رواية سر تحت الجلباب الفصل السادس 6 بقلم سلوي عوض
#سلوي_عوض
#سر_تحت_الجلباب.
بارت 6
كريم:
والله يا أختي أنا كمان حاسس بكده، بس هيكون سر ايه اللي يخليها تشتغل خدامه وعند واحد زي العمده ضلالي وميعرفش ربنا، وكمان احنا مش محتاجين حاجه الحمدلله مستورين.
نورا:
ياله مسير المستخبي يبان، ربنا يستر.
ونتركهم ونذهب إلى منزل العمده، حيث نجد ناعسه قد صعدت إلى الدور المخصص لجليله.
ناعسه:
صباحك نادي يا ست العرايس.
جليله:
بتثاؤب… تعيشي يا ناعسه.
ناعسه:
الحليب اللي محلي بعسل النحل لست العرايس.
جليله:
هاتي، وياله روّجي الدور، عاوزاه بيبرج.
ناعسه:
بس كده من عيوني التنين.
لتزغرت ناعسه.
ناعسه:
لولي لولي.
جليله:
بضحك… بس يا وليه هتفضحينا.
ناعسه:
لازم البلد كلها تتعبي زغاريد عشان أجمل عروسه ف الدنيا.
جليله:
طاب ياله هنزل أنا وانتي، وضبي بس شهلي.
ناعسه:
حاضر يا ست العرايس، وكمان أنا عاوزه بعد إذنك يعني نعبو التلاجات فاكهه ولحم وطير وكل حاجه غير الحلويات.
جليله:
عافيه عليكي.
ناعسه:
وبعد إذنك برده هطلعلك طجم النوم بتاع العروسه يكون أخضر عشان سنتك تبجا خضره.
جليله:
حبيبتي انتي يا ناعسه.
ناعسه:
وانتي ستي وتاج راسي.
جليله:
ابجي خلي مكان ف الدولاب عشان هدوم العريس.
ناعسه:
عيوني للعريس.
لتتركها جليله وتنزل.
جليله:
أما اتصل على العريس عشان يشيع هدومه.
لتتصل جليله على زاهر.
زاهر:
عروستي الغاليه.
جليله:
صباحك زي الفل.
زاهر:
صباحك نادي.
جليله:
لمؤاخذه يعني، انته مش هتشيع خلجاتك عشان نرصوها ف الدولاب؟
زاهر:
حاضر يا جلبي، هشيعلك خلجاتي.
جليله:
وأنا هرصهم بعيوني.
زاهر:
تسلملي عيونك.
جليله:
انا مش مصدجه نفسي أن الجمر ده هيبجا جوزي.
زاهر:
ده انتي الجمر والشمس والنجوم كمان.
جليله:
بس بجا انا بستحي.
زاهر:
طاب اعملي حسابك أن في ناس اجانب هيحضرو فرحنا.
جليله:
اجانب؟ اجانب؟
زاهر:
انتي مستجليه بعريسك ولا ايه؟
جليله:
له انته كد الدنيا.
زاهر:
يعني مساءلتيش مين الأجانب دول؟
جليله:
مش انته جولت متساءليش على اي حاجه واصل.
زاهر:
انا كده بجا احبك جوي واحطك ف عيوني.
جليله:
طاب انا هجفل دلوك عشان هفطر.
زاهر:
عاوزك تتغذي وتاكلي كويس.
جليله:
حاضر.
ليغلق زاهر الهاتف مع جليله.
زاهر:
شلبي يا شلبي.
شلبي:
افندم يا معلم مصطفى.
زاهر:
عاوزك تلم كل خلجاتي الجديدة وتروح بيهم على بيت العمده، وجبل ما تروح عارف الواد اللي بيبيع ورد شكلاته.
شلبي:
اه عارفه الواد ابو جصه ده.
زاهر:
عافيه عليك، هتروح تشتري ورد منيه وشكلاته وتخليه يلفهم لفه زينه وتديهم للعروسه ف يدها.
شلبي:
تحت امرك يا معلمي.
ليدخل عليهم نظمي.
نظمي:
ربنا يتمملك على خير يا صاحبي.
زاهر:
تعيش يا اخوي، والله لاءخليك عمده النجع بدل العمده المدلدل ده.
نظمي:
بتتكلم جد؟
زاهر:
ومن ميته وانا بهزر؟
نظمي:
عمده؟ عمده؟
زاهر:
وسيد العمد كمان، ينفع بجا العمده يتجوز غازيه غجريه؟
نظمي:
له طبعًا عندك حج يا اخوي.
زاهر:
بجولك ايه، العمده اللي هنخله عنديه بت تانيه غير جليله بتتعلم ف مصر، ايه رءيك نجوزوهالك ويبجا الفرح فرحين؟
نظمي:
طاب والمتعلمه ديه هترضي بيا؟
زاهر:
انته بس جول اه وملكش صالح.
نظمي:
طاب كيف والفرح بكره وكمان هسكن بيها فين؟
زاهر:
يا عم بس انته وافج وانا هدبر كل حاجه.
نظمي:
موافج يا صاحبي.
زاهر:
طاب اجعد.
ليتصل زاهر على العمده.
زاهر:
عبدالغني.
عبدالغني:
مرحب بجوز بتي المعلم مصطفى.
زاهر:
مرحب بيك، بجولك عبدالغني.
عبدالغني:
جول.
زاهر:
مش انته عندك بت بتتعلم ف مصر؟
عبدالغني:
اه وجايه ف الطريج عشان تحضر الفرح.
زاهر:
زين جوي، طاب احنا هنجوزوها لأخوي نظمي.
عبدالغني:
يا ادي الهنا والسعد اللي انا فيه.
زاهر:
الدور اللي هتجوز فيه كام اوضه؟
عبدالغني:
ده ست اوض كبار وفيه اربع حمامات ومطبخين كبار جوي، وكل تلت اوض بمطبخهم وحماماتهم ليهم باب وحديهم.
زاهر:
والله متسهله جوي، خلاص انا هاخد جزء ونظمي جزء، ياله افرشو الدور كله ووضبوه.
عبدالغني:
الخدامين بيوضبوه.
لتدخل وهيبه.
وهيبه:
بتكلم مين يا عمده؟
عبدالغني:
ارجصي يا وليه، شاديه بتك جالها عريس الريس نظمي.
وهيبه:
بس شاديه بتتعلم!
عبدالغني:
مافيش علام، خلاص تتجوز زي اختها بلا شحططه فارغه.
وهيبه:
خلاص اللي تشوفه.
زاهر:
هيا بتك جدامها جد ايه على متاجي؟
عبدالغني:
جدامها يا جي ساعه كده.
زاهر:
خلاص واحنا جايين.
عبدالغني:
تنورو الدنيا كلها.
ليغلق زاهر الهاتف.
زاهر:
ياله يا عريس، حظك ف رجليك، عروستك جدامها ساعه وتوصل.
نظمي:
اياك على الله تظلع حلوه.
زاهر:
عيبك انك غبي.
نظمي:
ليه يعني؟
زاهر:
عشان شاديه ديه البلد كلها بتتحاكي بجمالها.
نظمي:
صح ده؟
زاهر:
هتشوف بعيونك.
نظمي:
طاب ومتجوزتهاش انته ليه؟
زاهر:
عشان شاديه طيبه وغلبانه مش هتنفع معاي، لكن جليله عجربه وهتسهلي كتير.
نظمي:
انا ماشي وراك مغمض اهو وعارف ان عمرك ما هتضرني.
زاهر:
يا واد انته اكتر من اخو وسند وضهر ليا ولازما تعرف انك شجيج روحي.
ليتحتضنه.
نظمي:
ربنا يخليك ليا يا اخوي.
ونتركهم ونذهب الي منزل العمده.
عبدالغني:
بجولك يا جليله، عريسك جاي.
جليله:
بفرحه… جاي بنفسه؟
عبدالغني:
اه، وكمان في حاجه عاوزك فيها.
جليله:
خير؟
عبدالغني:
اصل نظمي صاحب عريسك عاوز يتجوز شاديه خيتك وبصراحه انا جلجان لا حسن متوافجش.
جليله:
بغيظ… توافج والجزمه فوج رأسها، مش كفايه جاعده لحالها ف الغربه جال بتتعلم بلا جله حيا!
وهيبه:
انتي عارفه أننا شيعناها مصر عشان نفتحلك السكه، عشان كل العرسان كانو جايين ليها هيا بس اكمنها جميله.
جليله:
بغضب… ليه يا اختي هو حد جالك اني عفشه؟ بس جوللي يا أبا هما هيعيشو فين؟
ليدخل عرفه.
عرفه:
هما مين اللي هيعيشو فين؟
عبدالغني:
اصل المعلم مصطفي طلب يد خيتك شاديه للريس نظمي.
عرفه:
ديه هتحلو جوي جوي.
جليله:
مجولتش يا أبا، يعني هيسكنو فين؟
عبدالغني:
معاكم ف نفس الدور، هما هياخدو جزء وانتو جزء.
عرفه:
طاب وهنلحجو ده بكره الفرح.
عبدالغني:
العريس جاي ف الطريج وهنشوفو هيجول ايه.
جليله:
تعرف يا أبا مصطفي جاللي أن في اجانب هيحضرو الفرح.
عبدالغني:
اجانب مره واحده!
جليله:
وايه يعني، هو عريسي جليل ده جد الدنيا.
عبدالغني:
مش صوت شاديه ده؟
عرفه:
اه والله هو.
ليخرج عرفه لتقابل أخته.
عرفه:
حمدالله على سلامتك يا شاديه.
شاديه:
الله يسلمك يا اخوي، امال فين العروسه؟
عرفه:
ما انتي كمان عروسه.
شاديه:
والله شكلك رايج، وسع انا تعبانه من السفر.
عرفه:
مش مصدجه، طاب خشيلهم المندره وانتي تعرفي.
لتدخل شاديه.
وهيبه:
حمدالله على السلامه يا بتي.
عبدالغني:
بتي حبيبتي.
شاديه:
الله يسلمكم.
جليله:
من تحت الضرس… عامله ايه يا شاديه؟
شاديه:
الحمدلله يا اختي، الف مبروك يا عروستنا.
جليله:
طيب…
لتتحدث جليله مع نفسها.
جليله (مع نفسها):
طول عمرك اجمل مني ومتعلمه، انا خايفه مصطفي لو شافها تعجبه ويهملني، طول عمرها واخده حظي ف كل حاجه.
جليله:
ما انتي كمان عروسه، اصل نظمي اللي بيشتغل عند عريسي طلب يدك للجواز وابوكي وافج، وهتسكني معايا ف الدور الثاني.
شاديه:
كلام ايه ده؟
عبدالغني:
زي ما سمعتي من خيتك، هو طلبك وانا وافجت، ولا هتصغري ابوكي وسط الناس؟
شاديه:
له يا أبا عمري مصغرك ابدا، اللي حضرتك تشوفه صح اعمله، وانا من يدك دي ليدك دي.
وهنا يدخل عليهم زاهر ومعه نظمي.
عبدالغني:
يا مرحب يا مرحب بعرسان بناتي
جليله: سي مصطفي عريسي الغالي.
(تشاور على نظمي) وده عريسك يا شادبه.
نظمي: (ينظر لشاديه بدهشه ويتحدث مع نفسه) معجوله في واحده بالجمال ده كله والله ما مصدج عيوني، دي شبه الحوريات والله يا بختي بيها، لو اني عارف ان امي مكانش فيه ف جلبها رحمه كت جولت إنها داعيالي.
جليله: مالك يا عريس خيتي متنح كده ليه؟
زاهر: أصله مبهور بجمال عروسته.
جليله: بغل! يعني انا عفشه؟
زاهر: مين جال كده، انتي ف عيوني اجمل ست ف الدنيا كلها.
عبدالغني: متجعدو يا جماعه هتفضلو واجفين كده ميصحش.
زاهر: اجعد يا نظمي اجعد، ها يا عروسه عجبك العريس؟
شاديه: (بأدب شديد) اللي يشوفه ابوي.
زاهر: طيب احنا هنجيبولك شبكه زي شبكه جليله.
شاديه: كتر خيركم.
شلبي: انا جيبت الحاجه اللي حضرتك أمرت بيها.
زاهر: طاب هات، اتفضلي يا عروستي جليله، ايه ورد وشكلاته عشان تعيش وتجيبلي العمده. طاب كده احنا مش هنلحجو نوضبو للفرحين، النهارده التلات جدامك يومين يعني يوم الخميس هيبجا الفرح. جر ايه يا نظمي متتكلم ولا الجطه كلت لسانك؟
نظمي: هاه… له.
زاهر: طاب بعد اذن العمده خد عروستك وروحو اجعدو ف الجنينه عشان تتعرفو علي بعض.
(يوميء العمده برأسه موافقه، وتذهب شاديه مع نظمي ويجلسو علي أريكه في الحديقه)
نظمي: اسمعي يا بت الناس لو انتي مش رايداني جوللي.
شاديه: (بأدب شديد) شوف انا صح اتعلمت ودخلت الجامعه لكن عمري مجدر اكسر كلمه لابوي.
نظمي: يعني مافيش حد ف حياتك؟
شاديه: له طبعا، اعوذ بالله انا عمري معمل الحرام ابدا.
نظمي: طاب انتي يعني موافجه علي؟
شاديه: انا كل اللي يهمني انك تتجي ربنا في وتعاملني بما يرضي الله وانك تعاملني معامله الاسلام.
نظمي: اه طبعا اكيد.
شاديه: مادمت هتعاملني بما يرضي الله انا كمان هراعي ربنا فيك واحفظك ف وجودك وغيابك وهكون لك زوجه واخت وصاحبه.
نظمي: خير خير.
نقاوه: بت يا ونيسه انا خيطتلك التوب اللي هترجصي بيه.
ونيسه: له ماليش نفس ارجص النهارده.
نقاوه: انتي عاوزه تخربي بيتنا الله يهديكي.
ونيسه: جولت له يعني له تعبانه يا ناس حرام عليكم ولا عاوزيني انام.
نقاوه: ما هو لازم تتعبي عشان لا واكله ولا شاربه، مفلحاش غير بس تشربي عشره جهوه لما وشك اتصبغ وتحت عيونك سود بجي طينه كحله.
ونيسه: اعملي معروف همليني ف حالي، ولا اجولك هاتي تلافونك عشان اكلم نظمي واطمن عليه.
نقاوه: إن كان ده هيريحك خدي كلميه وانا هطلع اوجف برا عشان تتحدتي براحتك يمكن لما تكلميه تروجي.
(تتركها نقاوه وتتصل ونيسه)
نظمي: ايه ده نمره غريبه اشوف مين؟
شاديه: طاب تحب اهملك انا دلوك؟
نظمي: له خليكي.
ونيسه: فينك يا ضي عيني معلش تلافوني اضيع وبكلمك من نمره نجاوه.
نظمي: اه خير وبعدين؟
ونيسه: اتوحشتك جوي.
نظمي: طيب طيب.
ونيسه: طيب ايه، انته زمجان مني؟
نظمي: انا هتجوز يوم الخميس وهغير نمرتي ومتتصليش بيا تاني.
ونيسه: انته بتجول ايه؟ انا وناسه جلبك، انته نسيت اللي بينا؟
(يغلق نظمي الهاتف)
ونيسه: (تصرخ بأعلي صوتها).
نقاوه: مالك فيكي ايه؟
ونيسه: (ببكاء شديد) ن ن نظمي جطع علاجته بيا وهيتجوز!
نقاوه: براحه عشان افهم.
ونيسه: بجولك نظمي هملني وجطع علاجتنا وهيتجوز وجفل السكه ف وشي.
نقاوه: ميغور، يعني انتي كتي كسبانه منه ايه، بلا حب بلا جرف.
ونيسه: همليني وحدي معوزاش اشوف حد ولا اسمع حد.
نقاوه: يا بت بس هتموتي روحك يا حزينه خساره فيه دمعه.
ونيسه: اه يا جلبي جلبي واجعني جوي.
(تسقط ونيسه مغشيا عليها)
نقاوه: حد يلحجني يا ناس!
العم نجيب: خير يا بتي مالها ونيسه؟
نقاوه: مش عارفه سجطت مني مره واحده.
نجيب: طاب هاتي كوبايه وعبيها مايه.
نقاوه: حاضر.
نجيب: (يخرج زجاجه) ده زيت الزيزفون انشاء الله فيه الشفا، تعالي يا نجاوه اسنديها خليني اشربها.
نقاوه: نجيب بالشفا إنشاء الله.
ونيسه: (تفتح عينيها).
نقاوه: فتحت عيونها!
نجيب: طاب روحي اغليلها من الاعشاب دي وحليها وهاتيها وهمليني انا جاعد معاها.
نقاوه: طاب خلي بالك عليها.
نجيب: روحي يا نجاوه.
نجيب: جوليلي مالك فيكي ايه يا بتي؟
ونيسه: (ببكاء) الراجل اللي سلمته جلبي وحبيته هملني وجطع كل طريج بيني وبينه.
نجيب: والراجل ده منينا ولا غريب؟
ونيسه: له مش غجري زينا.
نجيب: طاب اسمعيني يا بتي احنا الغجر مكتوب علينا نهجو من بلد لبلد والناس كلها فاكرينا من غير جلوب وان بناتنا لاءي راجل بس مش ف الحلال يعني لحمهم رخيص.
ونيسه: طاب ليه يعمل فيا كده وانا حبيته من كل جلبي؟
نجيب: ما انا فهمتك يا بتي، صدجيني كله ضحك علي الدجون، الناس بيعاملونا علي أننا والعياذ بالله بنبيع لحم بناتنا للي يدفع، ده جدرنا ومكتوبنا.
ونيسه: والله لو جاللي نهربو كت ههرب معاه.
نجيب: مهما هربتي هتروحي فين من جدرك ده يا بتي ومسطر علي الجبين، هما ناس واحنا ناس، والناس دول بيجولو الغجر سراجين وبيسرجو الكحل من العين.
ونيسه: بس كلنا ولاد تسعه.
نجيب: ده عند اللي يفهم يا بتي، جومي شوفي حالك وشدي حيلك واصلبي طولك، محدش هينفعك غير صحتك ونفسك.
ونيسه: عندك حج، انا من دلوك وجاي مش هدور غير علي نفسي ومسيره ياجي اليوم اللي انتجم لنفسي منك يا نظمي.
نجيب: وعدنا ومكتوبنا نعيشو سواحين ف البلاد عايشين ف خيش ولا بيدارينا ف الشتا ولا بيحمينا من شمش الصيف.
ونيسه: بجولك ايه يا عم نجيب؟
نجيب: جوللي ناعسه.
ونيسه: انا بفكر اهج من هنا خالص.
نجيب: تهجي تروحي فين؟
ونيسه: اي مكان ميكونش فيه اللي غدر بيا وكسرلي جلبي.