رواية كل ده كان ليه (كاملة جميع الفصول) بقلم هند ايهاب
- خلاص يا هند
- خلاص أيه يا ليل!!
- مالهوش لزوم اللي بتعمليه ده
رفعت حواجبي وقُلت:
- أزاي يعني، هو أنا مش من حقي أبقى أُم!!
مسك أيدي وقعدني جمبه وقال:
- يا حبيبتي وربنا مش رايد، وأظُن أنا وأنتِ عارفين السبب
غمضت عيني وقُلت بغضب:
- أنا مش بجبرك تكمل معايّ يا ليل ولو أنتَ مش قادر تُصبُر تقدر تشوف حياتك
ابتسم بتوتُر وقال:
- أنا عايزك وهكمل معاكي حتي لو الموضوع متحلّش
طبطب على أيدي وقال:
- وياريت متقوليش كدا تاني
هزيت راسي وباس راسي ومشى.
بقالي سنتين متجوزه ومفيش خلفه، روحت لدُكتور وقال أن فيه مشاكل عندي، كتب لي على علاج عشان المشاكل دي تتحل، بس الموضوع طوّل، اللي مصبرني على الهم ده هو ليل.
ابتسمت على صبرهُ معايّ، واحد تاني كان مكملش معايّ دقيقه كمان.
فتحت دُرج الكومودينو أكتشفت أن العلاج خلص.
نفخت بضيق لأن ليل دايماً اللي بيشتري العلاج.
قومت لبست بسُرعه ونزلت لأقرب صيدليه.
ابتسمت وأنا داخله الصيدليه وقُلت:
- صباح الخير
ابتسمت لي وقالت:
- صباح النور
مديت لها أيدي بالعلبه الفاضيه وقُلت:
- كُنت عايزه أشتري علبه من العلاج ده
مسكت العلبه وبصت على الأسم وبعديها بصت لي وقالت:
- ثانيه واحده
ابتسمت وهزيت راسي، دخلت وبعديها طلعت ومعاها واحده شغاله معاها، قربوا منها وقالت:
- هو أنتِ عايزه العلاج ده لمين!!
ابتسمت بستغراب وقُلت وأنا بطلع الروشته وقُلت:
- الدُكتور كاتب لي على العلاج ده
- علاج أيه اللي يعمل عُقم!!
بصدمه قُلت:
- أيه!! عُقم!! أنتِ أيه اللي بتقوليه ده!! أنتِ واعيه لكلامك!!
بصوا لبعض وقالت:
- والله تقدري تروحي لأي صيدليه تانيه وهيقولوا نفس كلامي
خدت العلبه والروشته وروحت لصيدليه تانيه وقالوا فعلاً نفس الكلام.
روحت عيادة الدُكتور ودخلت عنده بعصبيه وزعيق وقالت:
- لو سمحتي مينفعش كدا
بصيت لها بعصبيه وبصت للدكتور وقالت:
- معرفتش أمنعها والله يا دُكتور
شاور لها عشان تطلع وقُلت بعصبيه:
- أنتَ أزاي تعمل فيّ كدا، أنا هوديك في ستين داهيه
بتوتُر قال:
- أنا معملتش حاجه
طلعت العلبه ورميتها في وشه ورميت كُل اللي على المكتب في الأرض وقُلت:
- سألت قالوا أنه ده بُرشام عُقم، أنتَ خساره فيك تكون دُكتور، أنتَ مش بني أدم، ولازم أوديك في داهيه
- مش أنا السبب، دكتور ليل هو السبب
ضحكت بعلو صوتي وقُلت:
- أنتَ تخرس خالص، ومتجيبش سيرت جوزي على لسانك، وأنا هطلع من هنا على القسم لأن اللي زيك ميستاهلش يكون في المكانه اللي أنتَ فيها دي
كُنت همشي بس وقفني وقال:
- لاء أستني، صدقيني ليل هو اللي خلاني أعمل كده، ليل هو اللي عنده مشاكل في الخلفه وخلاني أوهمك أن أنتِ اللي عندك مشاكل
بسخُريه قُلت:
- هو أنتَ عايزني أصدق كلامك الخايب ده!!
- ليكي حق متصدقيش، وعشان كده أنا مأمن نفسي، لأن كُنت عارف ومُتأكد أنك هتعرفي في يوم من الأيام
طلع تليفونه وفتح تسجيل صوّتي، وليل بيتفق معاه، وكُل الكلام اللي قاله كان صح.
بقيت ماشيه مصدومه، مش عارفه أعمل أيه، لحد ما وصلت البيت، لميت هدومي بسُرعه ومشيت.
أول ما شوفتها مكُنتش مصدق نفسي، كُنت حاسس أني بحلم، كُنت حاسس أني مش هشوفها تاني.
وبعد سنتين من العذاب أخيراً شوفتها، قومت وقفت وفضلت أتابعها بعيوني.
كانت ماشيه في عز البرد، الدُنيّ كانت بتمطر، كانت بتعيط وشايله شنطه كبيره.
مقدرتش أشوفها في الحاله دي وأقعُد ساكت، محسيتش بنفسي غير وأنا بجري عليها.
#أسميته_تميم
#هند_إيهاب_الحبال