز نفسي 

دلال: لأ أنا بحب نفسك في الأكل وبعدين مش لازم انتي في المناسبة مش داعينك 

حنين: أنا جيت يا زوزه وجبت الحاجات عشان الأكل

دلال: طلبات إيه دي اللي جبتيها 

حنين: وانتي مالك هو سيادتك اللي هتطبخي

ريهام: بقولك يا اسمك إيه خدي امسحيلي الهيلز بتاعي عايزاه يلمع لأني محتاجاه ضروري

حنين: كنتي شيفاني الشغاله اللي باباه اشترهالك، شيلي البتاع دا بدل ما تلاقيه فوق دماغك وامشي من قدامي 

ريهام: بجد كنت لازم اقول لداداي عليكي شغلك شغاله شاطرة، متعوضة بقى يا بيبي 

حنين: بتصعبي عليا اوي يا ريهام يلا ومن اعمالكم سُلط عليكم 

ريهام: مش فاهمه قصدك 

زهراء: مع الوقت هتفهمي كل حاجه، يلا أنا هدخل أعمل الأكل لأن زوجي على وصول 

ريهام: مش عارفه عيسى مستحملك إزاي أصلا 

هو يستاهل واحدة تشرف زيي بنت حسب ونسب وقمر كمان، مش واحدة زيك، طنط انا سيبت الفستان في اوضة اوسي هروح اجيب حاجات نقصاني بسرعة 

دلال: استني هاجي معاكي عشان أمك راحت مشوار 

حنين: الله يعينها مبتضيعش وقت اكيد راحت عند زغلل مش فاضيه يا عيني 

__________

حنين: ألوو يا أبيه عيسى انت فين 

عيسى: في الطريق ان شاء الله ساعة وهوصل 

حنين: طب ما تعمل مفاجأه لزهرة وتجيب ليها فستان حلو على زوقك وتفاجئها وتعزمها على العشا أصلها في مود غريب وحالها مش عاجبني 

عيسى: والله فكرة جميلة، أحلى فستان وأحلى مطعم وهناخدك معانا 

حنين: لأ أنا بحب اقعد مع طنط ماليش في خروجات المتزوجين بس بالله عليك تفرحها دي شافت كتير من الوالدة 

_______

زهراء: بترغي مع مين تعالي ساعديني 

حنين: أنا استغليت انهم برا وحطيت بودرة الهرش على الفستان وكل دولاب حماتك وانتي أكيد حطيتي المستكة والبودرة التانية مش عايزاهم يخرجوا من الحمام 

زهراء: تم يا فندم والمأذون وصل وخليته يمشي ولما شرحت ليه الوضع سريعا دعالي وقالي مش هرد على رناتهم 

حنين: حلو اوي، بقولك يا زهراء معاكي رقم يسريه 

زهراء: معايا بس ليه 

حنين: انتي عارفه إني بعرف اقلد الأصوات وبالذات صوت حماتك انا هرن عليها واوقعها في الكلام واعرف منها مكان زغلول واسحبها لحد ما تقول كل حاجه 

زهراء: يا سلام على افكارك القمر، يلا بسرعة مستنية ايه 

_________

عيسى: زهراء حبيبتي انتِ فين أنا جيت 

ريهام: اخيرًا جيت يا عيسى انا مستنياك من بدري،  كنت بتنادي عليا ليه 

عيسى: هو انتي اسمك زهراء وأنا مش واخد بالي 

ريهام: سوري فكرتك بتقول يا ريهام، البرفيوم بتاعك ريحته خطيرة 

زهراء: حمدا لله على سلامتك يا حبيبي

عيسى: الله يسلمك يا زهرتي، بقولك يا زهرة ابقي هاتي لريهام زي البرفيوم اللي انتي جيباهولي أصله عجبها زوقك أو قوليلها على اسمه، أنا متعجب هي شامته ازاي اصل انا طول اليوم برا والعرق سيد الموقف 

زهراء: حاضر يا حبيبي، لا انت ريحتك قمر ما شاء الله ، اطلع خد شاور وتعالى عشان تتغدى 

ريهام: هروح ألبس فستاني على ما تجهز يا ايسو 

عيسى: ما تيجي معايا يا زهراء جايبلك حاجه عايزك تشوفيها 

زهراء: حاضر يا بابا هحط الأكل واجي وراك على طول 

________

عيسى: مستحيل امي تعمل كدا ، ازاي تفكر تعمل فيا كدا ، دا أنا ابنها الوحيد، أنا مش مستوعب 

حنين: زي ما بقولك يا أبيه، أنا سجلت لخالتك وواجهت مامتك وسجلت كل اللي دار بينا من غير ما تعرف، كل كلامها استهزاء بزهراء وانك مستحيل تصدق فيها كدا وانها هتجوزك لريهام وتخليك تطلق زهراء، انت مش عارف هما ناويين على إيه، انا كنت مصدومة زيك 

عيسى: انا لازم اواجه ماما لازم اقولها كل اللي جوايا ازاي اهون عليها ازاي تفكر تعمل فيا كده انا ومراتي

زهراء: إهدى يا عيسى، إحنا كل يوم بنقرأ سورة البقرة والقرآن دايما في بيتنا وربنا حافظنا ان شاء الله، وما هم بضارين به من أحد إلا بإذن الله، لا تخش من أحد كان ما دام لهذا الكون رب.. لا يملك الضر والنفع إلا هو.. لن يصيبك شيء إلا بأمره ولو اجتمع أهل الأرض أجمعون.. فاطمئن.

تسمع عن الست اللي كانت راحت لسيدنا موسى عليه السلام تطلب منه يدعيلها 

عيسى : لأ مش متذكر 

زهراء: يقال ان في ست طلب طلبت منه يدعو لها وبالفعل دعى لها وربنا قال لسيدنا موسى عليه السلام إني كتبتها عقيم وربنا قدر لها ده فسيدنا موسى قال لها فرجعت وجيت له تاني فطلبت منه يدعي لها تاني فدعى لها مرة اخرى ربنا سبحانه وتعالى قال له اني كتبتها عقيم المهم الست دي بعد فتره من الزمن جات لسيدنا موسى وعلى يديها طفل فسيدنا موسى استغرب جدا وسألها مين ده قالت له هذا بني فسيدنا موسى سأل ربنا كيف يا رب وانت كتبتها عقيم فربنا عز وجل قال لسيدنا موسى كلما كتبتها عقيم دعتني بيا رحيم فسبقت رحمتي قدرتي

عيسى: يا رحيم احفظنا واحمينا وارزقنا بالذرية الصالحة 

زهراء: آمين يا رب،  انا مش متأكدة من صحة القصة بس سمعتها من مشايخ كتير زي الشيخ نبيل العوضي وغيرهم ولكن اللي متأكده منه ان ربنا رحمته وسعت كل شيء وهيرزقنا ادعي وانت على يقين بالاستجابة وحتى لو لم يتحقق مرادنا فهذه الدعوات في ميزان حسناتنا ورضينا بقضاء الله وقدره الحمد لله 

عيسى: لو أمي تشوف النعمة اللي معايا وتصفي قلبها هتحمد ربنا إنه اكرم ابنها بزوجة صالحة زيك، يلا اجهزي عشان ننزل نشوف هنعمل ايه 

__________

دلال: إلحقني يا عيسى جسمي بياكلني مش قادرة 

ريهام: خلصي يا ماما عايزه ادخل الحمام مش قادرة استحمل اكتر من كدا 

يسريه: اه يا جسمي اهرشيلي ضهري يا دلال 

دلال: أنا عايزه اللي يهرشلي أوعي دخليني الحمام 

عيسى: خير يا ماما في إيه مالكم 

دلال: كنا مستنين المأذون واتأخر علينا ومعرفش جرالنا إيه فجأة، شكل مراتك عملت لينا حاجه 

عيسى: خير مأذون ليه ناويه تتجوزي تاني ولا ايه 

دلال: اه يا جسمي مش قادره شوفلي دكتور يا ابني بسرعة 

عيسى: حاضر بس حبيت أقولك ان زغلول أنا بلغت عنه وهيجي الدكتور ومعاكم حنين هتطمني عليكم وأنا همشي ومش هتشوفي وشي تاني أنا ولا مراتي، معرفش إزاي أهون عليكي وقالبك يطاوعك، ليه يا ماما حرام أنا عملت ليكي إيه، عايزه تجوزيني واحدة مبحباش بالعافية واسيب اللي مرتاح معاها، دا بدل ما تحبي الخير ليا وتتمنيلي السعادة، كتر خيرك يا أمي انتي وخالتي آخر ناس كنت أتوقع انهم يفكروا حتى يعملوا كدا، اتمنى تكوني مرتاحه كدا يا ماما، اشوف وشك بخير 

دلال: حقك عليا يا ابني أرجوك متسبنيش أنا آسفة، مكنتش عايزاها تاخدك منك وكان نفسي تفضل تحت طوعي، حقكم عليا 

ريهام: إلحقيني يا ماما وقعت في الحمام والفستان باظ

يسريه: اوعي من قدامي عايزه ادخل مش قادره 

عيسى: شويه لما اهدى هرجع يا ماما على ما تفوقي من اللي عملتيه وتحاولي تتوبي وتصلحي غلطك، خلي بالك عليهم يا حنين 

حنين: متقلقش عليهم يا ابيه كلها كام ساعة وهيكونوا تمام 

زهراء: إلحقني يا عيسى بطني بتوجعني ودايخه

عيسى: مالك يا زهراء في ايه، يا زهراء ردي عليا 

______

عيسى: خير يا دكتوره مراتي مالها 

الدكتورة: المدام عندها هبوط حاد ومجهدة ملهاش الضغط دا لازم ترتاح عشان الجنين اللي في بطنها 

زهراء: جنين إيه مش فاهمه 

الدكتورة: انتِ حامل يا مدام زهراء في الشهر التالت، ازاي متعرفيش 

عيسى: بتهزري يا دكتور صح 

زهراء: أنا بجد حامل يا دكتور 

الدكتورة: ايوه حامل الف مبارك ليكم وما شاء الله الجنين صحته كويسه، اهم حاجه ترتاحي وتخلي بالك من نفسك،  في روحك جواكي مسؤولة منك 

عيسى: يا رب يا رحيم اشكرك على نعمك وفضلك، اللهم لك الحمد، انتِ حامل يا زهراء 

زهراء: أنا حامل يا عيسى وهنكون اب وام اخيرا بفضل الله، اللهم لك الحمد والشكر كما ينبغي لجلال وجهك وعظيم سلطانك، الحمد لله على منعه وعطائه ، كنت واثقة في ربنا اوي الحمد لله 

عيسى: الحمد لله ومبارك علينا يا قلبي،  بصي بقى أنا مش عايزك تتحركي أنا هشيلك للعربية، وإتأكدي إن أنا بحبك أوي يا زهرتي 

#تمت بفضل الله 

#الأصيل

للكاتبة #أمل_عبدالرازق

تمت