رواية خطيب مؤقت (كاملة جميع الفصول) بقلم عمرو ليث
• أي إللي جايبك!
: جاية عشان نتعاتب وتصالحني
• أي البجاحة دي يبنتي هو أنتي إللي عايزة تتصالحي!
: أيوة
• مين إللي زعلان؟
: أنت
• وأنتي أي إللي مزعلك مني؟
: أنك زعلان
• يعني أنتي زعلانة مني عشان أنا زعلان منك؟
: ايوة
• ايوة في عينك اتقي الله
: بقولك أي أنا مبحبش الجو ده بيخنقني
• عاجبك ولا مش عاجبك!
وقفت قصادها ورديت عليها لقيتها أتخضت وبصتلي ..
: عاجبني خلاص أنت أخدت الموضوع بجد ليه حقك عليا عامةً أنا غلطانة
• حصل خير
: أطلبلنا حاجة لحد ما أروح الحمام وأرجع
• أيس كوفي ولا قهوة فرنساوي
: كوفي
كنت مرتاح أنا لحد ما جبت واحدة تطلع عيني، دايمًا بينصحوني أخطب وان أيام الخطوبة أحلى أيام، وأنا مشفتش يوم حلو كله نكد جتكم نيلة، راحت رحمة الحمام وطلبت أيس كوفي ليها وقهوة ليا، سمعت صوت تليفونها جالها إشعار، بصيت عليها لقيتها لسه مجتش، الفضول سرقني بصيت علىٰ التليفون لقيتها مسدج علىٰ الواتس فيها ..
• في مصلحة جديدة والراجل مستعجل عشان مسافر أي رأيك؟
إستغربت من محتوىٰ المسدج، مصلحة أي ومين الراجل ده، أستنيتها لحد ما جت وقعدت وسألتها ..
• رسالة أي دي؟
: أفتحي شوفيها
مسكت التليفون وفتحتها وفضلت باصة لتليفون وحسيتها أتوترت ووشها بدأت ملامحه تتغير ..
• ده دكتور وبيحتاج أدوية أجيبهاله بيبيعها عنده
: أدوية من المستسفى؟
• ايوة بيجيبها مشرف التمريض وأنا بوصلهاله
: وأنتي أي علاقتك ويكلمك ليه؟
• ماهو أنا إللي ببلغ المشرف
: رحمة
• أي يا محمد بتغير عليا حتىٰ من الشغل!
: أمال مالك أتوترتي واتخضيتي ليه
• متوترتش أسلوبك هو إللي خوفني
: لا عادي بسأل بس
• أنت مش واثق فيا ولا أي يا مودي؟
: مالهاش علاقة
• طب أشرب القهوة عشان نمشي وكفاية غيرة أي الدلع الماسخ ده
: ماشي
مشينا وأنا جوايا شعور غريب، حاسس أني متلغبط مش فاهم هي فعلاً إللي قالته صح ولا بتكذب، فضلت دماغي رايحة جاية لحد ما الزنانة ظهرتلي ..
• مش ناقصك
: مزعلاك صح قول أنها مزعلاك متخفش
• مش مزعلاني
: أمال مالك؟
• مش عارف حاسس أني متلغبط في شعور مش حلو من نحيتها
: شعور أي ده؟
• الشك
: اه يشكاك يا عديم الثقة
• هتتكلمي جد ولا تمشي!
: خلاص طب حصل أي؟
• في حد بعتلها مسدج بيقولها في مصلحة جديدة والراجل مستعجل عشان مسافر أي رأيك
: وأنا أقول رأيي ليه؟
• هو بيقولها كده في الآخر
: اه يعني هو بيقولها في مصلحة جديدة والراجل مستعجل عشان مسافر أي رأيك
• ماهو ده إللي قولتلهولك
: أنا افتكرتك بتقولي أنا أي رأيك
• وأنا هعمل أي برأيك أصلًا
: أمال بتحكيلي لييه
• عشان تسكتي
: طب ما ممكن أقولك رأيي فعلاً
بصيتلها بإستحقار ورجعت بصيت قدامي تاني ..
• أي بتبص بقرف ليه
: رأي أي إللي تقوليه يا نور في علاقة فيها شك
• قصدك عشان 19 سنة وكده يعني!
: ايوة يا نور
• طب ما تجرب
: سمعيني
• الشك ده يصحبي نوعين، الأول شك مبني علىٰ حقيقة واقيعية، والتاني مبني علىٰ غيرة
: لا اتكلمي عادي متتكلميش بمصطلحات
• يعني بتشك فيها عشان حصل حاجة تخليك تشك ولا بتشك عشان بتغير عليها؟
: عشان المسدج إللي شفتها
• طب وانت عشان تشيل الشعور ده محتاج تتأكد أنها مبتعملش حاجة غلط
: بالظبط
• أتكلم معاها وصارحها
: أنتي بتقولي أي؟
• أي إللي بقول أي بقولك أتكلم معاها يا محمد وقولها
: هقولها أنا شاكك فيكي يا رحمة ساعديني
• بالظبط
: نور بقولك أي يا تقولي كلام في محله يا تشوفي نفسك رايحة فين
• شايفة نفسي بذاكر
: طب روحي ذاكري يا دكتورة العيلة
• بتتريق حساك بتتريق يا بتاع حقوق أنت
: مالها حقوق يا سرنجة
• سرنجة دي بتتقال لبتوع تمريض يا أفندي
: روحي ربنا يهديكي
• بشد في شعري أنا ها بشد في شعري
يا ربي على العبث إللي أنا عايش فيه، عايش وسط عالم تعبانة، ربنا يهديهم، بس نور قالت حاجة لفتت إنتباهي أني أتكلم معاها، اه مبخبيش حاجة عليها بس مش لدرجة أني أقولها شاكك فيكي يعني، حاولت أرتب أفكاري كويس وقولت خلاص هروح أتكلم معاها في البيت عندهم بدل ما نتكلم في التليفون .
• خلاص همشي أنا يا ماما ولما ترجع قوليلها أني جيت
: خليك يمكن يكون الطريق زحمة هي أول مرة تتأخر بالشكل ده
• مأنا برن عليها تليفونها مشغول معرفش بتكلم حد ولا دي الشبكة
بعد مناوشات كتير مع دماغي أستسلمت وروحت لـ رحمة وعملتلها مفاجأة تلطف الدنيا ونتكلم مع بعض علىٰ رواقة، روحت ملقيتهاش في البيت رغم أنها في أجازة اليومين دول من الشغل، قعدت من الساعة 9 بليل لـ 12 مستنيها، ولحد ما جت بالسلامة ..
: كنتي فين!
• معلش أتاخرت واحدة صحبتي تعبت وكنت معاها في المستشفىٰ
: صحبتك مين دي وفين أهلها؟
• ملك صحبتي يا محمد مأنت عارفها
: طب كلميها
• ليه
: بقولك كلميها
طلعت التليفون بتاعها من الشنطة وبتبصلي ووشها بدأت ملامحه تتغير وأتوترت وبتتعلثم، رنت علىٰ ملك صحبتها وردت عليها ..
• ايوة يا ملك عاملة أي
: كويسة الحمدلله
• أخدتي العلاج؟
: ايوة أول ما وصلت أخدته معلش ياحبيبتي خليتك اتاخرتي
• ولا يهمك المهم أنك بخير
: أنا كويسة واه صحيح بعتلك الفلوس إللي دفعتيها في المستشفىٰ
• ليه طيب
: معلش ياحبيبتي بردو يمكن تحتاجي تجيبي حاجة
• ماشي هبقى أكلمك الصبح أتطمن عليكي
وقفلت مع صحبتها وحطت التليفون في الشنطة، وعيونها بدأت تدمع وشكلها هتعيط ..
: انا اسف حقيقي حقك عليا
• هتبطل إللي بتعمله أمته
: أعمل اي طيب بحبك وخايف عليكي
• مش بالشكل ده
: حاضر هحاول
• الوضع بقي يخنق يا محمد بجد
: أعمل أي يعني يا رحمة
• ممكن تمشي يا محمد بجد مش عايزة أتكلم
: همشي ونتكلم في وقت تاني
مشيت وأنا حاسس بالذنب تجاه رحمة، حاسس أني ظلمتها بعد إللي عملته معاها وشكيت فيها، بعد ما نزلت من عندها مشيت وأنا متضايق عشان زعلتها، مأنا مش عارف أعمل أي بغير عليها، تصرفاتها هي السبب، هحاول أصالحها بكره بطريقتي .
• عاجبك كده خليتيني أكذب
: معلش يا ملك بجد
• أنا أي ذنبي تحطيني في الموقف ده
: خلاص يا ملوكة كل ده عشان قولتلك تقولي أني كنت معاكي
• بس أنتي مكنتيش معايا ليه الكذب
: كذبة بيضة
• مفيش كذبة بيضة ولا كذبة سودة الكذب كذب يا رحمة
: خلاص طيب وبعدين أنتي بعتي فلوس بجد!
• ايوة عشان لو مقتنعش بكلامي يشوف الفلوس إللي بعتهالك عشان ميشكش كمان أننا متفقين
: أي دماغك دي بجد
• على الله بس تعملي بيه
: هعمل ياحبيبتي أردهالك يوم فرحك
• أبعتي الفلوس طيب
: هبعتلك الفلوس وعليهم بوسة كمان .
حمدت ربنا أن ملك أنقذتي المرة دي، مش عارفة الواحدة من غير صحابها كانت هتعمل أي والله، كنت عند الراجل بنتفق علىٰ المصلحة الجديدة، وهو مستعجل عشان مسافر كمان يومين، خلصنا الورق باقي بس أظبط الدنيا عشان محدش يحس بحاجة .
• مش عارف حاسس أن في حاجة مش طبيعية
: طب والحقيقة أي؟
• حاسس أني ظالمها
: وأحساسك عكس إللي شايفه؟
• حاسس أنها مخبية حاجة وفي نفس الوقت بيظهر عكس كده، ولكن تصرفاتها غريبة هي إللي مخلياني أشك فيها
: طب ودي قلة ثقة ولا غيرة زيادة؟
• هو أنا بغير عليها لكن تصرفاتها هي إللي مخلياني أشك فيها بالشكل ده
: أمشي ورا إحساسك لأنه غالبًا صح، ولكن حاول متخلطش الأمور ببعضها، خليك حريص
• حاضر
قعدت مع أمي اتكلمت معاها شوية وحسيت أني ارتحت أكتر لما اتكلمنا، مش عارف هل أنا فعلاً ظالمها وبغير عليها بزيادة، ولا هي إللي مخبية حاجة ومش عايزاني أعرف، ولكن زي ما قالت أمي خليني حريص لحد ما أشوف هيحصل أي .
• أي يا بتاع حقوق أنت
: عايزة أي؟
• عايزة اسألك سؤال مهم جدًا ومحيرني
: إتفضلي
• أنت إزاي خريج حقوق وشغال في بنك؟
: واسطة
• وحياة أبوك شوفلي الواسطة دي أنا كمان
: أنتي مش ملاحظة أنك قاعدة عندنا كتير ورايحة جاية
• بيت عمي وأنا حرة مش كده يا عمتوووا
ولقيت أمي بترد عليها وهي بتتفرج علىٰ المسلسل ..
: كده يقلب عمتوو البيت بيتك ياحبيبتي
بصيتلهم هما الاتنين ومش مستغرب من التطبيل بتاعهم لبعض لأن دي طبيعة الستات عمومًا، بيحبوا يطبلوا مع بعض .
• طب ما ترقص يلا
: أي!
• مأحنا هنطبل وأنت ترقص
: طب غوري
سبتهم ودخلت أوضتي مسكت التليفون بتاعي وفتحت الشات بتاعي أنا ورحمة، وافتكرت أول مرة اتكلمنا فيها لما جتلي البنك وكانت عندها مشكلة وحليتهاله، وساعتها هي طلبت رقمي عشان تتأكد أن المشكلة لو متحلتش ترن عليا، وفعلًا كلمتني بعد ما مشكلة الابلكيشن بتاع البنك اتحلت وشكرتني، والكلام جاب بعضه لحد ما خطبتها، أسلوبها كان راقي وجذاب جدًا، كانت دايمًا بتحاول تلفت إنتباهي ليها، عندها ذوق رهيب جدًا في الهدوم والالوان والتنسيق، ومدمنة قهوة زيي عشان بتشتغل ممرضة في مستشفىٰ خاص، وأتخطبنا بعد ما حبيتها .
• أنتي بيكون عندك وقت لكل إزاي بجد يا رحمة
: مستمتعة
• طب مش حرام؟
: اتعودت يا ملك أعمل أي وبعدين ماهو كله بالورق
• حتىٰ بردو يا رحمة مينفعش
: مش ده الوقت إللي يتقال فيه ينفع ولا مينفعش
• طب وخطيبك؟
: ماهو من ضمن الترتيبات
• حتىٰ ده؟
: سيباه للآخر
• اه بتضمني
: أمال طبعًا مينفعش أرمي الورق كله على التربيزة لازم اسيب ورقة أضمن اللعبة بيها
• وأنتي مبسوطة كده يعني؟
: جدًا
• ربنا يهديكي
حاولت أنصحها تبطل إللي بتعمله ده عشان غلط وحرام وهي بردو مصرة عليه، عندها حق مبقاش ينفع يتقالها ينفع ومينفعش لأن الوقت عدىٰ وهي خلاص اتعودت، واللي أتعود علىٰ حاجة مبيقدرش يبعد عنها بسهولة .
• عايز أراقب الواتس بتاعها
: بسيطة خالص
• إزاي!
: هات رقمها كده
أديتها الرقم وفتحت تليفونها، فضلت تلعب بيه خمس دقايق وبعدين ..
• بعتلك مسدج أفتح اللينك هتلاقيه أشتغل
: إزاي؟
• ده واتس ويب تقدر تفتحه في أكتر من تليفون بنفس الرقم
: لا مش فاهم!
• أنا كان ليا تجربة مع الهكر وكده عشان صحابي البنات، اتعلمت منهم حاجة بسيطة زي أقفل حساب فيس أو واتس أو اخترق وكده الحاجات البسيطة دي
: يعني الواتس بتاعها بقي معايا
• ومعايا
: ليه!
• ماهو البرنامج عندي يذكي إللي مخترقين بيه الرقم وعملتلك أنت ربط جهة تالتة
: فهمت ماشي
فتحتلي نور الواتس بتاع رحمة عشان أعرف بتكلم مين، فتحت اللينك وفعلًا اشتغل معايا الواتس بتاعها، ولكن الغريب أني ملقتش أي شات بينها وبين حد، الواتس كان فاضي خالص، بعت لنفسي مسدج وصلتلي منها فعلاً، ولكن الشات كان ممسوح، كلمت نور تاني تجيلي تشوف الحوار ده .
• عادي يبني يمكن هي مش عاملة نسخ إحتياطي لشاتات بتاعتها
: إزاي!
• يعني ممكن تكون مش رابطة الواتس بتاعها ببريد إلكتروني فـ طبيعي الشاتات متجيش تاني
: طب وانا هعرف منين إذا كانت بتكلم حد ولا لا
• أكيد هيبعتلها تاني يعني
أتطمنت بعد كلام نور وهي سابتني ومشيت، وأنا فضلت أدعي أن إللي في بالي يطلع غلط ومتكونش بتعمل حاجة من ورايا والشك يكون مجرد غيرة زيادة بس، نمت عشان كنت جاي من الشغل تعبان ومحستش بنفسي .
• إزاي بكره ومبلغتنيش قبلها ليه؟
: الراجل لسه قايلي دلوقتي أعمل أي
• طب أنا المفروض أعمل أي دلوقتي ولا اقولهم أي
: قوليلهم أنهم محتاجينك ضروري في المستشفىٰ وهتباتي هناك عشان عندهم عجز
• طيب هتصرف
مش عارفة أي العبط ده كنا متفقين أنه يبلغني قبلها عشان أجهز نفسي وأعرف هقول أي، كلمت أمي وقولتلها، أعترضت في الأول وبعدين وافقت بعد ما قولتلها ..
• إزاي يعني محتاجين حد يساعدهم عشان ضغط العيانين ومروحش، لو مش عشانهم يبقىٰ عشان الناس التعبانة ناخد ثواب عشان خاطر ربنا، إنما لو علىٰ المشرفين يولعوا
: ماشي عشان خاطر ربنا والناس التعبانة بس
عرفت اكروتها في كلمتين ووافقت أني أروح، كنت جهزت شنطة بسيطة حطيت فيها الهدوم بتاعتي، وكنت قاعدة مستنية العربية إللي هتيجي تاخدني .
• محمد فين يا عمتو!
: نايم جوه
دخلت فتحت الباب لقيته نايم، صحيته بصوووت عالي عشان يصحى بسرعة ..
• في أي حرام علىٰ إللي خلفوكي
: الحق شوف بسرعة فووق
• أي إللي حصل
فضلت أمسح في عيوني من كتر مأنا مش شايف أي حاجة وحاسس أن كل حاجة ضباب حواليا، صاحي مفزوع علىٰ صوت العبيطة دي ..
• ده النهاردة!
: ايوة
• هتعمل أي؟
سبتها قومت أخدت دش بسرعة عشان افوق الساعة كانت أربعة العصر، ونزلت ركبت العربية لقيت نور بتفتح الباب وبتدخل ..
• رايحة فين؟
: رجلي علىٰ رجلك
• انزلي يا نور مش ناقصك
: مش هنزل مش هسيبك لوحدك
أضطريت أخدها ومشيت بالعربية علىٰ العنوان إللي هتقابل فيه رحمة الراجل إللي هيتفقوا فيه علىٰ المصلحة إللي أنا لسه مش عارف أي هي لحد دلوقتي، وصلنا عند الفندق كانت الساعة 7 بليل، كنت واقف من بعيد مستنيها تظهر، لحد ما وقفت عربية ونزلت منها واحدة لابسة هدوم إللي ظاهر منها أكتر من إللي مغطياه، عرفتها من قفاها ومشيتها، نزلت وراها وأنا كنت لابس لبس مش هتعرفني بيه وكنت لابس كاب، لقيتها أول ما دخلت واحد كان مستنيها أستقبلها وباسها من ايديها وراح بيها علىٰ موظف الريسبشن، وقفت جمبهم لحد ما خلصوا واخدوا مفتاح الاوضة وطلعوا مع بعض .
• أي إللي حصل ولا عملت أي؟
: رحمة
• مالها
: طلعت متجوزة
يتبع ..
الجزء الاول " خطيب مؤقت "
لـ عمرو خالد لـيث
#الكاتب_ليث